Tabangi ang mga Tigkat-on sa Pagduol ngadto ni Jesukristo

Tabangi ang mga tigkat-on sa pagpalig-on sa ilang relasyon ngadto sa Langitnong Amahan ug kang Jesukristo.

Kahanas

Mga pamahayag nga motabang sa mga estudyante nga masayod ug mobati sa gugma sa Langitnong Amahan ug ni Jesukristo.

Ipasabot

Sa matag leksiyon, adunay daghang oportunidad sa pagtabang sa mga tigkat-on sa pagpalig-on sa ilang relasyon ngadto sa Langitnong Amahan ug kang Jesukristo. Pipila sa labing maayo nga mga oportunidad motumaw human ang mga estudyante nakapaambit sa ilang mga panabot o mga pagbati. Niana nga higayon, ang mga magtutudlo makahimo og mga pamahayag nga nagtutok sa gugma ug mga hiyas sa Langitnong Amahan ug ni Jesukristo.

Kini nga mga matang sa mga pamahayag motabang sa mga tigkat-on nga makaila kon sa unsang paagi ang Langitnong Amahan ug si Jesukristo mibati mahitungod kanila, sa unsang paagi sila mibati mahitungod sa Langitnong Amahan ug ni Jesukristo, o sa duha. Diha sa pamahayag mahimo nimong hatagan og gibug-aton, hatagan og pagpamatuod, o ikonektar ang unsay bag-ohay lang nga gipakigbahin sa estudyante bahin sa usa ka hiyas o kamatuoran mahitungod sa gugma sa Dios, kinaiya, ug mga pagbati alang sa Iyang mga anak. Kini nga mga pamahayag magmugna og dugang nga mga oportunidad alang sa Espiritu Santo nga mosaksi ngadto sa mga estudyante bahin sa ilang indibidwal nga bili ngadto sa ilang Amahan sa Langit ug sa Iyang Anak.

Mga Modelo

• Si Maggie nagpakigbahin nga siya nakadawat og tubag sa iyang pag-ampo. Ang magtutudlo mi-follow up dayon uban sa pamahayag, “Kana nga kasinatian mao ang ebidensiya nga ang Langitnong Amahan nakaila kon kinsa ikaw.”

• Si Jade nagpakigbahin nga nabati niya nga gibadlong siya sa Espiritu atol sa komperensiya sa wala pagbasa og dugang sa iyang mga kasulatan. Ang magtutudlo mitubag dayon og, “Salamat sa pagpahinumdom kanatong tanan nga gusto Siya nga malambigit sa atong mga kinabuhi.”

• Si Hae Soo nagpakigbahin og usa ka panabot nga iyang naangkon samtang nagbasa sa iyang mga kasulatan. Ang magtutudlo mitubag, “Ang imong mga hunahuna mitudlo kanamo kon unsa ka mabination ug malumo ang Dios.”

• Si Brigham nagpahayag kon sa unsang paagi siya nasagmuyo nga siya walay igo nga panahon sa pagbasa sa iyang mga kasulatan. Ang magtutudlo mitubag dayon, “Makasulti kami kon unsa ka dako ang imong gugma Kaniya pinaagi sa imong tinguha sa pagsunod Kaniya.”

• Si Adaline nagpakigbahin sa iyang mga pagbati human mobasa sa Doktrina ug mga Pakigsaad 18:10. Ang magtutudlo miingon dayon, “Nasayod usab ako nga ang imong kalag bilihon kaayo ngadto Kaniya.”

Pagpraktis

Paghimo og usa ka pamahayag nga makatabang sa matag estudyante nga mobati sa gugma sa Langitnong Amahan ug ni Jesukristo.

• Si Brooklyn nagpakigbahin nga usa sa iyang paborito nga mga linya gikan sa “Buhi ang Manunubos Ko, Niini Nasayud Ako” mao ang “[Siya buhi aron] mopahid sa akong luha.”

• Si Thomas nagpakigbahin nga sa wala pa ang diborsiyo sa iyang mga ginikanan, dihay daghang panag-away sa ilang panimalay. Kon mag-ampo siya, kana mao lamang ang panahon nga siya mobati og kalinaw ug kahupay.

• Human sa pagbasa mahitungod sa pagbahin sa Pula nga Dagat, si Priscilla nag-ingon, “Naghunahuna lang ko nga nindot kaayo nga gibuhat kini sa Dios alang ni Moises ug sa mga Anak sa Israel.”

Hisgoti o Pamalandongi

• Unsa ang bili sa paghimo og mga pamahayag nga makatabang sa mga tigkat-on nga mobati sa gugma sa Langitnong Amahan ug ni Jesukristo?

• Nganong gusto sa Langitnong Amahan nga mohimo kita niini nga mga matang sa mga pamahayag isip kabahin sa kasinatian sa pagkat-on?

Iapil

• Paggahin og 5 ka minuto human sa matag klase nga imong gitudloan alang sa sunod semana ug isulat ang mga pamahayag nga imo untang gisulti base sa unsay gipakigbahin sa mga estudyante. Alang sa sunod nga semana, paningkamot sa paghimo og susama nga mga pamahayag atol sa leksiyon.

Gusto pa og dugang?

• “Pagtutok diha ni Jesukristo,” Pagtudlo Sumala sa Pamaagi sa Manluluwas (2022), 5–9

• Chad H. Webb, “Labaw sa Tanang Butang” (tinuig nga sibya sa pagbansay sa Seminaries and Institutes of Religion, Hunyo 12, 2019), broadcasts.ChurchofJesusChrist.org.