1 Eng liluut er a bocha lemerek okedei me a euang el rak, me a direk el okedei me a eim, me kadosang, a roderchelel a Jesus a mla muchel a ikelesia er a chelsel a rokui el beluu el meliuekl. Me a ildois el mle er tir, e merang el mlo mekngit a rengrir er a kenterir, e miltecholb er a ngklel a Jesus; a direk el mlonguu Edaol Reng.

2 Me a lemerema okedei me a ongelolem er a rak, a rechad a di rokui elmlabult el mo er a Rubak er bebul a rokui el beluu, luldimukl er a rechedal a Nephi me a rechedal a Laman, e dimlak a klautok me a klautitekangel er a dlongelir, me a rokui el chad a mirruul a llemalt el mo er a tang me a tang.

3 Edi mle ta besul a rokui el tekoi er a delongelir; me a uchul eng dimlak a chebuul me a merau, a sibai me a remimokl el chad, tir a bai rokui el di mlo mimokl, mellai er a sengk er a babeluades.

4 Me a lluut el direk el merekong okedei me a euid el rak, eng dirke mellemolm el ngarngii a budech er a beluu.

5 Meng mlarngii a meklou me a mengasireng lurreor el lurruul a roderchelel a Jesus, el mlo elmong me te mlo omekungil er a resmecher, e olkiis er a remlamad, e mirruul er a rechitechut el mlo merael, me a remeiko a ngilai osngir, me a remechad a mlo orrenges; me a rokui el teletelel a tekoi lechelid a lurruul er a dlongelir a rengalek el chad; e dimlak a ngodech lulebang el meruul a tekoi lechelid, ndi mle tang le ngklel a Jesus.

6 Me tiaia mlo rekil okedei me a eai el rak, me a direk el okedei me a etiu el rak, me a okeuang me a tang, me a okeuang me a erung, oi, el mlollmuut er a okeuang me a etiu el rak al merekong, me a direk el okeim me a tang, me a okeim me a erung; oi, e direk el mlollmuut er a rekil a okeim me a etiu el rak.

7 Me a Rubak a mlo omekngeltengat er tir el mlo uldirkork er a chelsel a beluu; me te mloel liluut el mo mekedechor a meklou el beluu er a le blarngii aikel milseseb el beluu.

8 Oi, el molmuut er sel klou el beluu er a Zarahemla a lliluut el mekedecherur.

9 Endi betok el beluu a rirechorch, meng dimle ralm a ngarngii, meng dimlak el sebechir el kudmokl.

10 E chelechang, kamomes, ngliluut me a rechedal a Nephi a liluut el mo mesisiich, e mirrael kmal mle mereched el mlo obdois, e mirrael kmal mlo beches e ungil chad.

11 Meng mlorngii a chebechiil, me a chomerenged el chebechiil er tir, e mlo ngeltengat loltirakl a betok el telbiil el Rubak a diluer tir.

12 E merekong el dimle keael lluut el mo oltirakl omeruul me a ruoll er a llach er a Moses; ebai mirrael loltirakl a llach el lengilai er a Rubak er tir e Dios er tir, el melemolem lolsengerenger e meluluuch, el blechoel me er ongdibel el dmak el meluluuch e orrenges a tikingel a Rubak.

13 Malluut eng mlo diak a klautok er a dlongelir a rokui el chad er a bek el beluu; endi mlarngii a meklou el tekoi el chelid el mloerngii er a dlongelir a roderchelel a Jesus.

14 Me ngengelekla okeuid me a tang er a rak, me a direk el okeuid me a ongerung er a rak, el luutang el mochang er a rekil okeuid me a ongetiu er a rak; oi, el direk el engelekla dart el rak, me a roderchelel a Jesus lullilt er tir a mla merael mo er a baradis er a Dios, el baidi mlo tirkei el tedei el dimlo kiei; e mloerngii a rebebil er a roderuchel el mlechedaol mlo omtechei er tir, me a direk el betok er sel telcheroll a mlo nguemed.

15 Eng luutang meng mlo diak a klautok er a beluu, le beltik el reng er a Dios a mle kiei er a rengrir a rechad.

16 Meng dimlak a chelechei me a kal klakoad, me a ka luldikel, me a ka laokreng, me a ka lomengeblad me a ka omekeuad, me a ka ngii dil tekoi er a deleboes; meng dirkak a rengodech el chad el mla er a deuelreng el uaitir er a dlongelir a rokui el chad el mla obeob er a chimal a Dios.

