Aolepān Naan in Kōmeļele ko

Lale Bok in Bōk Meļeļe 2, jebta 20

em̧m̧aan ro rej kōjeraam̧m̧an juon em̧m̧aan

Bok in ej kōllaajrake naan in kōmeļeļe ko n̄an kōm̧m̧ane kain̄i ko im kōjeraam̧m̧an ko an priesthood eo. Stake būreejtōn ro, bisop ro, im kūļōk ro rej aikuj barāinwōt lale kakien ko im wāween ko me rej kōllaajraki ilo Bok in Bōk Meļeļe 1, jebta 16, im Bok in Bōk Meļeļe 2, jebta 20.

Juon kain̄i ej juon jerbal ekwojarjar, eo āinwōt peptaij, me ej kōm̧m̧an kōn mālim an priesthood eo. Kain̄i ko an peptaij, kapene, ekkapit n̄an Melkizedek Priesthood eo (n̄an em̧m̧aan ro), bōk menin letok kwojajar an tampeļ, im liāpe an tampeļ rej menin aikuj n̄an mour ijo eutiej tata n̄an aolep armej ro rej lokjak n̄ane. Men kein rej ņa etan kain̄i in lo̧mo̧o̧r ko. Āinwōt m̧ōttan kajjojo kain̄i in lo̧mo̧o̧r eo, armej eo ej bōk ej kōm̧m̧ani bujen ko ippān Anij.

Kōm̧m̧ane juon kain̄i in lo̧mo̧o̧r ej aikuji mālim eo jān juon ritōl an priesthood eo me ej kabwijer kii ko rejejjet ak eo ej jerbal ium̧win tōl eo an juon armej eo ej kabwijer kii kein. Kain mālim rōt in ej barāinwōt aikuji n̄an ņaetan im kōjeraam̧m̧an juon ajri; aje juon lōb; leļo̧k juon kōjeraam̧m̧an an petriak; im kōpooj, kōjeraam̧m̧an, im ajije kwojkwoj eo. Rikabwijer ro an Melkizedek Priesthood eo remaron̄ kōkwojajar oil eo, kōjeraam̧m̧an rinan̄inmej, leļo̧k kōjeraam̧m̧an ko an jemen, im leļo̧k kōjeraam̧m̧an ko jet kōn kaenōm̧m̧an im kōkapilōklōk ilo an jab m̧oktata kappukōt mālim jān juon rikabwijer priesthood eo.

Em̧m̧aan ro rej kōm̧m̧ane kain̄i ko im kōjeraam̧m̧an ko raikuj kōpooj er make kōn mour erreo im kajjieon̄ bwe ren tōl jān Jetōb Kwojarjar. Rej aikuj kōm̧m̧ane kajjojo kain̄i ak kōjeraam̧m̧an ilo jekjek eo etiljōk, kanooj lale bwe ej tōpar unin menin aikuj kein:

1. Ej aikuj kōm̧m̧ane ilo etan Jisōs Kraist.

2. Ej aikuj kōm̧m̧an jān mālim an priesthood eo.

3. Ej aikuj kōm̧m̧an kōn jabdewōt jekjek ko remenin aikuj, ko āinwōt kōjerbal naan ko rejeno̧ļo̧k ak kōjerbal oil eo kar kōjeraam̧m̧ane.

4. Ej aikuj kōmālim jān ritōl eo ej tōl eo ej kabwijer kii ko rejejjet (ekkā an bisop eo ak stake būreejtōn eo), eļan̄n̄e emenin aikuj ekkar n̄an naan in kōmeļeļe ko ilo jebta in.

Ritōl eo an priesthood eo me ej lale juon kain̄i ak kōjeraam̧m̧an ej kanooj lale we armej eo ej kōm̧m̧ane ewōr ippān mālim in priesthod eo, ej erreo, im ejeļā im ej ļoor jekjek ko rejejjet. Ritōl ro barāinwōt rej pukōt n̄an kōm̧m̧an kain̄i eo ak kōjeraam̧m̧an ilo kautiej im juon en̄jake ilo jetōt.

