“Mga Ideya sa Pagpalambo sa Imong Personal nga Pagtuon sa Kasulatan,” Mga Ideya sa Pagtuon sa Kasulatan (2021)
“Mga Ideya sa Pagpalambo sa Imong Personal nga Pagtuon sa Kasulatan,” Mga Ideya sa Pagtuon sa Kasulatan
Mga Ideya sa Pagpalambo sa Imong Personal nga Pagtuon sa Kasulatan
Aniay pipila ka yano nga mga paagi sa pagpauswag sa imong pagtuon sa pulong sa Dios diha sa mga kasulatan.
Pag-ampo alang sa Kadasig
Ang mga kasulatan naglangkob sa pulong sa Dios. Samtang ikaw nagtuon niini, pangamuyo sa imong Langitnong Amahan alang sa Iyang giya ug makadawat sa Iyang Espiritu aron sa pagtabang kanimo sa pagsabot kanila.
Pangitaa ang mga Kamatuoran mahitungod ni Jesukristo
Ang mga kasulatan nagtudlo nato nga ang tanang mga butang nagpamatuod ni Kristo (tan-awa sa 2 Nephi 11:4; Moises 6:63) mao nga pangitaa Siya sa mga panghitabo, mga istorya, ug mga pagtulun-an sa mga kasulatan. Ikonsiderar ang pagbutang og timaan o pagmarka sa mga bersikulo nga nagtudlo mahitungod sa Manluluwas ug unsaon sa pagsunod Kaniya.
Pangitaa ang Makapadasig nga mga Pulong ug mga Hugpong sa mga Pulong
Makita nimo nga may piho nga mga pulong ug mga hugpong sa mga pulong diha sa mga kasulatan nga makapadani kanimo, ingon og kini piho nga gisulat alang kanimo. Kini mahimong bation nga sa personal nga paagi may kalabotan ug nagdasig ug nag-awhag kanimo. Hunahunaa ang pagmarka niini diha sa imong mga kasulatan o pagsulat bahin niini sa usa ka study journal.
Pangitaa ang mga Kamatuoran sa Ebanghelyo
Usahay ang mga kamatuoran sa ebanghelyo (sa kasagaran gitawag nga doktrina o mga baroganan) direkta nga gipahayag, ug usahay gipasabot pinaagi sa ehemplo o istorya. Pangutan-a ang imong kaugalingon, “Unsa nga mga kamatuoran sa ebanghelyo ang gitudlo niini nga mga bersikulo?”
Paminawa ang Espiritu
Hatagi og pagtagad ang imong mga hunahuna ug mga pagbati, bisan og kini daw walay kalabotan sa unsay imong gibasa. Kadto nga mga pagbati mahimo nga mao gayod ang mga butang nga gusto sa imong Langitnong Amahan nga imong makat-unan ug mabati.
Ipahisama ang mga Kasulatan sa Imong Kinabuhi
Ikonsiderar kon sa unsa nga paagi nga ang mga istorya ug mga pagtulon-an nga imong gibasa magamit sa imong kinabuhi. Sama pananglit, mahimo nimong pangutan-on ang imong kaugalingon, “Unsa nga mga kasinatian ako aduna nga susama sa unsay akong gibasa?” o “Unsaon nako sa pagsunod ang panig-ingnan niini nga tawo dinhi sa mga kasulatan?”
Pangutana
Ang pagpangutana bahin sa ebanghelyo makatabang kanimo sa paghukom unsa ang tun-an. Samtang ikaw magtuon sa mga kasulatan, tingali adunay mga pangutana usab nga mosulod sa hunahuna. Tingali kini nga mga pangutana may kalabotan ngadto sa unsay imong gibasa o sa imong kinabuhi sa kinatibuk-an. Pamalandunga kini nga mga pangutana, ug pangita og mga tubag samtang ikaw nagpadayon sa pagtuon sa mga kasulatan. Human sa imong pagtuon, pangutana unsa pa ang gusto sa Dios nga imong makat-onan, ug pagbantay sa mga tubag atol sa mosunod nga mga oras o mga adlaw.
Gamita ang Mga Tabang sa Pagtuon sa Kasulatan
Aron makabaton pa og dugang nga panabot sa mga bersikulo nga imong gibasa, gamita ang mga footnote, ang Topical Guide, ang Bible Dictionary, ang Giya ngadto sa mga Kasulatan (scriptures.ChurchofJesusChrist.org), ug ubang mga tabang sa pagtuon.
Ikonsider ang Kinatibuk-ang Kahulogan sa mga Kasulatan
Makakaplag ka og makahuloganong mga panabot mahitungod sa usa ka kasulatan kon hunahunaon nimo ang kinatibuk-ang kahulogan niini—ang mga kahimtang o ang palibot sa kasulatan. Sama pananglit, ang pagkahibalo sa kaagi ug mga tinuohan sa katawhan nga gisulti sa usa ka propeta makatabang kanimo sa pagsabot sa tuyo sa iyang mga mensahe.
I-rekord ang Imong mga Hunahuna ug mga Pagbati
Adunay daghang mga paagi nga marekord ang mga pagbati nga moabut samtang ikaw nagtuon. Sama pananglit, mahimo nimong markahan ang makahuluganong pulong o hugpong sa mga pulong ug i-rekord ang imong mga hunahuna isip usa ka pahinumdom sa imong mga kasulatan. Mahimo usab nga maghimo ka og journal sa mga panabot, mga pagbati, ug mga impresyon nga imong nadawat. O mahimo nimong isulat ang pangutana nga imong gipangutana sa wala pa magsugod sa imong pagtuon, gisundan sa mga tubag diin ikaw gigiyahan.
Tun-i ang mga Pulong sa mga Propeta ug Apostoles sa Ulahing mga Adlaw
Basaha unsay gitudlo sa mga propeta ug apostoles sa ulahing adlaw mahitungod sa mga baruganan nga imong nakit-an sa mga kasulatan. Ang ilang mga mensahe anaa sa “Kinatibuk-ang Komperensiya,” “Mga Magasin,” ug ubang mga koleksiyon diha sa Gospel Library.
Magbasa og mga Istorya
Magbasa og mga istorya diha sa mga kasulatan, magtinguha sa pagsabot sa ilang konteksto (panahon, dapit, namulong, ug naminaw). Ang gihulagway nga mga istorya sa kasulatan mga maayo kaayo nga kapanguhaan alang niini, ilabi na sa kabataan ug mga sakop nga dili kaayo sinati sa mga kasulatan.
Pakigbahin sa mga Panabot
Ang paghisgot sa mga panabot gikan sa imong kaugalingon nga pagtuon usa ka maayong paagi sa pagtudlo sa uban ug makatabang nga malig-on ang imong pagsabot sa unsay imong nabasa.
Pagpuyo pinaagi sa Unsay Imong Makat-onan
Ang pagtuon sa kasulatan makapadasig kanato ug maggiya kanato sa pag-usab sa paagi sa atong pagpuyo. Paminaw sa unsay giaghat sa Espiritu kanimo nga buhaton samtang ikaw nagbasa, ug dayon pasalig sa pagbuhat niadtong mga pag-aghat.