“Ongedei el Bliongel: Ongeuang el Suobel —Mo Chedal a Jesus Kristo er a Klengar Kid,” Molisechakl er a Ebangkelio er Ngak: Teletelel a Domerk er a Ebangkelio er a Jesus Kristo (2023)
“Ongedei el Bliongel: Ongeuang el Suobel ,” Molisechakl er a Ebangkelio er Ngak
Ongedei el Bliongel: Ongeuang el Suobel
Mo Chedal a Jesus Kristo er a Klengar Kid
Osischeklel Tia el Suobel
A techolbechelid a deureng el chedaol ruoll er a urunguled. Sel demetecholb, e kede ochotii a klemeriar reng el mo oltirakl er a Dios e soiseb er a rael el bedul a diak a ulebengelel klengar. Kede dirrek lochotii a blakereng er kid el mo chedal a Jesus Kristo er a klengar kid.
Tial suobel a chelderoder loltirakl a telbiil el meruul er a techolbechelid. Ng uldimukl er ngii aikakid el bliongel, el dersta er ngii a ngarngii a mekekerei el bliongel.
Mngesuterir a rechad el mo medengei el kmo a suobel me a llach el molisechakl a tebechedel a telbiil el deruul er a techolbechelid. Mochotii er tir el kmo ng mekera a bek el telengtengil tial suobel a lengesuterir el “mei er a Kristo … e mo suobel el mo cherechar” (Omni 1:26; dirrek el mesa 1 Nephi 15:14).
Ke locha mo olisechakl er tial suobel er a kakerous el taem el lokiu odingel. A osisechakl a diak el lungil a lengelakl er a okedei el bung a temel. Ng bai ungil a le mekedeb, el mekdekudem odingel lolisechakl a mekedeb el suobel.
Mtib a bo molisechakl, e oingera e ke mo olisechakl, e uangera klemengetel. Momtab a usbechellir a rechad el molisechakl er tir e multuil er a ulekrael er a Chedaol Reng. Ngarngii a techellem el mo olisechakl lultuil er sel mo ungil ngosuterir a rechad el mo kldmokl el kirel a techolbechelid e moterekokl.
A bebil er a bliongel er tial suobel obengkel a tokubets el ongit. Mosiik a ulekrael el kmo ke mekerang e oingerang e ke siotai er a rechad. Bo mungil metebengar a telkelel a klemedengei er a tal chad. Mngeseuir el mo oltirakl er a ebangkelio el loudertang er a tal taem.
Telbiled el Blak a Rengud el mo Nguu a Ngklel a Jesus Kristo
Sel demetecholb, e kede tibir el mo oltirakl er a Jesus Kristo “loba rengud el rokir.” Kede dirrek el sioning el mo “nguu a ngklel [a] Kristo” (2 Nephi 31:13; dirrek el mesa Doctrine and Covenants 20:37).
A mo oungakl er a ngklel a Jesus Kristo a belkul a kmo kede melbedebek er Ngii e melasm el mo kiei loltirakl er Ngii. Kede mo oba llomes el ngar Ngii el mei er kid el mora rebebil. Kede mesekid el uai Ngii e Nguu el mo kot er a klengar kid.
Aikakid el bliongel a smaod eru el tekoi el rulid el mo melbedebek e oltirakl er a Jesus Kristo.
Blechoel Meluluuch
A nglunguuch a sebechel kedeb el cheldecheduch lobengkel a Demad er a Babeluades el mla er a rengud. Aikel nglunguched, eng sebeched el mimokl e bleketakl el mengedecheduch er Ngii. Kede ochotii a beltkil a rengud el mo er Ngii me a omereng el saul er a klengeltengat el me rekid. Kede dirrek lolengit a ngesou, sebechekled, me a ulekrael. Sel de chesmerii a nglunguched, eng kired el mo chelelakl e orrenges.
A Jesus a ulisechakl, “Ng kiriru el mo blechoel meluluuch el mo er a Chedam el ngara ngklek” (3 Nephi 18:19, smisichii a belkul; dirrek el mesa Moses 5:8). Me sel doluluuch el ngara ngklel a Jesus Kristo, e kede melbedebek er Ngii me a Demad ra Babeluades.
A Jesus ulechotii a rolel a doluluuch. Ng sebeched el mo medengelii a teletelel a nglunguuch lokiu omesubed er a nglunguchel a Osobel el ngara chedaol llechukl (mesa Mateus 6:9–13; Johanes 17).
A nglunguched a sebechel uldimukl er ngii aikakid:
-
Omuchel lokerir a ngklel a Demad ra Babeluades.
-
Ochotii a ngara rengud, el mereng a saul er a klengeltengat el bla dengai.
-
Oker a ker, osiik a ulekrael, e olengit a klengeltengat.
-
Mongesimer el kmo, “El ngara ngklel a Jesus Kristo, amen.”
A chedaol llechukl osischeklid el meluluuch a le tutau me a le kebesengei. Engdi, ng sebeched el meluluuch er a ngidil taem me a de ngara dingil basio. A kuk di nglunguched me a nglunguuch er a telungalek, e ngungil a bo doutubaruach sel doluluuch. Ng kired blechoel ngarngii a nglunguuch el ngara rengud. (Mesa Alma 34:27; 37:36–37; 3 Nephi 17:13; 19:16.)
A nglunguched a kirel ngarngii a belkul e ngara reng. Sel doluluuch, eng kirel diak ke domelekl a osisiu el tekoi me a osisiu el teletael.
Kede meluluuch loba klaumerang, meral ngara rengud, me a blakereng el mo oltirakl a nger el dengai. Sel bo de uaisei, e a Dios a mo omekrael er kid e ngosukid el mo melilt a ungil. Kede mo melchesuar el kmo kede kmeed er Ngii. Ngii a mo meskid a klemedengei me a klemerang. Ng mo omekngeltengat er kid er a ongelaod, budech, me a klisiich.
Omesubel Chedaol Llechukl
Mluut el Mesuub el kirel a Aika el Osisechakl
-
Ulekrael mira Chedaol llechukl: “Nglunguuch”
-
Bible Dictionary: “Nglunguuch”
-
Cheldecheduch ra Ebangkelioi: “Prayer”
Mosuub Chedaol Llechukl
A Nephi a ulisechakl, “Mosuub a tekingel a Kristo; el [ngii] a mo subedau er a rokui el tekoi el kirem el meruul” (2 Nephi 32:3; dirrek el mesa 31:20).
