1 Chelecha tara klebesei ea Alma er a lechiis er a rechedal a King Noah, eng mlo mekngit a rengul kirel a kentil me a telmellel, meng dimlo ngii el tang el mo er a beluu e mocha olisechakl er a rechad a tikingel a Abinadi–

2 Oi, el kirel a tekoi er a ngar medad el mei, me a kirel okiis er a kodall er a remlamad, me a osobel mei er a rokui el chad, el mo sebechel morngii loeak a klisiichel, me a rengelel me a kodellel a Kristo, me a le bekiis er a kodall, me a ngesechel mo er babluads.

3 Me tirkel mlo sorir lorrenges a tikingel a blo lolsisechakl ertir. Ng mle berrotel e olisechakl ertir me llak bo lodenge King. Me temle betok a mloumerang a tikingel.

4 Me chelecha ea tara klebesei e tirkel lildois el mloumerang er ngii a mlo er a basio el Mormon a ngklel, el lulngeklii a King, leng mla er a ulebengelel a beluu el sel bebil e bol temel, eng kmal mo betok a teblik el charm el ngarngii.

5 Chelecha chelsel tiael Mormon eng mlarngii a madedok el mle mechellins a lmel, me a Alma mlong, le bita er a ralm a mlarngii choreomel di mle mekekrei el kerrekar, mesel lemellomes eng ngara chelsel lomart er ngii er a rechedal a King.

6 Ea uriul e tirkei el mlo oumerang er ngii a mloer itiang el morrenges a osisecheklel.

7 Ea tara taem er a mla mo cheuib a betok el klebesei, ete beteknga a remle mechudel er tial basio el Mormon el me orrenges osisecheklel a Alma. Oi, tirkei el rokui loumerang a tikingel a mle mechudel el merrenges er ngii. Me ngullisechakl er tir e milsaod er tir a uuchel reng el kirel a klengit, me a mo suobel, me a klaumerang er a Rubak.

8 Me a tara klebesei eng dula ertir: Kamomes, tiakid a ralm er a Mormon (tiaia mle ngklel) e chelecha kemiu tiael somiu el mei er a chelechad er a Dios, e mo mokedong el chedal, e somiu el mo ngosuir a tang me a tang er a chelngelel me bol kebekakl;

9 Oi, e mla kongei el mo lmangel lobenterir a re ngara klengit el reng; oi, e mengelaod er a rengara klengit el reng, e mo dechor el sioning er a Dios er a rokui el taem me a rokui el tekoi, me a ngii dile basio, el di merekmo kodall, me bol sebechem el mosobel er a Dios, me bo mulcherangel lobenterir tirkel mo ngara kot lokiis er a kodall, me bom nguu a diak a ulebengelel klengar.

10 Elecha ksubedemiu alsekum tiaikid sel soal a rengmiu, ng diak el somiu el mo metecholb er a ngklel a Rubak, e lolchotel morngii el kmo komla soiseb er a telbiil kemiu me Ngii el kmo, komo mesiou er Ngii e oltirakl a llechul, me bol sebechel meskemiu el klou lomaoch a Reng er Ngii el mei er kemiu?

11 Elecha rechad ral rengesa ikael tekoi e tulemrotech a chimorir er a deuelreng e dilung: Tiaikid a soal a rengmam.

12 Elecha Alma ngiluu a Helam lengii el mle tara kot, el mo dechor er a chelsel a ralm, e mlo klou a ngerel kmo: E Rubak, beskemam el mo maoch a Reng er Kau el mera mesiungem me bol sebechel kudmeklii tiael ureor loba chedaol el reng.

13 Me tiael ledelang aikael tekoi, ea Reng er a Rubak a mlei er ngii meng dulang: Helam, ak melecholb er kau, le kuba ngerachel mlara Dios lolab a bek el klisiich, el lolchotel kmo kau a mla soiseb er a chelsel a telbiil el mo mesiou er ngii el di merekmo le mermang er kau a kodall, el kodall er a bedengem me bol sebechel mo omaoch a Reng er a Rubak el mer kau; e bol sebechel meskau a diak a ulebengelel klengar, lokiu a klisiichel a Kristo el olsobel el Ngii a di mla mekedmokl er a uchelel a bluuelchad.

14 A uriul er a Alma er a le dela ikael tekoi, e ngii el Alma me a Helam a ngilbeet er a ralm, e mle dum er a ralm loldeu le temle mui er a Reng.

15 A Alma liluut el nguu a tang el liluut er a ongeruel taem el mo er a ralm, e tilchelbii el diuaia kot, endi ngii a dimlak el bol ngebeet ra ralm.

