A Babier Er A Mosiah

1 A tara klebesei er a uriul er a Mosiah er a blal ruul a ikel dilur ngii a demal, meng mla mesubed el mo er a beluu er rokui, me a rechad a mermang el mlar ker me ker er a bek el beluu el mo er a templo el morrenges a tekoi el King Benjamin a mo melekoi er tir.

2 Me temerael mle betok, mle betok meng dimlak lomechur retir; le temle obdois e mesisiich el beluu.

3 Te dirrek el lullab a kot el ngelkel a chermir, el mo melnget e mo melul a uldars loltirakl a llechul a Moses.

4 E dirrek el mo sebechir el moureng a sulel a Rubak el Dios er tir, el ngilititrir loltobed er tir er a beluu er a Jerusalem, e millubet er tir er a chimorir er a cherreuir, e millilt er a remelemalt el chad el mo sensei er tir, me a dirrek el melmalt el chad el mo King er tir, el mla merkii a budech er a beluu er a Zarahemla, e ullisechakl er tir me bol loltirakl a llechul a Dios, me bo lungil a rengrir, e bol mui er a beltik el reng el mo er a Dios me a rokui el chad.

5 Mal merma tial sils ete mlei er a templo, te milkedechor er a tento ertir el mliuekl, el chad me a telungalk er ngii, el bechil me a re ngelkel sechal, me a re redil, me a rengelkir el sechal me a reredil, lomuchel er a kot el klou el mo er a kot el kekerei, me a rokui el telungalk a mle blibii.

6 Me te milkedechor a tento er tir el mliuekl er a templo; a chad me a tento rengii el teunglel a mle bedul a templo meng mo sebechir el di ngara tento er tir e remenges a tekingel a King Benjamin el bo lolkoi el mor tir.

7 Me a iildois a kmal mle klou me a King Benjamin a dimlak el sebechel mengedecheduch er tir rokui er a chelsel a templo, meng ngdilu er a rechedal me bo lomekedechor er a metongakl el kora tarikrab, me bol sebecherir arechad el remenges a tekoi el bololekoi.

8 Me chelchang mocha dechor er a tarikrab e mengedecheduch er a rechedal; Ng dimlak el sebecherir el remenges a tekingel rokui leng kmal mle betok a rechad; meng dilu er a rechedal me bo lluches a ikel lolekoi e lorous er tirkel cheroid el diak el sebechir el rongesii a ngerel me bol sebechir el dirrek mo medngei tekingel.

9 Me a ikakid ngii el tekoi lullekoi e dilung me bol meluches, el kmo: Rodam er ngak, kemiu el mla me mekideb er tiaer rokui, kemiu el sebechemiu el remenges a ikel bo kulekoi er kmiu er chelechael sils; ngdimlak kulai er kemiu el mei loba beot el reng el kirel a ikael tekoi el bo kulekoi, ka bo moltirakl er ngak, ebok a dingemiu me bom renges, me a rengemiu me bol sebechemiu el mo medengei, me a uldesuiu me bol sebechel a berrotel tekingel a Dios el mo chemolt er kmiu.

10 Ngak a dimlak kuleker er kemiu el kiriu el medakt er ngak, me a lechub e ko momdasu el kmo ngak a lemuut el ngarbab el diak uaia re chad.

11 Endi ngak a kmal diuai kemiu e betok el tekoi el ak mechitchut er ngii er a bedengek me a uldesuek; endi tirkael chad a ngileltak me a demak a chiledolak, e mloltirakl er a chimal a Rubak el ngileltak el mo merreder e King er tirkael chad; me a ktelutk e keldmokl er a diak el mochit el klisiichel, kirek el mo mesiou er kemiu lolab a rokui el klisiich me a uldasu me a duch el reng el Rubak a mla meskak.

12 Ak mesubed er kemiu el kmo, sera kmetutk el mo mesiou er kemiu er a rokui el sils er a klengar rengak, el melmuut er chelechal taem, eng dirkak a tael kungerchir a kolt me a silber me a lechub eng ngii dil ngerang lungil klalo er kmiu.

13 E dirrek el dirkak bechikmiu me bom chelsimer er a kelbus er a chelsel a chutem, me a lechub e bo mousibai er a tang me a tang, me a lechub e momekeuad, me a lechub e moumekmad, me a lechub e morechorch, me a lechub e bora laok reng; me a lechub e blak bechikmiu me moruul a betok el mekngit el tekoi, Ak bai olisechakl er kemiu el moltirakl a llechul a Rubak er a rokui el tekoi el blal dung er kemiu.

