1 Me chelchae betik er a renguk lodam er ngak, a kmla chemiu aikang me komo medngei telbilel a Rubak el bla le kedmokl ngii me a rokui el chad er a blai er a Israel.

2 Meng mla melekoi el mo er a re chiJews lokiu a ngerir er a reprofet, er a kot luchul el nga er a tara cheroll el mo er a tara cheroll el mo er sel taem el tir a lmuut el mo modak er a merang el ikelesia el longiil er a Dios; Misei etemo mechudel er a blurir me a merael chetmir, e mo merkoel kiei er a blurir er a beluu er a telbiil.

3 Ka morrenges e betik er a renguk lodam er ngak, ak melekoi er kemiu a ikael tekoi me bo lungil a rengemiu, e mokiis a btelmiu el mo cherchar, le Rubak a mo omekngeltengat er a rengelkiu.

4 Ak medngel kmo te betok er er kemiu a mla siik el blak a rengmiu el mo mednge tekoi el merkung; me a kmedngei el kmo kemiu a medngei el kmo, a techel a bedenged a mo mechut e mad; endi kede molab a bedenged e mo mesa Dios.

5 Oi, ak medngei el kmo, komedenglii el kmo, ng mor ngii a bedngel e mo chemolt er tirkel ngara Jerusalem, el ngii a kiblarngii el mei; me tiang a kirel mo uaisei, meng mo teloi er tir; leng diungil er a mesisiich lulemeob, meng kilngei el mo chuarm e mlo chederdall er a chad, er a bedengel er a tech, e mlad el kirir a rokui el chad, meng mouchul ea rokui el chad a mo chederdall er ngii.

6 Le kodall el mo er a rokui el chad, meng mo sebechel moureor a uldesuel me a kle chubechub er a ngar bab lulmeob, ngkirel mor ngii a klisiich er okiis er a kodall, me a okiis er a kodall a mei er a chad, le ngii el mlo ruebet; me a rebet a dilubech leng mlor ngii a klengit; me a chad a rirebet er a klengit, mi seia uchul me te mlengai el mo cheroid er medal a Rubak.

7 Me chelchang kirel morngii a kot el klou el tngakireng ele llak boel kot el klou el tngaki reng, e tiael mo mechut a diak el sebechel mo diak bol mechut. Me a le uaisei e sel mle kot el belsel a chad a dimlo uaisei el mlo diak a ulebengelel. Ea blo leuaisei, e tial tech sel lebo ra chutem, eng dimo braom el mo mechut er a delal chutem, e dikeael lluut el mekiis.

8 Ea, ngellemsel a Dios, ng kle chubechub me a reng el Dios er ngii! Me kamesang, alsekum ea bedenged er a tech a dikeael lluut el mekiis, ea delbenged a mocha chederdall er ngikei el anghel mlodik er medal a diak a ulebngelel Dios, meng mlo diablong, el dikeael lluut el mekiis.

9 Me a delbenged a mo uai ngii, me kede mo diablong, mo anghel er a diablong, el mo modik er medal a Dios er kid, me kede mobengkel a demal a blulak, e ngara ringel diuai ngii; Oi ngikei el ngii a ulumulak er a kot el demad me a delad, el rirellii el lekong anghel er a llomes, e oldurech er a rengalk el chad me temo meruul a berrotel telbiil lomkeuad er a rechad, me a betok el teletelel a berrotel el tekoi er a ilkolk.

10 Ea, ng merael klou a klungiolel a Dios, el mla kudmeklii a rolel eng mo sebeched el chemiis er a chimal ngikael kengaol mengelengalk; Oi ngikael kengaol mengelengalk, e kodall, e beluu er a ringel, el ngii a kumekedong er ngii el kmo, kodellel a bedenged, e dirrek el kodellel a delbenged.

11 Endi ng rolel a ngelsuil a Dios er kid, el Ditang el Edaol er a Israel, me tiael kodall el kulkoi er ngii, el di teluk a temel a mo olluut er a remlamad er a kodall er a debull.

12 Me tial kodall el kulkoi er ngii el ngii el kodellel a delbenged, a mo olluut er tirkel mlad er ngii; el ngii el kodellel a delbenged a beluu er a ringel; me a uchul me a kodall me a beluu er a ringel a kirel olekiis er a ulekodellir, me a bluu er a ringel a kirel loltobed er a re chelsimer el deleb, me a debull a kirel loltobed er a re chelsimer el tech, misei a bedenged me a delbenged a llmuut el mo dmak, tiaikid a klisiichel okiis er a kodall er a Ditang el Edaol er a Israel.

