“Labaw sa Tanang Butang”
Church Educational System Sibya sa Pagbansay • Hunyo 12, 2019 • Church Office Building Main Floor Auditorium
Magpasalamat usab ko ninyo ilabi na sa inyong mga paningkamot sa pagtutok sa Manluluwas isip sentro sa inyong pagtuon ug pagtudlo sa ebanghelyo. Sa akong naobserbahan sa mga klase ug nagtan-aw ko ninyo ug sa mga estudyante nga miila sa Iyang titulo ug tahas, nagtuon sa Iyang mga hiyas ug nagkat-on sa Iyang hingpit nga ehemplo,1, gibati ko ang pasalamat sa Langitnong Amahan nga nagpamatuod mo sa Iyang Hinigugmang Anak. Sa inyong pagsunod sa tambag ni Elder Clark sa pagtabang sa mga estudyante nga makat-on sa pag-ila Kaniya ug sa pagkat-on gikan Kaniya,2 nakita nako nga nagkadugang ang Espiritu Santo sa inyong pagtudlo ug mga pagdapit. Sa gisulti sa usa ka magtutudlo nako, “Ang pagsentro ni Jesus sa akong pagtudlo nakapabalik sa kalipay diha sa lawak klasehanan. Moawhag ko ninyo sa pagpadayon sa pagtinguha og inspirasyon unsaon nga epektibo kining mahimo matag adlaw.
Karon, modapit ko ninyo sa pagpaningkamot sa pagtabang sa mga estudyante nga makakita sa Manluluwas, dili lang sa ilang pagtuon sa kasulatan, apan diha usab ninyo—samtang maninguha kamo sa pagsunod sa Iyang ehemplo ug gugma. Tingali kahinumdom mo niini nga hunahuna gikan ni Presidente Boyd K. Packer nga makapadasig ug dako og implikasyon:
“Ang mga hiyas nga mao ang akong nindot nga pribilehiyo nga makita diha kaninyo mga kaigsoonan [sa] milabayng katuigan dili molabaw o mominos kay sa mga kinaiya nga gipakita sa Bantugang Magtutudlo. Mituo ako nga sa matang sa inyong pagbuhat sumala sa hagit ug responsibilidad nga anaa kaninyo, ang imahe ni Kristo nahimong makulit diha sa inyong mga panagway. Ug alang sa tanang praktikal nga katuyoan, diha sa klasehanan nianang panahon ug niana nga pagpahayag ug uban niana nga inspirasyon, kamo mao Siya ug Siya mao kamo.”3
Sa malukpanong mga kiniaya sa Manluluwas, ang nakahatag og kadasig ug pundasyon alang sa uban mao ang Iyang hingpit nga gugma—Iyang gugma sa Iyang Amahan sa Langit ug sa matag usa nato.
Si Apostol Pablo misulat, “Ug kon ako may gahum sa paghimog propesiya, ug makasabut sa tanang misteryo ug sa tanang kahibalo, ug kon ako makabaton sa hingpit nga pagtuo, … apan walay gugma, ako way kapuslanan.”4 Sa grupo sa mga magtutudlo sa seminary ug institute tingali si Pablo miingon, “Bisan og ako makadani ug nakasabut sa sukaranan sa pagtudlo ug pagkat-on, ug bisan ako dunay nindot nga leksyon ug walay gugma nga putli, ako way kapuslanan.” Ayaw na gamita nga pamalibad nga dili maninguha pag-ayo nga mahimong hanas kaayo nga magtutudlo. Apan hinumdumi nga ang atong pag-ampo alang sa pagsabut, kahibalo, ug pagtuo, kon di nato dugangan og gugma nga putli, kita sama sa “masaba nga agong o piyangpiyang nga nagatagingting.”5
“Ang Gugma Mapailubon ug Mapuanguron”
Si Apostol Pablo misulat, “Ang gugma mapailubon ug mapuanguron.”6
Usa sa ehemplo sa pagkamapuanguron sa Manluluwas nasulat sa Lucas 19. Si Zaqueo, nadatu sa iyang pagserbisyo sa mga taga-Roma apan gikasilagan sa mga Judeo nga mibati nga gibudhian tungod sa iyang pagpangolekta og buhis. Usa ka adlaw, si Zaqueo nagtinguha nga makakita ni Jesus apan tungod sa ka gamay niya dili siya makalusot sa daghang tawo, nga dili andam nga motabang kaniya. Maong si Zaqueo midagan diin maglakaw si Jesus ug mikatkat sa usa ka kahoy aron makakita Kaniya inig agi na Niya.
