1 Me chelchang, e ngak el Nephi a mo ouchais a ulaoch el lullekoi a demak el kirel a Josef el mlengai el mo er a Egipten.

2 Meng merang lulemlaoch el kirir a remo ngelekel. Me a ike el lulaoch el liluches lulemlaoch a diak el betok a meklou a belkul uai ngii. Me ngulemlaoch el kiram, me a mo ngar medad el cheroll; aika di lluches er a ike el tibereberk el sintsyu.

3 Elecha demak er a bocha le merek el louchais a lulemlaoch a Josef, e ngulmekedong er a re ngelkel a Laman el sechal me a redil e dula er tir el kmo: Rengelkei el ngelkel a kot el kulchellii, ng soak chobo mrenges a ika el tekingek.

4 Le Rubak el Dios a mla dmung: Alsekum e ko moltirakl a llechuk eng mo ungil besmiu er tial beluu; endi bo llak moltirakl a llechuk, e ko medort el mo er cheroid er medak.

5 Me kamosang e re ngelkei, ngdiak el sebechek el mo er a debull e lak beskemiu a klengeltengat; ele kmedenge el kmo, alsekum e ko mukerour loeak sel kiriu loeak ngii, eng diak mobes er ngii.

6 Me a lsekum eng ngar ngii a dellebeakl, ea kmeskemiu a klengeltengat, me le mengai er kemiu a dellebeakl e le meked er bebul a bterrir a rulemechell.

7 Me tial klengeltengat a mo uchul ea Rubak el Dios a mo diak le bechikemiu mem ngemed; meng mo chubekemiu me a re ngelkiu el mo cherchar.

8 Elecha bocha le merek a demak el melkoi er a rengelkel a Laman el sechal me a redil, e ngulmekedong er a rengelkel a Lemuel sechal me a redil me leme er medal.

9 E mocha melkoi er tir el kmo: Rengelkei, el ngelkel ongerul ngelkek el sechal; ak meskemiu osisiu el klengeltengat el kbilsterir a re ngelekel a Laman; meng diak di bom ngemed er rokui; ea uriul ea remo ngelekiu a mo ngeltengat.

10 Me a uriul er a demak er a bocha le merek el mengedecheduch er tir, eng mlo mengedecheduch er a re ngelkel a Ishmael el sechal, itir el rokui el blai.

11 A bocha le merek el melekoi er tir, eng mle ngedecheduch er a Sam el kmo: ke ngeltengat kau me a re ngelkem; le ko mo oubeluu er a beluu el ua obekum er a Nephi. Me a rengelekem a mo dmak tir me a rengelekel; e kau a di mouaia obekum, me a re ngelekem a di mouaia rengelekel, me kau a mo ngeltengat er a rokui el sils er kau.

12 Elecha uriul er a demak el Lehi er a le merkong el mengedecheduch er a telungalk er ngii, er a ikel ngara rengul, me a Reng er a Rubak el mlar ngii, eng kmal chudlang, me a le merma temel eng medei me te mocha doklii.

13 Elecha ngdiak le betok el klebsei er a uriul er a kodellel, ea Laman me a Lemuel me a re ngelekel a Ishmael sechal a mlo kesib a rengrir re ngak er a ngerrelel a Rubak.

14 Le ngak el Nephi el mlo durech el mo melkoi er tir a tekingel, me a kdilu er tir a betok el tekoi; me a demak meng dirrek er a uchei er a le mad; meng betok er ngii el tekoi a lluches er a ike el bebil er a tibereberk el klalo; le klou er a ngeschel a cherechar a lluches er a ike el bebil er a tibereberk el kloklek.

15 Ea ikang a kuluches a ikel tekoi el kmal ngar ngii er a renguk, me a betok er a tekingel a Rubak el blotk er a tibereberk el sintsyu,. Le tekingel a Dios a deoureng el mei er a delbengek, me a renguk chomdasu el kirel, me a kmeluches el mo sublir me a klungiolir a rengelkek.

16 Kamosang, a klou el deoureng a me er a delbengek el kirel a tekingel a Rubak; me a renguk a blechoel lomdasu el kirel a tekingel a Rubak el blak ues me a blak renges.

17 Meng meral ngar ngii a klou el klungiolel a rengul a Dios meng mla cholt er ngak a meklou e mengasireng el urrerel, me a renguk a kmo: olkoi, ngak a meral mengelengalk el chad! Oi, ng mekngit a renguk le tial bedengek er a tech; me a delbengek a mengubechub le kngtik a uchul.

