Sopwun 3: Nesen 2

An Samach won Nang Kokkotun Manau ese Much

Aramas repwe Mochen Sinei

• Met ewe popun ei manau?

• Ia ua feito me ia?

• Mi wor emon Kot mi tonge ei? Ifa usun ai upwe mefi pwe Mi tonge ei?

• Ifa usun upwe nuku non Kot nupwen a chommong mettoch mi ngaw a fis?

• Pwata ei manau a weires fan ekkoch? Ifa usun upwe kuna pochokun non ekkei fansoun?

• Ifa usun upwe winiti emon aramas murino?

• Met epwe fis murin ai mano?

Ewe niwinsefaniton ewe kapas allimen Jises Kraist a anisi kich ne ponuweni ekkewe auchean kapas eis. Me ren ewe kapas allim, sia kaeo usun pusin manauach me aucheach minne kich noun Kot. Ewe kapas allim a ngeni kich epinukunuk me anisi kich ach sipwe kuna kinamwe, pwapwa, me weweoch. Manaueni ewe kapas allim a anisi kich ne mamarita me kuna pochokun nupwen sia kuna sossotuch.

Kot a mochen met mi och fanitach Noun me a mochen epwe ngeni kich An kewe feioch mi nap, non ei manau me manau ese much (nengeni Moses 1:39; Doctrine and Covenants 14:7). Pokiten A tongei kich, A amonata eu kokkot fan itach ach sipwe angei ekkei feioch. Non ekkewe pukefel, ei kokkot a iteni kokkotun manau ese much, ewe watten kokkotun pwapwa, me kokkotun ngaseno (nengeni Alma 42:5, 8, 11, 13, 15, 16, 31).

Non an Kot kokkot, emon me emon kich sia fori eu sai seni me mwen ei manau, uputiw, manauen aion, mano, me manau murin mano. Kot a amonata met a auchea ngeni kich non ei sai pwe murin ach mano, sipwe pwan niwin sefaniti fan Mesan me angei ewe unusen pwapwa.

Jises Kraist I ewe ionapen an Kot kokkot. Ren An we Achasefan me Manausefan, Jises a mut ngeni emon me emon kich sipwe angei manau fochofoch me manau ese much.

Non manauach won ei fonufan, sise chechemeni manauach me mwen ei manau. Usun chok sise pwan wewefichi usun manauach murin ach mano. Nge nengeni, Kot a pwari chommong ennet usun ekkei kinikin non anein manauach. Ekkei ennet a awora ngeni kich mirit ach sipwe weweiti popun manauach, sipwe mefi pwapwa, me epwe wor ach epinukunuk ren mettoch mi och epwe fis. Ei mirit a eu nifang mi pin ngeni kich an epwe emweni kich won ei fonufan.

Ekkoch ekiek ren Osukun

Ei kinikin a amonata eu tetenin awewe epwe anisuk om kopwe amoneta ne osukun. A pwan pachenong ekkoch awewen kapas eis me ekkoch etiwetiw kopwe tongeni aea.

Nupwen kopwe amonata om kopwe osukun, kopwe ekipwichi me iotek fan iten nonnomun emon me emon me met epwe namot ngeni ngunur. Finata menni epwe kon auchea kopwe osukuna. Amonata om kopwe awewei foun kapas minne aramas resap kon weweiti. Kokkot anongonong won ukukun kunok kopwe tongeni nouni, chechemeni kopwe chok amocha me emecheresi ewe nesen.

Fini kewe uwekisin kopwe nounou nupwen om osukun. Ewe “Doctrinal Foundation” kinikinin ewe nesen a pachenong chommong aninisochun uwekisin seni pukefel.

Ekieki sokkun kapas eis kopwe eis non om osukun. Kokkotun etiwetiw om kopwe otoura minne epwe pesei emon me emon repwe anganga.

Aweweochu an Kot kewe pwonen feioch, me apasa om kapasen pwarata won met ka ani osukun.

Met kopwe Tongeni Osukuna Aramas non 15-25 minich

Finata eu ika nap seni eu ekkei nongonong usun ewe kokkotun manau ese much kopwe osukuna. Ewe nongonongun annuk ren eu me eu ekkewe nongonong a nom murin ekkei nesen.

Me mwen ei manau: An Kot Popun me Kokkot fan Itach

• Kich meinisin ngun noun Kot semirit. A fori kich non pusin ununun.

• Sia nom ren Kot me mwen sia uputiw won ei fonufan. Kich chochon An we famini. Mi sinei me tongei emon me emon kich.

• Kot a awora eu kokkot fan iten ach pwapwa me fefeita non ei manau me fefeino.

• Non manauach me mwen ei manau, sia finata ne fiti an Kot ei kokkot. Wewen sipwe feito fonufan pwe sipwe tongeni angei ewe eu kinikin non ach manauen fefeita.

• Jises Kraist I ewe ionapen an Kot kokkot. A fori ei tufich fan itach sipwe angei manau fochofoch me manau ese much.

Ewe Foruta

• Fan emwenien Kot, Jises Kraist a fori fonufan.

Ewe Turutiw an Atam me If

• Atam me If ir akkaewin noun Kot kewe semirit ra feito ngeni fonufan. Kot a fori inisir me enenier non ewe Ataken Iten.

• An Atam me If atai annuk, ra tou seni ewe atake, me ra imuseni me fan mesen Kot. Metei a fis ina ewe Turutiw.