13 Ngar bab el lungil a uldesuel a Dios er kid! Le sel bitang ea baradis er a Dios a mo cholluut a delbengir a remekedung; me a debull a mo cholluut a bedengir a re mekedung; me a delbenged me a bednged a llmuut el mo dmak, me a rokui el chad a dikeael lluut el mo mechut er a chutem, me a kale mad, e merokoel ngar, el di uaikid er a ungil klemedengei er kid er chelchael le ngarngii a bednged, endi a klemedengei er kid a llmuut el kmal mo mellomes.

14 Misel e kede kmal moungil medenge telmelled, me a klikingeled me a klemeau er kid; me a re melmalt a kmal mo ungil medngelii a deu el reng er tir, me a lemeltir el mo bliull er a klikiid, oi, el ngii a bail er a llemalt.

15 Me chelcha rokui el chad sel lengelakl er a kot el kodall el mo er a klengar, meng dikeael lluut el mad, eng kirir el mo dechor er medal a kingall er a kerrekriil er a Ditang el Edaol er a Israel; eng mochu tmaut a kerrekriil, me temo mukerrekriil el loltirakl er a edaol kerrekriil er a Dios.

16 Me ngulterkokl, el diua Rubak el ngar; a diak a ulebengelel tekingel a Rubak el Dios a diak bo lengemed, el ledilung: tirkel melmalt adi melmalt, me a re kikiongel adi kikiongel; me tirkel kikiongel a diablong me a reanghel erngii; me temo er a diak a ulebengelel ringel; el mlekedmokl el kirir; me a ringel mortir a uaia diosch el ngau me a mekeald el bad el nguil a di kmard el mo cherchar el diak a ulebengelel.

17 Ng merael klou a lemeltel a Dios er kid! Leng di motirakel a rokui el tekingel, leng mla tuobed er a ngerel, me a llechul a kirel di motmaut.

18 Endi chelchang e tirkel melmalt, a re santo er a Ditang el Edaol er a Israel, tirkel mlamourang er a Ditang el Edaol er a Israel, tirkel mla outekangel er a berredel a krus er a beluulechad, e dimlak le merur rengii, tirkel mo soiseb er a rengedel a Dios, el di mla mekedmokl el kirir er a uchelel a bluulechad, me a deuelreng ertir a mo cherrungel mo cherchar.

19 Ng merael klou a klechubechub er a Dios er kid, el Ditang el Edaol er a Israel! Leng mla sobecheklterir a re santo rengii er a kengaol mengelengalk el diablong, me a kodall, me a beluu er a ringel, me a diosch ngau, me a mekeald el bad, er a diak a ulebengelel ringel.

20 Ng merael klou el Edaol a Dios er kid. Leng di medenge rokui el tekoi, ngdiak a ditael tekoi el ngar ngii el diak lodengelii.

21 Meng mlei er a bluulechad el me olsobel er a rokui el chad alsekum te morrengs er a ngerel; leng mlo chuarm a ringelir a rokui el chad, oi, a ringelir a rokui el ngar, a sechal me a redil, me a rengalk el ngara telungalk er a Adam.

22 Ng mlo chuarm er chowai tiang meng mo sebechel okiis er a kodall el mo er a rokui el chad, me a rokui el chad a mo sebecherir el mo dechor remedal er sel klou el kerrekriil sils.

23 Meng milsterir a llach a rokui el chad meng kirir el mo ouuchel a rengrir er a kentrir, e mo metecholb er a ngeklel, e ngar ngii a mesisiich el klemrang er tir er a Ditang el Edaol er a Israel, le llak endiak el sebechir el mo suobel er a rengedel a Dios.

24 Ea lsekum eng diak bolouuchel a rengrir er a kelntrir, e loumrang er a ngklel, e bole metecholb er a ngklel, e loutekangel mo er a ulebongel, e temo delbeakl; ele Rubak el Dios el Ditang el Edaol er a Israel a mla melekoi.