17 Ngdimlak a re merechorech, me a ka romekeuad, me a lechub el blarngii a rechedal a Laman, me a ka di le ngodech el cheldebechel; te bai dimlo tang el ngelekel a Kristo, el telchull er a mo er a rengedel a Dios.

18 Eang tir a merang el ngeltengat! Le Rubak a ulemekngeltengat er tir er a rokui loruul; me te mlo ngeltengat e melleketek el mlo lmuut er a rekil a dart me a ongetruich er a rak; me a kot el telcheroll er a temel a Kristo a mla mo nguemed, e dimlak a klautok er a chelsel a beluu.

19 Malluut ea Nephi, el ngii a ulebang tiang el uriul el rekord, (el ngii a mla er a bebul a tibereberk el kloklel a Nephi) a mlad, ea ngelekel Amos a mlo omtechei er ngii lomtebechel; meng dirrek el kiltmokl er bebul a mliliut el rekord Nephi.

20 Me ngulbang el okai me a euang el rak e dirke mlarngii a budech er a beluu, endi te mlarngii adi mekesai el chad el mlo omtok er a ikelesia e mlo choungakl er a ngakl el rechedal a Laman; misei eng mlo omuchel luutang el moerngii a rechedal a Laman er a chelsel a beluu.

21 Malluut ea Amos a direk el mlad, (meng mle dart me a oketiu me a euang el rak er a lemei a Kristo) me a ngelekel el Amos a mlo omtebechel a rekord lomtechei er ngii; e direk el kiltmokl er bebul a mliliut el rekord er a Nephi; e dirrek el melluches er a chelsel a babier er a Nephi, el tiakid el buk.

22 Me ng chengelekla erung el dart el rak; me a ongerung el telcheroll a mla kaimekmad el di mekesai ku kiei.

23 Me elechang e ngak el Mormon, a soak chobo modengei el kmo a rechad a mla mo chobdois, el di berriid kung er bebul a beluu er rokir, el kmal mla mo imong el merau le ngeltengetir er a Kristo.

24 Me chelecha tiael erung el dart me a ta el rak, eng mocha omuchel mo erngii er a delongelir tirkei el mlo mekikidai a rengrir, lulubail a meringel a cheral bail, me a bek el bedengel a meringel a cheral ngisel a chesiuuch, me a ungil kloklel a bluulechad.

25 Miseikid el taem el mong ea kloklir me a lulusbech a mlo diak el ta besul er a delongelir.

26 Mete mocha blibii el mo er a kakerous el chelechad; e mocha omekedechor a ikelesia er tir losiik a uchul omengerker, e mocha oltngakl er a merang el ikelesia er a Kristo.

27 Ma lluut er a rekil erung el dart me a ongetruich er a rak eng mle betok a ikelesia er a chelsel a beluu; oi, ngmle betok el ikelesia melekoi el kmo tir a medengelii a Kristo, endi tuletngakl a betok el teletelel a ungil chais er Ngii, el mloel mong me te kilengei a betok el mekngit, e mlo oldars aikel mle chedaol el mong er ngikei el mekull a bo lolai leng mle dengerenger.

28 Me tiang el ikelesia a di merrael kmal mlo klou el mekngit a uchul, me a tang er a uchul a klisiichel a Satan el mlo el oreked a rengerir.

29 E liluut el mlarengii a ta er a ikelesia el luletngakl er a Kristo; e mlo melemall er a merang el ikelesia er a Kristo, le klengariou el reng me a klaumerang er tir er a Kristo; mete mle chetirir le betok el tekoi el chelid a dilubech er a delongelir.

30 Mi seia, mle uchul e tir a mlo obang a klisiich el mo er a roderchelel a Jesus el kiliei lobenterir, me te mlengelebus er tir, endi klisiichel a tikingel a Dios el mla ertir, me a kelbus a di ulebriid er a belngel, e tir a mirrael meruul a meklou el mengasireng er a delongelir.

31 Endi a rechad a dimlo chokor aikang el rokui el tekoi lechelid, e mlo medecherecher a rengrir, e mlo osiik cheldechulel a kodellir, el di uaia re chiJews er a Jerusalem el mlosiik a kodellel a Jesus, loltirakl a tekingel.

32 Me tulmidokl er tir el mo er a chelsel a blil a ngau, e tir a mle tuobed el dimlak le mekesakl.

33 E tir a direk lulmidokl er tir er a blil a tebelik el charm, e tir a ulsekool aikael teblik el charm el di uaia ngalk loba ngelekel a sib; me te tilobed er a delongelel e dimlak le mekesakl.