A omesubel chedaol llechukl a klou a belkul el bo dolbedebek e oltirakl er a Jesus Kristo. Chelsel chedaol llechukl e kede subii a klengar re Ngii, urerel, me a osischeklel. Kede dirrek el suub a yaksok er Ngii. Sel donguiu a chedaol llechukl, e kede mo melchesuar a beltkil a Rengul. A rengud obok, a klaumera er kid er Ngii a mechisois, e a uldesued a mo mellomes. A klaumera er kid er a chedaol Urerel a mo mesisiich.
Kede dobedebekii e oltirakl er a Jesus sel doltirakl a Tekingel er a klengar kid. Ng kired el mesuub chedaol llechukl er a bek el sils, oumesingd a Babier er a Mormon.
A chedaol llechukl er a Ikelesia er a Jesus Kristo ra Uriul-klebesei el Santo a ngarngii a Biblia, Babier er a Mormon, Doctrine and Covenants, me a Pearl of Great Price. Aika okedongall el “standard works.”
Mesuub Chedaol Llechukl
Mluut el Mesuub el kirel a Aika el Olisechakl
-
Ulekrael mora Chedaol Lechukl: “Chedaol Llechukl”
-
Cheldecheduch ra Ebangkelio: “Chedaol llechukl”
Telbiled el mo Oltirakl a Llechul a Dios
Uleklatk: Ng betok a teletael kirel osischeklel a llach er tial bliongel. Okesiul tiang, ng locha sebechem losisechakl er a chelsel a kesai el taem el moldingel. A lechub eng sebechem lolisechakl a bebil er ngii el tebechedel aikel kldei el kot el suobel. Sel molisechakl a llach, e mongaisisiu el mora telbiil er a techolbechelid me a uldasou er a mo suobel.
Sel demetecholb, e kede tibir lobengkel a Dios el mo “oltirakl a llechul” (Mosiah 18:10; Alma 7:15).
A Dios a mla meskid a llach le Ngii el betik a rengul er kid. Ng soal a kot lungil a lemei er kid, er chelechang me a diak a ulebengelel klengar. Me ngii el Demad ra Babeluades a uchul, e Ngii a medengei a dousbech el kirel chedaol klengar kid me a bedenged er a tech. Ng dirrek el medengei aikel mo uchul a klou el deureng el mei er kid. A bek el llach a chedaol sengk, lomekrael a tekoi el dolilt, omecheliu er kid, e ngosukid el mukeroul.
A tara uchul e kede mlei er a beluulechad a mesuub e mukeroul lokiu omelilt el doruul (mesa Abraham 3:25). A dolilt loltirakl a llechul a Dios— e douchel a rengud er a kngtid a— ngosukid er a omerolled er tial cheliseksikt el beluulechad.
A llechul a Dios a uchul a klisiich ma klengeltengat (mesa Doctrine and Covenants 82:8–9). A doltirakl a llach, e kede mo medengei el uase ng diak el oberaod el llach el tomer kid ra soad. A meral mimokl a mei lokiu otirekled er a llach. A oltirakl a uchul a klisiich el meskid a llomes me a klemedengei lokiu Chedaol Reng. Ng meskid a klou el deureng e ngosukid el morsel chedaol blebeled el ngelekel a Dios.
A Dios a yaksok el mo omekngeltengat er kid sel doltirakl a Llechul. A bebil er a klengeltengat a melutk el kirel a dersta el llach. Ea kot el ngaruchei el klengeltengat er Ngii a budech er tial klengar me sel tara klengar el merael mei. (Mesa Mosiah 2:41; Alma 7:16; Doctrine and Covenants 14:7; 59:23; 93:28; 130:20–21.)
A klengeltengat er a Dios a kirel a chedaol klechad me a klechad er a tech. Bebil ra taem, eng kirel mo klou a rengud e mengiil, loumerang el uase ng mei loltirakl er a Soal me a temel (mesa Mosiah 7:33; Doctrine and Covenants 88:68). Sel moungil mes a klengeltengat, eng kired el mo ungil lomes omtab. Tia kmal klemerang ra ikel klengeltengat el beot el mei er a di mitil a taem.
A bebil er a klengeltengat a bleketakl el mereched el mei. A bebil a locha mei er sel tara klengar. Ng diak el iior ra taem ma lechub a teletelel a klengeltengat er a Dios, ng sebeched el mo medengei el kmo ng mei sel dolasm loltirakl ra ebangkelio er a Jesus Kristo (mesa Doctrine and Covenants 82:10).
A Dios oba cherrungel beltikelreng el mora rokui el Ngelekel. Ng klou a rengul er a chelitechetud, e Ngii ousubes sel douchel a rengud.
Eru el Ngarbab el Llach
Sera loker er a Jesus el kmo, “Ng ngeral llach a kot el ngarbab er ngii el rokui?” E Ngii a ulenger, “Ng kirel betik a rengum er a Rubak el Dios er kau loba rengum el rokir, me a rokir el klengar kau, me a uldesuem el rokir.”
Ea Jesus a dilii ongeru el ngarbab el llach el uai sel kot: “Bol betik a rengum er a odam er kau” (Mateus 22:36–39). “Ng diak a ngodech el ngarbab el llach er a ikang” (Markus 12:31).
Kid el ngelekel a Dios er a reng a uchul, eng klou a techelled el mo mui er a beltikelreng. Ng telengtengil a chedaol dikesed. A doltirakl aikal eru el ngarbab el llach— el mo kot loubeltikelreng el mo er a Dios me a odam er kid a— ngii a blekerdelir a roltirakl er a Jesus Kristo.
Beltkil a Rengul a Dios
Ng betok a rolel a dochotii a beltkil a rengud el mora Dios. Kede oltirakl a Llechul (mesa Johanes 14:15, 21). Ng sebeched el Nguu el mo kot er a klengar kid, losiik er sel Soal. Ng sebeched el ngmai a soad, uldesued, me a rengud lotuil er Ngii (mesa Alma 37:36). Ng sebeched el kiei el ngara omereng el saul er a klengeltengat el Ngii a mla meskid—e mo bekururau el merous aikal klengeltengat (mesa Mosiah 2:21–24; 4:16–21). Ngokiu a nglunguuch ma omesiou el mora rebebil, eng sebeched lochotii a dmolech el beltkil a rengud el mo er Ngii.
Ng uaia bebil er a llach, a llach el mo betik a rengud er a Dios a klungioled. Sel ngii a betik a rengud er ngii a dosiik er ngii. E sel dosiik er ngii a omekrael a domdasou ma doruul tekoi. Ea ikel domdasou e meruul ochotii a klechad er kid— me sel kid a morngii.
