Tabangi ang mga Tigkat-on sa Pagduol ngadto ni Jesukristo

Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi.

Kahanas

Ipangutana ang butang nga motutok sa pagkonektar sa gahom sa Ginoo, kaluoy, ug impluwensiya ngadto sa kamatuoran nga gitudlo.

Ipasabot

Adunay gahom nga moabot kon atong ikonektar ang atong mga paningkamot sa pagsunod sa mga baroganan sa ebanghelyo ngadto sa atong Manluluwas si Jesukristo. Paggahin og panahon sa imong pagpangandam sa pagpamalandong kon unsa ang mga baroganan sa ebanghelyo diha sa hut-ong sa kasulatan nga makatabang kanimo nga masayod ug makasabot mahitungod ni Jesukristo. Dayon mainampingon nga maghimo og mga pangutana nga makadapit sa mga estudyante sa pagkonsiderar kon unsa ang ilang makat-onan mahitungod sa Iyang gugma, gahom, ug kaluoy gikan sa mga kamatuoran nga gitudlo. Agi og dugang sa pagtabang sa mga estudyante nga masabtan ang doktrina, kining mga matang sa mga pangutana makatabang usab kanila nga makakita kon sa unsa nga paagi nga ang pagsunod niana nga doktrina makatabang nila nga makasinati sa Iyang gugma, gahom, ug kaluoy, ingon man ang pagkahimong mas sama Kaniya. Kining mga matang sa mga pangutana mahimo usab nga makatabang sa mga estudyante nga mokonsiderar kon sa unsang paagi si Jesukristo motabang kanila nga masunod kana nga doktrina.

Modelo

Imbis mangutana …

• Nganong importante man ang pagsunod sa balaod sa ikapulo?

• Nganong kinahanglan man kitang maghinulsol sa matag adlaw?

Sulayi hinoon sa pagpangutana …

• Unsa ang natudlo sa pagsunod sa balaod sa ikapulo diha nimo mahitungod sa imong Langitnong Amahan ug ni Jesukristo?

• Unsa ang imong nakat-onan mahitungod sa kaluoy sa Manluluwas pinaagi sa matag adlaw nga paghinulsol?

Iklik dinhi aron makakita og bidyo niini nga modelo.

Pagpraktis

Pagpraktis pinaagi sa pag-usab sa mosunod nga mga pangutana sa paagi nga makatabang sa mga estudyante nga makakonektar sa gugma, gahom, ug kaluoy sa Ginoo ngadto sa mga kamatuoran nga gitudlo.

Imbis mangutana …

• Nganong importante ang pagtuon sa mga kasulatan sa matag adlaw?

• Unsa ang gahom nga moabot gikan sa pagtambong sa templo?

Sulayi hinoon sa pagpangutana …

Hisgoti o Pamalandongi

• Sa unsang paagi ikaw nakakat-on sa pagseguro nga ang mga baroganan sa doktrina mahimong mas makahuloganon samtang ikaw mokonektar niini ngadto sa gugma, gahom, ug kaluoy sa Ginoo?

• Sa unsang paagi kini makatabang sa atong mga estudyante nga mas makasabot ug mosalig diha sa mga pagtulon-an ug sa Pag-ula ni Jesukristo?

Iapil

Tan-awa ang imong sunod nga plano sa leksiyon. Paggahin og 10 ka minutos sa pag-usab sa mga pangutana aron matabangan ang mga estudyante sa pagkonektar sa gugma, gahom, ug kaluoy sa Ginoo ngadto sa mga kamatuoran nga gitudlo.

Gusto pa og Dugang?

• Chad H Webb, “Kami Naghisgot kang Kristo, Kami Nalipay diha kang Kristo” (Tinuig nga sibya sa pagbansay sa Seminaries and Institutes of Religion, Hunyo 12, 2018), broadcasts.ChurchofJesusChrist.org

• Chad H Webb, “Empathy” (Sibya sa tinuig nga pagbansay sa Seminaries and Institutes of Religion, Ene. 26, 2021), broadcasts.ChurchofJesusChrist.org

Kahanas

Hatag og mga imbitasyon nga motabang sa mga tigkat-on sa pag-ila sa gugma, gahom, ug kaluoy sa Ginoo diha sa ilang kaugalingon nga mga kasinatian.

