របៀបដើម្បីជួយដល់នរណាម្នាក់ដែលកំពុងមានវិបត្តិ

សូមយកចិត្តទុកដាក់ឲ្យខ្លាំងបំផុតចំពោះសញ្ញាព្រមាននៃការធ្វើអត្តឃាត និងការគំរាមកំហែងណាមួយក្នុងការប៉ុនប៉ងធ្វើអត្តឃាត ទោះបីជាបងប្អូនគិតថាបុគ្គលម្នាក់នោះ មិនគិតពិតប្រាកដអំពីការធ្វើអត្តឃាត ឬគ្រាន់តែទាមទារចំណាប់អារម្មណ៍ក៏ដោយ ។ សូមធ្វើតាមជំហានទាំងបីនេះដើម្បីផ្ដល់ការគាំទ្រ–សួរ យកចិត្តទុកដាក់ ប្រាប់ ។

ជំហានទី ១ ៖ សួរ ។ សូមសួរបុគ្គលនោះដោយត្រង់ៗថា តើពួកគេកំពុងគិតពីការធ្វើអត្តឃាតដែរឬទេ ។ បងប្អូនអាចសួរថា « តើអ្នកកំពុងគិតពីការបញ្ចប់ជីវិតរបស់អ្នកមែនដែរឬទេ ? » ប្រសិនបើពួកគេនិយាយថា ពួកគេកំពុងគិតពីការធ្វើអត្តឃាត សូមសួរពួកគេថា តើពួកគេមានផែនការធ្វើអត្តឃាតដែរឬអត់ ។ បងប្អូនអាចសួរថា « តើអ្នកមានគម្រោងធ្វើបាបខ្លួនឯងដែរឬទេ ? » ប្រសិនបើពួកគេមានគម្រោងធ្វើបាបខ្លួនឯង សូមជួយយកពួកគេទៅមន្ទីរពេទ្យ ឬគ្លីនិកថែទាំសុខភាពភ្លាមៗ ឬទូរសព្ទទៅអ្នកផ្តល់សេវាសង្គ្រោះបន្ទាន់ ឬបណ្ដាញជួយដល់វិបត្តិនៅក្នុងតំបន់របស់អ្នក ។ ( សូមមើល « បណ្ដាញជួយដល់វិបត្តិ » សម្រាប់តំណភ្ជាប់ទៅនឹងបណ្ដាញជំនួយនានាដែលនៅជុំវិញពិភពលោក ) ។ ប្រសិនបើពួកគេពុំមានគម្រោងធ្វើបាបខ្លួនឯងទេ សូមចូលទៅកាន់ជំហានទី ២ ។

ជំហានទី ២ ៖ យកចិត្តទុកដាក់ ។ សូមបង្ហាញថា បងប្អូនយកចិត្តទុកដាក់ដោយការស្ដាប់នូវអ្វីដែលពួកគេនិយាយ ។ សូមទុកពេលឲ្យពួកគេពន្យល់អំពីអារម្មណ៍ដែលពួកគេមាន ។ សូមគោរពដល់អារម្មណ៍ពួកគេ ដោយនិយាយអ្វីដូចជា « ខ្ញុំសោកស្ដាយដែលអ្នកមានការឈឺចាប់យ៉ាងខ្លាំងដូច្នេះ » ឬ « ខ្ញុំមិននឹកស្មានថា រឿងទាំងនេះធ្វើឲ្យអ្នកលំបាកដល់ថ្នាក់នេះនោះទេ » ។ បងប្អូនអាចជួយពួកគេឲ្យបង្កើតផែនការសុវត្ថិភាពរារាំងកុំឲ្យមានការធ្វើអត្តឃាតបាន ( សូមមើល « How to Create a Suicide-Prevention Safety Plan » ដាក ថូម៉ាស Ensign ខែ កញ្ញា ឆ្នាំ ២០១៦ ទំព័រ ៦៣ ) ។ ផែនការសុវត្ថិភាពអាចជួយមនុស្សឲ្យស្គាល់ពីភាពខ្លាំងផ្ទាល់ខ្លួនរបស់ពួកគេ មានទំនាក់ទំនងល្អ និងជំនាញដោះស្រាយបញ្ហាបានយ៉ាងល្អ ។ វាក៏អាចកាត់បន្ថយមធ្យោបាយប្រើប្រាស់ក្នុងការបង្កឲ្យមានគ្រោះថ្នាក់លើខ្លួនឯង ដូចជាអាវុធ ឬថ្នាំលេបជាដើម ។ ប្រសិនបើពួកគេសុំបងប្អូនមិនឲ្យប្រាប់នរណាម្នាក់ពីអារម្មណ៍របស់ពួកគេ សូមពន្យល់ថា បងប្អូននឹងគោរពឯកជនភាពរបស់ពួកគេយ៉ាងខ្លាំងតាមដែលអាចធ្វើទៅបាន ប៉ុន្តែពួកគេត្រូវការជំនួយច្រើនជាងអ្វីដែលបងប្អូនអាចផ្ដល់ជូនបាន ។ សូមកុំសន្យាថានឹងរក្សាគំនិតនៃការធ្វើអត្តឃាតរបស់ពួកគេទុកជារឿងសម្ងាត់ឲ្យសោះ ។