N̄e kain̄i ko ak kōjeraam̧m̧an ko rej kōm̧m̧an ilo kweilo̧k in kwojkwoj eo, bisop eo ej kanooj lale bwe ren kōm̧m̧ani ilo jejjōt. N̄an joļo̧k kajjokok juon rikabwijer priesthood eo, bisop eo ej unoojdikdikļo̧k n̄an kajim̧we bōd eļan̄n̄e ewōr ļamļam ko raorōk an kain̄i eo ak kōjeraam̧m̧an eo ejjab jim̧we.

Ro rej leļo̧k kōjeram̧m̧an ko an priesthood eo rej kōnono naan ko an kōjeraam̧m̧an eo (“Ij [ak kōmij] kōjeraam̧m̧an eok bwe …”) ijello̧kin kōm̧m̧an juon jar (“Jemedwōj Ilan̄, jouj im kōjeraam̧m̧an armej in bwe …”).

Bōk kuņaan ilo Kain̄i ko im Kōjeraam̧m̧an ko

Em̧m̧aan ro wōt rej kabwijer priesthood eo emenin aikuj im rej erreo remaron̄ kōm̧m̧ane juon kain̄i ak kōjeraam̧m̧an ak jutak ilo doulul eo. Ro rej bōk koņaer ekkā wōt an jejjo, ekoba ritōl ro ilo priesthood eo, ro uwaan baam̧le eo repaake, im ro jerāer āinwōt rikarejar jeiū ak jatū m̧aan. Ejjab kōketak n̄an kūr juon oran eo eļap an baam̧le, ro m̧ōttaer, im ritōl ro n̄an jipan̄ ilo juon kain̄i ak kōjeraam̧m̧an. N̄e elōn̄ ro rej bōk koņaer, emaron̄ erom pen kōm̧m̧ane im ko̧kkure ao̧ eo an jetōb in kain̄i eo. Ro rej kōm̧m̧ane juon kain̄i im ro rej tōl rej er ro wōt rej menin aikuj. Ro jet rej leļo̧k rie im rejtake rikōnono eo.

N̄e jejjo em̧m̧aan ro rej bōk koņaer ilo juon kain̄i ak kōjeraam̧m̧an, kajjojo iaer ilo mera likūt tuanbwijmaron̄ in pein ioon bōran armej eo (ak ium̧win nin̄nin̄ eo ej kōjeraam̧m̧an) im tuanmiin̄ in pein ioon aeran būratōr eo ituanmin̄in.

Mekarta jejjo wōt oran em̧m̧aan ro rej jutak ilo doulul eo n̄e juon armej ej bōk kain̄i eo ak kōjeraam̧m̧an eo, ekkā an ro uwaan baam̧le eo kūr n̄an pād.

Ritōl ro rej rōjan̄ em̧m̧aan ro rerreo ro rej kabwijer priesthood eo ekkar n̄an kōm̧m̧ani ak bōk kuņaer ilo kain̄i ko im kōjeraam̧m̧an ko n̄an ro uwaan baam̧le ko aer.

Erreo n̄an Bōk Kuņaan ilo juon Kain̄i ak Kōjeraam̧m̧an

Rikabwijer eo Melkizedek Priesthood eo wōt me ej erreo n̄an kabwijer juon peba in mālim an tampeļ emaron̄ āinwōt ainikien eo ilo kapen juon armej uwaan Kabun̄ in, leļo̧k Melkizedek Priesthood eo, kapit juon armej n̄an juon opiij ilo priesthood jab eo, ak kōjeno̧ļo̧k juon armej n̄an jerbal ilo juon kūr an Kabun̄.

Āin wōt kar tōl jān Jetōb eo im naan in kōmeļeļe ko ilo pārokūrāāp eo tok juon, bisop ro im stake būreejtōn ro ewōr ippāer jim̧we eo n̄an kōtļo̧k an rikabwijer ro an priesthood eo ro rejjab kanooj erreo eo an tampeļ n̄an kōm̧m̧an ak bōk kuņaan ilo jet kain̄i ko im kōjeraam̧m̧an ko. Mekarta, ritōl ro rej tōl rej aikuj jab kōtļo̧k bwe kain bōk kuņaan in eļan̄n̄e juon rikabwiijer priesthood eo ewōr an jerawiwi ko reļļap ejjan̄in kajim̧we.

