Fasin blong Man i Kilim Hemwan Bakegen
Stopem Fasin blong Man i Kilim Hemwan Bakegen mo Hao blong Helpem Wan Afta we Wan I Ded

Stopem Fasin blong Man i Kilim Hemwan Bakegen mo Hao blong Helpem Wan Afta we Wan I Ded

Ret blong fasin blong man i kilim hemwan bakegen i kam antap bigwan long plante eria long wol mo hem i wan bigfala problem mo consen. Stamba tingting blong pepa ia i blong helpem ol papa mo mama, ol famli, ol Jos lida, mo ol memba blong Jos taem oli stap lukaot blong givhan long olgeta we oli harem nogud long fasin ia blong man i kilim hemwan bakegen.

Ol memba oli save yusum risos ia blong lanem doktrin blong Jos abaot fasin blong man i kilim hemwan bakegen, lanem ol saen we oli ol woning blong fasin blong man i kilim hemwan bakegen, hao blong helpem wan man we i stap long trabol ia, mo hao blong helpem afta long wan we yumi lusum. Ol lida oli save yusum risos ia blong lidim ol storian we i gat mining wetem ol memba long ol stek mo wod kaonsel, mo long ol narafala ples tu. Stamba tingting blong ol storian ia i blong helpem ol lida mo ol memba blong givhan gud moa long olgeta we oli harem nogud long fasin ia blong man i kilim hemwan bakegen.

Sapos we yu ting blong holem wan toktok abaot fasin blong man i kilim hemwan bakegen bae i save help blong stopem fasin blong man i kilim hemwan bakegen mo givhan gud long olgeta we topik ia i tajem olgeta; bambae i mas gat tu adalt blong save lidim wan toktok olsem. Ol lida oli save invaetem wan profesenol insaed long komuniti we i andastanem mo respektem doktrin blong Jos long fasin blong man i kilim hemwan bakegen blong save tekem pat long kaen toktok olsem. Ol toktok o storian wetem ol pikinini we oli gat 12 yia i kam daon, i mas hapen nomo afta we papa mo mama i bin toktok wetem ol pikinini blong olgeta.

Afta we ol stek mo wod kaonsel oli bin lukluk tru long pepa ia, oli mas toktok tugeta babaot ol stret rod blong sapotem ol komuniti wok mo letem ol memba oli save long ol risos we i stap.

Doktrin mo Ol Prinsipol

Lod i bin tijim yumi blong tritim evri man wetem andastaning mo wetem bigfala lav mo sore taem Hem i tijim se: “[Yu mas lavem ol neiba blong yu olsem we yu lavem yuwan bakegen]” (Matiu 22:39 Ol traehad blong yumi blong givhan long olgeta we i harem nogud long fasin blong man kilim hemwan bakegen, bae i kam antap moa taem we yumi undastanem fulwan doktrin mo ol tijing olsem olgeta andanit ia:

  • Tru long Atonmen blong Hem, Jisas Kraes i gotru long ol jalenj o harem nogud blong laef blong wol ia fulwan blong mekem se Hem i save “olsem wanem blong helpem ol man blong hem long saed blong ol samting blong olgeta we oli no strong long olgeta” (Alma 7:11–13). James E. Fausti tijim: “From se Sevya i bin safa long evri samting we bae yumi save filim o gotru long hem, nao Hem i save helpem olgeta we oli no strong blong kam strong moa.” (“The Atonement: Our Greatest Hope,” Ensign, Nov. 2001, 22).

  • Laef long wol ia i wan presen we i gud tumas we i kam long God—wan presen we yumi mas onarem mo lukaotem gud ( luk long Doktrin mo Ol Kavenan 18:10; M. Russell Ballard, “Suicide:Some Things We Know and Some We Do Not,” Ensign Oct. 1987, 6–9).

  • Taem man i kilim laef blong hemwan bagegen, God nomo i save jajem ol tingting, ol aksen, mo wei we oli akaontebol long wanem we oli mekem. Fasin blong man i kilim hemwan bakegen hem i no stret samting ia we bae i talem se bae hem i save kasem laef we i no save finis to no ( luk long 1 Samuel 16:7; Doktrin mo Ol Kavenan 137:9; Dale G. Renlund, “Grieving after a Suicide Loss,” vidio long suicide.lds.org

Sam Moa Risos:

  • Ol Gospel Topik oli stap long topics.lds.org mo insaed long Gospel Laebri ap.