• Mwirin ewe Turutiw, Atam me If ra winiti aramas futuk. Manau non futuk, ra tongeni keao, fefeita, me nounou semirit. Ra mefi weires, tipis, me mano.

• Ewe Turutiw a eu anen feino ngeni manauen aramas. Ewe Turutiw a ngeni kich ei tufich ach sipwe uputiw won ei fonufan me fefeita non An Samach won Nang ei kokkot.

Manauach won Fonufan

• Non an Kot kokkot, a auchea sipwe feito ngeni fonufan pwe sipwe angei aionach, kaeo, me fefeita.

• Won fonufan, sia kaeo ach sipwe fetan ren nuku. Nge nengeni, Samach won Nang ese mut ngeni kich sipwe akanaemon. A amonata chommong niffang me emwen epwe anisi kich ach sipwe niwin ngeni Fan Mesan.

Ewe Achasefanin Jises Kraist

• Emon me emon kich sipwe tipis, me sipwe mano. Pokiten an Kot tongei kich, A tinato Noun we, Jises Kraist, ngeni fonufan pwe epwe fangono manauan fan iten ach tipis me mano.

• Pokiten an Jises Kraist achasefan, sia tongeni musono me nimenimoch seni ach tipis. Netipach epwe tongeni siwinino ika pwe sia aier. Ei ngeni kich eu tufich ach sipwe niwin ngeni fan mesen Kot me angei an we pwapwa ese much.

• Pokiten an Jises we Manausefan, sipwe pwan manausefan mwirin ach mano. Wewen ei pwe ngunuen emon me emon me inisin repwe chufengen sefan, me emon me emon kich sipwe ani manau ese much non unusoch, me inis epwe manausefan.

• Jises Kraist epwe ngeni kich ourur, epinukunuk, me chikar. An we angangen achasefan ina usun umoumochun An we tong. Meinisin ekkena rese pungupungoch non manau ra tongeni pungoch ren ewe Achasefan an Jises Kraist.

Ewe Nenien Ngun

• Nupwen ewe inis a mano, ewe ngun a sopwosopwono ne nonnom non ewe nenien ngun. Ei mochomochen fansoun kaeo me amoneta me mwen ewe Manausefan.

• Ewe kapas allimen Jises Kraist a osukun me non ewe nenien ngun, me sia tongeni sopweno ne mar me fefeita.

Ewe Manausefan, Manau ese Much, me Manau Tekia.

• Mwirin ach fansoun non ewe nenien ngun, ewe Manausefan epwe tap non fetanin ach manau ese much.

• Ewe Manausefan ina ewe fansoun niwinsefan fengenin ngunuch me aionach. Emon me emon kich sipwe manausefan me inisich epwe fokkun unosochuno. Sipwe manau fefeino. Ei a tufich me ren an ewe Chon Amanau we Achasefan me Manausefan.

Kapung me Muun Ning

• Nupwen sia manausefan, Jises Kraist epwe apungu kich. Me nukun ekkoch chok me neich mi tiweno, meinisin noun Kot semirit repwe angei eu neni me non ewe muun ning.

• Nge kich meinisin sipwe manausefan, esap kich meinisin sipwe angei ewe ning ese much. Jises epwe apungu kich anongonong won ach nuku, angang, me aier ach manau won fonufan me non ewe nenien ngun. Sia tongeni niwin ngeni fan mesen Kot ika kich mi nukuchar.

Kapaseis Kopwe Tongeni Eisini Aramas

Ekewe kapas eis mi tetenitiw ikkena ekkoch awewe ren kapas eis kopwe tongeni eisini aramas. Ekkei kapas eis ra tongeni anisuk an epwe weweoch om oporous me weweiti met mi auchea me namot ngeni emon me emon me ar weweiti.

• Met ka mefi pwe ina ewe popun me auchean manau?

• Met a ngonuk om pwapwa?

• Met sokkun weires ka mochen Kot epwe anisuk non?

• Met ka kaeo seni sokkun weires a fen fis ngonuk?

• Met ka sinei usun Jises Kraist? Ifa usun Manauan me an angang a anisi manauom?

Sokkun Etiwetiw Kopwe Tongeni Ngeni Ekkoch

• En mi tongeni tingorei Kot non iotek epwe anisuk kopwe sinei pwe met aua osukuna ngonuk mi ennet? (Nengeni “Teaching Insights: Prayer” non ewe saingonon kinikin nesen 1.)

• En mi tongeni fiti ach fan non ei Raninfel kopwe kaeo chommong met sia osukuna ngonuk?

• En mi tongeni aneani ewe Puken Mormon me iotek kopwe sinei pwe iei ewe kapasen Kot? (Mi namot kopwe erenir repwe anea ekkoch sopun ika uwekisin.)

• En mi tongeni tapweno mwirin an Jises nenien appiru me paptais? (Nengeni “Ewe Etiwetiw ren Paptais me Kopunguno,” minne mi nom me mwen chon nesen 1.)

• Kich mi tongeni minano eu fansoun sipwe chusefan?

Nongonongun Annuk

Ei kinikin a awora annuk me pukefel fan itom om kopwe kaeo epwe anapano om weweiti me pwarata usun ewe kapas allim me anisuk ne osukun.

Me mwen ei Manau: An Kot Popun me Kokkot fan Itach

Kich Noun Kot, me Sia Nom ren I me mwen Ach Uputiw

Kot i ewe Semenapen Ngunuch. Kich wesewesn Noun semirit, sia for non Pusin ununun. Emon me emon kich a wor ach tufich seni nang usun kich noun Kot. Ei mirit a tongeni anisi kich seni fansoun riaffou me pesei kich ach sipwe murinono.