Ang kasulatan miingon, “Sa paghiabut ni Jesus niadtong dapita, siya mihangad ug miingon kaniya, Zaqueo, dumali ka pagkanaog; kay kinahanglan adto ako moabut sa imong balay karong adlawa.
“Ug siya midali sa pagkanaug, ug kaniya midawat siya nga malipayon.”7
Mahunahuna ninyo unsa ka dakong butang alang ni Zaqueo nga makita, ug unsay nahimo sa pagdapit sa Manluluwas alang sa usa ka tawo nga kanunay ibaliwala? Kining gamay nga buhat sa kapuangod nakahimo og dakong kalainan.
Ang atong mga estudyante kinahanglan sa atong pailub ug kapuangod. Ang dili maayong pamatasan, pagkabalda, ug dili maayong kinaiya, usahay, makapalisud sa pagtudlo. Apan nianang gutloa, moawhag ko ninyo sa pagbaliwala sa kinaiya ug tan-awa ang tawo. Palihug hunahuna pag-ayo sa pagpangutana, “Unsay nakaingon niini nga pamatasan o kinaiya?”
Sama sa gitudlo ni Elder Jeffrey R. Holland, “Kon kadtong mga bata nga dili moapil, tingali dili pa kamo makatudlo kanila, apan mahimong higugmaon ninyo sila. Ug kon karong adlawa kamo mahigugma kanila, tingali makatudlo na kamo kanila ugma.
“… Wala niana ang nagsalig kanila. Mahimo nato silang higugmaon gikan sa sinugdanan hangtud sa katapusan, ug ang mga milagro mahitabo.”8
Apan unsaon ninyo paghimo niana, ilabi na kon lisud higugmaon ang usa ka tawo? Si Elder Holland mitabang nato sa dihang miingon siya, “Sugdi pinaagi sa paghigugma sa Dios. Dayon hangyo Siya sa pagtabang kaninyo sa pagpakita sa inyong gugma alang Kaniya ngadto sa uban nga nagkinahanglan sa inyong gugma.”9 Kamo “makaampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma.”10 Makaampo kamo nga motan-aw nila sama sa Iyang pagtan-aw nila. Makapaminaw ka ug mosulay sa pagsabut nila. Ug sama sa gidugang ni Presidente Henry B. Eyring “Serbisyuhi; pangitai og gamayng butang nga himoon alang nila. Bayri ang bili sa pagserbiso, ug ang Dios motahud niini. Mosaad ko kaninyo niana. Ayaw kabalaka kon ang inyong mga estudyante dili buotan usahay. Paghimo lang og butang alang nila, ug sila makita nga mahimong mas buotan og gamay. Gasa kini gikan sa Dios.”11
Kaninyong tanan nga nagtambong sa pasundayag sa musika ug sa sport sa inyong estudyante o nangita og hilom nga paagi sa pagsebisyo nila, salamat. Bisan og wala sila makakita ninyo, bation nila nga ang inyong gugma nagkadako tungod kay ang Ginoo mopanalangin ninyo sa gugma tungod kay kamo nagsebrisyo nila.12
Laing ehemplo sa kapuangod sa Manluluwas makita sa Marcos kapitulo 5.