16 Tiaikid a mle teletelel er a lolecholb er tirkel rokui el mlei er tiael basio el Mormon; el mlar ngii a bekord eruel dart me a teoang el ngar; oi, me te miltecholb er a ralm er a Mormon me temlo mui er a budech er a Dios.

17 Me temlo kodongall el ikelesia er a Dios e dirrek el ikelesia er a Kristo er tiaikid el sils el mong. Ea uriul e ngii dile chad el miltecholb lokiu a klisiich me a ngerachel er a Dios a mlo chad er a ikelesia er ngii.

18 Elecha tara klebesei ea Alma lultuil er a ngerachel er a Dios a mlengedaol er a remlo priest; a tang el priest a mle chedaol mo olisechakl er a rokeim el chad el kirel a tikingel a Dios.

19 E ulechelechel ertir meng diak lolsisechakl a ngodech, ndi ikel tekoi el ngii a mla olsisechakl, me a tilobed er a ngerir a re profet.

20 Oi, e dirrek el milellach er tir el kmo, ng diak lolsisechakl a ngodech ndi uuchel reng me a klemerang er a Rubak el mla olsobel er a rechedal.

21 E milellach er tir el kmo ngdiak le kirel morngii a klautok er a tang me a tang, e bai kirir lomes el di mo tang el moruchei, loba ditael klemerang me a ditang el techolb, me a reng er tir a mo dmak el di mo tang er a beltik el reng el mo er a tang me a tang.

22 Me chelchang dulaer tir el kmo bo molisechakl. Misei ete mlo ngelkel a Dios.

23 E milellach er tir el kmo bo moltirakl er a ulengull el sils, em kellii leng chedaol, me a mo bek el sils el loureng a sulel a Rubak el Dios er tir.

24 E dirrek el milellach er tir el kmo tirkei el priest el ngii a milngedaol er tir, a kirir el mo choureor lolab a chimorir el kirel a delengcheklir.

25 E mlarngii a tael sils er a chelsel a tael sandei el meltutk el kirir el mo mengideb er tir el mo dmak el mo olisechakl er a rechad, e mo mengull er a Rubak el Dios er tir, e dirrek el mle mekudem el mle keldibel alsekum eng mlo sebechir.

26 Me a re priest a dimlak le kirir el mo ultuir er a rechad el kirel a siungel a delengcheklir, le ngurelir a mo uchul eng mo ertir a klechubechub er a Dios, meng mo sebechir el mo mesisiich er a Reng, el medengelii a Dios, meng mo sebechir lolsisechakl loba klisiich me a ngerachel er a Dios.

27 A Alma liluut el mellach el kmo, a rechad er a ikelesia kirir el mo olengeseu lolab a kloklir, el mo ultuir er sel ngarngii er a chad; ale betok a ngarngii er ngii eng kirel klou a ngesuil; ea di mekesai a kloklel a kirel di mo telkib a ngesuil; e ngikei el diak a ngerang er ngii a dengesuir.

28 Me chelechang kirir lolengeseu er a ikel ngarngii er tir loba mededaes el reng me a ungil reng el mo er a Dios, el mor tirkei el priest el ousbech a ngesu, oi, me a ngii di lechad el chebulang e di meau.

29 Me a ikang ale diluer tir, ele llechul a Dios el mler ngii; mete mirrael melemalt er medal a Dios, el kaingeseu el momui er a tekoi er a klechad me a tikingel a Dios er a ikel lousbech me a ike el sorir.

30 Elechang ea ikang a dilubech er a chelsel a Mormon, Oi, er bita er a ralm er a Mormon, er a chelsel oreomel er bita er a ralm er a Mormon; oi, tiael chutem er a Mormon, tiael diosch er a Mormon, tiael chereomel er a Mormon, ng merael klebokel mor chosengir tirkel mle er ngii e mlochu medengelii Osobelir; oi, te merang el ngeltengat, lete mo mengitakl loldanges er ngii el diak a ulebengelel.

31 Me a ikang el tekoi a dilubech er a oliochel er a beluu, me llak bo lodengei a king.

32 Endi chelechang ea tara klebesei ea king a mlo metik er a kora ngodech lomerael er a delongelir a re chad, meng dilu er a re mesiungel mete mlo omdikm er tir. Mitiael sils er a bol mekideb el morrenges a tikingel a Rubak, ea King a miltik er tir.

33 Me chelecha King a dulang, a Alma choldubech er a rechad el mo omtok erngii; tia mlo uchul e nguleldurch er a resoldau er ngii el mo chomekeuad er tir.

34 Elechang ea Alma me a rechedal a Rubak a rirenges chisel omrolir a resoldau er a King; me te ngilai a tento ertir me a telungalek er tir e chiliis el mo er a chelsel oreomel.

35 Ea ildisir a bekord mlar euang el dart me a okeim el ngar.