2:3

Diha sa Kahayag sa Iyang Gugma

Bonnie H. Cordon

Kinatibuk-ang Presidente sa Young Women

Sibya sa Pagbansay sa Church Educational System • Hunyo 12, 2019 • Church Office Main Floor Auditorium

Mga kaigsoonan, kalipay kaayo ang makauban kamo karong adlawa.

Napanalanginan kita nga nakapaminaw sa mga pulong ni Brother Chad Webb. Pagkanindot kon unsa kita ka pingga sa Ginoo. Kining hilisgutan sa gugma napatik sa kasingkasing ni Brother Webb ug kanako usab. Makapaikag kon giunsa nga magkadungan kami og hisgut bahin niini. Manghinaut ko nga mogahin kamo og higayon ug irekord ang pipila sa mga impresyon nga inyong madawat karon mahitungod sa hilisgutan sa gugma.

Gusto nakong ipahayag ang akong walay kinutuban nga pasalamat ni Elder Kim B. Clark ug ni Brother Chad Webb sa pagsunod sa mga pag-aghat sa Espiritu sa ilang makanunayon ug mainampuong pangamuyo sa pagpalig-on sa kabatan-onan. Sa dihang among nadawat ang propetikanhong pagpasabut bahin sa nakasentro sa panimalay nga pagkat-on sa ebanghelyo nga gipangutana sa matinud-anong mga kaigsoonan, “Unsaon sa kabatan-onan nga mahimong mas maayo nga instrumento sa pagpalig-on sa panimalay?” Nakahibalo na kamo unsa ang sunod nga nahitabo. Gitrabaho nila ang napulo’g usa ka lain laing iskedyul sa eskwelahan sa tibuok kalibutan aron mahiuyon sa mga kurso sa seminary uban sa basahon sa kasulatan nga gigamit sa matag tuig alang sa kurikulum sa Dali Sunod Kanako. Kining dinasig nga kausaban wala gyud nagkulang sa paghimog milagro!

Mahinangop kaayo ko kon maghunahuna sa mga batan-on ug mga young adult nga makadala sa mga kamatuoran sa ebanghelyo gikan sa ilang klase ngadto sa ilang mga panimalay. Makaangkon sila og pagsalig sa ilang kaugalingong salabutan ug sa ilang kapasidad sa pagpapaambit sa ebanghelyo. Ang pagdungog sa ilang kaugalingong mga tingog sa pagpahayag sa kamatuoran sa Manluluwas magpadayon nga usa ka gamhanang pagpamatuod sa pagpalig-on sa kasinatian.

Mapasalamaton kaayo ko sa pagpahiuli sa ebanghelyo ug alang niining mahimayaon nga panahon sa paglambo.

Gusto usab nakong ipaabut ang akong pasalamat ngadto sa mga kapikas ug sa uban kinsa misuporta niining talagsaong mga magtutudlo—kamo nga maminaw sa mga ideya, kansang personal nga istorya gipaambit (hinaut nga dunay pagtugot), ug kansang mga kusina ug mga garahean nautingkay sa pagpangita og kagamitan alang sa leksyon. Nanghinaut ko nga dili gayud ninyo ipakaubos ang inyong impluwensya.

Ginaingon nga, “Ang kaminyoon tingali ang labing … dili kalikayan sa tanang mga sitwasyon sa pagtudlo. … Kon ang tawo magminyo maana sila sa, pagsabut, sa pag-uyon aron magkat-on sa usag usa.”¹ Ang akong bana, si Derek, mao ang akong sinaligan nga suporta ug impluwensya, bisan pa og panagsa ra kaayo siya mobarug sa akong tupad atol sa oportunidad sa pagtudlo. Samtang kamo nagtinambagay ug dungan nga nagkat-on, ang mga batan-ong hamtong, kabatan-onan, ug ag ilang mga pamilya mapanalanginan tungod sa inyong impluwensya. Importante kamo nga bahin niining talagsaon kaayo nga buhat.