Hunahunaa unsay gibuhat ni Jesus sa babaye nga dunay sakit sa pagdugo. Daghan kaayo Siya og gihimo sa pag-ayo kaniya. Tingali siya gikapoy na sa sakit, sosyal nga pagsalikway, ug problema sa pinasyal. Mao nga sa dihang si Jesus nakamatikod nga nawala Kaniya kana nga hiyas, Siya “miliraw sa pagtan-aw kon kinsa ang naghimo niadto.”13 Ang pisikal nga pagkaayo nahitabo na. Si Jesus padulong sa Iyang adtuonon nga dinaliang panginahanglan ug gani Siya mihunong. Siya mihangop sa iyang pagtuo, ug Siya mitawag gani niya nga “anak.”14 Ang Manluluwas mitan-aw kaniya, wala sa iyang sakit. Nakakita siya og tawo nga kinahanglan higugmaon ug bayawon, dili problema nga sulbaron o buluhaton nga kompletuhon.15
Bisan unsang buluhaton nga himoon, bisan unsa nga leksyon nga andamon nga itudlo, bisan unsa nga problema sa pagdisiplina nga masugatan, oportunidad kini sa pagbayaw sa mga tawo.
Ug manghinaut ko nga ang atong gugma ipaabut niadtong wala pa malista o magtambong. Dunay daghang mga Zaquio ug niining babaye nga naghulat luyo sa pundok sa mga tawo. Mao nga sunda ang ehemplo sa Manluluwas ug lakaw pangitaa sila.16 Palihug pagmainampoon ug pagtinambagay samtang kamo magtinguha og inspirasyon unsaon sa pagtabang sa kabatan-onan nga makat-on sa Manluluwas ug sa Iyang mga pagtulun-an. Ang mga paningkamot sa pagpaenrol ug pagkompleto mao ang prayoridad ug makadasig nga katuyoan sa atong buhat sa pagpanalangin sa mga anak sa Langitnong Amahan.
“Labaw sa Tanang Butang, Sul-ubi ang inyong kaugalingon sa Higot sa Gugma nga Putli, ingon sa usa ka Kupo”
Ang Ginoo miingon ngadto ni propeta Joseph Smith, “Labaw sa tanang butang, sul-ubi ang inyong kaugalingon sa higot sa gugma nga putli, ingon sa usa ka kupo, nga mao ang higot sa kahingpitan ug kalinaw.”17 Unsa ang maingon og sama sa higot sa gugma nga putli?
Sa Juan 8 mabasa nato ang babaye nga gidala ngadto sa templo ug gipresentar sa mga Pariseo ngadto ni Jesus. Miingon sila ngadto sa Manluluwas:
“Magtutudlo, kining babayhana nadakpan diha gayud sa pagpanapaw.
“Si Moises nagsugo kanato nga ang ingon kaniya kinahanglan gayud patyon pinaagi sa pagbato. Unsa may imong ikasulti?”
Si Jesus mitikubo ug misulat sa yuta, ingon og wala siya makadungog nila. Sa dihang nagpadayon sila sa pagpangutana, Mibarug Siya ug miingon, “Kinsa kaninyo ang walay sala maoy paunahag labay kaniyag bato.” Ug unya miusab siya pagtikubo ug mipadayon sa pagsulat sa yuta.
Samtang ang mga Pariseo nakombikto sa ilang kaugalingong mga tanlag, tagsa-tagsa silang mibiya. Sa dihang si Jesus ug ang babaye na lang, Siya miingon “Babaye, hain na sila? wala bay mihukom kanimog silot?
“Siya mitubag, Wala, Senyor. Ug si Jesus miingon kaniya, Dili usab ako mohukom kanimog silot: lumakaw ka, ug ayaw na pagpakasala.”18
Samtang mamalandong mo niini nga hitabo, pwede ba ninyong ikonsiderar ang tulo sa daghang leksyon nga atong makat-unan gikan sa hingpit nga ehemplo sa Manluluwas?
Una, ang Pag-ula ni Jesukristo nagtugot nato sa pagkat-on gikan sa atong mga sayop ug pinaagi sa paghinulsol, dili mahukman niini. Sa atong mga klase dunay mga estudyante nga nakahimo og mga sayop. Samtang kinasingkasing natong itudlo ang kaandam sa Langitnong Amahan sa pagpasaylo ug sa kalipay sa paghinulsol,19 nagtabang ta sa mga estudyante (ug sa atong mga anak) nga motuo nga ang Pag-ula sa Manluluwas ilang magamit—tungod kay mao gyud.
