1 Ka momes, temo betok a ngar ngii er sel sils, el bo kuruul a mengasi reng lurreor er a delongelir lotireklii sel telbilek el mlor ngii ra delongelek ngak me a rengalk el chad, me a kelmuut el mo tometii a chimak el mong me ngongerung el taem el bocha kungudel er a rechedak, el tir a ngara blai er a Israel;

2 E dirrek el mo lotkii a tilbilek kau me ngak e Nephi, me a dirrek el mo er a demam el kmo, ng diakubes er a remo ngelkem, me a tikingir a rengelekem a mo tuobed er a ngerek el mo er a remo ngelekem; me a tekingek a mo bekrurt el remurt el mo er a ulebengelel a bluuelchad er rokir el mo olkael mo er a rechedak, el chad er a blai er a Israel.

3 Me a tekingek el mo bekerurt el remurt a mouchul me a reisentael a mo melkoi el kmo: A Biblia! A Biblia! A Biblia dobang, meng diak el sebechel lmuut el mo er ngii a bebil er a Biblia.

4 Endi chelchang tiakid a tekingel a Rubak el Dios: Ake el mekeblung, a Biblia bole nguu; ng mo ngara re chiJews el mei, el tir a chedak er a telbiil er a irechar. Me to ureng a sulir a re chiJews, e luuchul a tir choba Biblia? Oi, ng ngera belkul a tekingir a re Isentael? Te mednge chelebed me a ureor me a ringel el le blar ngii a re chiJews, me a omngull er tir el mer ngak, meng nguuchul eng ngar ngii chosobel el mo er a re Isentael?

5 E kemiu el Isentael, komla melbedebek er a re chiJews, el chedak er a chuodel telbiil? Ng diak, ko bai mla melebeakl er tir, e ksib a rengmiu er tir, e dirkak molasm el mo mengudel er tir. Engdi chelcha, ak ngmai ikang er rokui el locha er bebul a btelmiu; le ngak el Rubak a dirkak kubes er a re chedak.

6 Ke keblung, kau el kmo: A Biblia ki mobang, meng diak ki mousbech a lmuut el bebil er a Biblia! Ng dimlak el chad er a chiJews a uchul me ko mobang a Biblia?

7 Ng diak modenge el kmo ng ngarngii a betok el kakrous el beluu, el diak dil tang? Ng diak modenge el kmo, Ngak el Rubak el Dios er kemiu a ulemeob er a rokui el chad me ak medengelterir tir kel ngara iuns er a cheroid el daob; me ngak a merreder er a ianged el ngar bab me a beluulechad el ngariou; me ak merous a tekingek el mora re chad. Oi, ng mo er a rokui el beluu er a beluulechad?

8 Meng ngera ko mengiremrum er ngii, komuaisei le kemiu el mo ngmai a lmuut el bebil er a tekingek? Ng diak modengel kmo, cheldechedechal cherul beluu a sioning lekor kemiu el kmo ngak a Dios, meng diak kubes er a tang me a ta er a beluu? Me sel kulekoi el mo er a tara beluu, osisiu el tekoi a kulkoi el mo er a tang. Me sel bol dak el merael ngii lerul beluu, me a tekingir meng mo dmak el merael.

9 Ak meruul er tiang me bo lodenge re betok el kmo, Ngak osisiu er chelii, me chelechang, me a diak a ulebengelel; me a tekingek el kulekoi a di ngar sel lungil er ngak. Me sel kdelii a tal tekoi, e lak mousbech el kmo ng dikeal sebechek el lmuut el dulii a chimong. A urrelek a dirkak le bol merek; me a diak le boel merek er a ulebongel er a re chad, me a lechub e bol merek er sel taem el mo cherechar.

10 Me a Biblia el mobang a diak luchul me bo mousbech el kmo, a rokui el tekingek a ngara chelsel; me a lechub e mousbech el kmo, ng dikea kbo kuldurch me bol meluches a lemuut el bebil.

11 Le ngak oldurch er a rokui el chad, ar ngar ongos me a ngebard, me a diluches me a dims, me a iuns er a cheroid el daob, me temo meluches a ikel bo kulkoi er tir; le ikel babier el mo meluches a bo kukerrekeriil er a beluulechad, el di mo chad me a omrellel lultuil er a ikel le lluches.

12 Kamosang, ak mo melkoi ea re chiJews a mo meluches; ak klmuut el mo melkoi ea rechedal a Nephi a mo llmuches, ak dirrek el mo melkoi el mo er tir kel bebil er a kebliil er a blai er a Israel el kulrrael er tir el mor cheroid, e temo meluches, e dirrek el mo melkoi el mo er a rokui el beluu er a beluulechad temo lmuches.

13 Ea tara klebsei ea rechad er a Jews a mo ngmai a tekingir a rechedal a Nephi, me a rechedal a Nephi a mo ngmai a tekingir er a re chiJews; me a rechedal a Nephi me a re chiJews a mo ngmai a tekingir tirkel ririid el kebliil er a Israel, me a ririid el kebliil er a Israel a mo ngmai a tekingir er a rechedal a Nephi me a re chiJews.

14 Ea tara klebsei, ea rechedak el chad er a blai er a Israel, a lmuut el mo mechudel e mo remei er a blurrir el kloklir, me a tekingek meng mo mechudel mo ditang. E ngak a mochotii el mo er tirkel loldechelakl e lomtok a tekingek e chomtok er a rechedak, el tir a chad er a blai er a Israel, Ngak a Dios, el kildmeklii a telbiil ngak me a Abraham el kmo ngdiak kubes er a remo ngelkel el mo cherechar.