Ang akong mensahe karon magsugod sa usa ka linya sa pamilyar nga kanta sa Primary. Akong sugdan ug inyong humanon. “Tudloi ko paglakaw ...”

“ ... sa kahayag.”

“Tudloi ko paglakaw’s kahayag.”² Kining duha ka baruganan, kahayag ug gugma, maoy nahimo nakong kauban sa pagbiyahe samtang namalandong ko sa atong panag-uban karon. Kini nga kombinasyon sa mga pulong makita usab diha sa unang linya sa pakigpulong ni Presidente Henry B. Eyring; sa dihang siya miingon, “Akong panghinaut karon nga mabati nato ang gugma ug kahayag sa Dios.”³ Pagkayano apan makapadasig nga tinguha sa pagsugod sa klase. Akong panghinaut nga ang matag estudyante mobati og gugma og kahayag gikan sa Dios. Talagsaong mahanturong mga saad ang giandam alang kanila ug sa ilang mga pamilya samtang sila nagkat-on nga mobati sa Iyang kahayag ug gugma.

Akong gipangutana akong anak, si Dallin, “Unsa may labing importane para nimo gikan sa seminary?” Nagdahum ko nga ang tubag sama sa Doktrinal nga Kahanas o humanon ang Basahon ni Mormon. Nasurprisa ko nga nakadungog sa iyang mahunahunaon nga tubag.

“Ang mga magtutudlo.”

“Ang mga magtutudlo?” Nakapangutana ko.

Mipasabut siya, “Adunay piho nga mga magtutudlo kinsa makaingon mi nga nagpangga kanamo.”

Kini nga kasinatian nagkumpirmar kanako sa malungtarong epekto nga mahimo sa gugma sa matag kasingkasing.

Anaa kaninyo ang kalipay sa pagtudlo sa maanindot nga kabatan-onan ug mga young adult sa Simbahan ug mopamatuod sa gugma sa Dios alang kanila. Gihigugma nako sila ug ako nasayud nga kamo usab. Tinuod sila sama sa gisulti ni Presidente Russell M. Nelson, “ang labing halangdon nga mga espiritu” sa atong Langitnong Amahan … ang Iyang kinamaayohan nga kuponan—[gitagana] alang niining katapusang hugna.”⁴

Pipila ka tuig ang milabay, migahin ko og mubo nga panahon isip usa ka magtutudlo sa seminary. Ako adunay malumo nga pagbati alang kaninyo ug gamayng pagsabut sa inyong mga responsibilidad. Niadtong 2008, natawag ko isip magtutudlo sa sayo sa buntag nga seminary didto sa Utah. Sa dihang mitawag nako ang presidente sa stake, hunahuna nako, “wala ba diay silay tawo sa Utah nga makatudlo og full time?” Salamat na lang, wala nako gisulti ang akong hunahuna, ug nasayran na lang nako nga naa koy mga yawe ug mga responsibilidad sa pag-abli sa seminary building kada 5:45 sa buntag. Tingali makaingon lang ko nga, ang tingtunaw sa Utah bugnaw sa 5:45 sa buntag.

Atol sa akong kasinatian sa pagtudlo sa seminary, nakumpirmar nako kon unsa gayud ka pinangga sa Ginoo ang matag estudyante. Nakaamgo ko nga pagkapalaran sa ubang kabatan-onan nga adunay matinud-anon, mahigugmaon nga ginikanan. Nabatyagan usab nako nga kadtong kabatan-onan nga wala nakaangkon og gugma ug pagtagad nga ilang gikinahanglan ug nangandoy sa hilabihan. Among nakita ang samang pangandoy sa gugma sa atong young single adult.