Ol Saen we Oli Ol Woning blong Fasin blong Man i Kilim Hemwan Bakegen

Plante pipol we oli traem fasin blong man i kilim hemwan bakegen oli no rili wantem ded; oli wantem nomo blong spel long ol hevi samting long saed blong bodi, mo long tingting, mo long filing, o long ol harem nogud long saed blong spirit we oli stap gotru long hem. Plante pipol we oli stap long problem ia oli soem ol saen we i givim woning bifo oli traem blo kilimded olgetawan bakegen. Sapos yu lanem blong luksave ol woning saen ia, bambae yu rere yuwan blong save givhan gud long olgeta we oli nidim help. Lisin gud long ol toktok olsem “mi no kea sapos mi ded” o “evriwan bae i stap gud moa sapos mi no stap.” Ol woning saen ia i gat ol aksen we oli go olsem:

  • Lukaotem ol wei blong kilimded olgeta wan

  • Stap tokbaot ol filing blong no gat hop o no gat risen blong stap laef

  • Stap tokbaot filing olsem blong stap insaed long wan trap o ol filing blong harem nogud we i hevi tumas blong tekem

  • Stap tokbaot se hem i wan hevi trabol long ol narafala man

  • Wei we oli yusum alkol mo ol rabis drag i stap kam antap bigwan

  • Givimaot ol samting we i blong olgeta from nating nomo

  • Oli stap soem ol aksen blong stap wari tumas o stikim man blong mekem se hem i kros o stap mekem samting long wan wei we i no skelem gud tingting mekem se aksiden i save hapen

  • Oli stap kamaot long wan grup o famli o wantem blong stap olgetawan nomo

  • Soem bigfala kros o stap tokbaot mo lukaotem blong givimbak trabol

  • Stap soem bigfala kwik jenis long aksen mo filing (luk long National Suicide Prevention Lifeline).

Wan saen we i givim woning hemwan bae i no oltaem minim se i gat wan problem Be sapos wan man i bin gat sam taem long histri blong laef blong hem we hem i bin traem blong kilimded hemwan bakegen o sapos yu luksave wan bigfala jenis hariap nomo long man o stat blong luksave moa long wan saen, tekem aksen kwiktaem. Ol fri ples blong kasem help mo plante moa infomesen long problem ia yu save faenem long suicide.lds.org (Luk long “Hao Blong Helpem Wan Man We I Stap long Trabol Ia we I Bigwan Olgeta” insaed long gaed ia blong save moa.)

I nomata long ol bes traehad blong yumi, bae yumi no save stopem evriwan we i wantem blong kilimded hemwan bakegen. Sam long ol situesen ia we man i kilimded hemwan bakegen i hapen we i no gat eni woning saen. Yu no responsibol long joes blong wan blong endem laef blong hem.

Sam Moa Risos:

Hao Blong Helpem Wan Man We I Stap long Trabol Ia we I Bigwan Olgeta

Oltaem yufala i mas tekem i impoten blong luksave ol woning saen blong fasin blong man i kilimded hemwan bakegen mo eni narafala problem we i soem se wan man i traem blong kilimded hemwan bakegen, iven sapos yu ting se man ia i no tingting tumas blong kilim hemwan bakegen o hem i jes stap lukaotem blong ol narafala man i luk hem. Folem trifala step ia blong givim sapot—Askem, Tekem Kea, Talem

Step 1: Askem Askem man long fes blong hem sapos hem i stap tingting abaot fasin blong man i kilimded hemwan bakegen. Yu save askem: “?yu stap tingting blong endem laef blong yu?” Sapos oli talem se oli stap tingting long fasin ia blong tekemaot laef blong olgetawan bakegen, askem olgeta sapos oli kat wan plan. Yu save askem: “?yu gat wan plan blong kilimded yuwan?” Sapos oli gat wan plan, kwiktaem helpem olgeta blong go long hospital o wan klinik, o ringim wan imejensi seves we i save help o wan ples blong help long taem blong bigfala trabol olgeta. (Visitim suicide.lds.org/crisis blong luk telefon namba blong ol help laen raon long wol.) Sapos oli no gat plan, muv i go long step 2.

Step 2: Tekem Kea Soem se yu kea long olgeta taem yu lisin long wanem oli talem. Givim long olgeta taem blong eksplenem wanem oli stap filim. Respektem filing blong olgeta mo talem wan samting olsem, “Mi sore tumas we yu stap harem nogud tumas” o “mi no bin save se ol samting oli bin had long yu bigwan.” Yu save traem helpem olgeta blong krietem wan sefti plan blong stopem fasin blong man i kilimded hemwan bakegen (luk long ““How to Create a Suicide-Prevention Safety Plan,” Doug Thomas, Ensign, Sept. 2016, 63). Wan sefti plan i save helpem pipol blong faenemaot ol strong gud saed blong olgeta, ol gudfala rilesensip, mo ol helti skil blong stap save tekem ol hadtaem long laef. Hem i save daonem ol tingting blong givim kil long hemwan, olsem yusum ol denja tul o ol meresin__ Sapos oli askem yu blong no talemaot long ol narafala man abaot ol filing blong olgeta, eksplenem se yu respektem laef mo raet blong olgeta bigwan, be talem se oli nidim moa help bitim hemia we yu save givim…Yu neva mekem promes long olgeta blong kipim ol tingting blong olgeta blong tekemaot laef blong olgeta, i stap olsem wan sikret.