Ug kini nga tambag alang usab sa matag usa nato. Nagkinahangla kita sa Pag-ula sa Manluluwas sa pagtabang nato nga mapasaylo ug mamaayo. Dayon kon makasinati ta sa kalipay sa paghinulsol, kita makadasig sa mga estudyante sa pagduol sa Manluluwas tungod kay kana nga pagdapit moabut gikan sa atong nausab nga mga kasingkasing.
Ikaduha, ang gugma mao ang usa ka tigdasig sa pagtabang nato nga gusto nga mobuhat unsay matarung. Si Elder Dale G. Renlund miingon, “Sigurado, ang Manluluwas wala mobaliwala sa pagpanapaw. Apan wala usab Niya gipanghimaraut ang babaye. Giawhag Niya ang babaye nga usbon ang iyang kinabuhi. Nadasig siya nga mag-usab tungod sa Iyang kapuangod ug kalooy. Gipamatud-an sa Hubad ni Joseph Smith sa Biblia ang miresulta nga pagkadisipulo niya: ‘Ug ang babaye mihimaya sa Dios sukad niana nga takna, ug mituo sa iyang pangalan’ [Juan 8:11].”20
Isip mga magtutudlo, o mga ginikanan, kita siguro matintal sa pagpugong sa gikinahanglan nga pagpadayag sa gugma tungod kay basin mabalaka ta sa pagpamalibad sa sala o pagbaliwala sa di maayong kinaiya. Ang atong mga estudyante ug ang atong mga anak sa kasagaran nakahibalo na unsay atong gibati mahitungod sa Ginoo ug sa Iyang mga sugo. Unsay ilang gikinahanglan sa kasagaran mao ang kasiguroan nga sila gihigugma ug gihatagan og bili. Ang gugma ug paglaum nga gibati niini nga babaye samtang siya gipanalanginan sa “hingpit sa gugma nga putli” sa Manluluwas mao ang atong gilauman nga bation sa tanan natong mga estudyante samtang sila nagkat-on Kaniya ug sa Iyang ebanghelyo.
Ikatulo, ang Manluluwas nahigugma sa doktrina sa Amahan apan wala gayud kini gigamit isip usa ka bunal. Ang mga Pariseo nakahibalo ug gani migamit sa balaod ni Moises, nagkutlo sa balaod ug sa mga sangputanan niini. Apan ang Tighatag sa balaod, kansang misyon mao ang “sa pagbugkos sa dugmok og kasingkasing [ug] pagmantala sa kagawasan sa mga binihag,”21 pilia hinoon ang paghatag og kalooy. Gipanalipdan Niya ang babaye gikan sa nag-akusar nga mga kamot ug mga kasingkasing sa mga Pariseo samtang naghatag nila sa gikinahanglan nga pagpamalandong sa kaugalingon sa ilang panginahanglan nga pag-usab.
Usahay duna tay mga estudyante ug mga magtutudlo nga migamit sa doktrina sa paagi nga nagdapit sa espiritu sa pag-akusar ug panghimaraut. Imbis moawhag ug mobalaan, kini nga paagi makapaulaw ug makalaglag. Sa pagsunod sa ehemplo sa Ginoo mao ang pagtudlo nga makahatag og paglaum ug pagkaayo sa masulub-on.
Agig dugang sa sala, ang masulub-ong kasingkasing nagagikan sa lain-laing mga sirkumstansya. Daghang mga estudyante nagagikan sa malisud, gani masakit nga mga sitwasyon nga nakapaduha-duha nila kon gihigugma ug gipangga ba sila. Ang uban nakigbisog sa mga hagit sa kabalaka o adunay pagkaperpeksyonista nga maoy nakaingon nga sila panghimarauton imbis nga hatagan og paglaum. Ang uban mibati nga wala tagda tungod kay sila nag-atubang og mga tintasyon o mga hagit kalabut sa sekswal timailhan ug mibati nga nalit-ag ug nabalaka nga sila walay dapit o kaugmaon diha sa gipahiuli nga Simbahan ni Jesukristo.