Juon bisop emaron̄ kōtļo̧k an juon jemen eo ej kabwijer Melkizedek Priesthood eo n̄an ņaetan im kōjeraam̧m̧an ajri ro nejin jekdo̧o̧n eļan̄n̄e eo jemen ejjab kanooj erreo ekkar n̄an tampeļ. Ejja āinwōt, juon bisop emaron̄ kōtļo̧k an juon jemen eo ej juon pris ak rikabwijer Melkizedek Priesthood eo n̄an peptaiji ajri ro nejin ak n̄an kapit ļaddik ro nejin n̄an opiij ko an Aaronic Priesthood eo. Juon rikabwijer Melkizedek Priesthood eo ilo ejja jekjek kein wōt maron̄ kōtļo̧k n̄an jutak ilo doulul eo n̄an kapen ajri ro nejin, n̄an leļo̧k Melkizedek Priesthood ioon ļaddik ro nejin, ak n̄an kōjeno̧lo̧k lio pāleen ak ajri ro nejin. Ijowōt ke, ejjab maron̄ āinwōt ainikien eo.

Kōm̧m̧ane juon Kain̄i ak Kōjeraam̧m̧an ilo Bar juon Ward

N̄an āinwōt ainikien eo n̄e ņaetan im kōjeraam̧m̧an juon ajri, peptaij ak kapene juon armej, kapit juon armej n̄an juon opiij ilo priesthood eo, ak aje juon lōb, rikabwijer priesthood eo eo ej jokwe itulikin ward eo am make aikuj kwaļo̧k n̄an ritōl eo ej tōl juon peba in mālim an tampeļ ekāāl ak Recommend to Perform an Ordinance boom̧ eo me ej jaaini jān juon membōr in bisoprik eo.

Kōm̧m̧ani Kain̄i ko jān im n̄an Armej ro Ewōr Utamwe in Āinbwin ko

Unin tōl ko n̄an kōm̧m̧ani kain̄i ko jān im n̄an armej ro ewōr utam̧we in ānbwin ko rej waļo̧k ilo Bok in Bōk Meļeļe 1, 16.1.8 im 16.1.9.

N̄an unin tōl ko kōn ukook in kain̄i ko n̄an ro rejaron̄ron̄ ak ro rejjab maron̄ ron̄, lale Bok in Bōk Meļeļe 1, 21.1.26.

Ukook in Kain̄i ko im Kōjeraam̧m̧an ko

Unin tōl ko n̄an ukook in kain̄i ko im kōjeraam̧m̧an ko rej litok Bok in Bōk Meļeļe 1, 16.1.2.

Naan in kōmeļeļe ko ñan Kōm̧m̧ani Kain̄i ko im Kōjeraam̧m̧an ko

Bok kein rej ellaajrak rej letok naan in kōmeļeļe ko kōn kōm̧m̧ani kain̄i ko im kōjeraam̧m̧an ko:

1. Bok in Bōk Meļeļe 2, jebta 20

2. Bok in Tōl an Baam̧le, peij 18–25

3. Eddo ko im Kōjeraam̧m̧an ko an Priesthood, M̧ōttan B, peij 42–47

Kōjerbal bok kein, ritōl ro an priesthood eo rej katakin em̧m̧aan ro kile kōm̧m̧ani kain̄i ko im kōjeraam̧m̧an ko. Ritōl ro rej kanooj lale bwe kajjojo rikabwijer ro an priesthood eo ewōr aer Bok in Tōl an Baam̧le ak Eddo ko im Kōjeraam̧m̧an ko an Priesthood, M̧ōttan B, bwe en maron̄ wōr an make kape in naan in kōmeļeļe kein.

Ritōl ro rejjab aikuj kōm̧m̧an ak kōjerbal bok ko jet me rej leļo̧k naan in kōmeļeļe ko n̄an kain̄i ko im kōjeraam̧m̧an ko, ak jar ko ijello̧kin Būreejtōnji eo Kein Kajuon eaar kōmālim kain bok kein.