Akong giila kanang usa sa labing importanting kinaiya sa magtutudlo mao ang ablilidad sa paghigugma—ang gugma nga gipamulong ni Juan: “Mga Hinigugma, maghigugmaay kita ang usa sa usa: kay ang gugma iya sa Dios; siya nga nagahigugma gipanganak sa Dios, ug nakaila sa Dios. Siya nga wala magahigugma wala makila sa Dios; kay ang Dios gugma man.”⁵

Isip magtutudlo, ang atong paningkamot mao ang pagpalambo sa atong gugma alang sa Dios ug dayon dad-on ang gugma sa Dios alang sa kabatan-onan nga ako gitawag sa pagtudlo.

Adunay hilabihan nga gahum diha sa gugma sa Dios. Gusto nakong isipon kini nga gugma sa tulo ka managlahi nga mga aspeto: gugma sa atong mga kinabuhi, gugma diha sa atong panimalay, ug gugma diha sa atong mga lawak klasehanan.

Una, ang gahum sa gugma diha sa atong personal nga kinabuhi. Importante gayud nga kita motuo ug mosalig nga ang Dios nahigugma kanato. Ang atong mga estudyante nga dili mobati sa gugma sa Ginoo pinaagi kanato gawas kon kita mismo unang mobati sa gugma sa Ginoo. Nahingangha ako niining kasulatan: “Kay gihigugma sa Dios ang kalibutan nga tungod niana gihatag niya ang iyang bugtong Anak.”⁶ Ato bang gipamalandungan ug gibati ang kadako niini nga gugma? Usahay maghunahuna ko kon igo ba ang atong pagtinguha nga mobati niana nga gugma. Nakaila ba kita kon si kinsa kita ug kang kinsa kita?⁷ Dapiton ko kamo sa pagpangayo Kaniya diha sa mapaubsanon, bug-os nga pag-ampo alang sa tabang nga mobati sa Iyang balaan nga gugma alang kaninyo.

Tungod kay ang kalibutan moguba, mobalda, ug mobungat, sayon ra ang pagkabulag ug dili mahibaloan napasagdan na. Importante nga aktibo kitang modala sa Iyang yugo ngari kanato⁸ ug tinguhaa nga mobati sa Iyang gugma. Samtang mohimo kita niining paningkamot, Siya mobubo sa Iyang gugma diha sa kaabunda.

Ikaduha, ang gugma sa Dios kinahanglang mopuyo diha sa atong mga panimalay. Tuguti ko nga ihulagway kining baruganan sa usa ka sugilanon. Usa ka gabii ang akong bana, si Derek, ug ako wala magkasinabut sa usa ka isyu. Nangatulog mi nga walay resolusyon; apan, nasayud ko nga husto ko.

Pagkasunod buntag, miluhod ko aron mag-ampo, naghangyo alang sa Espiritu nga magmabuligon samtang ako nangandam sa pagtudlo sa akong klase sa seminary. Nangamuyo ko nga ang kabatan-onan mobati sa gugma sa Ginoo pinaagi nako. Samtang nangandam ko nianang adlawa, sa akong hunahuna nagsige og balik ang panagsumpaki sa milabay nga gabii. Samtang nagsakay ko sa sakyanan nga mapasigarbuhon ang kasingkasing ug nagtuo nga husto ko, nangatarungan ko nga makatudlo gihapon ug makahigugma uban sa Espiritu. Mipadayon ko sa pagpangayo og balaang giya samtang nagdrayb ngadto sa building sa seminary. Sa tibuok biyahe, uban sa akong lig-on kaayo ug gibarugan nga pangatarungan, padayon nakong gibaliwala ang makanunayong tingog sa Espiritu. Apan bisan unsa pa ka gahi ang akong pangatarungan, ang Espiritu mihunghong, “Balik. Pangayo og pasaylo. Dili igsapayan kinsa ang sakto; paghinulsol ug himoa kini nga husto.”