Ipasabot

Makatabang ka sa mga estudyante sa pagduol ngadto kang Jesukristo pinaagi sa pagdapit kanila sa pag-ila sa Iyang gugma, gahom ug kaluoy diha sa ilang kaugalingong mga kasinatian. Human nga imong matino ang usa ka kasulatan diin gihulagway ang Iyang gugma, gahom o kaluoy:

• Ipahayag ang kamasaligon sa mga estudyante nga nakasinati sa gugma, gahom, o kaluoy ni Kristo diha sa ilang kinabuhi.

• Hatagi og panahon ang mga estudyante sa pagsiksik sa ilang mga panumdoman sa mga higayon sa dihang sila mibati sa gugma, gahom, o kaluoy sa Manluluwas sa ilang kaugalingong mga kasinatian (kini nga mga gutlo mahimong milabay na o sa kasamtangan).

• Pangutana kon aduna bay andam mopakigbahin og usa ka kasinatian.

Samtang ang mga estudyante mas sarang sa pag-ila sa tahas ni Kristo diha sa ilang personal nga mga kasinatian, sila mobati nga mas suod ngadto Kaniya ug ang ilang relasyon uban Kaniya mapalig-on.

Modelo

Ania ang usa ka ehemplo sa unsa kaha ang panagway niini:

• Doktrina ug mga Pakigsaad 61:1 naghulagway ni Jesukristo isip “Kaniya kinsa aduna sa tanan nga gahom.” Aron matabangan ang mga estudyante nga makaila sa Iyang gahom diha sa ilang mga kasinatian, ikaw mahimong miingon: “Ako motuo nga ang matag usa kaninyo nakasinati diin kamo mibati sa gahom sa Manluluwas diha sa inyong kinabuhi. Palihog igahin ang mosunod nga tulo ka minuto ug pagsulat mahitungod sa usa ka higayon sa dihang kamo mibati sa Iyang gahom.” Human ang kadaghanan sa mga estudyante nakakompleto sa pagbansay sa pagsulat, mahimo ka nga mangutana, “Kon kini dili kaayo personal, andam ba si bisan kinsa nga mopakigbahin sa ilang kasinatian ngadto sa klase?”

Pagpraktis

Tubaga ang usa o labaw pa sa mosunod:

• Lucas 5 adunay pipila ka ehemplo sa gahom sa Manluluwas sa pag-ayo. Basaha sa Lucas 5:12–17. Pagpraktis sa pagsulat og usa o duha ka imbitasyon nga motabang sa mga estudyante nga mamalandong kon sila nakasinati sa samang paagi sa gahom ni Kristo sa pag-ayo.

• Paklia ang imong sunod nga leksiyon sa kurikulom. Pangita og usa ka dapit diha sa hut-ong sa kasulatan diin kamo makapraktis sa pagsulat og usa o duha ka imbitasyon sa pagtabang sa mga tigkat-on sa pagpamalandong sa dihang sila personal nga nakasinati sa gugma, gahom o kaluoy sa Ginoo.

Hisgoti o Pamalandongi

• Unsa nga mga imbitasyon ang bag-o nimong ihatag aron matabangan ang mga estudyante nga makaila sa gugma, gahom, ug kaluoy ni Kristo diha sa ilang personal nga kinabuhi?

• Unsaon nimo sa paghinumdom sa paghatag niining matang sa imbitasyon sa imong sunod nga kasinatian uban sa mga estudyante?

• Tungod sa mga kasinatian nga imong naagian uban sa gugma, kaluoy, ug gahom ni Kristo, sa unsang paagi nga makadasig kana kanimo sa pagpadayon o tingali makadugang sa imong mga paningkamot sa pagtabang sa imong mga estudyante nga makita Siya sa ilang mga kinabuhi?

Iapil

Pagpili og usa ka umaabot nga hut-ong sa kasulatan nga magpakita sa kaluoy, gugma o gahom ni Kristo. Maampingon nga maghimo og usa ka imbitasyon sa imong plano sa leksiyon aron matabangan ang mga estudyante nga makita ang Manluluwas diha sa ilang personal nga mga kasinatian.

Gusto pa og Dugang?

• “Tabangi ang mga Estudyante sa Pagduol ngadto ni Jesukristo,” Pagtudlo Sumala sa Pamaagi sa Manluluwas (2022), 8–9

• Dieter F. Uchtdorf, “Ang Gasa sa Grasya,” Liahona, Mayo 2015, 107–10

• Russell M. Nelson, “Ang Walay Kataposan nga Pakigsaad,” Liahona, Okt. 2022, 4–11