Oubeltikelreng er a Rebebil
Oubeltikelreng el mora rebebil a tebechedel a beltkil a rengud el mora Dios. A Osobel a ulsischeklid a betok el teletael el mo oubeltikelreng er a rebebil (mesa, okesiu, Lukas 10:25–37 ma Mateus25:31–46). Kede oldingel e mengemedaol er tir el mei er a rengud ma klengar kid. Kede oubeltikelreng lokiu omesiou—luldimukl omesiou ra beot el teletael. Kede oubeltikelreng el mora rebebil lokiu a sengk el blal beskid a Dios el mo omekngeltengat er tir.
A beltikelreng el mora rebebil a uldimukl ra kllouelreng, blekokouii, e bleketakl. Ng uldimukl ra mimokl lousubes. Ng belkul a kmo kede mengull ra rokui el chad.
Sel betik a rengud ra chad, e kid me ngike el chad a di diul mukngeltengat. A rengud a mukeroul, a klengar kid a morngii a moktek er ngii, e a deureng a mechisois.
Klengeltengat
Erul ngarbab el llach— el mo betik a rengud ra Dios me a odam— er kid a dodai er a rokui llechul a Dios (mesa Mateus 22:40). Sel kot el mo betik a rengud er a Dios, me a rebebil, e a rokui el tekoi ra klengar kid a mora ungil urebetellel. Tiakid el beltikelreng a ngmodech a uldesued, ma usbechellel a temed, ma ikel soad el meruul, ma ikel bo doruul.
Mesuub Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol llechukl: “Bliochel beltikelreng,” “beltikelreng”
-
Cheldecheduch ra Ebangkelio: “Bliochel beltikelreng,” “Beltikelreng”
Moltirakl er a Profet
A Dios omekedong er a reprofet el mo omtechei er Ngii ra beluulechad. Ngokiu ra reprofet er Ngii, e Ngii ouchais a klemerang ma ulekrael ma uleklatk.
A Dios a milkedongii a Joseph Smith el mo kot el profet er a uriul klebesei (mesa suobel 1). A re mle okiuellel a Joseph Smith a dirrek el mlokedong er a Dios el mo omekrael er a Ikelesia er Ngii, luldimukl ra profet lomekrael er ngii er chelechal sils. Ng kirel morngii a klaumera er kid ra chedaol okedongel a profet er chelechang e oltirakl osischeklel.
A osischekelterir a re ngar el profet ma reapostol a meskid otil a diak a ulebengelel klemerang ra beluulechad el di ngodech kung. Sel doltirakl ra reprofet ra Dios, e a rraureng ma uldikel ra beluulechad a diak el bol loberraod el mei er kid. Kede mo metik ra klou el deureng er tial klengar e ngmai a ulekrael er tiakid el telengtengil omerolled el mora diak a ulebengelel klengar.
Omesubel Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol Llechukl: “Profet,” “Prophetess,” “Ulaoch, Omlaoch”
-
Cheldecheduch ra Ebangkelio: “Reprofet,” “Omlaoch”
Oltirakl a Teruich el Llach
A Dios a ulecholt a Teruich el Llach el mora cheuodel profet el ngklel a Moses el mo omekrael er a rechedal. Aika llach a dirk doltirakl er chelechal sils. Aika osischeklid el mo mengull e melanges er a Dios. Ng dirrek el osischeklid el kmo ng mekera dosiou er a tang ma tang.
-
“Ng diak mnguu a ngodech el dios el mo ruchei er ngak” (Exodus 20:3). A ngodech el “dios” a uldimukl er ngii a betok el tekoi, el uaia klalou, klisiich, ma lechub a chetengakl.
-
“Ng diak mongull a ngii dil bleob el chaus” (Exodus 20:4).
-
“Ng diak morrekakl er a ngklel a Rubak el Dios er kau” (Exodus 20:7).
-
“Mletkii chedaol sils, e mkelii” (Exodus 20:8).
-
“Mongull er a demam me a delam” (Exodus 20:12).
-
“Ng diak momekeuad” (Exodus 20:13).
-
“Ng diak bol melaok a rengum” (Exodus 20:14).
-
“Ng diak morechorech” (Exodus 20:15).
-
“Ng diak molekoi a blulak el kirel odam er kau” (Exodus 20:16).
-
“Ng diak bol ngibes a rengum” (Exodus 20:17).
Mesuub Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol Llechukl: “Llach, Teruich el”
-
Chedecheduch ra Ebangkelio: “Teruich el Llach”
Moltirakl er a llach er a Klikiid er a Deleboes
A llach ra klikiid ra deleboes a klou a ultutelel telengtengil a moktek ra Dios el kirel a mo suobel ma diak a ulebengelel klengar. A mo dmak a bedengir el sechal ma redil a mechedaol ra Dios el kirel a blebelir a rengalek e olchotel a beltikelreng ra chebechiil. Sel mo dmak a bedengir me a klisiich lomeob a klengar a kirel klebokel e chedaol.
A llechul a Dios ra klikiid ra deleboes a mo diak a klausechelei ra ikrel a chebechiil ra sechal ma redil. Tial llach a dirrek el melutk ra mui el klaumerang ra chelsel a chebechiil ra rechad el kaubuch.
A ngosukid el mo oltirakl er tial llach, e a reprofet a mla mellach er kid el mo klikiid a uldesued ma omelkinged. Ng kired el mengeroid er kid ra osengel a teletael er a deleboes. A otirekled ra llach el klikiid ra delboes, eng kired el mo ungil a blekerdeled ma teleteled a doubail.
A rechad el mo metecholb a kirir loltirakl ra llach ra klikiid.
Ouchel reng ma Klausubes
A denguu ra medal a Dios, e a telmellel a llach ra klikiid a oberaod el klengit (mesa Exodus 20:14; Efesus 5:3). Ng tomelii a chedaol klisiich el Ngii a mla meskid lomeob a klengar. Ng di Ngii a melemolem el betik a rengul er kid luldimukl a bla de temelii tial llach. Ng oleker er kid el mo ouchel a rengud e mo klikiid lokiu a tngakireng er a Jesus Kristo. A berredel a klengit a sebechel mutechei ra budech ra klausubes er a Dios (mesa Doctrine and Covenants 58:42–43).
Klengeltengat
A Dios a mla meskid a llach ra klikiid el mo omekngeltengat er kid ma rengalek ra reng el Ngii oldurokl er tir el mei ra beluulechad. A otireklel tial llach a klou a belkul kirel a budech ma beltikelreng ra klengar kid, klaumerang, ma kltalreng er a deluill ra telungalek.
