Na Vakasama Eso me Vakavinakataka na Nomu Vuli iVolanikalou Yadua

Oqo eso na sala rawarawa me vakarabailevutaka na nomu vulica na vosa ni Kalou ena ivolanikalou.

Masulaka na veivakauqeti

Na ivolanikalou era tiko kina na vosa ni Kalou. Ni ko vuli tiko, kerea vua na Tamada Vakalomalagi me dusimaki iko ka ciqoma na Yalona me vukei iko mo kila vinaka.

Vakaraica na Dina Eso me baleti Jisu Karisito

E vakatavulica vei keda na ivolanikalou ni veika kece e vakadinadinataki Karisito (raica na 2 Nifai 11:4; Mosese 6:63), vaqarai Koya ena soqoni, italanoa, kei na veivakatavulici ena iVolanikalou. Navuca mo vola se makataka na tiki ni volanikalou e vakatavulica na veika me baleta na iVakabula kei na veika meda cakava meda muri Koya.

Vakaraica na Veivosa kei na Malanivosa e Veivakauqeti

Ena rawa talega ni o raica eso na vosa kei na malanivosa ena ivolanikalou e tarai iko, e vaka ni ra a volai saraga me baleti iko. Era na rairai veiganiti tu vakayadua ka vakauqeti ka vakayavalati iko. Navuca mo toqai ira ena nomu ivolanikalou se volai ira ena nomu ivola ni veisiga.

Vakaraica na Dina va-Kosipeli Eso

Eso na gauna na dina vakosipeli (dau vakatokai me vunau se vakavuvuli) sa volai vakadodonu, ka so na gauna esa vakaibalebaletaki ena dua na ivakaraitaki se italanoa. Tarogi iko mada, “Na dina tawamudu cava so e vakatavulici ena veitikina oqo?”

Vakarorogo ki na Yalotabu.

Yadrava matua na nomu vakasama kei na veika o vakila, ke sega mada ga ni veisotari kei na ka o wilika tiko. Na veivakanananu oqori sa rawa ni ka saraga e vinakata vei iko na Tamada Vakalomalagi mo vulica.

Vakatautauvatataka na iVolanikalou ki na Nomu Bula

Navuca na sala e vakaibalebale kina ki na nomu bula na italanoa kei na ivakavuvuli o wilika tiko. Me ivakaraitaki, sa rawa ni o tarogi iko, “Na cava so au sotava esa tautauvata kei na ka au wilika tiko?” se “E rawa vakacava ni u muria na ivakaraitaki ni tamata oqo ena ivolanikalou?”

Mo dau taro

Na tarogi ni taro me baleta na kosipeli ena rawa ni vukei iko mo vakatulewataka na veika mo vulica. Ni o vulica tiko na ivolanikalou, ena votu mai nomu vakasama na taro eso. Na veitaro oqo e rawa ni semati ki na ka o wilika tiko se ki na nomu bula raraba. Vakasamataka vagumatua na veitaro oqo ka vakaraica na isaunitaro ni o tomana tiko na vuli ivolanikalou. Ni oti nomu vuli, taroga na cava tale e vinakata na Kalou mo vulica, ka vakaraica na isaunitaro ena veiauwa kei na veisiga ka tarava.

Vakayagataka na Veivuke ni Vuli iVolanikalou

Me vakaikuritaki na raiyawa eso ena veitikina o sa wilika, vakayagataka na ivakamacala e ra, na Topical Guide, na Bible Dictionary, na Guide to the Scriptures (scriptures.ChurchofJesusChrist.org), kei na veivuke ni vuli tale eso.

Navuca na iVakavuvuli ni iVolanikalou

Sa rawa mo raica eso na vakasama titobu me baleta na ivolanikalou kevaka o vakasamataka na kena ituvatuva—na ituvaki se ituvatuva ni veika ena ivolanikalou. Me kena ivakaraitaki, na kilai ni tuvaki kei na nodra vakabauta na tamata e vosa kina e dua na parofita ena rawa ni vukei iko mo kila vakavinaka na inaki ni nona vosa.

Vola na Nomu Vakasama kei na Veika o Vakila

E vuqa na sala o rawa ni vola kina na veika e votu mai vei iko ena nomu vuli tiko. Me ivakaraitaki, e rawa ni o makataka e dua na vosa se malanivosa e vakaibalebale ka vola na nomu nanuma ena nomu ivolanikalou. Sa rawa talega ni o maroroya e dua na ivolaniveisiga ni raititobu, veika o vakila, kei na vakanananu eso o ciqoma. Se o rawa ni vola na taro o a taroga ni bera ni o tekivu vuli, ka tarava mai na isaunitaro o a dusimaki kina.

Vulica na Nodra Vosa na Parofita kei na iApositolo ni Gauna Oqo

Wilika na cava era vakatavuvulitaka na parofita kei na iapositolo e muri oqo baleta na ivakavuvuli dina e kunei ena ivolanikalou. Sa vakarautaki tu na nodra itukutuku ena “Koniferedi Raraba,” “Mekasini,” kei na so tale na ikumuni ena Gospel Library.

Wilika na ivolanikalou

Wilika na italanoa ena ivolanikalou, ka vakasaqara me kilai vinaka na kedra ituvaki (gauna, vanua, vosa, kei na ivavakoso). Na italanoa mai na ivolanikalou sa ivurevure cecere ki na ka oqo, vakabibi vei ira na gone kei ira na lewenilotu era sega soti ni kila na ivolanikalou.

Wasea na Raititobu Eso

Na veitalanoataki ni raititobu mai na nomu vuli yadua e sega walega ni sala vinaka mo vakatavulici ira kina na tani, ia e vukea talega me vaqaqacotaka na nomu kila vakamatata na veika o sa wilika.

Bulataka na Veika O Vulica

Na vulici ni ivolanikalou me kua walega ni vakauqeti keda ia e dodonu talega me muataki keda ni veisautaka na ivakarau ni noda bula. Vakarogoca na veika e vakauqeti iko kina na Yalotabu mo cakava ni o wiliwili tiko, ka qai vakadeitaka mo cakacaka ena veivakauqeti oqori.