A Babier Er A Enos

1 Elecha tara klebsei, e ngak el Enos, a medengel kmo, a demak a mle melmalt el chad, le ngulsischeklak er a tekingel, e dirrek el milkurulak er a llechul a Rubak – meng ngeltengat a ngklel a Dios er ngak el kirel–

2 Me chelcha kmouchais er kemiu er a berraod el kblar ngii er medal a Dios ruchei er a mlengubet kung a kngtik.

3 Elcha kmirrael momalech a charm er a chelsel oreomel, ea tekoi el blek blechoel lorrenges er a demak el melkoi el kirel a diak a ulebngelel klengar, me a deoureng er a re santo, a mle soiseb el mo er a elsel a renguk.

4 Me a delbengek a mlo songerenger; me a kmlo outubaruach er medal a milebak, e lilangel mor ngii er a mesisiich el nglunguuch me a ongit el kirel a delbengek; meng tal sils el klilangel mor ngii; ea bocha le kebesengei ea kdirrek luldersii a ngerek meng mlo er a babeluades.

5 E mlar ngii a ngor el mler ngak el kmo: Enos, a kngtim a mla mengubet, me kau a mo ngeltengat.

6 Ngak el Enos a medngel kmo, a Dios a diak lomulak; me a berredel a kngtik a mlo dibus.

7 Mak dilung: Rubak, ng mekerang e mo uaisei?

8 Meng dilur ngak el kmo: Ng uaisei leng klaumerang re kau er a Kristo, el dirkak o mrengsii malchub e mesang. Meng betok el rak er medad e ngii a merkung el mochotii a bedengel er a tech; me morael ea klaumerang re kau a mla rullau el mo cherrungel.

9 Metia er a krenges a ikal tekoi, eng mocha soak el olngeseu er a rudam er ngak er a rechedal a Nephi; me a kuldersii a delbengek er rokir el mo er a Dios el kirir.

10 Me chelcha tial kuruul er a ongit er a renguk, ea negrel a Rubak a liluut el mlei er a uldesuek el kmo: Ak moldingel er a rodam er kau alsekum tir a mo oltirakl a llechuk. Ak mla mesterir tiael beluu el ngii chedaol beluu; meng diak bol delbeakl ng dimerekmo le bol rebet er a klengit; me ak moldingel er a rodam er kau el diuai i kel blak dung, ea kentrir a bo kngai lodak er a chelbuul e ngmai el kmed er bebul a beterrir.

11 Me a uriul er a krenges a ikael tekoi, e ngak el Enos a kmal mlo mesisiich a klemra rengak er a Rubak; me a kmiluluuch el morngii a betok el mekekmangel longit el kirir er a rodam er ngak er a rechedal a Laman.

12 A tara klebesei er a uriul er a nglunguchek me a urelek el kmal mle blak a renguk, ea Rubak a dilur ngak el kmo: Ak mo meskau a ikel soam leng klaumerang er kau a uchul.

13 Me chelecha tiakid sel mle soak lolengit er ngii el kmo, alsekum ar chedak er a rechedal a Nephi a mo ruebet er a klengit, me temo nguemed, ea rechadal a Laman a diak bol ngemed, ea Rubak le kedmokl a rekord er a rechedak er a rechedal a Nephi, me a bo le klisiichel a chedaol chimal endi ungil, ngii di bol sebechel er a tara klebesei el mo er a rechedal a Laman, me altae ngmo sebchir el mo suobel.

14 Le chelchal taem ea kimla mo er a ikel sebechemam lolluut er tir el mo er a klemrang. E tirka millekoi lolengasech a rengrir e kmo, al sekum ng sebechir ete tomall a rekord e omkeuad er kemam me a siukang er a redemmam er a irechar.

15 Me chelchal kudengei el kmo, a Rubak el Dios a mo sebechel kudmokl a ikel rekord er kemam, ea klilangel mor ngii el meketekt el taem, leng dilur ngak el kmo: Ngii dil ngerang el molengit loba klemrang, e oumrang el kmo kemo nguu loba ngklel a Kristo, e kau a mo nguu.