Sia nom ren Kot usun Noun semirit ngun me mwen sia uputiw won fonufan. Kich chochon An we famini.

“Mi wor eu auchean nonnomuch meinisin sia nonofengen won iei tori fefeino, eu sise tongeni sipwe miti seni, me eu sipwe fokkun kinisou ren. Ena pwe en mei wesewesen noun Kot at me nengin ren popur non pekin ngun seni nepoputan tori fefeino.

“… Weweiti ei ennet—wesewesen weweiti me komochunuk—iei ekkesiwinin manau. A ngonuk eu amwararen nonnomum mine ese wor emon epwe tongeni angei sonuk. Nge mi chommong seni ena, epwe ngonuk eu auchean memef me eu esisinen auchean manauom. Omuchunon, a ngonuk tufich seni nang, sufon, me auchean popun manauom” (M. Russell Ballard, “Noun Samach won Nang” [Brigham Young University devotional, Mar. 3, 2020], 2, speeches.byu.edu).

Sia Fini pwe Sipwe Feito Fonufan

Samach won Nang amen tongei kich me mochen sipwe winiti usun I. I emon mi tekia non eu inis mi ning.

Non mananauach me mwen ei manau, sia kaeo pwe Kot a wor an kokkot fanitach ach sipwe winiti usun I. Eu kinikinin An kokkot sipwe tou seni neniach non nang me feito ngeni fonufan ach sipwe angei inisich. A pwan auchea ach sipwe mefi me fefeita non nuku nupwen eu fansoun sia towaw seni fan mesen Kot. Sisap chechemeni ach nonom ren Kot. Nge nengeni, Epwe amonata met mi auchea ngeni kich pwe sipwe tongeni niwin sefanino Ren.

Pungun Finata, ika ewe tufichin pusin finata, iei auchean kinikin me non an Kot ei kokkot fanitach. Non manauach me mwen ei manau, kich menisin sia fini ach sipwe tapweno mwirin an Kot we kokkot me feito ngeni fonufan pwe sipwe tongeni angei ewe oruen kinikin me non ach manauen fefeita ese much. Sia weweiti pwe nupwen sia nom ikkei, epwe wor chommong minefon tufich ach sipwe marita me mefi pwapwa. Sia pwan weweiti pwe sipwe pwan kuna sosot. Sipwe kuna sosot, riaffou, netipechou me mano.

Non ach fini ach sipwe feito fonufan, sia nuku non an Kot tong me aninis. Sia nuku non An kokotun manau ese much.

Samach won Nang a Fini Jises Kraist epwe Angasa Kich.

Jises Kraist I ewe ionapen an Kot kokkot. Me mwen feito ngeni fonufan, sia fen sinei pwe sise tongeni niwiniti fan mesan Kot won pusin ach. Samach won Nang a fini Jises Kraist, Noun we Anaemon, pwe epwe otufichi ngeni kich ach sipwe niwiniti I me ani manau ese much.

Jises a fokkun etiwa. A mochen epwe feito ngeni fonufan me angasa kich me ren An asoren achasefan. An we Achasefan me Manausefan a ounusano an Kot we kokkot fanitach.

Kaeo ekkewe Pukefel

Noun Kot Semirit

• Foffor 17:28–29

• Hebrews 12:9

An Kot Popun

• Moses 1:39

• Abraham 3:25–26

• John 17:3

Manauach me Mwen Ach Feitiw Fonufan

• Doctrine and Covenants 138:53–56

• Abraham 3:22–28

• Ephesians 1:3–4

• Job 38:4–7

• Jeremiah 1:5

Kaeo Pwan Ekkoch usun Ei Nongonong

• Emwen ngeni ekkewe Pukefel: “Manau me mwen ei manau,” “Kokotun Fangono Manau”

• Pukenapen Emwen, 1.1: “An Kot Kokkotun Pwapwa”

• Itenapen Kapas Allim: “Me Mwen ei Manau,” “Kokkoten Amanau”

Ewe Foruta

An Samach won Nang we kokkot a fis pokiten ewe forutan fonufan, ikewe Noun kewe ngun repwe angei inisir me tufichin memef me ian. Manauach won fonufan a tufich ngeni kich ach sipwe feifeta me winiti usun Kot.

Fan emwenien Samach won Nang, Jises Kraist a fori ewe fonufan me mettoch meinisin mi manau. Samach won Nang a pwan fori mwan me fefin non Pusin ununun. Ewe Foruta a pwarano usun an Kot tong me An mochen faniten ach sipwe tongeni mamarita.

Kaeo ekkewe Pukefel

• 1 Nifai 17:36

• Alma 30:44

• Doctrine and Covenants 88:41–47

• Moses 2; 6:63

• Genesis 1:27

• Joseph Smith Translation, John 1:1–3

• 2 Corinthians 5:6–7

Kaeo Pwan Ekkoch usun Ei Nongonong

• Emwen ngeni kewe Pukefel, “Fori, Forutan”

• Itenapen Kapas Allim: “Forutan”

Ewe Turutiw an Atam me If

Me mwen ewe Turutiw

Atam me If ir akkaewin noun Kot kewe semirit ra feito ngeni fonufan. Kot a fori inisir non Pusin ununun me enenier non ewe Ataken Iten. Non ewe atake ramen tupwon, me Kot a amonata met mi namot ngenir.