Sel doltirakl ra llach ra klikiid, e kede mo selbechakl ra ringel ra reng el mei lokiu a deleboes el deliongel ra ikrel a chebechiil. Kede dirrek el mocheroid ra telmellel a reng ma bedenged ra ikaikid el deleuill. Kede mo ungil a rengud er medal a Dios (mesa Doctrine and Covenants 121:45). Kede mo mimokl el kirel a ulekrael ra Chedaol Reng. Kede mo ungil kldmokl el meruul a chedaol telbiil ra templo el ngii oldak a telungalek el mo cherechar.
Mesuub Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol Lechukl, “Gethsemane
-
Cheldecheduch ra Ebangkelio: “Deleboes”
Oltirakl ra Llechul Ongeltacher
A klou el techall ra rechedal a Ikelesia a mo melecha ongeltacher. Sel dolechang a ongeltacher, e kede olngeseu ra urerel a Dios lomekngeltengat er a Rengelekel.
A llach ra ongeltacher a ulemuchel er a taem er a Cheuodel Renged. Okesiul tiang, a profet Abraham a millecha ongeltacher er a ikel rokui el kloklel (mesa Alma 13:15; Genesis 14:18–20).
A tekoi el ongeltacher a belkul a kmo tang er a teruich. Sel dolechang ongeltacher, e kede odersii a tang er a teruich er a ududed el mora Ikelesia (mesa Doctrine and Covenants 119:3–4; interest a dodengelii el belkul a kerkerenged). A rokui el ngarngii er kid a sengk ra Dios. Sel dolechang ongeltacher, e kede ochotii omereng el saul el mo er Ngii lokiu a telkib er a ikel Ngii a mla meskid.
A ongeltacher olchotel a klaumerang er kid. Ng dirrek el rolel a kede mengull er a Dios. A Jesus a ulisechakl el kmo ng “kired el kot losiik … ra rengedel a Dios” (Mateus 6:33), e a ongeltacher a rolel a doruul er ngii.
Usbechellel a Udoud er a Ongeltacher
A udoud ra ongeltacher a chedaol. Kede ngmai ongeltacher er kid el msa chedal a rengara bisop, ma lechub eng sebeched el harau online. A chedal a bisop sel ngai ongeltacher, e te odurokl el mora klou el obis er a Ikelesia.
A chelechad er a First Presidency, ma Chelechad er a re Teruich me a terung el Apostol, me a Presiding Bishopric a tibir a usbechellel ongeltacher ra urerel a Dios (mesa Doctrine and Covenants 120:1). Aika uldimukl rengii a:
-
Okedecherul ma omekbeches a templo me a ikelesia.
-
Oidel ma llecheklel chedaol llechukl.
-
Olngeseu a omeruul me a urerel a Ikelesia re aikel basio el lengarngii.
-
Olngeseu a ureor er a remisionari ra beluulechad el rokir.
-
Olngeseu a urerel a reksi er a telungalek.
-
Olngeseu a skuul ma tekoi ra omesuub.
A ongeltacher a diak lomdoud er a roungerachel ra Ikelesia. Tirka mesiou el di tada e diak lududel.
Klengeltengat
Sel dolechang ongeltacher, e a Dios a yaksok a klengeltengat el kuk betok ra ikel dolechang. Ng “mekengii … a tuangel ra babeluades, e meskid … a klengeltengat, el mo diak a basio el kirel” (Malachi 3:10; mesa bades 7–12). Aika el klengeltengat a sebechel kirel a reng ma bedenged er a tech.
Mesuub Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol Lechukl: “Ongeltacher, Tithing”
-
Cheldecheduch ra Ebangkelio: “Ongeltacher”
Oltirakl er a Llach el kirel a Ulekerreuil a Bedenged
Llechul a Rubak el kirel a Bedenged
A bedenged a chedaol sengk er a Dios. Kede ousbech ra bedenged ra tech el mo uai Ngii. A bedenged a kmal klou a ultutelel ma chedaol llechukl a mengaisisiu er ngii el mora templo (mesa 1 Korint 6:19–20).
A Rubak a soal a domekerreu a bedenged lokiu omengull. A ngosukid el mo meruul uaisei, e Ngii a mla otii a llechul a bedenged lokedongall el Llach ra Ulekerreuil a Bedenged. Tial ocholt osischeklid el kirel a ungil dongang e diak dolai a mekngit el klalou el mo tomelii a bedenged— oumesingd a rrom, dekool, me a mesisiich lilumel (rua tea ma kohi)
A Llach ra Ulekerreuil a Bedenged, e a reprofet a mla omeklatk el kirel a usbechllel a bebil ra kar el mesisiich, e mekull, malechub eng modiak kede itii. A reprofet a dirrek el mla omeklatk er kid ra mekngit e terekakl el usbechellel a kar. (A merredel ra mision a mo onger a ker el kirel a bebil ra tekoi loruul a rechad ra ikel basio el mngarngii.)
Klengeltengat
A Rubak a meskid a Llach ra Ulekerreuil a Bedenged el kirel a bedenged ra tech ma reng ma klechad er kid. Ng yaksok a klengeltengat sel doltirakl er tial llach. Aikal klengeltengat a uldimukl er ngii a mesisiich a bedenged, llomes, ngarbab el klemedengei, e selbechakl (mesa Doctrine and Covenants 89:18–21).
A doltirakl ra Llach ra Ulekerreuil a Bedenged a rullid el mo ungil rongesiii odbechel Chedaol Reng. Ng uaisei el morngii a secherel a bedenged, ng di a doltirakl er tial llach e ngosukid el mo mesisiich a bedenged, uldesued ma rengud.
A rechad el mo metecholb a kirir el mo oltirakl ra Llach ra Ulekerreuil a Bedenged.
A teletael omolngeseu ra rechad el ngara mekngit el kar, e mesa bliongel 10.
Mesuub Chedaol Llechukl
Mluut el Mesuub el kirel a Aika el Osisechakl
-
Omesuub ra Chedaol LLechukl: “Llach er a Ulekerreuil a Bedenged”
-
Cheldecheduch ra Ebangkelio: “Health,” “Llach ra Ulekerreuil a Bedenged”
-
Ngesou ra Klengar: “Mekngit el Kse”
Kullii a Chedaol Sils
Sils er a Ulengull me a Omengull
A Chedaol Sils a sils el Dios a mla oterkeklii er a bek el sandei el mo oelngull ra urered e mengull er Ngii. A tara ikel Teruich el llach le ngilai a Moses a kmo “mletkii a chedaol sils, e mkelii” (Exodus 20:8; dirrek el mesa 9–11bades).