14 Me ngak me a kuureor er a chimak meng mo sebechek el ngosukmiu me llak bo lolai a oleng er kemiu, me llak le boerngii obraod el tekoi el merkemiu – a ikael tekoi el kulkoi a di kemiu el medengei le ko momes er chelechael sils.

15 Rodam er ngak, ng diak kulkoi el kor olecholt, me a lechub e kulekoi el loltelechakl er kemiu; Ak melkoi a ikael tekoi me bo modngei el kmo, ng sebechek longer el kmo ng klikiid a renguk er medal a Dios er chelechal sils.

16 Ka morrenges, chelcha sel kduel kmo, ak melsiou er kmiu el bek el sils, eng diak le belkul a kmo kulecholt, le klemrang ea kmilsiou er a Dios.

17 Elechang ea kmelkoi er er kemiu aikang me ko mo suebii a klemrang el kmo; sel mosiou el kirel a ngii dil chad e kau, e kau a merang el mesiou er a Dios er kau.

18 Kamesang elceha ko momkedong er ngak el kmo ak King er kemiu; me a lesekum engak el momkedong el kmo, King er kmiu a choureor el olengeseu er kemiu, eng ngera meng diak moureor lolengeseu er a tang me a tang.

19 Me chelchael sekum ngak el momekedong el kmo King er kemiu a betok el rak el kusiou er kemiu, el ngii omesiou el mo er a Dios, a morngii er a rengmiu loureng a sulek, engkol uangera el kiriu el mo oureng a sulel a King er kemiu er a babeluades.

20 Ak melkoi er kemiu e rodam er ngak, alsekum e ke kmal moureng a sulel e oldanges el moer sel sebechel a rengum er rokir el mo er a Dios el milebau e mengedmokl e omtebechel er kau, e mla rullii meng sebechel demeu rengum, e mla nguu a budech el loia er a delengecheklir er a derta er kemiu.

21 Ak dmur kemiu el kmo, alsekum komesiou er ngikei el lulmeob er kmiu er a kot luchul, e omes er kemiu er a rokui el klebesei, e meskemiu chomouteliil, meng mo sebechemiu el mengitentik e meruul a ikel somiu, e dirrek loltekau erkemiu er a bek el bung – Akmul uase alsekum ko mo mesiou er ngii loba rengemiu er rokir, e kom dirrek el dimo ulechrangel meterekakl el sibai.

22 Kamosang, a ditael longerchir rengii er kemiu a kmo, bo moltirakl a llechul; e ngii a mla kongei el kmo chobo moltirakl a llechul eng moungil besmiu er tial beluu; e diak el sebechel mo ngodech aikel lolekoi; me a lsekum ko morrenges a llechul eng mo mekngeltengat er kemiu e melisiich er kemiu.

23 Elecha kot eng mla omeob er kemiu, e meskemiu a klengar er kemiu, me ko mla mo blals el kirel.

24 Ea ongerung, e ngolterkokl el kmo, ngkiriu el mo oltirakl a llechul; ea cho bomuaisei eng di mereched el lomekngeltengat er kemiu; me a leuaisei eng mla mengkad er kemiu. Me kom dirk belsel, er chelechang me a mor medal el di blechoel; meng ngera ko menglou a ngeriu er ngii?

25 Me chelcha kuker, ngerang sebechiu el dmung el kiriu? Ak subedmiu el kmo, ng diak a ngerang. Ng diak el sebechemiu el kmo, kemam a ngarbab er a klungiolel a chebechab er a chutem; le kmiu a ulebeob er a chebechab er a chutem; el ngii a kloklel ngikei el lulmeob er kemiu.

26 Me ngak, ngak el momekedong er ngak el kmo King er kemiu a diak ngarbab er kemiu; le ngak a dirrek el chebechab. Kemiu tial lomes el kmo, Akmla mo chuodel, meng di kmedung lolutii tiael bedengek er a klechad el mo er a delal chutem.

27 Me chelecha aikel kullekoi el kmo, ak milsiou er kmiu, e mirrael el mededaes a uldesuek er medal a Dios, me a kulmekedong er kemiu el me keldibel, me bol sebechek el diak motelechakl, me a resechiu bo llak el merngak sel bokedechor er a kerrekriil er a Dios er a aikel tekoi el lulterkokl er ngak el kiriu.

28 Ak dilung el kmo, a kulmekdong er kemiu el me keldibel meng mo sebechel mo diak el chelsechusm a bilek er a resechiu er chelchael taem el di kmeedku kmora debull, me bolsebechek el mong el ngara budech, me a diak el mad el delbengek a mo sebechel mo teloi er a rechad er a chelitakl er serbab el mengitakl chodanges el mo er a melemalt el Dios.

