Tinuig nga mga Sibya
Ang Gahum sa Personal nga Pagpadayag
2:3

Ang Gahum sa Personal nga Pagpadayag

Elder Kim B. Clark

Sa Seventy

Pagbansay nga Sibya sa Church Educational System • Hunyo 12, 2019 • Church Office Building Main Floor Auditorium

Sa di pa ko magsugod sa akong pakigpulong, mopahayag ko sa akong gugma ug pasalamat. Makalipay nga ikauban kamo niining dakong buhat sa pagtabang sa bag-ong henerasyon sa pagkat-on og maayo sa ebanghelyo ni Jesukristo. Gipangga ko kamo, ug nag-ampo nga unta ang panalangin sa Ginoo naa ninyo ug sa inyong pamilya.

Gusto nakong hisgutan karon ang tulo ka sumbanan sa personal nga pagpadayag sa Basahon ni Mormon:

Una mao ang sagradong mga rekord nga nagpamatuod kang Jesukristo ug sa plano sa Amahan. Ikaduha mao ang saksi sa Espiritu Santo, nga naglig-on sa pagtuo diha kang Jesukristo ug naglig-on sa pagkakabig Kaniya. Ikatulo mao ang buhing mga propeta nga nagpamatuod kang Jesukristo ug nakigbatok sa dautan.

Kining mga sumbanan tataw ug kusganong gipakita diha sa Basahon ni Mormon kay kini importante—gani mahinungdanon—sa paglig-on sa pagtuo kang Jesukristo ug pagkakabig ngadto Kaniya sa atong panahon.1

Ania kita sa panahon nga ang dautan ug ang walay giyang katawhan naningkamot sa pagkumbinser sa bag-ong henerasyon nga ang maayo dautan ug ang dautan maayo. Migamit sila sa pamaagi ni Sherem, Nehor, ug Korihor sa Basahon ni Mormon—malimbungong pulong, pang-ulog-ulog, ug madanihong mga kinulit ug imahe—sa pagmugna og doktrinang sayop bahin sa atong relasyon sa Dios, gugma, pagsabut, pagminyo, mahangturong ilhanan, pamilya, ug daghan pa. Daghan niining mga idolohiya ug mga doktrina sa katawhan may “hulagway sa pagkadiosnon, apan [tanan] nanghimakak sa gahum niana.”2

Ang atong mga estudyante kanunayng nag-atubang og mga mensahing sama niini, ug gikinahanglan nila ang personal nga pagpadayag nga maglig-on sa ilang pagtuo kang Jesukristo ug sa ilang pagkakabig Kaniya. Nanghinaut ko ug nag-ampo nga tabangan gayud ninyo ang atong mga estudyante nga makat-on og maayo niining mga sundanan sa personal nga pagpadayag.

Sagradong mga Rekord nga Nagpamatuod kang Jesukristo

Akong sugdan gikan sa sagradong mga rekord nga nagpamatuod kang Jesukristo. Tema kini nga makita diha sa tibuok Basahon ni Mormon. Nagsugod kini sa mga palid nga tumbaga.3

Ang kasinatian ni Nephi kang Laban mahinungdanong hitabo sa iyang kinabuhi. Nasayran ni Nephi ang kaimportante sa mga rekord diha niya ug sa iyang pamilya: “Kini kaalam sa Dios nga kita makakuha niini nga mga talaan, nga aron kita makatipig ngadto sa atong mga anak sa pinulongan sa atong mga amahan; … ug sa mga pulong nga gilitok sa ba-ba sa tanan nga balaan nga mga propeta.”4