Isip mga magtutudlo, maningkamot kita sa pagsabut unsa kini nga mga kasinatian sa atong mga estudyante. Tugoti ko nga mopakigbahin kaninyo og usa lang ka ehemplo gikan sa panan-awon sa usa ka kanhiay nga estudyante nga mipasubot sa iyang kasinatian sa seminary. Siya miingon, “Ang sugo mao ang paghigugma sa inyong silingan, apan ingon og ang mga tawo naghunahuna sa paghigugma sa inyong silingan gawas lang kon sila bayot. Ang malukpanong mensahe mao nga ang labing grabe nga butang, ug nakapangutana ko unsaon nako nga makabaton og bili sa kaugalingon ug unsaon sa Langitnong Amahan sa paghigugma nako.”
Samtang mag-atubang ang mga estudyante og personal nga mga hagit, kinahanglan kitang maminaw aron makasabut ug pagsulti sinsero nga empatiya ug gugma. Himoon nato ang lawak klasehanan nga mahimong makapangutana ug ang mga isyu mahisgutan uban sa pagtahud ug pagsabut. Kinahanglan nga klaruhon nato ang pagtudlo sa kamatuoran ug pagtabang sa matag estudyante sa pag-ila sa iyang mahangturong pagkatawo isip mga anak sa mahigugmaong langitnong mga ginikanan.22 Ug kinahanglan kitang motabang sa mga estudyante nga makahibalo nga sila wala mag-inusara. Ang pagpakita og dugang gugma ug pagsabut makadapit sa Espiritu Santo, makadugang sa nakat-unan, ug moayu sa masulub-on nga kasingkasing.23
Si Presidente Dallin H. Oaks mitudlo nga, “Kita dunay katungdanan sa ‘pagtambayayong sa usag usa nga mga alantuson, nga kini mahimo nga magaan’ [Mosiah 18:8]. Samtang dili kita makausab sa doktrina sa Ginoo, kita gusto nga ang atong mga miyembro ug ang atong mga polisiya nga magmabination niadtong nakigbisog sa mga hagit sa pagkamortal.” Miingon usab siya nga “Ang mga paningkamot sa atong mga miyembro sa pagpakita og dugang nga pagsabut, kapuangod ug gugma mopalambo og dugang nga respeto ug pagsabut… [ug] makapakunhod sa kasilag ug panagbingkil nga komon karon. … Kana mao gayud ang atong tinguha, ug kita nagtinguha sa tabang sa atong mga miyembro ug sa uban sa pagkab-ot niini.”24
Importante nga ang matag magtutudlo nakasabut sa doktrina, nakahibalo unsay gisulti sa mga propeta sa Ginoo karon mahitungod niini nga mga hilisgutan, ug kahibalo sa pagtubag sa matinabangon ug mabination nga paagi.25 Kami mapasaligon kami nga mopalambo niini nga mga bahin ug mohatag og dugang nga pagbansay ug mga kapanguhaan sa pagtabang kaninyo.
Ug kon dunay mga higayon nga ang mga butang nga inyong gisulti o sa mga estudyante makaingon nga dunay mobati nga siya wala magustuhi, mahimo bang mag-ampo kamo alang sa kalig-on ug pagsabut kon unsaon ninyo sa pagtabang nga makunhuran ang kinaiya nga pag-akusar? Tabangi ang inyong mga estudyante nga mahinumdom nga ang matag usa nato naningkamot pa gihapon ug nagkinahanglan sa kalooy sa Manluluwas. Si Lucifer ang nailhan nga Magsusumbong, kinsa “sa adlaw ug gabii mao ang nagasumbong [kanato] sa atubangan sa atong Dios.”26 Sa pagtandi, ang mga kamot, mga bukton, ug gugma sa Ginoo sa gihapon gipatuyhad.
