Ko e hā ‘oku fakaʻaonga‘i ai ʻe he saití e foʻi lea ko e “fetokangaʻaki fakaetangata mo fakaefefiné”?

ʻOku ʻuhinga e “fetokangaʻaki fakaetangata mo fakaefefiné”, ki he fetokangaʻaki fakaeloto, fakaesino, feʻofaʻaki pe fakasekisuale ʻa ha tangata mo e tangata pe fefine mo e fefine. ʻE ala lava ʻa kinautolu ʻoku nau fefaʻuhi mo e fetokangaʻaki fakaetangata mo fakaefefiné, ke fili pe ʻikai fili ha tuʻunga fakasekisuale ke ui ʻaki kinautolu. Tatau ai pē pe ko e hā e tūkungá, ko e fetokangaʻaki ʻa e tangata mo e tangata pe fefine mo e fefiné, ko ha foʻi lea fakatekinikale ia ʻokú ne fakamatalaʻi e meʻa ʻoku hokó kae ʻikai ui ʻaki kita. ʻOku fakaʻaongaʻi ʻe he uepisaití ni ʻa e foʻi leá ni ke fakakau mai ki ai e kakai ʻoku ʻikai ke nau ongoʻi fiemālie hono ui ʻaki kinautolu ha hingoá (label)—ka ʻoku ʻikai ko hono fakaʻikaiʻi ʻo pehē ʻoku ʻikai ha meʻa ko e nonofo fakatangata, nonofo fakafefine pe fakatouʻosi.

Ko e ngaahi hingoa angamaheni tahá ko e lesbian (tokanga ha fefine ki he kakai fefiné), gay (tokanga ha tangata ki he kakai tangatá), mo e bisexual (tangata pe fefine ʻoku manako fakatouʻosi pē he ongo tuʻungá). ʻOku fakaʻaongaʻi foki ʻe ha kakai fefine ʻe niʻihi ʻa e foʻi lea gay ke ui ʻaki kinautolu. ʻOku malava ke fakaʻaongaʻi ʻe he kakaí ha ngaahi hingoa kehe, pea ko e niʻihi ʻoku nau aʻusia ʻa e fetokangaʻaki fakaetangata mo fakaefefiné ʻoku nau fili ke ʻoua naʻa ui ʻaki ia kinautolu. ʻOku malava pē ke liliu ʻa e founga ʻoku fili ai ʻe he kakaí ke ui ʻaki kinautolú, ʻi he hili ha ngaahi taimi.