25 Seia uchul meng mla meskid a llach; le llak a llach eng diak a kelbus, ea llak a kelbus, en diak a blals, ea llak a blals, ea kle chubechub er a Ditang el Edaol er a Israel a ngoititrir lokiu a tengakireng; me temo suobel leng klisiichel a uchul.

26 Le tngakireng a mo sumecheklii sel longerechir er ngii a llemeltel kirir tirkei el dimlak lenguu a llach, me te mla mengubet er a mengelngalk e kengaol kodall me a beluu er a ringel, me a diablong me a diosch el ngau, me a mekeald el bad, er a diak a ulebngelel ringel; e lmuut er a smechir er a Dios el milstrir a klengar, el Ngii el Ditang el Edaol er a Israel.

27 Endi alii er ngikei el nguu a llach, Oi, meng mla ngmai a rokui el llechul a Dios el uai kid, e mo tomall, meng di mengesensang eng mo merek a temel er a klengar, ng mo kengaol teletael a leboerngii.

28 Ng merael meduch el mengeblad ngikei el chad er a klengit! Ea, ng kldidai el reng me a mechechetakl, me a klebelngul a chad. Sel lengar ngii a skulir e tousbech el kmo te merael melloms, meng mo diak lorrenges a tekingel a Dios, me te ngmai locheuekl le tousbech el kmo tedi medngei rokui, misei auchul me a llemsir a kleblung meng diak a ngerael rellii el mo er tir. Me tedi mo nguemed.

29 A le ngarngii a skulir e ngungil alsekum toltirakl a tekingel a Dios.

30 Alii er tirkel merau, el merau er a klalo er a bluulechad. Me tir el merau a uchul me te mekngit er a remechebuul, e mengelbus er a rengariou a rengrir, me a rengrir a di ngara ungil kloklir; me a kloklir a mla mo Dios er tir. Endi tir me a kloklir a di monguemed.

31 Alii el mo er a remechad el diak bo lorrenges, le temo nguemed.

32 Alii el mo er a remikou el diak lomes, le te dirrek el mo nguemed.

33 Alii er tirkei el chelsimer a rengrir, le klaodngei er tir er a kentrir a mo chelebed el mortir er a ulebongel sils.

34 Alii er ngikei el bulak, leng mo modubech el mo eriou er a beluu er a ringel.

35 Alii er ngikei el ngar ngii er a rengul e omekoad, leng mo er a kodall.

36 Alii e tirkei el meruul a delboes el tekoi, le temo modubech el mo eriou er a beluu er a ringel.

37 Alii er tirkei el mengull a bleob, leng ngikei el merreder er a rediablong a kmal lungil a rengul er tir.

38 A domketakl er ngii eng kmo, alii el mor tirkel el ngar ngii a kentrir e mad; le te lmuut el mo er a Dios, e mesa medal e dingar er a kentrir.

39 Betik er a renguk lodam rengak, ka momdasu er a kentil sel de temellii a rengul a Edaol Dios, me a kentil sel de mechitikaik er a omngususeu er ngikei el cheblad. Lak mobes el kmo, a ngibesreng er a beluulechad a kodall, ea reng er a kle chelid a diak a ulebngelel klengar.

40 Betik er a renguk lodam rengak, merenges a tekingek. Lako mobes er a klisiichel a Ditang el Edaol er a Israel. Lako meduel kmo, ngak a meringel a tekingek lekoer kemiu; le lsekum kom uaisei e ko momtok er a klemrang; le ngak a melkoi a tekingel a ulemeob er kemiu. Ak medengei el kmo, a tekoi er a klemrang a meringel el mo er tirkei el diak el klikiid; endi remelmalt a diak le medakt, leng sorir a klemrang meng diak lomritel.

41 Me a leuaisei e betik er a renguk lodam er ngak, mei er a Rubak, el Ditael Edaol. Lak mobes el kmo, a rolel a melmalt. Kamosang, a rael bo lorael er ngii a chad a kmal kekrei, endi ng melmalt el rael ngar medal, e ngikel mengkar ra tuangel a Ditang el Edaol er a Israel; el diak lousbech er a mesiungel mengkar; e diak a ngodech el rael mong, ng di seikid el tungelel; meng diak el sebechel mecheblad, leng Rubak el Dios a ngklel.

