1 Elchang e tiaikid a ulebongel er ngak el Nephi el lomlaoch lekor kemiu el betik er a renguk lodam er ngak. Ng sebechek lelmuches a di mekesai el tekoi el kudengel kmo ngmo duubech er a ngar medad, e dirrek el di mekesai er a tekingel a ochellek er a Jakob a sebechek lelmuches.

2 Me chelcha ikel bla kluches a ungiang er ngak, ng di ngar ngii a mekesai el tekoi el kirek el melkoi el kirel osisecheklel a Kristo; me chelchang ea kmo melkoi el bleketakl lekor kemiu, loltirakl er a bleketakl teletelel sel kulekoi a ulaoch.

3 A delbengek a soal a blektakl: le tiaikid a teletelel a Rubak el Dios a loruul a urelel mo er a re ngelkel a chad. Le Rubak el Dios a omeskid a llomes er a klemedengei; meng melkoi el mo er a re chad a tekoi er a blurir me temo medengei.

4 Me chelechang eng soak a omlatk a ikel kullekoi er kemiu el kirel ngikei el profet lulechotii er ngak a Rubak, el mo melecholb er a Sib er a Dios el mo melubet a kngtil a beluulechad.

5 Me chelcha lsekum a Sib er a Rubak el chedaol, a mo metecholb el moltirakl er a llemalt, e kid el diak de chedaol a lmuut el kmal kired el mo metecholb, oi el mo er a ralm!

6 Chelechang soak loker re kemiu el betik er a renguk lodam er ngak, ngerael llemalt a blo lotireklii a Sib er a Dios a bol metecholb er a ralm?

7 Ngdiak modengel kmo ngii a mle Chedaol? Meng mle Chedaol, endi ngulechotii el mo er a re chad el kmo, ng ngiluu a bedengel er a tech el lochotii a klengariou er reng el mo er a Edam, e ulochotii el mo er a Edam el kmo, ng mo chorrenges a tekingel e oltirakl a llechul.

8 Me chelcha bocha le merek el metecholb er a ralm, ea Edaol Reng a mle metengel mer bebul el oba teletelel a belochel.

9 Tiang a liluut lochotii el mo er a re chad a lemeltel a rael me a chibutek el tuangel, el kirir el mo soiseb er ngii, el Ngii a mla chotii a teletael el mo er tir.

10 Meng dilu ra rengalk el chad el kmo: moltirakl er ngak. Me chelechang e betik er a renguk lodam er ngak, ng sebeched el moltirakl er a Jesus, e lak el soad el moltirakl a llechul a Edam?

11 Me a Edam a dilung el kmo: Bo mo uuchel a rengmiu er a kngtmiu, e bo metecholb er a ngeklel a betik er a renguk el ngelkek.

12 Me a ngerel a ngelkel er sei er a lemei er ngak eng kmo: ngikel mo metecholb er a ngklek, a Edam a mo msang a Edaol Reng el di uai ngak, me bo moltirakl er ngak e moruul a ikel mulsekak el meruul.

13 Me chelcha betik er a renguk lodam er ngak, ak medengel kmo, alsekum ko moltirakl er a Ngelkel Sechal, loba blakelreng, el diak el kakrous a ikrel me a chelsel a rengemiu, e lak moruul a blulak er medal a Dios, e meral mo somiu el mo mekngit a rengmiu er a kngtemiu, me ko mochotii el mo er a Edam el kmo, ng somiu el mo oungakl er a ngklel a Kristo lokiu a techolb, oi me kemo oltirakl er a Rubak el Ngii oseblem el mo metengel mo er a chelsel a ralm, loltirakl a tikingel, sei kid e kau a monguu a Edaol Reng; e ngii a merku techolb er a ngau me a Edaol Reng; e ngii a mochu sebechem el melkoi el uaia re anghel, loldiu odanges el mo er a Ditang el Edaol er a Israel.

14 Me kamomes e betik er a renguk lodam er ngak, a ngerel a Ngelkel Sechal a mler ngak el kmo: Sel bla bo le mekngit a rengum er a kngtim, e mochotii el mo er a Edam el kmo kau a ngar ngii er a rengum a mo oltirakl a llechuk, lokiu a techolb er a ralm, e mla nguu a techolb er a ngau me a Edaol Reng, meng mla mo sebechem el melkoi loba beches el ngor, oi e dirrek el melkoi a tekingir er a re anghel, ea uriul er tiang e kau a kmo, ng diak modengelkak, eng bai ungil a le mlak bo modengelkak.

15 Me a krirngesii a ngerel a Edam el kmo: Oi, a tekingel a betik er a renguk a klemerang e diak le mengodech. Ngikei el moutekangel mo er a ulebongel a mo suobel.

16 Elechae betik er a renguk lodam er ngak, ak medengelii tiang el kmo, alsekum a chad a diak bo loutekangel mo er a ulebongel, loltirakl omrellel a Ngelkel a ngar el Dios, eng diak el sebechel mo suobel.

17 Me bo moruul a ikel tekoi el bla kdu er kemiu el kmo, ak mla mesang a Rubak er kemiu e osebliu a mo meruul, le tiaikid a uchul eng mlo mocholt er ngak meng mo sebechiu el mo medengelii a siseball el bom siseb er ngii. Le sel siseball el bom siseb er ngii a ouuchel reng el kirel a klengit, me a techolb er a ralm; e ngii a mochu mengubet a kentemiu, er a ngau me a Edaol Reng.

18 E sei kid e kau a mla soiseb er a melemalt e chibutek el rael, el ngii a merael mo er a diak a ulebengelel klengar; oi kemla soiseb er a tuangel, kemla otirakl a llechul a Edam me a Ngalk, me kau a mla nguu a Edaol Reng, el sioning er a Edam me a ngalk, el mo lomolem a telbiil me a ikel le dilul kmo ke mongmai chobom siseb er a rael – chobo mngai.

19 Me chelechang e betik er a renguk lodam er ngak, e ke mla soiseb er a melmalt e chibutek el rael; Ng soak loker el kmo ngmla moungil a rokui, ngdiak; ele ng dimlak komei er cho uaitiang a le mlak a tekingel a Kristo me a mesisiich el klaumerang er kau el mo er ngii, meng di mlo ultuir re ngii el ngarngii a klisiichel lolsobel.

20 Misei a uchul eng kiriu el loutekangel di merael mo ruchei el mla tibir a rengum el kirel a Kristo, e bleketakl ongilem, me a beltikelreng el mo er a rokui el chad. Mal sekum e ko moutekangel merael mo ruchei el di urrekodel er a tekingel a Kristo, e outkangel mo er a ulebongel, ea Edam a dilung el kmo: ko mo nguu a diak a ulebengelel klengar.

21 E chelchang e betik er a renguk lodam er ngak, tiai kid a rael; ng diak a ngodech el rael me a lechub eng ngakl ngarngii er cheungel babeluades, el mo uchul ea chad a sebechel mo suobel er a rengedel a Dios. Me chelechang e morrenges, tiai kid osisecheklel a Kristo, el ngii a ditang el klemrang losisecheklel a Edam, me a Ngalk me a Edaol Reng, el ngii a dital Dios el diak a ulebengelel. Boluaisei.