“Apay nga Adalen dagiti Nasantuan a Kasuratan?” Dagiti Kapanunotan iti Panagadal iti Nasantuan a Kasuratan (2021)
“Apay nga Adalen dagiti Nasantuan a Kasuratan?” Dagiti Kapanunotan iti Panagadal iti Nasantuan a Kasuratan
Apay nga Adalen dagiti Nasantuan a Kasuratan?
No sipapasnektayo nga agadal kadagiti nasantuan a kasuratan, umas-asidegtayo ken ni Jesucristo ken ad-adda a maawatantayo ti ebangheliona ken ti pangsubbot a sakripisiona. Inallukoynatayo ni propeta Nephi iti kastoy a wagas:
“Gapuna, masapul nga agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: Maaddaankayto iti biag nga agnanayon” (2 Nephi 31:20).
Dagiti pannursuro manipud kadagiti nasantuan a kasuratan ti mangtulongto kadatayo a makasubli iti Nailangitan nga Amatayo. Indawat dagiti propetatayo iti ud-udina nga aldaw nga adalentayo dagitoy a masansan nga agmaymaysa ken, iti lugar a mayannatup, kas sangapamiliaan. Inawisdakami nga agsursuro manipud kadagiti padas dagiti adda kadagiti nasantuan a kasuratan ken mangyaplikar kadagiti pakaammuan iti nasantuan a kasuratan ken pannursuro iti biagtayo ita, kas iti balakad ni Nephi iti 1 Nephi 19:23. Inawisdatayo dagiti agpada a nagkauna ken kabaruanan a propeta tapno agadal kadagiti nasantuan a kasuratan ken tapno “agpennek kadagiti balikas ni Cristo” (2 Nephi 32:3).
Insuro pay ni President Russell M. Nelson daytoy napateg a kinapudno maipapan iti “panagpennek” kadagiti nasantuan a kasuratan:
“Ti agpennek kayatna a sawen ti ad-adda pay ngem iti panangraman. Ti agpennek kayatna a sawen ti mangraman. Ramanantayo dagiti nasantuan a kasuratan babaen ti panagadal kadagitoy iti espiritu ti naragsak a panangtakuat ken napudno a panagtungpal. No agpennektayo kadagiti balikas ni Cristo, maisiglotda ‘iti taptapi a puspuso a naglasag’ [2 Taga Corinto 3:3]. Agbalinda a napateg a paset ti kinataotayo” (“Living by Scriptural Guidance,” Ensign, Nob. 2000, 17).
No agtultuloytayo a makipaset iti bukod ken sangapamiliaan a panagadal iti nasantuan a kasuratan, datayo ken dagiti pamiliatayo ket matarabay, masaluadan, ken mapapigsa a maibusor iti adu a karit tti aldawtayo.