1 Elecha kmelkoi er kau el Jakob. Kau a mle kot el kulchellau er a ikel sils el blok arm er a chelsel oreomel. Me sera chomkekrei eng mle betok longarm me a klengit el reng chobloer ngii, le rubekmiu el mlo mekngit a teletelir.

2 Endi chelechang e Jakob, kau el kot e kulchellau er a dengar oreomel, a ungil medngelii a klisiichel a Dios; me a ongarm el bloer ngii a mouchul a klisiichem.

3 Me chelchang a reng er kau a mo ngeltengat, e mo kiei el ngara budech lobengkel obkum er a Nephi; Ea klengar re kau a mo mechoit el mesiou er a Dios er kau. Seia uchul ea kmedengei el kmo, ke mla suobel, lokiu a melmalt el Oseblem; le kelma mesang er sel le terka temel a rokui el tekoi, e ngii a mei el mo olsobel er a rokui el chad.

4 E kau er sera chomkekrei, e ke milsa klebkellel; me ke ngeltengat el diuai tirkel el tir a momesang er a tech el ngii a mo olsisechakl er tir; ele Reng a diosisiu er chelii, me chelechang, me a mo cherechar. Me a rael a mla mekedmokl, er sera rebet er a chad, a rolel e kede mo suobel a mo er a ngii dilechad.

5 Ea rokui el chad, a di ngar ngii a klaodengei er tir el sebechir el medengelii a ungil me a mekngit. Ea llach a mla mei er a chad. Me a bo doba llach en diak a chad el klikiid; me a lechub e kede kmo, a llach a uchul ea chad a ngii a chelsimer. Oi, me a bo doba llach er a klechad e te mil chesimer; me a dirrek el bo doba llach er a reng, me te dirrek el diak boltab er a ngarngii a klungiaol, e mo remiid el mo er a klengit el reng el mo cherechar.

6 Me chelcha roled el mo suobel a mei loiak a Edaol Messiah el ngii a mui er a klisiichel a Dios lolsobel me a klemerang.

7 Kamosang, ngii a di mle ngii el mlo melenget el kirel a klengit, meng mo mekekad aikel el mo metemall el llach, el kirir tirkel mo llmangel a rengerir, e ouchel a rengerir; e diak a ngodech el mekekad a belsel kirel a meltemall el llach.

8 Miseia uchul meng mera el klou a ultutlel bo lodengei ika el tekoi a rechad er a bluuelchad er rokir, e bo lodengei el kmo, ng diak a tech el sebechel mo er medal a Dios, el diak lultuil er a omerellel, me a kle chelbechub er ngii, me a ngesuil a Edaol Messiah, el mo tongetengii a klengar rengii er a tech, e liluut el nguu loba klisiichel a Reng, meng mo sebechel mo erngii okiis er a kodall, el ngii a mo kot el mo mekiis.

9 Meng ngii a kot el rodech el mo er a Dios, meng mo kudmeklii a ungi delwill el mo er a rokui el ngalk el chad, me tirkel moumerang er ngii a mo suobel.

10 Meng tiaikid lungil deluill a uchul me a rokui el chad a sebechir el mo er a Dios; seia uchul me temo dechor re medal, el ngii a mo oukerrekriil er tir loba klemrang me a kle chedaol el ngar er ngii. Miseia uchul me a ulebengelel a rokui le llach el le bilskid a Ditang el Edaol, a ngar ngii a telkael belsel, e tial blals el telkael, a dita berredel ngii me a deuelreng el telkael ngara bitang, el ngii ochotii a belkul a tngakireng.

11 Ng kirel ngar ngii erbitang el kautok er a rokui el tekoi. Alsekum engdiak, e kot el kulchellii er akngara oreomel, en diak el sebechel ngar ngii a ungil tekoi, me a lechub eng mekngit, me a lechub eng chedaol me a lechub el chelbuul, me a ungil me a lechub el mekngit. Me a rokui el tekoi a di mo tang; Malsekum eng ngar ngii a ditang el bedenged, eng kirel lulkeuad, leng diak a klengar me a kodall el diak a uldikel me a budech, me a deuelreng me a klengit el reng me a omelechesiu me a lechub en diak domelchesiu.

12 Me a leuaisei e ngulbeob el diak a belkul; meng dimlak a uldasu el kirel a uchul e ngulbeob. Me a leuaisei eng tomellii a llemesel a Dios me a uldesuel kirel a diak a ulebengelel, me a klisiichel me a klechubechub er ngii me a llemeltel.

13 Me a lsekum e ke kmo ng diak a llach, eng kirem el mocha kmo ng diak a klengit. Me a lsekum e ke kmo ng diak a klengit, eng mocha kirem el kmo ng diak a llemalt. Elelak a llemalt e ng diak a deuelreng. Ea lsekum eng diak a llemalt me a deuelreng, e ng diak a blals me a lechub eng klengitelreng. Ea Isekum eng diak a ika el tekoi eng diak a Dios. Ea Isekum eng diak a Dios, e kid me kede dibus, me a beluulchad meng diak; leng dimlak lobeob a ngii di le klalo, me a lechub eng ngomruul tekoi, me a lechup eng tekoi el doruul el kirel; me a le uaisei eng locha di mlo diak a ngii dile ngerang.