Chelsel chedaol ocholt er chelechal taem, a Rubak a liluut el melekoi el kirel Chedaol sils el kmo ng sils ra ulengull ra ureriu, e mo mengull ra Ngarbab el Dios ” (Doctrine and Covenants 59:10). Ng dirrek el dilu el kmo a Chedaol sils a kirel sils ra deureng, ma omereng el saul (mesa bades 14–15).
A tebedechel a omengull er kid ra Chedaol sils, e kede mora miting ra sakrament ra bek el sandei. Chelsel tiakid el miting, e kede mengull ra Dios e melai er a sakrament lomeletked ra Jesus Kristo ma Tngakireng er Ngii. Sel dolai ra sakrament, e kede mekbeches a telbiled el lobengkel a Dios e ochotii el uase ng soad louchel a rengud ra kngtid. A chedaol ruoll ra sakrament a kmal moktek er a omengull ra Chedaol sils.
Chelsel a ikelesia e kede dirrek el ngara klas el mesuub er a ebangkelio er a Jesus Kristo. A klaumera er kid a mukeroul sel dedak el mesuub chedaol llechukl. A beltikelreng er kid a mukeroul sel dosiou e dolisiich ra tang ma tang.
E dirrek elsel dolengull ra urered ra chedaol sils, eng kired el mengeroid er kid ra mora stouang ma bebil er a omeruul el rulii tial sils el mo uaia di mitil a sils. Kedemo mechei a omeruul ra beluulechad e ngmai a moktek ra uldesued ma omerelled el mora chedaol tekoi.
Sils el Doruul a Ungil
A meruul a ungil ra Chedaol sils a dirrek el kmal klou a belkul el ua ikel dongeroid er kid er ngii el tekoi. Kede mesuub ra ebangkelio, melisiich a klaumerang, melisiich a deleuill, olngeseu, e meruul a bebil ra ungil omeruul lobengkel a telungalek ma resechelid.
Klengeltengat
A omengull ra Chedaol sils a olchotel a ultired ra Chedam er a Babeluades ma Jesus Kristo. Sel deruul a omilil er kid ra Chedaol sils loltirakl a soal a Dios, e kede mo melchesuar a deureng ma budech. Kede mo mesisiich ra reng ma bedenged meng mesisiich. Kede dirrek el mo kmeed ra Dios e mo dmolech a deleuill er kid lobengkel Osobel. Kede mo mui el klikiid ra tekingel a beluulechad (Doctrine and Covenants 59:9). A Chedaol sils a mo deureng el mei er kid (Isaiah 58:13; dirrek el mesa bades 14).
Mesuub Chedaol Llechukl
Mluut el Mesuub el kirel a Aika el Osisechakl
-
Cheldecheduch ra Ebangkelio: “Chedaol Sils”
-
Ulekrael mora Chedaol Lechukl:“Chedaol Sils”
Oltirakl e Mengull a Llach
A Ruriul-klebesei el Santo a oltirakl a llach e ungil chad ra beluu (mesa Doctrine and Covenants 134; Articles of Faith 1:12). A rechedal a Ikelesia a kirir el mesiou el melisiich a buai ma beluu. Ng dirrek el kirir el mo okesiul a ungil blekeradel ra beluu me a kabelment.
A rechedal a Ikelesia a dirrek longeseu ra kabelment ma tekoi ra palatiks el ngii oltirakl a llach. A rechad ra ikelesia el ngara deruchall ra kabelment a omtechei ra buai, ng diak lomtechei ra Ikelesia.
Omesubel Chedaol Llechukl
Mluut el Mesuub el kirel a Aika el Olisechakl
-
“Political and Civic Activity” er a bliongel 38.8 er a General Handbook
-
Cheldecheduch ra Ebangkelio: “Chedal a beluu”
Chedaol Telbiled el mo Mesiou er a Dios me a Rebebil
Mesiou
Sel de metecholb, e kede soiseb er a chedaol telbiil el mo mesiou ra Dios me a rebebil. Omesiou er a rebebil er a rechad a tara rolel e kede mesiou er a Dios (mesa Mosiah 2:17). A profet Alma a ulisechakl er tirkel mle sorir el mo metecholb el kmo ng kirir el mo mesebechakl er a tang ma tang e mengelim er a rechelmongel e mengelaod er a rousbech ongelaod (Mosiah 18:8–9).
Uriul er a techolbechelid, e a rebeches el chedal a Ikelesia a blechoel nguu okedong el mo mesiou er a chelsel a Ikelesia. Aikal okedong a di kid el mong e diak dududel er ngii. Sel de kengei el blak a rengud el mesiou, eng meleketek a klaumera er kid, e suub a duch, e omekngeltengat er a rebebil.
A tara telengtengil omesiou er kid ra Ikelesia a mo “oldingel lodam” ma lechub “oldingel el odos.” Tia ikid el ngerachel, e kede mesiou el mo ra dersta el chad ma telungalek.
Kid loltirakl er a Jesus Kristo, e kede osiik a techall el mesiou er a bek el sils. El uai Ngii, kede mo merael “meruul a ungil” (Rellir 10:38). Kede mesiou ra ngar bita er kid me a buai. Kede olngeseu er a chelsel a ikel techall er a omesiou lokiu a JustServe sel le ngarngii. Sebeched lolngeseu er a urerel a Ikelesia me sel dubech a chelebuul ra beluu.
Mesuub Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol Lechukl:“Omesiou”
-
Cheldecheduch ra Ebangkelio: “Omesiou”
Omerk er a Ebangkelio
A telengtengil a telbiled ra techolbechelid, e kede yaksok el mo “dechor el sioning er a Dios”(Mosiah 18:9). A tara rolel e kede dechor el sioning a sel domerk er a ebangkelio er a Jesus Kristo. Sel dolengeseu ra rebebil el nguu a ebangkelio a tara kot el klou el deureng ra omesiou el sebeched el lodersii (mesa Doctrine and Covenants 18:15–16). Ng mesisiich lolchotel a beltikl a rengud.
Sel dolchesuar a klengeltengat le ke doltirakl er a ebangkelio,eng mo soad el lomerk a ikaikid el klengeltengat A rechedal a telungalek, resechelid, ma dekaodengei el chad a blechoel mo semeriar sel dochotii a ungil okesiu sel lesa ebangkelio lomekngeltengat a klengar kid. Ng sebeched lomerk er a ebangkelio er a omerelled ra bek el sils (mesa General Handbook, bliongel 23).