Nupwen Atam me If ra nonom non ewe atake, Kot a annuku ngenir resap mongo ewe iran sinei och me ngaw. Ika ra aneasochisi ei annuk, iwe repwe chok nonom non ewe atake. Iwe nengeni, resap tongeni kaeo seni met mi sokofesen me sosot non manauer. Resap tongeni ar repwe sinei pwapwa pokiten ar resap tongeni mefi riaffou me metek.

Setan a sotuni Atam me If ar repwe ochei ewe foun ira mi annuk resap ochoch, me ra finata ar repwe ochei. Pokiten ei finata, ra tou seni ewe atake me imuno seni fan mesen Kot. Metei a fis ina ewe Turutiw.

Mwirin ewe Turutiw

Mwirin ewe Turutiw, Atam me If ra winiti aramas futuk. Rese chiwen nom non ewe nenien tupwon, ra weweiti me mefi och me ngaw. Ra tongeni aea ar we pungun finata ne fini eu me neir. Pokiten Atam me If ra sinei sokofesenin mettoch me sosot, ra tongeni kaeo me fefeita. Pokiten ra mefi netipechou, ra pwan tongeni mefi pwapwa. (Nengeni 3 Nifai 2:22–25.)

Me nukun ar riaffou, Atam me If ra mefi nge ar we manau non futuk eu wachemuken feioch. Eu me nein ekkewe feioch ar ra tongeni nounou semirit. Ei a amonata ewe anen faniten noun Kot kewe ekkoch ngun repwe feito ngeni fonufan me angei inisir.

Usun ekkewe feiochun ewe Turutiw, me ruemon Atam me If ra pwapwa. If a apasa, Ika pwe esap punun ach we atai annuk sise tongeni sipwe nounou [semirit], me sise tongeni sinei och me ngaw, me ewe pwapwa ren fangono manau, me ewe manau ese much mine Kot a fang ngeni meinisin mi aneasosich (Moses 5:11; nengeni pwan verse 10).

Weweochun Annuk: Ewe Turutiw

Ewe Turutiw a fokkun auchea me non an Kot we kokkotun manau ese much. Ewe Turutiw a ngeni kich ach sipwe tongeni feito fonufan me fefeita ngeni ach sipwe winiti usun Kot (nengeni 2 Nifai 2:25).

Ewe finata an If me Atam ne ochei ewe ira me tou seni ewe Ataken Iten eu finata non pekin ngun mi auchea. Napengeni, ekkewe pukefel me soufos ra kapas usun ei pekin finata pwe eu atai annuk, esap eu tipis (nengeni Nongonongun Achifouwa 1:2; 2 Nifi 9:6).

Ekkoch aramas ra wewengaw ngeni pwe kich meinisin sia tonong non ewe tipis an Atam me If ra fori (ekoch ra apasa “pwe wesewesen tipis”). Nge nengeni, ewe Samon a pwarano pwe I a achasefani ekkewe wesewesen foffor mi ngaw, ikkewe mine tipisin sam me in esap tongeni epwe tota won ekkewe semirit (Moses 6:54).

Nupwen ka aewin osukun usun ewe Turutiw, awewei epwe fatafatoch.

Kaeo ekkewe Pukefel

Non ewe Atake

• 2 Nifai 2

• Moses 2:26–31; 3:15–17; 4:6–12; 7:32

• Genesis 1:26–31; 2:15–17

Ewe Turutiw

• 2 Nifai 2:15–16, 22–27; 9:6–10

• Alma 12:22–34

• Moses 4; 5:8–12

• Genesis 2:16–17; 3

• Doctrine and Covenants 29:36, 39; 101:78

Kaeo Pwan Ekkoch usun Ei Nongonong

• Guide to the Scriptures: “Turutiw An Atam me If,” “Pungun Finata”

• Itenapen Kapas Allim: “Fall of Adam and Eve,” “Agency and Accountability”

Manauach won Fonufan

Chommong aramas repwe mochen sinei, “Pwata u nom won ei fonufan?” Manauach won ei fonufan amen auchea me non an Kot we kokkot faniten ach fefeita. Wesewesen ach popun sipwe moneta ach sipwe niwin no ngeni fan mesen Kot me angei ewe ennetin pwapwa. Ekkei mettoch a makketiw fan ikkei ekkoch mettoch minne manauen fonufan a amonata fanitach.

Angei eu Inis

Popun ach feito fonufan pwe sipwe angei eu inis minne ewe ngun epwe nonnom non. Inisich mi pin, amwararen foffor an Kot. Ren inisich, sia tongeni, kaeo, me mefi chommong mettoch minne ngunuch ese tongeni. Sia tongeni fefeita non ekkoch an minne ngunuch ese tongeni.

Pokiten inisich mi wor futukan, sia mefi metek, semwen, me ekkoch weires. Ekkei a tongeni anisi kich ach sipwe kaeo engino, umoumoch, me ekkoch tufich seni nang. Ra tongeni repwe nonnom rech non anen ach pwapwa. Finata mi pung nupwen mi weires ach sipwe fori iei ukukun ach nuku, epinikunuk, me tong ennet repwe winiti pwe masowen manauach.

Kaeo om kopwe Aaeoch Pungun Finata

Pwan och popun manauach won fonufan sipwe aeaoch ach pungun finata—ne finata met mi pung. Kaeo usun aeaochun ach pungun finata a fokkun auchea ach sipwe winiti usun Kot.

