1 Elecha King Benjamin er a bochael merek el melkoi a tekoi el anghel er a Rubak a diluer ngii, e ngulmerk er a chosengel mor tia el lildois er a rechad, ea lomes e tedi mla mo blengkangk er a chutem le dakt er a Rubak a mla moertir.

2 Me te mlo ungil mes a teletelel a klechad er tir, el lelmuut el ngariou er a chebechab er a chutem. Me telilangel mle ngerir el kmo: Ea bom chebkemam e beskemam a tngakireng er a resechel a Kristo, me bol sebechel mengubet a kentemam, me a rengmam bol beches; le kimoumerang er a Jesus Kristo el Ngelkel a Dios el milebii babeluads me a bluulechad, me a rokui el tekoi; el ngii a me metengel me teloi er a rengalk el chad.

3 Me chelecha bochal merek el melkoi a ikael tekoi, ea Reng er a Rubak a mle ertir, me te mlo mui er a deuel reng, e mla nguu a ngebetel a kentrir, meng mlorngii a budech er a rengrir, leng mle mesisiiech a klemra er tir er a Jesus Kristo el dirke mei el diuaia ikel tekoi el King Benjamin a diluer tir.

4 Me a King Benjamin a luutael mekngii a ngerel e mocha melekoi er tir el kmo: kemiu el sechelik me a rodam er ngak, me a rechedak me a rechad er a beluak, ngesoak lomeklatk er kemiu el kmo; merengs ebo modengei a ulebongel el tekoi el bo kulkoi er kemiu.

5 Kamomes, alsekum a klemedengei er kemiu er a klungiolel a Dios a mlamok a medemiu me bocha modengei el kmo, ng diak komngrang, e diak a belkmiu, e uaitia klikingliu–

6 Ak subedmiu el kmo, alsekum komla mo medngelii a klungiolel a rengul a Dios, me a diak el mochit el klisiichel, me a llemesel me a klungel a rengul, me a ulserechakl reng er Ngii el kirir a rengalek el chad; me a dirrek el tngakireng er ngii el milketmokl er a uchelel a bluulechad, me bol sebechel osobel mor ngikei el moumerang er a Rubak, meng mo blak a rengul loltirakl a llechul, e melmolem er a klemrang el mo er a ulubengelel a klengar rengii, ak melkoi er a klengar er tial bedenged–

7 Ak melkoi el kmo, ng kaikid ngikel el chad el monguu osobel, loeak a tngakireng el dimla mekedmokl er a uchelel a bluulechad el mo er a rechad, lulmuchel er a rebetel a Adam, me a rengar er chelechang, me a redirk mo ngar el mo lmuut er a ulebengelel a bluulechad.

8 Me tiaikid a teletael el luuchul eng ngarngii chosobel. Ng diak a ngodech el teletael eng mo sebeched el mo suobel, ng di tiakid el mla medung; e diak a ngodech el teletael mouchul a chad a sebechel mo suobel, ngdi ikaikid el blekradl blak dung er kemiu.

9 Moumerang er a Dios; moumerang el kmo ng ngarngii, e Ngii a mileob a rokui el tekoi el ngara babeluades me a ngara bluulechad; moumerang el kmo, ngii olab a rokui le llomes, me a rokui el klisiich er babluades me a bluulechad; bo moumreang el kmo, a chad a diak lodengei a rokui el tekoi el Rubak a sebechel medengei.

10 E mluut el moumerang el kmo, ng kirem el mo mekngit a rengum er a kentim e diak komluut el mong, e nguu a rengum el moriou er medal a Dios; e olengit er Ngii loba blak el reng me lousubes er kau; e chelecha lsekum koumra ikal rokui el tekoi e bo moltirakl.

11 E elcha ngak a lmuut el melkoi a ikel bla kulkoi el kmo, elecha el bocha modengelii a klebkellel a Dios, me a lechub e bla bo modengelii a klungiolel, e bla mechermii a beltkil a rengul, me blam nguu a ngbetel a kentim, el mouchul a klou el deuel reng er a delbengiu, me a uchul meng soak, a llak mobes, e blechoel dobedebekii a klou el klisiichel a Dios, me kemiu el diako mngerang, me a klungiolel me a kellou el reng er Ngii el kiriu ar diak a belkmiu, mengai a rengmiu el meriou el mo er a berteklel a kle ngariou el reng, e momkedong er a ngklel a Rubak er a bekel sils, em dechor el delalm er a klemerang el kirel a ikel tekoi el mo duubech el mildung er a ngerel a Anghel.

12 Kamomes, ak subedemiu el kmo, chobom uaisei eng mo blechoel ngarngii er kemiu a deuel reng, me ko momui er a beltikelreng er a Dios, me a kentmiu choblechoel nguu e ngubet el kirel, me kemiu a mo mengerngird er a klemedengei me a klebkellel ngike el lulemeob er kemiu, me a lechub eng klemedengei er a llemalt me a klemerang.

13 E mo diak er a uldesuiu a melmall er a tara chad, e mo kiei el ngara budech, e mo mesa ngii dile chad a melmalt lomeruul leng mlo kirel.

14 E diako bechititerir ar ngelkiu me bol sengrenger, me a lechub el bol meau; me a lechub e bechititerir me lolmall a llechul a Dios, ele kakeoad el kauteketok er a delongelir, e losiou er a diablong el ngii a merreder er a klengit, me a lechub eng mekngit el chelid el lullekoi er ngii ar demad er a ngara mong el cheraro er a rokui lungil tekoi.