Kede siotai er a rebebil el mo teloi er kid er a omesiou, ra buai, ma omilil, me a loruul a Ikelesia. Ng sebeched el loleker er tir el mora miting er a Ikelesia ma lechub a techolbechelid. Ng sebeched el loleker er tir el mo omes a video el online el mesaod ra ebangkelio er a Jesus Kristo, menguiu ra Babier er a Mormon, ma lechub oldingel ra templo open house. Ng kmal betok a teletael er a ongit el sebeched el meruul. Blechoel, el siotai a belkul a uldimukl ra telungalek er kid, sechelei, ma retonari ra ikel ngii a doruul.
Sel dolengit, e a Dios a mo meskid a techall el mo omerk er a ebangkelio e ouchais er a rebebil aikal klengeltengat er a klengar kid.
A lmuut el bebil er a omesodel a suobel er a beltikelreng, omerk, me a oleker, e mesa “Unite with Members” er a bliongel 9.
Mesuub Chedaol Llechukl
Mluut el Mesuub el kirel a Aika el Osisechakl
-
Ulekrael mora Chedaol Lechukl:“Ureor er a Missionary”
-
Cheldecheduch ra Ebangkelio: “Ureor er a Misionari”
Olsengerenger me a Tenget er a Dolsengerenger
A Dios a kildmeklii a llechul olsengerenger el rolel e kede mo mesisiich ra tekingel a reng e olngeseu er a remechebuul.
A dolsengerenger a kmo kede diak domengur e diak dolim el telkib el taem. A Ikelesia a blechoel a mla oterkeklii a kot el Sandei er a bek el buil el sils er a dolsengerenger. A sils ra dolsengerenger a diak domengur ma diak dolim er a chelsel a lluich ma eua el sikang alsekum eng mesisiich a bedenged. A bebil er a meklou a belkul telengtengil a Sandei er a dolsengerenger a ouchais ra klaumera er kid. Ng dirrek el sebeched lolsengerenger er a ngii di el taem alsekum eng usbechall.
Meleketek Chedaol Klisiich
A dolsengerenger a ngosukid el mo ngariou a rengud, mo kmeed er a Dios, e mo mesisiich ra chedaol tekoi. Uchei ra lomuchel er a Urerel, e a Jesus Kristo a ulsengerenger (mesa Mateus 4:1–2). A chedaol llechukl olab a betok el cheldecheduch ra reprofet ma rebebil el lolsengerenger me bol mesisiich ra chedaol tekoi e losiik a klengeltengat el kirir ma rebebil.
A dolsengerenger me a nglunguuch a dmak. Sel dolsengerenger e doluluuch loba klaumerang, eng sebeched el lungil ngmai chedaol ocholt. Kede dirrek el mo ungil mtebengar a klemerang ma klemedengei ra soal a Dios.
Olngeseu ra Rengesool
Sel dolsengerenger, e kede odars a udoud el mora Ikelesia el mo olngeseu er a remechebuul chad. Tia okedongall el uldars er a dolsengerenger. Kede odars a uldersed sel dolsengerenger el ngii osisiu ra cheral aikel blengur el dimlak dongang. Kede mo bekerurau el melecha telkib el betok er a ikel cheral a eru el blengur alsekum eng sebeched. A uldars ra dolsengerenger a tara rolel e kede mesiou er a rebebil.
A ikang el udoud a lousbech el mo er a kall me a bebil er a klalo el usbechall el mo er a rechad el ousbech a ngeso, er a di beluu me a beluulechad. A lmuut el bebil ra tekoi el kirel a udoud ra sengerenger, e mesa“Donating Tithes and Other Offerings” er tial suobel.
Mesuub Chedaol Llechukl
Olsengerenger
Omekerreu er Tirkel Lousbech a Ngeseu
Mluut el Mesuub el kirel a Aika el Osisechakl
-
Ulekrael mora Chedaol Lechukl:“Sengerenger, Olsengerenger”
-
General Handbook: 22.2.2
-
Cheldecheduch ra Ebangkelio: “Olsengerenger me a Uldars er a Sengerenger”
Telbiled Loutekangel el Mora Ulebongel
Sel demetecholb e kede tibir lobengkel a Dios el mo “outekangel el mora ulebongel” loltirakl er a ebangkelio er a Jesus Kristo (2 Nephi 31:20; dirrek el mesa Mosiah 18:13). Kede melasm el mo oltirakl er a Jesus Kristo er a klengar kid el rokir.
A profet Nephi er a Babier er a Mormon a silodii a techolbechelid el kmo ng siseball el desiseb el mora rael er a ebangkelio (mesa 2 Nephi 31:17). Uriul er a techolbechelid, e kede melemolem el mesisiich el ngara Kristo (2 Nephi 31:20).
Sel “dolemolem” el ngara rael ra roltirakl, e kede mengedmokl el mora templo. Seikid e kid a mo meruul a telbiil lobengkel a Dios sel dengai a chedaol ruoll er a templo. Chelsel a templo, e kede nguu a klisiich e sebeched el moak el telungalek el mo cherechar. A otirekled er a telbiil el deruul er a templo a mekengii a chesimer ra chedaol techall ma klengeltengat el Dios olab el kired.
Sel blak a rengud el melemolem el ngara rolel a ebangkelio, eng mo sebeched el ngmai a ngarbab el sengk ra Dios el ngii a sengk ra diak a ulebengelel klengar (mesa 2 Nephi 31:20; Doctrine and Covenants 14:7).
Aikakid el bliongel a smaod a bebil er a teletael el Dios a ngosukid el mo outekangel el mora ulebongel er tial omerolled er a beluulechad— e mo metik ra deureng.
Priesthood me a Cheldellel a Ikelesia
A priesthood a ngerachel me a klisiich er a Dios. Ngokiu a priesthood, e a Chedam er a Babeluades a kudmeklii a Urerel el mo uchul a diak luut el kodall ma diak a ulebengelel klengar el mora Rengelekel Moses 1:39). A Dios a msa ngerachel ma klisiich el mora Rengelekel sechal ma redil el ngara beluulechad el mo olngeseu er tial lureor.
A priesthood a omekngeltengat er kid el rokui. A chedaol ruoll el uai a techolbechelid ma sakrament a mengai lokiu tirkel loba priesthood. Kede dirrek el ngmai a klengeltengat er a omekungil, ongelaod, me a omengetikaik.
Priesthood me a Orretel a Ikelesia me a Okedong
A Ikelesia a mukrael er a Jesus Kristo lokiu a reprofet me a reapostol. Tirkal oungerachel a mokedong er a Dios, moterekokl, e nguu a ngerachel ra priesthood el mo meruul a ureor el ngara ngklel Osobel.