Samach won Nang me Jises Kraist ra aiti kich met mi pung me ngeni kich annuk an epwe emweni kich ngeni pwapwa. Setan a sotuni kich ach sipwe fori mi ngaw, a mochen kich sipwe netipengaw usun chok i. Sia kuna sokofesen nefinen och me ngaw, minne mi auchea ach sipwe aea ach pungun finata (nengeni 2 Nifai 2:11).

Nupwen sipwe aneasosich ngeni Kot, sia mamarita me angei An kewe feioch a pwonei. Nupwen sia aneasonap, sia otowawa kicheno seni I me angei niwinin ach kewe tipis. Inamwo ika fan ekkoch a fis, nge tipis a chok fokkun emwen ngeni kich netipengaw. Iteitan ekkewe feiochun aneasochis—me feiengawen tipis—esap mwitir ne ponu me pwapwano. Nge mi chok fat, pwe Kot mi ennet.

Ina mwo ika kich mi fori ukukun ach tongeni, kich meinisin sia tipis me “nipwakingaw ngeni ewe muun Kot” (Romans 3:23). An sinei ei, Samach won Nang a amonata eu anen ach sipwe aier pwe sipwe tongeni niwin ngeni I.

Aier a wato manamanen ach Chon Angasano, Jises Kraist, non manauach (nengeni Ilaman 5:11). Nupwen sia aier, sia nimenimoch seni ach kewe tipis ren ewe achasefan an Jises Kraist me ewe Nifangen Ngun mi Fel (nengeni 3 Nifai 27:16–20). Seni aier, sia mefi pwapwa. Ewe anesefan ngeni Samach won Nang mi suk ngeni kich, ren An we umoumoch. (Nengeni “Aier” non nesen 3.)

Kaeo Fetan ren Nuku

Pwan eu popun ei manau sipwe tongeni mefi ekkoch mettoch minne achok tongeni fis ach towaw seni Samach won Nang. Pokiten sise kuna I, a namot sipwe kaeo ne fetan non nuku (nengeni 2 Corinthians 5:6–7).

Kot ese nikitikicheno non ei sai. A tinatiw ewe Ngun mi Fel an epwe emwenikich, apochokuna kich, me enimenimochukicheno. A pwan ngeni kich ekkewe pukefel, soufos, iotek, me ewe kapas allimen Jises Kraist.

Mettoch meinisin minne sia fori non manauach—ewe pwapwa me netipengaw, tufich me tumunungaw—a tongeni anapano ach moneta ach sipwe churi Kot.

Kaeo ekkewe Pukefel

Eu Fansoun Mamarita me Fefeita

• 2 Nifai 2:21; 9:27

• Mosaia 3:19

• Alma 12:21–24; 34:31–35; 42:2–10

• Abraham 3:25–26

Finata

• 2 Nifai 2:26–29

• Joshua 24:15

Och me Ngaw

• Moronai 7:12–19

Tipis

• Ilaman 5:11

• Rome 3:23

• 1 John 1:8–10

Sipwe Fokkun Nimenimoch ach sipwe Nom ren Kot

• 3 Nifai 27:19

• Moses 6:57

Kaeo Pwan Ekkoch usun Ei Nongonong

• Emwen ngeni ekkewe Pukefel: “Manau non futuk, Manau iei,” “Sosot”

• Itenapen Kapas Allim: “Manau iei,” “Sosot”

Ewe Achasefanin Jises Kraist

Pokiten ewe Turutiw an Atam me If, kich meinisin sia tipis me mano. Sise tongeni pichino seni ewe weiresin tipis me mano won pusin ach. Non an Samach won Nang we kokkotun manau ese much, A amonata eu anen ach sipwe pichino seni ewe weiresin Turutiw pwe sipwe tongeni niwiniti I. Me mwen forutan fonufan, A finata Jises Kraist epwe ach Chon Amanau me Chon Angasano.

Jises Kraist chok a tongeni angasakicheno seni tipis me mano. I ewe wesewesen Noun Kot. Ese wor tipisin, amen unusen aneasosich ngeni Samach won Nang. Afen amonata me mochen epwe fori an Samach won Nang angang.

An ewe Chon Amanau Achasefan a pachenong An we riaffou non Gethsemane, An riaffou me mano won ewe irapenges, me An we Manausefan. A fokkun riaffou nap seni ach sipwe weweiti—wate A kus seni cha ekis meinisin pwangapwangen unuchan (nengeni Doctrine and Covenants 19:18).

An Jises Kraist Achasefan eu amwararen mettoch non uruon aramas. Seni An we angangen achasefan, Jises a fori mokutun an ewe Sam we kokkot. Sise tongeni tufich me nukun ewe Achasefan an Jises Kraist pun sise tongeni pusin angasa kich seni tipis me mano (nengeni Alma 22:12–15).

An ach we Chon Amanau we fangono manau a pwarata usun An ewe Sam tong ngeni kich. “Ukukun waten, me nakataman, me tekian, me anononun” an Kraist tong sise tongeni weweiti (Ephesians 3:18; nengeni pwan uwokisin 19).

Jises Kraist A Okkufu Mano Fanitach Meinisin

Nupwen Jises Kraist a mano won ewe irapenges, Ngunun a imuno seni Inisin. Non ewe ounungatin ran, Ngunun me Inisin ra chufengen sefan, rese tongeni chiwen imufesen sefan. A pwa ngeni chommong aramas, pwari ngenir pwe I mi wor Inisin ren futuk me chuu. Ei ochufengenin inis me ngun a iteni Manausefan.

