1 E chelchang e momes e betik er a renguk lodam er ngak, alta ko momdasu er a rengmiu el kirel a kmo, ko mo mekerang ruriul er chobla mtuu er a siseball. Endi ngerang me ko momdasu el uai sei er a rengmiu el kirel a ikal tekoi?

2 Ko mla bes er a kdu er kemiu el kmo uriul er a chom nguu Edaol Reng eng sebechiu el melkoi el uaia re anghel? E chelecha ko mekerae melkoi el uaia re anghel al dibus Edaol Reng?

3 A re anghel a mengedecheduch loba klisiichel Edaol Reng; me a uchul me te melkoi a tekingel a Kristo. Mi sei a uchul ak melkoi el kmo, bo medinges er a tekingel a Kristo; le tekingel a Kristo molecholt er kemiu a ikel kiriu el meruul.

4 Me chelcha lsekum ak momerek el melekoi a ika el tekoi, e kemiu a di diak modengei, eng belkul a kmo, ng dirkak molengit, me a lechub e molngod; mi sei a uchul eng dirkak bom siseb er a llomes, e bai mo remiid er a iilkolk.

5 Ka morrenges, ak lmuut el dmu er kemiu el kmo, sel chomsiseb er a siseball e menguu Edaol Reng, e ngii a molecholt er kemiu a ikel kiriu el meruul.

6 Morrenges, tiai kid osisecheklel a Kristo, meng dikea lmuut losisechakl el mo er ngii, ng di merekmo sel le belcholt er kemiu er a tech. E sel le belcholt er kemiu er a tech, ea ikel tekoi el bo lolekoi er kemiu a kiriu el moltirakl.

7 E chelchang e ngak el Nephi a dikea kulekoi le Edaol Reng a mla dueb a tekingek, meng di ngaku el lmangel leng diak oumerang, e klou a delngerenger, me a bleot el reng, me a keldidai el reng er a rechad; meng diak losiik me bo lodengei, me a diak bo lomtab a meklou el mellomes el tekoi a le mechedreder el mor sel kmal beot lomsodel.

8 Elchang e betik er a renguk lodam er ngak, ak umdasu e komdirke rrau a rengmiu, meng mekngit a renguk leng kirek el lemuut el mo melkoi el kirel tial tekoi. Alsekum ko morrenges er a Reng el ngii olisechakl er a rechad er a omeluluuch; e ko momdenge el kmo, ng kmal kiriu el meluluuch; le mekngit el chelid, a diak lolisechakl er a chad el kmo moluluuch, ng bai olisechakl er tir el kmo ng diak le kiriu el meluluuch.

9 Ka morrenges e kulekoi, ng kmal kiriu el mo blechoel meluluuch, e diak o mesaik; me a ngii di le ngerang el moruul mo er a Rubak, a kot eng kmal kiriu el meluluuch el mo er a Edam loba ngklel a Kristo, meng mo chemedolii a urelem lekor kau, me ngii lurrelem a mouchul a klungiolel a delbengem.