29 E lmuut kung, me ak subedemiu el kmo, ak millai er kmiu el me keldibel, meng mo sebechek louchais er kmiu el kmo, ng dikeal sebechek el sensei me a lechub e King er kmiu;

30 Le chelechang el taem el kungedcheduch er kemiu e ngomritl a bedengek; endi Dios olengeseu er ngak me a uchul meng sebechek el mengedecheduch er kemiu, e mla dmuer ngak me ak mouchais er kmiu er chelchael sils el kmo, a ngelkek el Mosiah a King e merredel er kemiu.

31 Me chelechang e rodam er ngak, eng soak chobo moruul aikel choblar ngii er a ngara mong, kemiu tiael lulerrenges a llechuk me a llechul a demak meng mlo ungil besmiu el dimlak obom mechitechut er a recherreuiu, me kom dirrek el mo uaisei chobo moltirakl a llechul a ngelkek, me a lechub eng llechul a Dios el bo le beskemiu e ko mo ungil besmiu er tiael beluu me a re cherreuiu a diak bol mesisiich er kemiu.

32 Endi morrenges e kemiu el chedak, bom kerkikl eng mol morngii a kalutok er a delongliu, me ko moltirakl er a mekngit el chelid el lullekoi er ngii a demak er a Mosiah.

33 Morrenges, ng morngii a dellebeakl el mo er ngikei el mo oltirakl er ngikel chelid; le lesekum eng moltirakl er ngii e medei el dirke chelsechusm er a kentil, eng diua le ngilmii omkodall el mo er a delbengel, meng monguu a blingelel diak a ulebengelel le kelebus, leng mlo omtok er a klaodengei er ngii e tomellii a llechul a Dios.

34 Ak mesubed er kemiu el kmo, tedi tirkel mekekerei el ngelkiu a dirkak el mosisechakl, engii e kemiu el rokui a mla mesuub a ikael tekoi, me komdi medngei el kmo, ng diak a ulebengelel di belsel a Demmiu er Babeluades, me modars el mo erngii a rokui el molab, me a di klengar er kemiu; e dirrek el mla suub a ikel rekord el ngarngii a ulaoch el lullekoi ar chedaol profet el mera taem er a demad er a Lehi rale tobed er a Jerusalem.

35 Me a ikel rokui el mla medung er a redemad el mer chelechang. Me a ikel lullekoi al diluer tir a Rubak meng melemalt e klemrang.

36 Me chelechang eak melekoi er kemiu e rodam er ngak, a uriul er a chobla mosuub e bla musisechakl aikael rokui el tekoi, ea lesekum kau a mo melemall e mo omtok a ikel mla medung, me ke choridau er a Reng er a Rubak, meng mo diak el ngar kau lomekrael er kau er a rolel a mellomes luldasu, me bom ngeltengat, e boel ungil besum e mkeldmokl–

37 Ak subedemiu el kmo, ngikei el mo uaisei, a mo chemolt lomtok er a Dios; meng mla kongei el mo mengull er a mekngit el chelid, meng mo omtok a rokui el melemalt, me a Rubak a mo diak lobengkel, leng diak el sebechel kie diak el chedaol templo.

38 Mal sekum ngikel chad a diak bol mekngit a rengul er a kentil, meng di cherreuel a Dios e mo er a kodall, e sel klisiichel a lemeltel a Dios a mo okisii a delbengel e ochotii a klungel a uluchulel me a berredel a rokui el kentil, meng di mo merat er medal a Dios, e mo mui a rengul er a klengit el reng, me a ringel me a dmoelch el dakt el di uaia ngau el diak el mad a ngeuil, el di kmard el mo cherechar.

39 Bomodengei el kmo, a klechubechub a dikeael sebechel ngoseuir ngikael chad; me a le uaisei, ea ulebongel kerrior el mo er ngii a mo melemolem el mo cherechar er a diak a ulebengelel ringel.

40 Morrenges e kemiu el meklou el chad, me kemiu el mekekrei el chad, me kemiu el mekekrei el ngalk el sebechiu el mo medengei a tikingek, le cheldechedechak a blektakl meng sebechiu el mo medengei, ak meluluuch me bol sebechiu el mekiis e bom letkii a tletael le borngii tirkel mla ruebet er a klengit.

41 E lmuut el soak chomomdasu el kirel a klengeltengat me a klungiaol ngarngii tirkel loltirakl a llechul a Dios. Mosterir, te ngeltengat er a tekoi er a klechad me a tekingel a Dios; ea loutekangel loumerang el mo er a ulebongel e te mengai el mor babluades el mo kiei lobengkel a Dios er a diak a ulebngelel deuelreng. Bomlatk el kmo, aikael tekoi a klemrang; le Rubak el Dios a mla dmung.