A irechar, e a Kristo a milsterir a re Apostol er Ngii a osisiu el priesthood, el mlo sebechir el omekrael er a Ikelesia er Ngii ruriul er a lorael mora babeluades. Telkib el taem e tial ngerachel a ririid ra rechad ra bo likrii a ebangkelio ma kodellir a re Apostol.
A roderuchel ra babeluades a ulutii a priesthood er sera 1829 lokiu a Profet Joseph Smith, ma Rubak a liluut el toketekii a Ikelesia er Ngii lobengterir a reapostol me a reprofet. (Mesa suobel 1.)
Ngara bek el beluu, e a rebisop ma remerredel a stake a oba ngerachel ra priesthood lomekrael er a Ikelesia.
A rsechal ma redil a mokedong e moterekokl el mo mesiou er a chelsel a Ikelesia, e te nguu a ngerachel ra Dios el kirel tial okedong. Tial ngerachel a lobang a re misionari, roungerachel, resensei, ma rebebil el di merekmo bo lak el ngara ikal okedong. Ng mengai lokiu a dereder er tirkel oba kiis ra priesthood.
A ngerachel er a priesthood a di sebechel usbechall lokiu a llemalt (mesa Doctrine and Covenants 121:34–46). Tial ngerachel a chedaol klaumerang lomtechei er a Osobel e oureor loba Ngklel. Ng blechoel kirel mo omekngeltengat e mesiou er a rebebil.
Aaronic Priesthood me a Melchizedek Priesthood
Chelsel a Ikelesia, e a priesthood a uldimukl er ngii a Aaronic Priesthood me a Melchizedek Priesthood. Ngokiu a dereder er tirkel lolab a kiis er a priesthood, ea Aaronic mea Melchizedek Priesthood a mora re klikiid el sechal el chedal a Ikelesia. Uriul er a lemengai sel priesthood, ea chad a moterekokl el mora obis ra priesthood, el uaia deacon ma lechub a elder. Ng kirel moterekokl ra chad el ngii oba ngerachel.
A klou el chad ma lechub a ngeasek el sechal sel nguu a priesthood, eng tibir lobengkel a Dios el mo meruul chedaol ngerachel, mesiou er a rebebil, e olngeseu el meleketek er a Ikelesia.
A rengeasek el sechal a sebechir el nguu a Aaronic Priesthood e moterekokl el mo deacon lomuchel er a Kot el buil er sel rak el bol 12 a rekrir. Ng sebechir el moterekokl el mo sensei er sel rak el bol 14 a rekrir e mo priest er sel rak el bol 16 a rekrir. A rsechal lobult a sebechir el nguu a Aaronic Priesthood ruriul ra techolbechelid me a le moterekokl. A roba Aaronic Priesthood a mengedmokl a chedaol ruoll ra sakrament ma techolbechelid.
Uriul er a losiou el priest ra Aaronic Priesthood, e a klikiid el sechal el kesengil eng 18 a rekil a sebechel nguu a Melchizedek Priesthood e moterekokl el mo elder. A remeklou el sechal nguu a Melchizedek Priesthood a sebechir el meruul a chedaol ruoll el uai a omekngeltengat lomekungil me a mengelaod er a rechedal a telungalek ma rebebil.
Mesa General Handbook, 38.2.9.1, el kirel a lmuut el lomesodel a rebeches el chedal a ikelesia a lolai er a priesthood.
Chelechad me a Cheldellel a Ikelesia
Chelechad er a Priesthood A chelechad a chelderodel el chelechad er a roba priesthood. A bek el ward a ngarngii a chelechad er a re elders el mora remeklou el chad. A chelechad er a re deacon, sensei, ma re priest a mora rengeasek el sechal.
Relief Society. A Relief Society a uldimukl ra redil el 18 a rekrir el mo er bab. A rechedal a Relief Society a melisiich a telungalek, dersta el chad, me a buai.
Rengeasek el Redil. A rengeasek el dil a mo teloi er a cheldellel a Young Women lomuchel er a kot el buil er sel rak el bol 12 a rekrir.
Primary. A rengalek el rekrir a 3 el mora 11 a ngara chelechad er a Primary.
Sandei Skuul. A rokui el meklou el chad me a rengeasek a ngara Sandei Skuul, el mo kebetech e dmak el mesuub chedaol llechukl.
A lmuut el bebil er a omesodel a priesthood, e mesa General Handbook, bliongel 3.
A lmuut el bebil er a omesodel a chelechad er a priesthood me a cheldellel a Ikelesia, e mesa General Handbook, bliongel 8–13.
Mesuub Chedaol Llechukl
Mluut el Mesuub el kirel a Aika el Osisechakl
-
General Handbook, bliongel 3: “Priesthood Principles”
-
Cheldecheduch ra Ebangkelio: “Aaronic Priesthood,” “Melchizedek Priesthood,” “Priesthood”
Chebechiil me a Telungalek
Chebechiil
A chebechiil er a delongelel a sechal me a redil a mechedaol er a Dios. Ng moktek er a uldesuel el kirel a diak a ulebengelel omerollir a Rengelekel.
Sel mo tang a sechal ma bechil redil er a chelsel a chebechiil a kirel kot el mekreos el deleuill er tial beluulechad. Ngarngii a chedaol ngerchelir el mo ngara klaumerang ra tang ma tang e blak a rengrir ra telbiil ra chebechielir.
A sechal ma redil a diosisiu er a medal a Dios. A tang a diak el kirel ngarbab ra chimong. A uldesuir a kirel ultuil ra kltalreng ma beltikelreng, el di diul mui el kaingeseu.
A sechal ma redil kaubuch sel kaubeltikelreng el dak loureor, e a chelbechilir a sebechel mo uchul a klou el deureng. Ng sebechir el kaingeseu e olngeseu ra rengelekir ra omerollir el bedul a diak a ulebengelel klengar.
A Telungalek
Ng uai a chebechiil, e a telungalek a mechedaol ra Dios ra moktek er a Uldesuel el kirel a diak a ulebengelel deureng. A telungalek er kid a sebechel mo ngara deureng sel sekum e kede kiei loltirakl osischeklel a Jesus Kristo. A roungalek olisechakl er a rengelekir ra ebangkelio er a Jesus Kristo e ochotii okesiu loltirakl er ngii. A telungalek a meskid a techall el mo kaubeltikelreng e mesiou er a tang ma tang.
A roungalek a kirir rulii a telungalek er tir el mo kot el ngaruchei el ngerchelir. Ng chedaol techall ma ngerachel el roungalek a omekerreu ra rengelekir a lomechell er tir ma lorodel er tir.