34 Endi a rechad a bai mlo medecherecher a rengrir, le te mlechedereder er a rebetok el priest me a reblulak el profet el mo mekedechor a betok el ikelesia, e meruul a betok el teletelel a mekngit. Me te ulemekoad er a rechedal a Jesus; endi rechedal a Jesus a dimlak lobult e longelebed. Mete mlechudoud er a ngesonges el klemedengei me a mekngit, er a rak el mo er a ta er a rak el mol mocha merek erung el dart me a okedei el rak.

35 Me chelechang er a chelsel tiael rak, oi, er a chelsel erung el dart me a okedei me a tael rak eng mloer ngii a klou el deliongel er a rechad.

36 Me a chelsel tiaikid el rak e te mlekiis a rechad lulmekedong er tir el kmo rechedal a Nephi, el tir a mle merang loumerang er a Kristo; ea delongelir e te mlaerngii a mle chokodongall el rechedal a Laman me a rechedal a Jakob, me a rechedal a Josef me a rechedal a Zoram;

37 Misei e tirkei el merang loumerang er a Kristo, me a remerang el mengull er a Kristo, (uldimukl er tir tirkei el tedei loderchelel a Jesus el mle kirir el di kiei) a mlo okodongall el rechedal a Nephi, me a rechedal a Jakob me a rechedal a Josef me a rechedal a Zoram.

38 Ea lluut e tirkei el mlo otngeklii a ungil chais a mlo okodongall el kmo rechedal a Laman me a rechedal a Lemuel me a rechedal a Ishmael; e dimlak le bo lak loumerang, endi mlo sorir lomtok osisecheklel a Kristo; me tullisechakl er a rengelekir me bo lak loumerang, el diuaia redemerir er a uchelel di mirrael mo diak loumerang.

39 Me a mle uchul tiang, a delngerngerir me a mengelengalk lomerellir a redemerir, el diuaia uchelel. Mete mlosisechakl el mo oucheraro er a rengelekel a Dios, el diuaia rechedal a Laman el mlosisechakl el mo oucheraro er a rengelekel a Nephi er a uchelel.

40 Eng liluut me a erung el dark me a okeuang me a euang el rak a merekong, me a ikang a mle blekerdelir a rechad. Me a remle mekngit el chad a mirrael mo mesisiich, e liluut el kmal mlo obdois lolechit er a rechedal a Dios.

41 Me te millemolm el lomekedechor a ikelesia er tir, e omsiich lolab a betok el bedengel a meringelchad el klalo. Me a leuaisei ea erung el dart me a okeim el rak a merekong, me a direk el erung el dark me a okolm el rak.

42 Me a lluut ea remekngit er tirkael chad a mocha omuchel el mengedmokl a berotel telbiil me a cheldebechel er a Gadianton.

43 Me a direk el rechad el mle okodongall el kmo chedal a Nephi a mirrael mo ngarbab a rengrir, le te kmal mlo merau, e mekedidai a rengrir el uaia rodam er tir er a rechedal a Laman.

44 Me tiaikid el time ea roderuchel a mocha mekngit a rengrir el kirel a kentil a bluulechad.

45 Me a ta er a klebesei er a rekil a edei el dart el rak ea rechedal a Nephi me a rechedal a Laman a diosisiu kung el kmal limong er a delngerenger el diosisiu a tang el mo er a tang.

46 Me a ta er a klebesei ea remerechorech er a Gadianton a ulebriid er bebul a beluu er rokir, e dimlak a melemalt el chad, ngditael tirkei loderchelel a Jesus. Ea kolt me a silber a lulengudel mlo omingodel, e tir a mirrael mo e mei er a betok el teletelel olidiuul.

47 Me a ta er a klebesei er a rekil edei el dart me a eim el rak (a rechad a dirke nga er a er a delngerenger) a Amos a mlad; me a ta erngii er a Ammaron a mlo omtechei erngii el lomtebechel a rekord.

48 Me a ta er a klebesei er a bocha le merek edei el dart me a lluich el rak, ea Ammaron a mlocheech er a Edaol Reng el mo mart a record el mle chedaol – Oi, a rokui el chedaol rekord el lulemdid a chim el ngar er a ta er a cheroll el mo er a ta er a cheroll, el mle chedaol – el mlo llmuut er a edei el dart me a lluich el rak ruchei er a lemei a Kristo.

49 Meng milart lultuil er a Rubak, me bol sebechel lelmuut el mei er a blachel er a blil er a Jakob, loltirakl a ulaoch me a telbilel a Rubak. Me tiaia ulebongel er a rekord er a Ammaron.