Laing kinaiya sa balaan nga gugma mao ang tinguha sa atong Amahan sa Langit alang nato nga mahimong sama Kaniya ug sa pagdawat sa tanang mga panalangin nga Iyang giandam alang sa Iyang mga anak.
Ang atong Langitnong Amahan Mao ang usa ka Dios nga Adunay Taas nga mga Gilauman
Miingon si Elder D. Todd Christofferson: “Ang atong Langitnong Amahan usa ka Dios nga adunay taas nga mga gilauman.”27 Dili Siya mohunong sa pagpaabut kanato. Siya modawat nato kon kita masayop, maglaum nato samtang kita mag-uswag, ug mapailubon nga molahutay samtang kita magtubo. Ang usa ka magtutudlo nga nahigugma sa iyang mga estudyante usab adunay taas nga gilauman ug mas magpakabana mahitungod sa ilang mahangturong kauswagan kay sa mahitungod lang sa unsay dagan sa klase karon o sa unsa nga paagi siya magustuhan sa iyang mga estudyante.
Si Jesus naghandom gayud sa kauswagan sa Iyang mga sumusunod.
Pananglitan, si Jesus nakakita ni Pedro unsay dili niya makita sa iyang kaugalingon. Siya midapit ni Pedro sa paglihok inubanan sa pagtuo, ug sa dihang si Pedro nadagma, ang Manluluwas mipabangon niya, kanunay nga nagtutok kinsa sa katapusan si Pedro mamahimo.
Ang pagbaton og taas nga gilauman makadasig sa mga estudyante nga molihok inubanan sa pagtuo, magtugot nila nga makasinati sa gisaad nga mga panalangin sa Ginoo. Si Elder Neil L. Andersen mitudlo nga kon kita mogiya ug motudlo nga walay gugma ug ubos ang gilauman, kita nag-awhag og rebelyon. Ang taas nga gilauman nga walay gugma makapasiugda sa pagbiya. Ang dako nga gugma apan ubos ang gilauman makamugna og pagbati sama sa barkada apan gamay ra og kauswagan. Hinoon, ang dako nga gugma ug taas nga mga gilauman makamugna og mga milagro.28 Mao kana ang matang sa gugma sa Manluluwas ug mao ang matang sa gugma nga kinahanglan natong angkunon kon kita buot mohimo og kalainan sa mga kinabuhi sa atong mga estudyante.
Sa dihang nangutana ko sa mga estudyante sa seminary ug sa institute kon sa unsa nga paagi nga ang gugma sa ilang magtutudlo nakapanalangin nila, dali silang nakasulti ug puno sa pasalamat. Ania ang pipila lang ka bag-ong mga ehemplo:
Usa ka batan-ong babaye miingon, “Ganahan ko nga mosulod sa seminary ug makakita sa akong magtutudlo nga malipayon ug mapahiyumon. Gani dili nako masulti kon unsa ka dako ang nahimo sa iyang gugma ngari kanako. Kaganiha gidayeg ko niya, ug ako migawas sa gambalay naningkamot nga dili makahilak, nakapalipay kaayo kini kanako. Kadtong yanong pagdayeg bililhon kaayo ngari kanako. Matag adlaw ganahan kaayo ko moadto sa seminary. Mao kini ang nakapaimportante sa akong adlaw. Ang gugma sa akong magtutudlo alang nako nakatudlo nako sa paghigugma sa tanan isip mga anak sa Dios.”
Sa pagsubli sa gisulti sa uban, “Ang among klase karon nakapausab nako. Nakabaton kog kaisug sa pagpangutana og lisud, ug ang akong magtutudlo naminaw pag-ayo nako ug naningkamot sa pagsabut diin ako gikan. Dayon migahin siya og panahon sa pagtubag sa akong pangutana. Unsay iyang gisulti nakapabuka sa akong mga mata nga wala nako mahunahuna kaniadto.”