Rokui el telungalek a ngarngii a ringel el chelbangel. Sel dosiik a ngesou ra Dios e doltirakl a llechul, e a ringel ra telungalek a sebechel ngosukid el mesuub e mukeroul. Bebil er a taem e a ikal ringel a ngosukid el mo ouchel a rengud e ousubes.
A remengeteklel a Ikelesia a mla olisechakl er a rechedal a ikelesia el mo ngarngii a ongdibel er a telungalek er a bek el sandei. A roungalek ousbech er tiaikid el taem lolisechakl er a rengelekir ra ebangkelio, melisiich a deleuill ra telungalk, e ngara ungil omilil. A remengeteklel a Ikelesia a dirrek el mla otebedii a chais el olisechakl a meklou a belkul klemerang el kirel a telungalek (mesa “A Telungalek: A Chais el mora Beluulechad,” ChurchofJesusChrist.org).
A bebil er a teletael el dirrek el melisiich a telungalek a nglunguuch ra telungalek, omesubel chedaol llechukl, e dmak el ngara ongdibel er a ikelesia. Ng dirrek el sebeched losiik a reksi er a telungalek, meluches a cheldecheduch ra telungalek, e mesiou er a rebebil.
Betok el chad a diak a kmal techellir ra chebechiil ma lechub e le ngara ungil deleuill er a telungalek. Betok a mla soiseb ra dertel a chebechiil ma lmuut el meringel teletael er a telungalek. Eng di, a ebangkelio a omekngeltengat er a dersta el chad el diak el iior er a teletael er a telungalek le ngara chelsel. Sel le blak a rengud, e a Dios a mo meskid a rael el mo ngmai a klengeltengat er a ungil telungalek, a le tial klengar ma lechub eng sel tara klengar meraeal mei.
Omesubel Chedaol Llechukl
Chebechiil
Telungalek
Mluut el Mesuub el kirel a Aika el Osisechakl
-
Ngesou er a Chedaol Llechukl: “Telungalek,” “Chebechiil, Bechiil”
-
General Handbook, bliongel 2: “Supporting Individuals and Families in the Work of Salvation and Exaltation”
-
Cheldecheduch ra Ebangkelio: “Chebechiil,” “Telungalek,” “Roungalek”
Templo ma Ureor ra Reksi er a Telungalek el mora Rebeldeked
A Demad er a Babeluades a betik a rengul er a rokui el Ngelekel e soal a bol sobel el nguu a diak a ulebengelel klengar. Ng di te betok el chad a mla mad e dimlak a techellir rongesii ebangkelio er a Jesus Kristo ma lechub e lengai a chedaol ruoll ra ebangkelio ra mo suobel. Aika el chedaol ruoll a uldimukl er ngii a techolbechelid, moterekokl, oterkeklir a rsechal ra priesthood, klengeltengat er a templo, ma diak a ulebengelel chebechiil.
Ngokiu chubechub ma krasia er Ngii, e a Rubak a mla kudmeklii a rolel e tirkal chad a ngmai chedaol ruoll er a ebangkelio. Chelsel a belurir a redeleb, e a ebangkelio a mosisechakl el mo er tirkel mla mad e dimlak el nguu ebangkelio (mesa Doctrine and Covenants 138). Chelsel a templo, e kid a sebeched el remuul chedaol ruoll lomtechei er tirkel beldeked ma rebebil. Tirkal beldeked el ngara belurir a redeleb a sebechir el kongei ma lechub e te kotouar aika el chedaol ruoll el mla mekedmokl el kirir.
Uchei er a doruul aika el chedaol ruoll, eng kired el smiik a ngklir tirkal beldeked el dirkak el ngai chedaol ruoll. A osiik a ngklir a rebeldeked me luchul e lengai a chedaol ruoll a moktek er a ureor er a reksi er a telungalek. Sel de betik a ngklir, eng sebeched locha er a database er a Ikelesia FamilySearch.org. E kid (ma lechub a rebebil) a sebechir lomtechei el remuul a chedaol ruoll el kirir ra chelsel a templo.
Sel de betik a ngklir tirkal beldeked e deruul chedaol ruoll el kirir, e a telunglek er kid a sebechel mo dmak el mora ulebongel.
Omesubel Chedaol Llechukl
Mluut el Mesuub el kirel a Aika el Osisechakl
-
General Handbook, bliongel 28: “Chedaol Ruoll er a Templo el kirir a re mla Mad”
-
Cheldecheduch ra Ebangkelio: “Techolbechelid el kirir a re mla Mad,” “Reksi er a Telungalek”
Templo, Klengeltengat, Diak a Ulebengelel Chebechiil, Diak a Ulebengelel Telungalek
Templo
A templo a blil a Rubak. Ng chedaol basio el desiseb er a telbiil lobengkel a Dios e ngmai a chedaol ruoll. Sel doltirakl aikal telbiil, e kede mo nguu a klisiich er a teletelel a Dios ra klengar kid (mesa Doctrine and Covenants 84:19–22; 109:22–23).
Chedaol Klisiich
A tara chedaol ruoll el denguu er a templo a chedaol klengeltengat. A tekoi el klengeltengat a belkul “a sengk.” Tial sengk ra klemedengei ma klisiich a ngara Dios el mei. Sel lomeliul a klengeltengat, e kede tibir lobengkel a Dios el mo moak el mo er Ngii ma Ngelekel, el Jesus Kristo (mesa bliongel 1).
A remeklou el chad a sebechir el ngmai a klengeltengat er a templo el kirir ruriul er a kesengil eng tal rak er a bol chedal a Ikelesia. A lmuut el bebil er a omesodel a klengeltengat er a templo, e mesa General Handbook, 27.2.
Diak a Ulebengelel Chebechiil me Diak a Ulebengelel Telungalek
A uldesuel a Dios er a deureng a rulii a deleuill er a telungalek meng melemolem ruriul er a kodall. Chelsel a templo eng sebeched el mo kaubuch el mo cherechar. Tia rulii a telungalek meng sebechel mo dmak el mora ulebongel.
Uriul er a robekel a lengai a klengeltengat er a templo, eng sebechir el mo kaubuch ma lechub ete moak el mora ulebongel. A rengelekir a sebechir el merenged el mo er tir.
A sechal ma redil el mla moak ra templo a kirir loltirakl a telbiil el bla lengai me bol ngai a klengeltengat ra diak a ulebengelel chebechiil.
Omesubel Chedaol Llechukl
Mluut el Mesuub el kirel a Aika el Osisechakl
-
General Handbook, bliongel 27: “Chedaol Ruoll er a Templo el kirir a re Ngar”
-
Cheldecheduch ra Ebangkelio: “Templo,” “Klengeltengat,” “Chebechiil”