14 Elecha rungalk, ak melkoi er kau aikang el lorellem e sublem; ele Dios a mera el ngar ngii, e Ngii a mleob a rokui el tekoi, me a ianged me a chutem, me a rokui el tekoi el ngar er a chelsel, luldekial a tekoi el kid a meruul, me a tekoi el doruul kirel.

15 Meng mo sebechel mekedmokl a uldesuel kirel a mo cherchar el klengar er a chad, me a uriul er a le bebii a kot el demad me a delad me a charm er a ked, me a suebek el charm er a mlidiul, me a uldekial a rokui klalo el lulbeob, eng kirel mocharngii a chomtok; me a blul rodech lomtok er a kerrekar er a klengar; a tang a merkos me a chimong a mechuuached.

16 Miseia uchul a Rubak el Dios a milchere chad meng dingii el melilt a loruul. Me a chad a diak el sebechel melilt alsekum eng diak a ngara bitang me a bitang e mengususeu er ngii.

17 E ngak el Lehi, lultuil er a ikel blak chuiu, a mlo medengel kmo a anghel er a Dios, a ngar ngii, leng ngelluches el kmo, ng rirebet er a ianged e mlo diablong, leng mirruul a ikel mekngit er medal a Dios.

18 Ng rebetel er a ianged auchul meng mlo mekngit el mo cherechar, meng mle soal a rokui el chad a bo le mekngit. Me ng kaikid el chuodel bersoech, el diablong, el demal a rokui el blulak, a dilu er a Eva elkmo: a chom kelii tia el blul rodech en diak o mad, ke bai mo uaia Dios el medengelii a ungil me a mekngit.

19 Me a Adam me a Eva er a le kelii a blul rodech e te mlodik er a sers er a Eden, e mlo oureor er a chutem.

20 Me chelecha te mlo oungalek el mlo uchul a telungalk er a bluulechad.

21 Me a klengar er a rengelekel a chad a mlo mekekmanget leng mle soal a Dios a bo el sebechir el mo ouuchel a rengrir er a kentrir er a dirkel chad; mitia mlo techall el le bilsterir a Dios meng kilmanget a klengar er tir, leng mle llach el Rubak el Dios a milsterir a re chad. Leng mlar ngii a llechul kmo, a rokui el chad a kirir el mo ouuchel a rengrir er a kenterir, leng ngulchotii er a rokui el chad el kmo, te ririid leng kentil a kot el Edam me a Edil.

22 Egndi chelechang alsekum a Adam a dimlak el temellii a llach eng dimlak el rebet, meng di kiliei er a sers er a Eden. Me a rokui el tekoi lulbeob a dimlo uai ngii er a le kot lobeob; e di uaisei el mo cherchar el diak a ulebengelel.

23 Meng dimlak bo loungalk, e dimle uaisei el mekedung, e diak bol deu a rengrir, leng diak lodengelii a klengit el reng; el diak loruul a ungil leng diak lodngelii a mekngit.

24 Endi, a rokui el tekoi a mla mekedmokl er a llemesel ngikei el medengei a rokui el tekoi.

25 A Adam a rirebet meng mo sebechel mor ngii a chad; ea chad a ngar, meng mo sebechel mor ngii a deuelreng er a rengul.

26 Me a lemei Messiah er se el bochale temel a rokui el tekoi, el mo olsobel er a re chad er a rebetir. Misei el le seblang er a rebet er tir, eng mla mo sebechir el ditir er chelcha el mor medad le temla mo medngelii a ungil me a mekngit; meng di tir el melilt a loruul, el diak omesterir a chelngelir; ng di merekmo le blals el mor ngii er a uriul klebesei el kirel a miltemall el llach el bla le beskid a Dios.

27 Sei a uchul me a chad a di ngar se el lungil er ngii a reng er a tech, le ike el kirel mor ngii a di bla lengai. Mal seual eng ngiltii a budech me a diak a ulebengelel klengar lokiu a klou el meruul a deluill el kirir a rokui el chad, me a lechub e te ngiltii a klsibai me a kodall, le te mechetakl er a klisiichel a Diablong; leng di blechoel mengesuseu er a rechad me le bora ringel el di uai ngii.

28 Me chelcha e rungalk ea kuureng me momes el mo er a klou el meruul a deluill, e bo moltirakl a meklou a ultutelel el llechul e bo moumerang a tikingel e mngiltii a diak a ulebengelel klengar loltirakl er a Reng er Ngii el Edaol;

29 Ea llak bom ngiltii a kodall el diak a ulebengelel, loltirakl er a soal a tech me a mekngit el ngar ngii, el msa klisiichel a reng er a diablong me ngorkedau e ngoikau el mo er a beluu er a ngau meng mo merreder er kau el nga er a cheungel a rengedel.

30 Akmla dmu ika el sesel tekoi leko er kemiu er rokui el ngelekek er a ika el luriul klebesei er a kle kekrongel el tedeb el temek; el blak ngiltii a ungil er ngii le kmlo oltirakl a tekingir a re profet. Meng diak a ngodech el kusiik er ngii, ng di ta el diak a ulebengelel klungiaol mo er a delbengiu. Boluaisei.