15 Ko bai molisechakl er tir el mo merael er a rael er a klemrang me a ulserchakl reng, ko molisechakl er tir me bol kaubeltik el reng, el kaingeseu.

16 Me kemiu a dirrek el mo olngeseu er tirkel mousbech a ngeseu er kemiu; ko momsa chad a ikel ngii a lousbech el ngarngii er kemiu; e diako molutii a chebuul al mer kau el me olengit a ngeseu me modikii me bol metacherbesul.

17 Alta te kmo, bo bechirei eng di mle ngii lochudii a chelbulel meng diak bo kulengeseu er ngii, ka bok bsa kall, me a lechub engii dil ngerang er a rolel a ngeseu, le tiaia kuk mlo kirel belsel–

18 Ak subedau e kau el chad el kmo, ngikel mo uaisei a kmal klou urelel kirel mo ouuchel a rengul er a kentil; lel sekum eng diak bol mekngit a rengul kirel omrellel, eng mo remiid el mo cherechar leng diak a blingelel er a Rengedel a Dios.

19 Ka momes, kid ng diak de rokui el di mechebuul me dultuil er a diosisiu el Dios, el ngii a uchul a rokui el ngarngii er kid; al kall me a le bail me a le kolt me a le silber, me a ngii dil ngerang el kid a ungil besud er ngii.

20 Ka mosang, chelchal taem e kemiu tia er a cho momekedong er a ngklel, lolengit er ngii er a ngebetel a kentmiu. Meng mlekerang, ng mlo diak a belkul ontemiu? Ng diak, ngbai ulecheblii a Reng er Ngii lekoer kemiu, e riruul a rengmiu meng mlo mui er a klungiaol me a ngeriu a mlo diak el sebechel tuobed a tekoi er ngii, le deuel reng el mle er kemiu a kmal mlo imong.

21 Me chelechang, alsekum ea Dios el Ngii a ulemeob er kemiu, me ko multuil er ngii er a klengar rekemiu, me a rokui el ngar ngii er kemiu luuchul me kom ngar, e dirrek el meskemiu a rokui el molengit e lokiu a llemalt, me a klaumerang loumerang el kmo ng mo meskemiu; alsekum eng uaisei, eng locha kmal kiriu kuel merous el mo er a tang me a tang.

22 Alsekum ea chad el kmal metechrebesul meng melengit a ngeseu, e kau a mo oukerrekriil er ngii e otubii, e kau a merang el mo melmalt sel bo mobals, le kau a mekreos a ngarngii er kau, el merang eng diak le kloklem leng kloklel a Dios el dirrek el merreder er a klengar er kau; e diak molengit er ngii, me a lechub e mouchel a rengum er a omrellem.

23 Ak subedemiu el kmo alii er ngke el chad el mo uaisei, le ngii me a kloklel a di mo nguemed; elecha ikael tekoi a kulkoi el mor tirkel merau er a kloklel a bluulechad.

24 E elechang ak lmuut el melkoi el mo er a re mechebuul, kemiu el diak a kmal ngerang er kemiu, endi ngarngii a sebechel mousbech er a bek el sils; ak melkoi er kemiu el kotoar er a chebuul leng diak a ngerang er kemiu; ng soak chomdu er a rengmiu el kmo, ng diak kulngeseu leng diak er ngak, olko ngarngii, eakmsang.

25 Elechang ealsekum ke medengelii er a rengum chouaitiakid eng diak le kentim, ealsekum eng diak, e kau a mla medebeakl; ea dellebeklem a melmalt eleng nguibs a rengum er a dirkak lekoer kau.

26 E chelechang ea mo kirel aikel tekoi el blak dung er kemiu – a kmo, a mo rolel eng mo sebechel mengubet a kentmiu er a bek el sils, meng mo sebechiu el merael klikiid er medal a Dios – a kuureng me komo merous a ngarngii er kemiu el mo er a remechebuul. A chad me sel ngarngii er ngii, e bo mokelii a songeranger, e milii a dimeau, e oldingel er a re smecher e omesterir aikel lousbech el kirel a tekoi er a delbengir me a bedengir el loltirakl a lengesonges er ngii.

27 E bom kerkikl aikal tekoi me lemekedmokl loeak a llomes me a klebechel lomeruul, leng diak a mengerchir er a chad el mo bekerurt er a klisiichel. Endi ng kmal kirel mo blak a rengul meng mo sebechel nguu a ngkedel; le rokui el tekoi a kirel moltirakl er a melemalt el blechebechel.

28 Meng soak a llak mobes el kmo ngikei el llongir a kloklel a ta er ngii a kirel lolutii sel lilengir loltirakl er a telbiil, le llak eng mla mo kentim; me a llak e kau a mouchul ea tar kau a morullii a klengit.

29 E chelechang diak el sebechek el subdemiu er a rokui el teletelel omruul klengit, leng betok a rael me a teletael diak el sebeched el masech.

30 Ndi ikakid a sebechek el dmuer kemiu, alsekum eng mo diak bo mkerkikl el kiriu me a uldesuiu, me a tekoi er a ngeriu, me a omerelliu, e moltirakl a llechul a Dios, e molemolm loumerang aikel bla mrenges el kirel sel lemei a Rubak, e sel lulebongel er a klengar er kemiu e ko kmal di mo remiid. E chelechae kau el chad, mlatk me llak bomriid.