Ren manau non futuk, emon me emon kich sipwe mano. Nge nengeni, pokiten Jises a manau seni mano, meinisin aramas re uputiw won fonufan repwe pwan manausefan. Ewe Manausefan eu niffang seni nang fanitach meinisn, seni an ewe Chon Amanau umoumoch me kirekiroch. Ngunun me Inisin emon me emon epwe chusefan fengen, me emon me emon kich sipwe manau non unusoch fefeino, inis manausefan. Ika esap pokiten Jises Kraist, mano epwe asopwano ach epinukunuk non nonomuch ren Samach won Nang non kan fansoun mwach (nengeni 2 Nifaii 9:8–12).

Jises A Otufichi Kich Ach Sipwe Nimenimoch Seni Ach Tipis

Ach sipwe weweiti ewe epinukunuk sia tongeni angei seni Kraist, a auchea sipwe weweiti ewe annukun pungoch. Iei ewe annuk ese tongeni siwin minne a fori niwinin ach foffor. Aneasosich ngeni Kot a ngonuk niwinin fofforoch, me aneasonap a ngonuk niwinin fofforingaw. (Nengeni Alma 42:14–18.) Nupwen sia tipis, ngunuch a nimengaw, me ese wor mettoch mi nimengaw epwe nom fan mesen Kot (nengeni 3 Nifai 27:19).

Non an Jises Kraist we angangen achasefan, A mefi ach weires, riaffou, me moni niwinin ach kewe tipis (nengeni 3 Nifai 27:16–20). An Kot kokkot a ngeni Jises Kraist manaman pwe epwe fori mettoch meinisin fan itach—me uta nefinach me pungoch (nengeni Mosaia 15:9). Pokiten an Jises achasefan, A tongeni apungano An kewe pungun umoumoch fan itach nupwen sia anganga ach nuku ne aier (nengeni Moronai 7:27; Doctrine and Covenants 45:3–5). “Umoumoch a tongeni amanemenachu ekkewe mochenin pungoch, me ochufengeni [kich] me nepoun tumun” (Alma 34:16).

Pwe seni chok ewe niffangen Achasefan an ewe Chon Amanau me ach aier sia tongeni niwinsefaniti fan mesen Kot. Nupwen sia aier, sia musono me ngunuch a nimenimoch. Sia ngas seni chourekin ach kewe tipis. Kinasen ngunuch a chikar. Sia ureno ren pwapwa (nengeni Alma 36:24).

Ina mwo ika kich sise unusoch me sia turutiw sefan, nge mi wor umoumoch, tong, me kirekiroch non Jises Kraist nap seni nipwakingaw, mwanino, ika ach tipis. Kot mi chok fokkun moneta iteitan me mochen foropachekicheno nupwen sipwe kun ngeni I me aier (nengeni Luke 15:11–32). Ese wor och mettoch me emon “epwe tongeni atowawakicheno seni ewe tong an Kot, ewe a nom non Kraist Jises ach Samon” (Romans 8:39).

Jises a Wata Won Ach Metek, Riaffou, me Apwangapwang

Non An we achasefan, Jises Kraist a wata Won ach metek, riaffou, me apwangapwang. Pokiten ei, A sinei “anongonong won ewe pekin aion ifa usun an epwe anisi noun aramas anongonong won ar apwangapwang” (Alma 7:12; nengeni pwan uwokisin 11). An etiwetiw, “Feito rei,” me nupwen sipwe fori, Epwe asoso kich, epinukunuk, pochokun, tufich, me echikar (Matthew 11:28; nengeni pwan uwoskisin 29–30).

Nupwen sipwe nongonong won Jises Kraist me An we Achasefan, A tongeni anisi kich ne engino ngeni sosotuch, samau, me metek. Sia tongeni ureno ren pwapwa, kinamwe, me ouruur. Meinisin ekkena ese pungupungoch ren manau a tongeni pungoch ren ewe Achasefan an Jises Kraist.

Kaeo ekkewe Pukefel

An ewe Chon Amanau Achasefan

• 2 Nifai 2:6–8.

• Mosaia 3:5–12

• Alma 7:11–13; 11:40; 34:8–10

• Doctrine and Covenants 18:11–12; 19:15–19; 45:3–5; 76:40–43

• John 3:16–17

• 1 John 1:7

Manausefan

• 2 Nifai 9:6–7, 13

• Mosaia 15:7–12

• Alma 11:42–45; 40:23

• Ilaman 14:15–19

• Luke 24:1–10, 36–39

• John 11:25–26

• 1 Corinthians 15:20–22, 41–42

Kaeo Pwan Ekkoch usun Ei Nongonong

• Emwen ngeni ekkewe Pukefel: “Jises Kraist,” “Mano, Achasefan,” “Umoumoch”

• Itenapen Kapas Allim: “Jises Kraist,” “Achasefan an Jises Kraist,” “Umoumoch”

Ewe Nenien Ngun

Chommong aramas repwe mochen sinei, “Met epwe fis mwirin ua mano?” Ewe kokkotun amanau a amonata ekkoch auchean ponuen ei kapas eis.

Mano kinikinin an Kot “kokkotun kirekiroch” fan itach (2 Nifai 9:6). Nap seni nesoponon ach fisita, mano ewe oruen kinikin non fefeitan manauach. Ach sipwe winiti usun Kot, sipwe weri mano me mwirin sipwe unusoch, inisich epwe manausefan.

Nupwen ewe inis a mano, ewe ngun a sopwosopwono ne nonnom non ewe nenien ngun. Iei ei mochomochen nenien kaeo me moneta me mwen ewe Manausefan me Omuchunon Kapung. Ach tipachem seni manau non futuk epwe chok nonom rech.