“Oo na!” Sa katapusan supak sa akong buot ug gipabalik ang sakyanan. Misulod sa kwarto, 5:20 sa buntag ang oras ug ang akong pinangga nga Derek natulog pa. Misugod og kalma ang akong kasingkasing sa akong pagsulod. “Derek, pasayloa ko kagabii.” Karon kining tipikal nga si Derek, malinawon nga miingon, “Mipasaylo nako ug gikalimtan na.” Ang akong kasingkasing napuno sa gugma, ug mibati sa tumang kalooy sa Ginoo.

Dihay kaabunda sa gugma ug sa Espiritu diha sa klase nianang adlawa. Ang gugma diha sa among panimalay nakaimpluwensya og lapas pa sa balay.

Ug Ikatulo, ang mga magtutudlo sa seminary ug institute adunay espesyal nga oportunidad sa pagpakigbahin sa gugma sa Dios. Ang inyong klase mao ang kahigayunan sa paghigugma sa mga indibidwal. Wala ko nagtudlo og klase sa 34; nagtudlo ko og 34 ka indibidwal. Siguro mao kini nga gugma ang nabati sa akong anak nga si Dallin—dili lang basta gugma alang sa klase sa kinatibuk-an, apan kanang pagbati nga nailhan ug sa tinag-tagsa nga paghigugma. Tungod kay ingon niana ang paghigugma sa Langitnong Amahan. Sa tinuoray nga paghigugma sa atong mga estudyante, kinahanglan ato silang tan-awon sama sa pagtan-aw sa Manluluwas kanila. Unsa man ang Iyang gihigugma sa matag usa kanila? Unsa nga mga gasa ang Iyang nahatag kanila? Unsa nga potensyal ang Iyang nakita diha kanila? Pinaagi sa tinud-anay nga paghigugma kanila, atoa silang matabangan nga madala ngadto sa Manluluwas.

Kon atong hinumduman nga si Kristo mao ang tinubdan sa tanang gugma, moduol kita Kaniya aron mobati og dugang gugma sa atong personal nga kinabuhi, gugma sulod sa atong mga panimalay, ug sa atong mga klase gayud. Dili kita makamugna og gugma—moabut lamang kini gikan Kaniya ngari kanato ug pinaagi kanato. Sa Moroni, gitudloan kita sa, “pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo.”⁹ Nag-ampo ko nga ang matag usa kanato modawat sa pagdapit ni Moroni.

Ang pagdapit ni Presidente Eyring mao ang pagbati og “gugma ug kahayag gikan sa Dios.”¹⁰ Sayon ra nga magkonsiderar sa gugma ug kahayag kon atong hinumduman nga dili lang Siya ang tinubdan sa tanang gugma, Siya ang kahayag. Si Jesukristo mismo mipamatuod, “Ako ang kahayag ug ang kinabuhi sa kalibutan.”¹¹ Kon kita mopaduol ngadto Kaniya, Siya mopadayag og dugang kahayag, kamatuoran, ug gugma kanato.

Karon, mamalandong kita sa makadiyot sa tulo ka dapit sa gugma nga atong nahisgutan ug ikonsiderar ang epikto sa gugma ug kahayag:

Samtang mobati kamo og gugma sa Dios sa inyong kaugalingon nga kinabuhi, unsa nga kahayag ang miabut? Unsa nga mga panglantaw ug panghunahuna ang inyong personal nga naangkon?
Unsa nga kalamboan ang miabut sa inyong kaminyoon ug sa inyong pamilya samtang inyong nabati ang gugma sa Dios ug nakasinati og dugang nga kahayag?
Sa imong classroom, kon ang imong mga estudyante mobati sa gugma sa Dios pinaagi nimo, unsa nga kahayag ang miabut sa ilang kinabuhi? Unsaon nila sa pagpalambo ug pag-usab?
Unsa nga kangitngit ang mahanaw samtang sila makaamgo ug personal nga magtinguha sa kahayag?