ជំហានទី ៣ ៖ ប្រាប់ ។ សូមលើកទឹកចិត្តដល់បុគ្គលនោះឲ្យប្រាប់នរណាម្នាក់ដែលអាចផ្ដល់ការគាំទ្របន្ថែមទៀតបាន ។ សូមចែកចាយព័ត៌មានទំនាក់ទំនងសម្រាប់ធនធានផ្ដល់ជំនួយផ្សេងៗទៀតដែលមាននៅក្នុងតំបន់របស់បងប្អូន ។ ធនធានទាំងឡាយអាចរួមមានមន្ទីរពេទ្យសហគមន៍ គ្លីនិកថែទាំបន្ទាន់ ឬបណ្ដាញជួយដល់វិបត្តិនានាដែលឥតគិតថ្លៃ ។ ប្រសិនបើពួកគេមិនស្វែងរកជំនួយនោះទេ បងប្អូនត្រូវប្រាប់នរណាម្នាក់ជំនួសពួកគេ ។ បងប្អូនប្រហែលជាចង់និយាយអ្វីមួយដូចជា « ខ្ញុំយកចិត្តទុកដាក់ចំពោះអ្នក ហើយចង់ឲ្យអ្នកមានសុវត្ថិភាព ។ ខ្ញុំនឹងប្រាប់នរណាម្នាក់ដែលអាចផ្តល់ជំនួយដែលអ្នកត្រូវការ » ។ សូមគោរពឯកជនភាពរបស់ពួកគេ ដោយប្រាប់តែនរណាម្នាក់ដែលបងប្អូនគិតថាអាចជួយបាន ដូចជា សមាជិកគ្រួសារដែលជិតស្និទ្ធ ប៊ីស្សពរបស់បុគ្គលនោះ ទីប្រឹក្សាសាលា វេជ្ជបណ្ឌិត ឬអ្នកជំនាញផ្នែកថែទាំសុខភាពផ្សេងទៀត ។ ប្រសិនបើបងប្អូនមិនប្រាកដថាត្រូវប្រាប់នរណាទេ សូមនិយាយជាមួយនឹងប៊ីស្សពរបស់បងប្អូន ឬទូរសព្ទទៅបណ្ដាញជួយដល់វិបត្តិដែលឥតគិតថ្លៃនៅក្នុងតំបន់របស់បងប្អូន ។ សូមចងចាំថា យើងមិនបានរំពឹងឲ្យបងប្អូនជួយដល់បុគ្គលនោះតែម្នាក់ឯងនោះទេ ។

កំណត់ចំណាំ ៖ ប្រសិនបើបងប្អូនកំពុងដឹកនាំការពិភាក្សាមួយ សូមពិចារណាសុំឲ្យអ្នកចូលរួមទាំងឡាយអនុវត្តតាមជំហានទាំងនេះ ។ សូមផ្ដល់ឧទាហរណ៍មួយដល់ពួកគេថា មានមនុស្សម្នាក់មករកពួកគេ ហើយបង្ហាញពីគំនិតចង់ធ្វើអត្តឃាត រួចសុំឲ្យពួកគេអនុវត្តពីរបៀបដែលពួកគេនឹងឆ្លើយតប ។

ធនធានបន្ថែមទាំងឡាយ

ម៉ូសាយ ៤:២៧; មរ៉ូណៃ ៧:៤៥–៤៧; គោលលទ្ធិ និង សេចក្តីសញ្ញា ៨១:៥។
បណ្ដាញជំនួយផ្នែកសុខុមាលភាព ( សម្រាប់ប្រធានស្តេក ប៊ីស្សព និងប្រធានសាខា ) ។
« Taking Time to Talk and Listen » រ៉ូសម៉ារី អិម វីសុម Ensign ខែ មេសា ឆ្នាំ ២០១២ ទំព័រ ១០–១៣ ។
« I’m Worried about Someone » នៅលើគេហទំព័រ suicide.ChurchofJesusChrist.org ។
« ការធ្វើអត្តឃាត » ធនធានការប្រឹក្សា នៅលើគេហទំព័រ ChurchofJesusChrist.org ។