Ug sa katapusan, usa ka batan-ong lalaki misulat: “Gisugdan nako kini nga semester sa dili maayong kinaiya. Wala ko magpakabana sa ebanghelyo o sa akong kaugalingon, ug ako dili malipayon. Giingnan nako ang akong mga ginikanan nga gusto ko nga moundang sa seminary. Ug dayon mitambong ko sa klase. Ug ang akong magtutudlo nakaila sa akong ngalan bisan og wala pa ko makaanha sukad. Ang espiritu sa among klase maoy nagpasulabi sa akong tibuok adlaw, ug ang kinabuhi mas nahimong maanindot. Giusab nako ang akong kinaiya, nagsugod sa pagsimba pirme, nagbasa sa akong mga kasulatan, ug nagsugod sa paghunahuna. Tungod sa iyang gugma alang namo ug sa ebanghelyo, ug sa kahayag ni Kristo nakita nako diha kaniya, naningkamot ko alang niana nga kahayag ug niana nga gugma. Ako mogradwar sa seminary, moserbisyo og misyon, ug moabut ang adlaw nga magminyo sa templo tungod kay ang akong magtutudlo midapit sa Espiritu ug mitudlo uban Kaniya isip iyang kompanyon matag adlaw.”
Karon sa pagtapos, gusto ko nga mosulti sa akong pasalamat sa Ginoo ug kaninyo. Mapasalamaton ko sa malukpanon ug diha-diha nga gugma sa Ginoo. Mapasalamaton ko sa Iyang pailub samtang ako naningkamot nga makat-on sa mga leksyon nga atong gihisgutan karon. Ang Iyang gugma ug kapuangod nakapahimo nako nga maningkamot pa. Ug gusto ko nga makahibalo kamo kon unsa ka dako sa among gugma kaninyo. Nakahibalo kami sa inyong walay kutas nga pagserbisyo niadtong inyong tudloan ug tabangan. Nakahibalo kami nga kamo nag-ampo pag-ayo alang kanila, ug kamo naguol kon sila makigbisog, ug kamo malipay kon sila magmalampuson. Nakahibalo kami nga kamo nagpas-an sa inyong kaugalingong mga problema ug nagsalig sa Ginoo matag adlaw sa Iyang kusog alang kaninyo ug sa inyong pamilya. Manghinaut kami nga kamo nakahibalo nga kami nag-ampo alang kaninyo ug nga kami nahigugma kaninyo.
Hinaut nga inyong tabangan ang matag estudyante nga makaila ug mahigugma sa Manluluwas pinaagi sa pagtabang kanila nga makakita Kaniya, sa ilang pagtuon sa mga kasulatan—ug diha kaninyo. Akong pag-ampo nga kita mahimong mabination, motan-aw sa mga indibidwal ug dili sa mga problema; nga kita motabang sa pagpanalangin pa sa mga anak sa Langitnong Amahan; nga atong ipaubos ang mga kamot sa pag-akusar ug motabang sa tanan nga mobati nga dunay dapit ug kaugmaon diha sa Simbahan sa Ginoo; nga atong awhagon ang atong mga estudyante sa pagsunod sa mga pagtulun-an isip tibuok kinabuhi nga mga disipulo ni Jesukristo, magpadayon diha sa dalan sa pakigsaad aron sila makadawat sa tanang mga panalangin nga giandam sa Langitnong Amahan alang kanila. Hinaut nga kita motabang nila nga mobati ug mosalig sa gugma sa atong Langitnong Amahan ug sa Iyang Anak nga si Jesukristo. Ug hinaut nga kamo dili gayud makalimot nga “ang imahe ni Kristo [mahimong] makulit diha sa inyong mga panagway. Ug alang sa tanang praktikal nga mga katuyoan, niana nga klasehanan niana nga panahon ug niana nga pagpahayag ug uban niana nga inspirasyon, kamo mao Siya ug Siya mao kamo.”29
Sa ngalan ni Jesukristo, amen.
© 2019 pinaagi sa Intellectual Reserve, Inc. Tanang mga katungod gigahin. Bersyon: 5/19. Hubad sa “Above All Things.” Cebuano. PD60009021 853