Copyright ni Simon Dewey 2019 Pagtugot gikan sa Altus Fine Art

Ikahibulong pa ba nga ang atong propeta, si Presidente Russell M. Nelson midapit kanato sa “pagpalambo sa [atong] espirituhanong kapasidad sa pagdawat og pagpadayag.”¹² Kon mabati nato ang gugma sa Dios, mapuno kita sa Iyang kahayag ug paglaum. Kon magtinguha kita sa kahayag ug inspirasyon sa Dios, atong mabati hilabihang kadako nga gugma. Pagkatalagsaon nga kombinasyon.

Ang akong kasinatian sa pagtudlo sa sayo sa buntag gisawhan sa usa ka matinud-anong lalaki nga ginganlan og John Lund. Kining iyang pagka-higante sa espirituwal (ug sa pisikal) nakatudlo kanako og mga butang mahitungod sa kalambigitan sa gugma ug kahayag. Tuguti nga mopaambit ko og duha ka ehemplo nganha kaninyo karon.

Usa sa among mga estudyante sa sayo sa buntag ingon og lisud masabut. Ang akong reaksyon tingali, nianang higayuna, mao lang ang pagsulimbad sa akong mata. Si John, hinoon, mipili sa paghigugma ug nagtinguha og kahayag. Sa among panagtigum aron magtinambagay mahitungod niining partikular nga estudyante, si John misugod sa pag-ingon, “nag-ampo ko mahitungod kaniya kagabii.” Kini nga pasiuna, hapit yano, pamahayag nga nakapahinuklog kanako. Gidala ni John ang ngalan niining batan-ong lalaki ngadto sa iyang panimalay, diin abunda ang gugma, ug mihangyo sa Langitnong Amahan kon unsaon nga iyang mas mahibaloan ug masabtan ang iyang estudyante. Ang paghigugma sa atong mga estudyante, ilabi na sa paghigugma kanila sama sa paghigugma sa Ginoo, nagkinahanglan og pagtinguha ug paglihok sa pagpadayag.

Akong ipaambit ang ikaduha nga istorya diha sa mga pulong ni John:

“Ang Ginoo nakaila gayud sa atong mga estudyante. Nahinumdom ko sa usa ka batan-ong lalaki nga badlungon. Naningkamot ko sa pagbaliwala kaniya sulod sa daghang mga bulan, sa pagkatinuod, makalagot siya.

“Nag-andam ko og leksyon, ug naghinam-hinam na ko kaayo kon sa unsang paagi nga ang mga butang maghiusa. Nakakita pa gani ko og usa ka butang nga magamit sa leksyon nga talagsaon. Sa akong pag-abut sa seminary building ang Espiritu miaghat nako, nag-ingon, ‘John kinahanglan ka nga magtudlo kabahin sa pag-ampo.’ Pag-ampo? Gusto gyud kong makatudlo sa akong nindot nga leksyon. Wala ko nag-andam og leksyon kabahin sa pag-ampo.

“Mibarug ko sa atubangan sa klase ug miingon, ‘wala ko kahibalo kon si kinsa ang nagkinahanglan niini karon, apan akong usbon ang akong leksyon. Dunay tawo dinhi sa klase nga nagkinahanglan nga kitang tanan maghisgut kabahin sa pag-ampo.’ Niining yano nga leksyon gisugdan og usa ka pangutana, ‘Nganong nagkinahanglan kita og pag-ampo?’ ”

Nianang gabhiona dunay nanuktok sa pultahan ni John. Diha sa iyang pultahan nagbarug ang usa ka tawo nga adunay susama nga istorya. Diay to, si milabay nga gabii, ang badlungon nga estudyante ni John nakadawat og imbitasyon gikan sa iyang hinigugma––giawhag siya sa iyang hinigugma sa pag-ampo aron mahibalo kon tinuod ba ang Simbahan. Ang awhag sa iyang hinigugma, karon inubanan sa wala damha nga leksyon ni Brother Lund bahin sa pag-ampo, miaghat sa batan-ong lalaki sa pagbuhat. Paglabay sa panahon nasaksihan ni John ang kausaban niining estudyante samtang nakabaton siya og lig-on nga pagpamatuod sa gipahiuli nga ebanghelyo ug sa katapusan nabugkos sa iyang matinud-anon ug madasigon nga hinigugma diha sa templo.