42 E ngikel melengod a le nguu a chesimer el kirel; ea re mellomes, me a remedengei, me tirkel merau, meng re ngar bab a rengrir leng ngarngii a skulir, me a llemsir me a iiltetir, oi, tirka tirkel tir ochedechudel er a rengul; me a lsekum eng diak lechoit a ikael lomrellir, e lebo lodngei el kmo, kemam a mekeblung er medal a Dios, ele bolnguu a demolech el ngariouel reng, eng mo diak le nguu a chesimer el kirir.

43 Me a tekoi er a re mellomes me a re mekdung a mo obart er tir el mo cherchar – Oi, sel deuel reng el mla mekedmokl el kirir a re santo.

44 Ea betik er a renguk lodam er ngak, mdebedebek aika el tekingek. Ak ngmai a bilek el sirars er medemiu; E meluluuch er a Dios loseblek, me loriik loba medal diak a iimiu er ngii; me bo modngei er a uriul klebesei, sel le boel dechor a rokui el chad er a kerrekriil el kirel omrellir, e bo lodenglii a Dios er a Israel a milsekak er a kurrars a kentmiu er a delbengek, me boel sebechek el dechor el beches er medal, e diak chelsechusm er a resechiu.

45 Ea betik er a renguk el lodam er ngak, bo bechei a kentmiu; mkedoked a bombatel er ngikel soal lorreched el melechet er kemiu; e mei er a Dios el ngii a omkedechraol luuchul le kemo suobel.

46 Mongedmokl a delbengiu el kirel a medidiich el sils, el llemalt a mo modars el mo er a re melemalt er a sils er a kerrekriil, me llak bo muldechomel er a klou el dakt; me llak bom debedebek a rokui el kentim er a bleketeklel, e bo morimel el melekoi el kmo: Ng chedaol el chedaol a lemeltem, e Rubak el Dios lolab a rokui el klisiich – endi ngak a medengei kentik; Ak tilmall a llechum, me a kentik a ngar ngak; me a diablong a mla mdechemak, me ak mla mo cheldil el mor tial klou el klengit el reng.

47 Endi chelchang e rodam er ngak, cho momdasu eng kirek louchais er kemiu a merael tletelel a ikael kengaol tekoi? Choaikang sebechel rullau el mo medakt alsekum kau a klikiid a uldesuem? Cho momdasu eak kmal mo mesaod cho aikang el mo aisei alsekum kemiu a klikiid er a klengit.

48 Kamesang, alsekum komle chedaol, ea kmellekoi er kemiu chedaol tekoi; endi kemiu a diak kom mechedaol, e somiu a kulisechakl er kemiu, me a uchul eng kirek lolisechakl er kemiu er a mo redechel a klengit.

49 A delebengek a kmal chetil a klengit, ea renguk a dmeu el kirel a llemalt, me ak mo oldangs er a chedaol ngklel a Dios er ngak.

50 Kamei e rodam er ngak, le mei ngikei el meched a rengul, lemei er a ralm; me ngkel diak a ududel, mei me lomechar e longang; Oi, mei me momechar a bilong, me a milk el diak mousbech a udoud, ng diak a cheral.

51 Me llak mongoit a udoud el mo er a diak a ultutelel, me a lechub e mongoit a suliu el mo er a diak el rellii a rengum. Kamei me morrenges er ngak, e mlatk a ikel tekoi el blakdung, e memkeed er a Ditang el Edaol er a Israel, e monga ikel diak le bo lengemed, me a kabo lemechut me boel lungil a rengul a delbengem er a keldelebuu.

52 Kamomes e betik er a renguk lodam er ngak, mlatk a tikingel a Dios er kemiu; moluluuch el morengii el blechoel er a bekel sils, e moureng a sulel loba chedaol ngeklel er a bek el kebesengei. E bo lungil a rengum.

53 Me kamomes a ikel meklou el telbilel a Rubak, meng ngarbab e ngilanget el me tabesul ngii me a re ngalk el chad; meng klisiichel, me a ungial a rengul me a kle chubechub er ngii, meng mla kongei er a telbiil kmo, a re mo ngeleked a diak dibo lengemed er rokui a bedngir. Ngbai mo mengedmokl er tir, me a tara klebesei er a ngar medad el chroll, e tir a mo mekdung el ta er a rechelel a blai er a Israel.

54 E elchang e rodam eng dirke soak el mengedecheduch er kemiu, me a klukuk ea kmo dmu rekil a cheldechedechak. Boluaisei.