1 Me chelcha King Benjamin er a bocha le merek el melekoi el mo er a rechedal, e nguleldurch el mloker el kmo temlo oumerang a tikingel mo ertir.

2 Meng dimlo ta ngerir loldiu el kmo: Oi, aki oumerang a rokui el tekoi el blamdung el mer kemam; a kidirrek el mla mo medengei el bleketakl e klemerang, leng reng er a Rubak lolab a bek el klisiich a mla rullemam el morngii a klou el ngodech er kemam, me a lechub eng chelsel a rengmam, meng mla mo diak er a uldesuam a mo meruul a mekngit, e bai di mo blechoel meruul a ungil.

3 E dirrek el kemam lultuil er a diak bol ngemed el klungiolel a Dios, me a Reng er Ngii el mla mei er kemam, me a kimla moungil mes a tekoi er a ngar medad; me a cholkung mlo kirel, eng mlo sebecham lomlaoch el kirel a rokui el tekoi.

4 Ng klemerang er kemam el kirel a ikel tekoi el King er kemam a mla dmung er kemam me a uchul eng mla mei er kemam tiael klou el llomes, meng nguuchul ea kioldeu loba kmal klou el deuelreng.

5 Me a kim kongei el mo soiseb er a telbiil kemam me a Dios er kemam el mo meruul a soal, e mo omkerreu a llechul er a rokui el tekoi el bo lollach er kemam, er a ikel medechel klebesei er a klengar er kemam, meng mo diak dilkemam lochudii a diak a ulebengelel ringel, el diuaia le dillii a anghel, me bollak kimolim er a kob er a ngasch reng er a Dios.

6 Elecha ikaikid aikel tekoi el King Benjamin a mle soal lorrengs; meng dula ertir: Kemiu a mla dmu soak lorrengs el tekoi; me a telbiil el blam ketmokl a melmalt el telbiil.

7 Me chelechang ngokiu a telbiil blam ketmokl e komo okedongall el ngelekel a Kristo, el sechal me a redil, le kamomes, chelechal sils e komla mechell el mo er ngii er a reng; le kemiu tiael kmo, ng klaumerang er kemiu er a ngklel a uchul ea rengmiu a mla mo ngodech; miseia uchul eng mla omechell er kemiu me komla mo ngelkel sechal me a redil.

8 Me ngoeak tiaikid el deluill e komo ngara ilmokl, leng diak a ngodech el deluill el mouchul e komo mimokl. Ng diak a ngodech el ngakl el ngarngii el mo uchul eng mei osobel; seia uchul meng soak chom nguu a ngklel a Kristo kemiu er rokui el mla soiseb er a telbiil lobengkel a Dios, el kiriu el mo mekedung el mo lmuut er a ulebengelel a klengar er kemiu.

9 Ea uriul klebesei eng mo chemolt me ngikei el mo choltirakl er tiang a mo moues er a klisiichel a chimal a Dios, leng mo medengelii a ngklel sel le mokedong; leng mo mokedong er a ngklel a Kristo.

10 Chelechang mo chemolt er a uriul klebesei el kmo ngikei el diak el nguu a ngklel a Kristo, a mo mokedong er a ngodech el ngakl; misei eng mo metik er ngii el dengchokl er a katrul a Dios.

11 Meng soak a llak mobes el kmo tiaikid sel ngakl, el ngak a diluel kmo, ak mo meskemiu el diak le kirel mo mesuld, endi merekmo rebet er a klengit; me bom kerkikl el diak kobora klengit, mellak bol mesuld a ngakl er a rengmiu.

12 Ak subedemiu, a kuureng me molatk lorreked er a ngakl me di lellechukl er a rengmiu, me llak obetik er kemiu el ngara klitechetul a chimal a Dios, ebo mrengesii e modengelii a ngor el momekedong er kemiu, me a ngakl el bo lomekedong er kau.

13 Ele a chad ng mekerae mo medengelii a merredelel el dirkak losiou er ngii, meng ngodech el chad a losang, e cheroid er a uldesuel me a beltik el reng er ngii.

14 E lmuut kung, a chad ng sebechel kuk dimong meng nguu a chermel obliil el roba el mei me ngomekeroul er ngii? Ak subedemiu el kmo, ng diak; ng dirrek el diak le kengei me longang lobengkel a chermel, e bai orikii, lotebedii. Ak subedemiu el kmo chouaitiang a morngii er a delongeliu alsekum kau a diak modengelii a ngakl el bo lomekedong er kau.

15 Misei a kureng me bo mesisiich el diak komesim, el blechoel meruul a ungil ureor, me a Kristo el Rubak el Dios lolab a bek el klisiich bol ngiltau me bom tara mor babluads el ngara mo cherechar lulengull me a diak a ulebngelel klengar, lultuil er a llemesel, me a klisiichel me a llemeltel me a klechubechub er Ngii el mileob a rokui el tekoi el ngara ianged me a bluulechad, el Ngii a Dios el nga er bab er a rokui. Boluaisei.