Panagsa ra kaayo ang atong makat-unan kon nganong ang ingon nga mga impresyon moabut, apan kon kita adunay pagsalig diha sa gugma sa Ginoo alang sa atong mga estudyante, kita makalihok sa gamhanan nga mga pagpadayag, ug ipaambit ang Iyang kahayag ngadto sa Iyang hinigugmang mga anak.

Kon kita magtinguha og pagpadayag sa paghigugma sama sa Dios, magiyahan kita sa pagkab-ot ug motudlo sa tinagsa-tagsa sa estudyante. Ang resulta, personal kaayo. Ang Ginoo mipakita niining personal nga pamaagi diha kang Nephi sa dihang siya nagtinguha sa pagkuha sa mga palid. Si Nephi mipamatuod, “Ug ako giubanan sa Espiritu, wala masayud sa sinugdanan sa mga butang nga ako mobuhat. Bisan pa niana ako mipadayon.”¹³

Si Laban dili motugot nga maangkon ni Nephi ang mga palid. Si Nephi gisugo sa Ginoo sa pagpatay ni Laban. Inubanan sa dakong kasubo, siya misunod. Nianang gabhiona si Zoram usab dili motugot nga maangkon ni Nephi ang mga palid. Busa nganong wala man gigamit ni Nephi ang samang pagpadayag nga iyang nadawat kalabut ni Laban? Nganong wala man si Nephi mibunot sa espada sa makausa pa?

Ang Ginoo nakaila ni Zoram, ug si Nephi nasayud sa Ginoo ug misalig diha sa giya sa Espiritu. Ang Ginoo nakaila nga si Zoram mamahimong “tinuod nga higala ngadto … ni Nephi.”¹⁴ Dili ba kita mapasalamaton nga sa sinugdanan, si Nephi nagtinguha og indibidwal nga pagpadayag ug “gigiyahan sa Espiritu.”?¹⁵

Isip usa ka magtutudlo, mahimong bation nga makahadlok ang pagpatuman sa responsibilidad aron mabati ang gugma sa Dios alang sa matag estudyante ug sa pagdawat og pagpadayag kon unsaon sa pagtabang sa matag indibidwal. Makahupay nga hunahunaon nga ang atong mga calling ug mga reponsibilidad isip kaabag ni Kristo.

Si Elder Jeffrey R. Holland midapit kanato nga “maghago ta uban sa Ginoo sa ubasan, sa pagtabang sa Dios ug Amahan sa Iyang dakong buluhaton sa pagtubag sa mga pag-ampo, paghatag og kahupayan, pagpahid sa mga luha, ug paglig-on sa huyang nga mga tuhod. Kon ato kanang buhaton, mahimo kitang mas mahisama sa mga disipulo [ug mga magtutudlo] ni Kristo nga maoy angayan kanato.”¹⁶

Ang atong mga kabatan-onan ug mga young adult kinahanglan nga mobati, masayud, ug mosalig sa gugma ug kahayag sa Ginoo. Kon kamo motugot niini, ang gugma sa Manluluwas moabut pinaagi kanimo. Ug kon ang inyong mga estudyante mobati sa Iyang gugma, sila makaila ug makadawat og personal nga pagpadayag. Makaplagan nila unsay kahulugan sa “paglakaw sa kahayag sa iyang gugma.”¹⁷ Mopamatuod ko, nga kini nga gugma makatabang kanila nga mahimong sama sa atong Langitnong Amahan ug sa atong hinigugma nga Manluluwas ug maglakaw diha sa dalan sa pakigsaad balik ngadto Kanila. Niini ako mopamatuod sa ngalan ni Jesukristo, amen.