Step 3: Talem Leftemap tingting blong hem blong talem tingting blong hem long wan man we i save givim moa sapot. Serem ol kontak infomesen blong risos long eria blong yu we i save help. Ol risos, i gat ol komuniti hospital, ol kea klinik we i save helpem man kwiktaem, o ol fri helplaen long wol we i save help long taem we trabol i kam bigwan olgeta. Sapos oli no lukaotem help, yu nidim blong talem long wan man long bihaf blong olgeta. Yu save talem wan samting olsem: “mi kea long yu mo mi wantem yu blongsef i stap. Bambae mi talem long wan man we mi save se hem i save givim long yu help we yu yu nidim.” Respektem praevet laef blong olgeta taem yu talem hemia long wan man nomo we yu save se i save help, olsem wan famli blong olgeta we i kolosap, bisop blong hem, wan spesel man long wan skul we i save givim kaonsel, wan dokta, o wan narafala profesenol we i wok long helt kea. Sapos yu no save gud huia blong ringim, toktok long bisop blong yu o ringim wan fri help laen long eria blong yu we i save help taem i gat bigfala trabol olgeta. Tingbaot se yu no mas ting se yuwan nomo bae yu sapotem hemia we i stap long trabol.

Not: Sapos yu stap lidim wan toktok raon long topik ia, tingbaot blong askem olgeta we oli stap tekem pat blong praktisim ol step ia. Givim olgeta wan situesen we wan man i kam long olgeta mo tokbaot ol tingting blong kilimded hemwan bakegen mo askem long olgeta blong praktis long hao nao bae oli save ansarem hem.

Sam Moa Risos:

Wanem blong Mekem afta we Wan I Kilimded Hemwan

I nomata long ol bes traehad blong yumi, bae yumi no save stopem evriwan we i wantem blong kilimded hemwan bakegen. Hem i olsem oltaem, blong olgeta we oli stap biaen afta we wan i kilimded hemwan bakegen blong oli gat ol filing se man i no wantem save long olgeta, oli sek i stap, oli filim sem, kros, mo oli konfius. Presiden M. Russell Ballard i talem: “Aksen ia blong tekemaot laef blong yuwan Hem i rili wan nogud samting from we wan aksen ia nomo, i mekem plante man we oli harem nogud long hem: faswan i hem we i ded, ol plante narawan—ol famili mo fren—we oli stap biaen, sam we bae oli fesem plante yia blong bigfala harem nogud mo tingting i fasfas” (“Suicide: Some Things We Know, and Some We Do Not,” Ensign, Oct. 1987, 7). Blong wanwan long olgeta ia, hiling bae i kam tru long Sevya nomo, we “hem we i bin go daon, daon bitim evri samting,” mekem se hem i save, “long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long olgeta.” (Doktrin mo Ol Kavenan 88:6; Alma 7:12). Ol profesenol risos mo ol kaonseling oli save help bigwan.

Ol stek mo wod kaonsel bae oli wantem blong toktok raon long hao nao oli save sapotem ol famli mo wanwan man o woman afta we wan i tekemaot laef blong hemwan. Ol kwestin blong toktok raon long olgeta i gat:

  • ?Olsem wanem nao olgeta tijing mo Atonmen blong Jisas Kraes i save givim hiling long wanwan man, woman o famli?

  • ?Wanem nao sam long ol nid we ol givhan brata mo sista oli bin stap luksave long wanwan man, woman o famli? ?Wanem seves nao oli bin givim?

  • ?Wanem i ol nid we i stap oltaem long saed blong filing o long saed blong spirit we wanwan man o famli i nidim? ?Huia i save givim sapot ia?

  • ?Man ia o famli ia i gat ol nid long saed blong bodi, olsem transpot o kaekae?

  • ?Hao nao ol okseleri lida blong wod oli save sapotem ol pikinini mo yangfala we oli bin lusum wan we oli lavem tumas?

Harem nogud ia afta we wan i tekemaot laef blong hemwan i save stap blong wan longfala taem. Sapos wan man i gohed blong filim bigfala harem nogud ia o sore, kaonsel wetem olgeta narafalawan we oli kea long hem. Wetem plante prea tingbaot hao nao yu save givim bes sapot blong yu. Bambae yu traem blong helpem hem blong kasem wan prishud blesing o blong konektem hem wetem ol risos we oli stap insaed long eria blong yufala. Ol harem nogud sapot grup, ol dokta, o ol narafala helt kea profesenol oli save givim help bigwan.

Not: Sapos yu stap lidim wan grup toktok, yu no tokbaot olsem wanem nao wan man i tekemaot laef blong hem. Hemia i save leftemap tingting blong wan insaed long grup blong kopi fasin ia we yu tokbaot. Sapos wan man i stat blong serem ol kaen storian ia long wan grup, daerektem storian ia i go long wan narafala rod long wan fasin we i kaen.

Sam Moa Risos:

Ol Nara Risos

Ol Kaonsel we oli kam long Ol Lida blong Jos

Ol Eksperiens blong Laef blong Wanwan Memba

Ol Narafala Risos blong Jos

  • “Ambassadors of Hope: Working Together to Prevent Suicide,” Maryssa Dennis, Ensign, Sept. 2018

  • MentalHealth.lds.org

  • “LDS Family Services Offices” long LDS.org (Blong famli kaonseling mo toktok tugeta)

  • “Lead Inspired Discussions,” Teaching in the Savior’s Way (2015), 33–34

Luk long suicide.lds.org blong plante moa risos