16 Ng mlarngii a klemra rengak, me a klilangel mo er a Dios me le kedmokl a rekord; e ngii a kilengei el kmo, ngmo ngmai el mo er a rechedal a Laman sel lebo lungil temel.

17 Me ngak el Enos a mlo medngei el kmo, ngoltirakl er a telbiil el mlor ngii; meng mlo chelellakl a renguk.

18 A Rubak a dilur ngak: A redemmiu a dirrek el mlengerechir er ngak er a osisiu el tekoi; meng mo mekedmokl el moltirakl er a klemra er tir; le klemrang er tir a diua klemera er kau.

19 Me chelecha tara klebesei, e ngak el Enos a mirrael mo er a rechadal a Nephi, me a kumlaoch el kirel a tekoi el merkung, e ouchais er tir a ikel blakrenges me a bla kues.

20 Me a kuuchais me lebora rekord el kmo, a rechedal a Nephi a millasm el mesmechokl er a rechedal a Laman el mo er a merang el klemerang er a Dios. Endi urelam a dimlo diak a belkul; le reng er tir er a klaucheraro a mle mesisiich, me te dioltirakl kung er a chelimimiil reng, me te mlo teblik, e bekeu, el sorir a merserasech, e mengull a bleob me a kle kikiongel, el di menga techel a charm; edi kiei a tento edi meloaoch er a chereomel, el ousaker er a kekedeb el budel a charm, e telamk a bterrir; e mle meduch er a balech me a oles me a chotilech. E betok er tir a di mlenga chemadech el techel a charm; e dimlak lolengull losiik a uchul a kodellam.

21 Me tiaikid ea rechad er a Nephi a mirruul a sers, e omkeroul a betok el bedengel a mungi, me a rodech, me a betok el charm me a betok el bedengel a kerebou me a kaming me a teblik el kaming me a betok el uos.

22 E kmal mle betok a re profet er a delongelam. A rechad a mle mekididai a rengerir mete mle meringel er tir a mo mosisechakl el medengei a tekoi.

23 Meng dimlak a ngodech el mlar ngii, ng di mirrael a meringel tekoi, me a ulaoch er a mekemad, me a klautok, me a tellemall, e blechoel lulmeklatk er tir er a kodall, me a klemengetel a diak a ulebngelel, me a kerrekriil me a klisiichel a Dios, me a betok el uai kaikid el tekoi el meruul er tir me bol blechoel ngar ngii a dakt er tir el kirel a Rubak. Mak melkoi el kmo, ng dimlak er a ikel kimullekoi a mle beot er a ikang, ng dimle beches e blektakl el tekoi a mle sebechel ngosuterir meng diak di loldenglengel mo er a klou el dellebeakl. Me tiaikid a teletelek er a kuluches a blekerdelir.

24 Ak miles a mekmad er a delongelir a rechedal a Nephi me a rechedal a Laman er sel temek.

25 Me a tara klebsei er ak chudelang, e mla mo chuib a dart me a okeuid me a etiu el rak er a taem er a demmam er a Lehi ral tobed er a Jerusalem.

26 A kumes er ngak engdi kmeed ku ak mo er a debull, ng klisiiched a Dios a uchul meng kirek lolisechakl e omlaoch el mo er tir ka el chad, e melkoi a tekoi loltirakl a klemrang el ngara Kristo. Meng bekel sils er a klengar rengak el kullekoi er ngii meng liluut el mo dmeu a renguk el kirel er a tekingel a bluulechad.

27 Meng di kmeed ku kmora blil a ulengellek, lobengkel Oseblek, le kmedngei el kmo ngii a mo ulengellek. Meng dmeu a renguk el kirel sel sils el tiael mo mad el bedengek a mo nguu sel diak le bol mad, e mo dechor re medal; e mo ungil a renguk el mesa medal, me ngii a mo melkoi er ngak el kmo: Mei er ngak e kau el ngeltengat, ng ngarngii a mla mekedmokl el kirem er a meringel chad el blil a Demak. Boluaisei.