18 Ak mla meiengel er a ongitikaik, me a klengit a di mereched el soibes er ngak.

19 Me sel kusiik a ungil reng, ea renguk a lmangel le kngtik a uchul; endi kmedngel kmo ngtecha kuumera er ngii.

20 A Dios er ngak oltekau er ngak; e ulemekrael er ngak er a chelbulek er a kngar er a oreomel; e ulemes er ngak er a kngar er a daob loleong a toachel.

21 Ng mla tal bok mui er a beltikelreng er ngii, el di mlo mechitechut a bedngek.

22 Ng mla torekelterir a re cherreoek, me te mlomritel er medak.

23 Kamosang, ng mla remenges a lengelek a le mellomes, e meskak a klemedengei lokiu a ues a le klebesei.

24 Me a le mellomes e nguldalem a renguk, e mesisiich el meluluuch er medal, me a tekingek a tuobed el melemalt el mo er bab; me a re anghel a mla me metengel el me mengedecheduch er ngak.

25 Me a bebul osebkel a Reng er ngii, a bla le borngii a bedengek el mor bebul a kedidai el rois. Me a medak a mla mes a imong el meklou el tekoi, el diak le kirel moes er a chad; mi sei a uchul eng mlo mekull er ngak meng dimlak kuluches.

26 Me chelcha llsekum a kmla mes a meral meklou el tekoi, me alsekum ea Rubak a dimle ngii el nguu a rengul meriou, el di moa chad, e mle ldingel loba klou el klechubechub el reng eng ngera belkul llangel a renguk, me a delbengek le ngara klou el klengit el reng, me a techel a bedengek bo le mechoit, me a klisiichek bo le ngemed, leng chelitechetuk a uchul?

27 Meng ngera belkul bokmechitechut er a klengit el bedengek a uchul? Oi, ng mo ngeral bo kmechitechut er a ongitikaik, me ngikei el luuchul a mekngit a mei meng soiseb er a renguk el tomellii a budech er ngak e chomekringel er a delebengek? Ngera uchul meng kesib a renguk el kirel a cherroek?

28 Bekiis e delebngek! E lako di mchebecheb leng klengit a uchul. Moldanges e renguk, e lako bsa techall a cherreoel a delbengek.

29 Lak bo le kesib a rengum er a cherroek. E lak molas a klisiichek el kirel a ringel el mer ngak.

30 Moldanges e renguk, e mlangel mo er a Rubak e mdu: Rubak, akuldanges er kau el mo cherechar; Oi, a delbengek a oldanges er kau el Dios er ngak, e beduk luchul a kmo suobel.

31 Rubak, ngsebechem loseblii a delbengek? Ng sebechem el sobecheklak er a chimal a cherroek? Ng sebechem el ngosukak me ak chemoit a rokui el teletelel a klengit?

32 Me a chesmerel a beluu er a ngau le mechesimer er medak, le renguk a telemall me a reng er ngak a mengubechub! Rubak lako mchismerii a tungelel a llemalt er medak, me bol sebechek el merael er a ngariou el delongelel a ked, me di kngara blektakl rael.

33 Rubak, al sebechel e bilak er a bilel a llemeltem! E Rubak, mrellii a rolek mek chiis er a re cherroek. Al sebechel e mlemeltii a rael er medak! Ellako molecha olibsongel er medak e mededesii a rael bo kueak ngii, e llako molenget er ngak, e bai molenget er a re cherroek.

34 Rubak akdi mla oumrang er kau, e oumrang er kau el mo cherchar. Ng diak bok nguu a klaumera er ngak el loia er a chim er a tech. Oi, ng delbeakl ngikei el mo oumrang er a chad, me a lechub eng moultuil er a di klisiichel a bedngel er a tech.

35 Oi, ak mednge el kmo, a Dios a bkururau el mo er a ngii di le chad lolengit. Oi, a Dios er ngak a mo meskak a ikel kulngit el ngii a melmalt; e mo blechoel el mengedecheduch lekor er kau. Oi, ak mo lmangel lekor kau, e Dios er ngak, el beduk er a llemalt. Ng uaisei, a ngerek a di mo merael mor bab lekor kau, el beduk, e diak a ulebngelel Dios er ngak. Boluaisei.