Pagkat-on Kanako

Elder Kim B. Clark

Sa Seventy

Usa ka Gabii uban ni Elder D. Todd Christofferson

Pakigpulong ngadto sa mga CES Religious Educator • Enero 26, 2018 • Salt Lake Tabernacle

Mapasalamaton ko nga makauban kamo karong gabhiuna. Gusto nakong motanyag og mga pulong sa gugma ug pasalamat ngadto sa mga magtutudlo sa nagtubo nga henerasyon sa seminary, institute, ug sa relihiyoso nga edukasyon sa mga eskwelahan, kolehiyo, ug mga unibersidad sa Simbahan. Gimahal ko kamo, ug mapasalamaton ko sa inyong talagsaon nga buhat. Mapasalamaton usab ko sa inyong mga pamilya ug sa suporta nga ilang gihatag kaninyo. Dako kamo nga panalangin sa mga kabatan-onan ug mga young adult nga inyong gitudloan.

Karong gabhiuna ganahan kong mopaambit og hunahuna kaninyo nga ako naglaum nga makatabang sa inyong paningkamot sa pagtabang sa inyong mga estudyante nga makakat-on pag-ayo sa ebanghelyo ni Jesukristo. Ang lawom nga pagkat-on diha sa ebanghelyo, pagkat-on sa bug-os nga kasingkasing ug bug-os nga kalag, mahitabo kon motubo ang gahum sa atong mga estudyante sa pagbuhat niining tulo ka mga butang:

Molambo ang kahibalo ug pagsabut sa ebanghelyo, uban sa ilang mga hunahuna ug kasingkasing.
Gamiton kana nga kahibalo sa pagpalambo og kapasidad alang sa epektibo, matarung nga buhat.
Molambo diha sa Kristohanong mga hiyas ug kinaiya nga mahimong mas mahisama sa Langitnong Amahan ug sa Iyang Anak, si Jesukristo.

Si Ginoong Jesukristo mipadangat og pagdapit sa pagkat-on pag-ayo diha sa duha ka mga kasulatan. Ang una sa Mateo 11:28–29: “Umari kanako, kamong tanan nga nabudlay ug nabug-atan, ug papahulayon ko kamo. Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.”¹

Ang ikaduha sa Doktrina ug mga Pakigsaad 19:23: “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako.”²

Diha sa duha ka tudling ang Ginoo mipadangat sa pagdapit: pagkat-on kanako. Daghan nang katuigan ang milabay si Elder Neal A. Maxwell mipahinumdum, kini nga pagdapit nakasentro sa matubsanong gahum ni Ginoong Jesukristo, ug usa ka pagdapit nga magkat-on pag-ayo. Si Elder Maxwell miingon: “Adunay daghang piho nga pamaagi nga atong magamit sa atong kaugalingon … mga kasulatan mahitungod ni Jesus ug sa Pag-ula, apan ang tanan ubos niini nga ideya: ‘Isangon ninyo ang akong yugo diha kaninyo, ug pagtuon kamo gikan kanako ’³ Sa pagkatinuod, walay laing paagi sa pagkat-on pag-ayo!”⁴

Ang bugtong paagi sa pagkat-on pag-ayo mao ang pamaagi sa Ginoo—sa pagpadayag ug inspirasyon pinaagi sa gahum sa Espiritu Santo, sa aktibo nga makanunayong pagtuon ug paningkamot, ug sa pagtudlo sa usag-usa inubanan sa grasya ni Jesukristo.⁵

Kini nagpasabut nga ang pagdapit sa Manluluwas sa “pagkat-on kanako” adunay duha ka may kalabutan nga kahulugan nga nagtukma sa matahum nga paagi sa pamaagi sa Ginoo sa pagkat-on pag-ayo.

Ang unang kahulugan sa “pagkat-on kanako” mao ang: Pagkat-on sa pag-ila kanako.

Makakat-on kita sa pag-ila kang Jesukristo pinaagi sa pagbaton og hugot nga pagtuo Kaniya ug modangup Kaniya aron sa paghinulsol, pagtinguha sa Iyang kapasayloan ug Iyang matubsanong gahum, ug pagtuman sa Iyang mga sugo. Ang pag-ila Kaniya mao ang matawo sa espirituhanong paagi diha Kaniya, makasinati og dako nga kausaban sa kasingkasing, mahimong Iyang mga anak nga lalaki ug babaye. Ang pagkat-on sa pag-ila ni Jesukristo mag-abli sa atong mga kasingkasing ug hunahuna ngadto sa implewensya sa Espiritu Santo ug magdala kanato og kasigurohan sa gugma sa Ginoo.

Ang ikaduhang kahulugan sa “pagkat-on kanako” mao ang: Pagkat-on gikan kanako.

Ang Ginoong Jesukristo nahibalo gayud og unsa ang atong gikinahanglan. Ang Iyang kahibalo ug pagsabut, Iyang kaalam ug Iyang kinaiya, ang tanan hingpit, kompleto. Samtang kita seryusong magtuon sa mga kasulatan, makakat-on kita sa Iyang hingpit nga ehemplo. Tungod kay Siya mao ang panag-ingnan sa tanang balaan nga hiyas ug kinaiya, ang atong pagtuon sa ebanghelyo kinahanglan nga nagpunting Kaniya. Kon kita makaila Kaniya, Siya misaad nga motabang kanato nga makakat-on og maayo gikan Kaniya. Syempre, kinahanglan nga molihok kita uban sa hugot nga pagtuo kang Jesukristo sa pagbuhat sa atong bahin, apan samtang kita nagbuhat sa ingon, Siya misaad nga maghatag kanato og kahibalo ug mopahait sa atong salabutan pinaagi sa Espiritu Santo. Siya misaad nga padak-an ang atong kapasidad alang sa matarong nga buhat ug motabang kanato nga mas mahisama Kaniya. Kini mao ang lawom nga pagkat-on.

Ikaw ug ako nasayud nga kining mga butanga tinuod. Kon kita matinud-anon, ang Ginoo motudlo kanato pagtulun-an human sa usa ka pagtulun-an, lagda human sa usa ka lagda sa tibuok natong kinabuhi.

Akong minahal nga mga kaigsoonan, ako kamong dapiton nga sinserong motuo sa pagdapit sa Manluluwas sa pagkat-on Kaniya. Samtang nagbuhat ka sa ingon, lawom ang imong makat-unan, ug inyong matabangan ang inyong mga estudyante nga lawon usab ang makat-unan. Ako usab kamong dapiton nga personal nga mosaksi niining mga mahangturong kamatuoran. Mahimo kining gamhanan kaayo alang sa inyong mga estudyante nga makadungog nga ikaw nagsaksi sa imong kaugalingong kasinatian nga nakaila sa Ginoo ug nakakat-on gikan Kaniya.

Ug mao nga ako motapos niining gabhiuna uban sa akong personal nga pagsaksi. Ako nasayud nga buhi ang Dios ug nga si Jesus mao ang Kristo! Ako nasayod sa gugma sa Manluluwas ug sa Iyang matubsanong gahum gikan sa akong kaugalingon nga kasinatian ug sa pagpadayag pinaagi sa Espiritu Santo. Usa ka makapainubsanon ug hingpit nga makapalipay ang matudluan ni Ginoong Jesukristo. Ako mopamatuod nga ang Iyang mga saad tinuod. Ang lawom nga pagkat-on tinuod, ug kini atong pribilehiyo ug ang pribilehiyo sa atong bililhong mga estudyante. Ako mopamatuod sa pangalan ni Jesukristo, amen.