Non ewe nenien ngun, aramas ra etiwa me manaueni ewe kapas allimen Jises Kraist “ra ketiwenong non ew nonnomun pwapwa, minne a iteni paratais” (Alma 40:12). Kukkun semirit repwe pwan nom non paratais nupwen ra mano.

Ekkewe ngun non paratais repwe nom kinamwe seni ar kewe weires me netipengaw. Repwe soposopono non ar mamarita non ngun, repwe fori an Kot angang me iamwir ngeni ekkoch. Repwe afanafana ewe kapas allim ngeni ekkewe rese angei nupwen ar manau won fonufan (nengeni Doctrine and Covenants 138:32–37, 57–59).

Non ewe nenien ngun, aramas rese angei ewe kapas allim won fonufan, ika ekkewe ra finata resap aneasochisi ekkewe annuk, repwe nonnom non koukun mettoch (nengeni Doctrine and Covenants 138:6–37; Alma 40:6–14). Nge nengeni, pokiten Kot mi pungoch me umoumoch, mi wor ar fansoun repwe tongeni ausening ewe kapas allimen Jises Kraist. Ika re etiwa me aier, repwe ngaseno seni ar kewe tipis (nengeni Doctrine and Covenants 138:58; nengeni pwan 138:31–35; 128:22). Repwe etiwetiwenong non ewe kinamwen paratais. Repwe pwan angei eu neni non ewe muun ning anongonong won an emon angang non ei manau me non ewe nenien ngun.

Sipwe nom non ewe nenien ngun tori ach manausefan.

Kaeo ekkewe Pukefel

• Alma 34:34; 40

• Doctrine and Covenants 138

• 1 Peter 3:18–20; 4:6

• Ecclesiastes 12:7

Kaeo Pwan Ekkoch usun Ei Nongonong

• Emwen ngeni ekkewe Pukefel, “Paratais”

Ewe Manausefan, Manau ese Much, me Manau Tekia.

Manausefan

An Kot kokkot a otufichi kich ach sipwe mamarita me angei ewe manau ese much. Mwirin ach fansoun non ewe nenien ngun, ewe Manausefan epwe fis non ena mamarita.

Ewe Manausefan ewe ochusefanfengenin ngunuch me inisich. Kich meinisin sipwe manausefan. Ei a tufich me ren an ewe Chon Amanau we Achasefan me Manausefan. (Nengeni Alma 11:42–44.)

Nupwe sia manausefan, inisich epwe fokkun unusoch, sisap metek me semwen. Sipwe manau iei, manau fochofoch.

Amanau

Pokiten sipwe manausefan meinisin, kich meinisin sipwe ngaseno—ika angei amanau—seni manon inis. Ewe niffang a kawor ngeni kich seni ewe chenin Jises Kraist.

Sipwe pwan tongeni tumun—ika angei amanau—seni niwinin ewe annukun pungoch mi fis faniten ach tipis. Ei niffang apwan tufich seni ewe kirekiroch me umoumoch an Jises Kraist nupwen sia aier. Nengeni Alma 42:13–15, 21–25.)

Manau mi Tekia

Manau mi Tekia, ika manau ese much, iei ewe nenien pwapwa mi tekia me ning non ewe muun selestial. Manau mi Tekia eu niffang mi anongonong won foffor. President Russell M. Nelson a aiti kich, “Ekkena mettoch mi anongonong won mi pachenong nuku non ewe Samon, aier, paptais, angei ewe Ngun mi Fel, me sopweno ne nukuchar ngeni ekkewe annuk me pwonen ewe tempel” (“Manau ese Much me Manau mi Tekia,” Liahona, May 2008, 9).

Manau mi Tekia wewen nonnom ren Kot feinfeino non famini ese much. Sipwe sinei Kot me Jises Kraist, sipwe winiti Usur, me manaueni ewe manau Ra pwapwaiti.

Kaeo ekkewe Pukefel

• 2 Nifai 9:6–7, 13

• Alma 11:42–44; 22:14; 42:13–15, 21–25

• 1 Corinthians 15:20–22

Kaeo Pwan Ekkoch usun Ei Nongonong

• Emwen ngeni ekkewe Pukufel, “Manausefan”

• Itenapen Kapas Allim: “Manausefan,” “Amanau”

Kapung me Muun Ning

Esinesin: Nupwen aewin osukun usun ekkewe muun ning, osukun seni met mi mecheres anongonong won met mi namot ngeni emon me an weweiti.

Nupwen sia manausefan, Jises Kraist i epwe nouch sou kapwung mi pungoch me umoumoch. Ren ekkoch chok mi tiweno, emon me emon kich sipwe feino non eu neni non ekkewe muun ning. Ina mwo kich meinisin sipwe manausefan, esap chok nono ewe ning ese much sipwe angei (nengeni Doctrine and Covenants 88:22–24, 29–34; 130:20–21; 132:5).

Emon me emon ekkewe ese wor ar tufich ne unusen weweiti me aneasosich an Kot kewe annuk ar nom won fonufan repwe tongeni ausening me non ewe nenien ngun. Jises epwe apungu emon me emon anongonong won an nuku, angang, mochen, me aier non ei manau me non ewe nenien ngun (nengeni Doctrine and Covenants 138:32–34, 57–59).

Ekkewe pukefel ra aiti kich usun celestial, terrestial, me telestial muun ning. Eu me eu ra pwarata usun an Kot tong, pungoch, me umoumoch.

Ekkewe ra anganga ar nuku non Kraist, aier seni ar tipis, angei ekkewe annukun ewe kapas allim, aponueta ar kewe pwon, angei ewe Ngun mi Fel, me nikitu tori nesoponon repwe nom non ewe muun selestial. Ei muu epwe pachenong aramas ekkewe ese wor ar tufichin fansoun ar repwe etiwa ewe kapas allim non ei manau nge “ita repwe fen etiwa ren unusen netiper” me fori non ewe nenien ngun (Doctrine and Covenants 137:8; nengeni pwan uwokisin 7). Ekkewe semirit ra mano me mwen ewe ier ar repwe weweiti mettoch (wanu ier) repwe pwan nonom non ewe muun selestial (nengeni Doctrine and Covenants 137:10).

Non ekkewe pukefel, ewe muun selestial a wewe ngeni ewe ningen akar. (Nengeni Doctrine and Covenants 76:50–70.)

Ekkewe aramas ra manauoch ekkewe rese angei ewe kapasen pwarata usun Jises me non aion, nge mwirin ra angei repwe nom non ewe muun terrestial (Doctrine and Covenants 76:74). Usun chok mi ennet ren ekkewe rese kon nikitu non ar kapasen pwarata usun Jises. Ei muu a wewe ngeni ewe ningen maram. (Nengeni Doctrine and Covenants 76:71–80.)

Ekkewe ra soposopono non ar tipis me rese aier non ei manau ika rese etiwa ewe kapas allimen Jises Kraist non ewe nenien ngun repwe nom non ewe muun telestial. Ei muu a wewe ngeni ewe ningen fuu. (Nengeni Doctrine and Covenants 76:71-113.)

Weweochun Annuk: Kapung

Emom me emon epwe uta mwen Jises Kraist epwe “Kapung anongonong won an angang” (3 Nifai 27:15; nengeni uwokisin 13–15). Ewe Samon epwe fori an angang ren emon me emon ren pusin an angang, pachenong an weweiti och me ngaw, weweiti ewe kapas allim, tongeni , me mochen (nengeni Luke 12:47–48; Doctrine and Covenants 137:9).

Pokiten sise kon weweochuti nonomun ekkoch, sipwe ukuti seni ach apungano usun menni ekkewe muun ning repwe angei. Nge, sipwe amonnakicheta ach sipwe churi ewe Samon me etiwa ekkoch ar repwe moneta. (Nengeni Alma 5:15–19, 33; Moroni 10:32; Dallin H. Oaks, “‘Judge Not’ and Judging,” Ensign, Aug. 1999, 6–13.)

Kaeo ekkewe Pukefel

• 2 Nifai 9:15

• Mosaia 3:24

• 3 Nifai 27:14–16

• Doctrine and Covenants 76:50–113; 88:20–32; 137:7–10

• John 14:2

• Rome 14:10

• 1 Corinthians 15:40–41

• 2 Corinth 12:2

Kaeo Pwan Ekkoch usun Ei Nongonong

• Emwen ngeni ekkewe pukefel: “Judge, Judgment,” “Degrees of Glory”

Etettenin Nesen mi Mwochomwoch me Ukukoch

Ekkewe tetenin nesen ekkoch aninis ren met kopwe tongeni osukuna ekkoch ika pwe mi chok mochomoch fansoun. Nupwen kopwe aea ei tettenin nesen, fini eu ika ekkoch nongonong kopwe osukuna. Ewe nongonongen annuk ren eu me eu nongonong a nom me mwen ei nesen.

Nupwen kopwe osukun, kapas eis me ausening. Anapano om etiwetiw minne epwe anisi aramas ne kaeo ar repwe mamarita me arapakan ngeni Kot. Eu auchean etiwetiw ina ren ewe aramas epwe pwan chursefanuk. Tamen ewe nesen epwe anongonong won kapas eis kopwe eis me om ausening.

Met Kopwe Tongeni Osukuna Aramas non 3-10 Minich

• Kich meinisin ngun noun Kot semirit. Kich chochon An we famini. Mi sinei me tongei emon me emon kich.

• Kot a awora eu kokkot fan iten ach pwapwa me fefeita non ei manau me feinfeino.

• Non an Kot kokkot, a auchea sipwe feito ngeni fonufan pwe sipwe angei aionach, kaeo, me fefeita.

• Jises Kraist I ewe ionapen an Kot kokkot. A otufichi ngeni kich ach sipwe angei manau esemuch.

• Fan emwenien Kot, Jises a fori fonufan.

• Met sia fori won fonufan a anisi kich ne amonakicheta ach sipwe niwin ngeni fan mesen Kot.

• Emon me emon kich sipwe tipis, me sipwe mano. Pokiten an Kot tongei kich, A tinato Noun we, Jises Kraist, ngeni fonufan pwe epwe angasa kich seni ach tipis me mano.

• Meinisin ekkena rese pungupungoch non manau ra tongeni pungoch ren ewe Achasefan an Jises Kraist.

• Nupwen inisich a mano, ngunuch a soposopono ne manau. Nge kich meinisin sipwe manausefan. Wewen ei pwe ngunuen emon me emon me inisin repwe chufengen sefan, me emon me emon kich sipwe ani manau ese much non unusoch, me inis epwe manausefan.

• Nupwen sia manausefan, Jises Kraist epwe apungu kich. Me nukun ekkoch chok me neich mi tiweno, meinisin noun Kot semirit repwe angei eu neni me non ewe muun ning. Sia tongeni niwin ngeni fan mesen Kot ika kich mi nukuchar.