Ang mga palid nga tumbaga may dakong impluwensya sa espiritwal, relihiyuso, ug kalambuang sosyal sa mga katawhang Nephite. Nahimo kining tinubdan sa personal nga pagpadayag ug mahimayaong mga panagna sa pag-anhi sa Anak sa Dios, ang Usa nga Balaan sa Israel. Naghatag usab kini og gamhanang saksi bahin sa talagsaong plano sa Amahan sa kaluwasan. Ang balaang mga propeta nga gikutlo diha sa mga palid nga tumbaga misaksi nga tubson sa Mesiyas ang mga sala sa kalibutan, mag-antus ug mamatay, ug magmadaugon batok sa sala ug kamatayon.5

Anaa usab sa mga palid nga tumbaga ang pakigsaad sa Amahan kang Abraham ug sa tanang balay ni Israel. Nadiskobrihan ni Lehi nga kaliwat siya ni Jose ug ang iyang kaliwatan mahimong mga anak sa pakigsaad, manununod sa tanang mga saad nga gihimo sa Dios ngadto ni Abraham, lakip ang pagpundok sa Israel sa katapusang mga adlaw.

Gigamit ni Lehi ang mga palid nga tumbaga sa pagtudlo sa iyang mga anak bahin sa Manluluwas ug sa mga pakigsaad sa Amahan sa balay ni Israel. Gipadayon ni Nephi ug ni Jacob kana nga paagi ug unya midugang sa kaugalingon nilang mga rekord ubos sa sugo gikan sa Ginoo.6 Nakabig gayud si Nephi sa importansya sa pagtipig og permanenting mga rekord, labi na niana nga sagrado.7

Sukad sa katukuran niadtong unang mga adlaw didto sa gisaad nga yuta, ang mga Nephite mihimo og kultura sa pagtipig og sagradong rekord, pagbasa, ug pagtudlo sa importante ug balaang mga responsibilidad. Uban sa pagtuo kang Jesukristo ug pasalig nga ibahandi ug tipigan ang Iyang pulong, ang mga Nephite nahimong katilingban sa mga tigtipig og sagradong rekord, mga tigbasa, ug mga tigtudlo.8 Ang opisyal nga mga rekord anaa sa mga palid, apan sa kadugayan, ang mga Nephite nakakita’g paagi sa pagmantala aron ang sagradong mga rekord makopya ug masulat sa mas gaan ug maapud-apud nga mga materyal.9

Ang pag-apud-apod sa sagradong mga rekord maghimo sa mga ginikanan nga makatudlo sa ilang mga anak sa mga sugo sa Ginoo ug ang ilang mga anak makatudlo sa ilang mga anak ug hangtud sa ilang mga apo.10 Ang mga misyonaryo, sama sa mga anak ni Mosiah, makadala sa mga rekord ug ila kining magamit sa pagtudlo sa mga Lamanite uban sa talagsaong mga resulta.11 Dihang gitudloan ni Alma si Helaman, ang sagradong rekord mimugna og mapadayagong kasinatian nga “mipatubo sa panumduman niining katawhan, oo, ug … midala og liboan sa mga Lamanite] ngadto sa kasayuran sa Ginoo nga ilang Dios, ug pagmaya diha kang Jesukristo nga ilang Manunubos.”12

Kining pagmaya milabaw pa dihang mipakita ang nabanhawng Manluluwas sa katawhan, sa templo sa Bountiful.13 Aduna kita niining talagsaon, lig-on nga saksi sa maulaong sakripisyo ug mahimayaong pagkabanhaw sa buhing Kristo diha sa Basahon ni Mormon karon pinaagi sa kalooy, gasa, ug gahum sa Dios.14 Sama sa mga Nephite, ug tungod kanila, kita adunay mga sagradong rekord nga nagpamatuod kang Jesukristo ug sa plano sa Amahan sa kaluwasan. Sama sa gitagna ni Alma sa iyang anak nga si Helaman dugay na, ang Ginoo “[mi]amping niining mga butang alang sa maalamong katuyoan diha kaniya, nga siya makapakita sa iyang gahum sa umaabut nga mga kaliwatan.”15

Kana nga umaabut mao karon. Mipakita ang Ginoo sa Iyang gahum ngadto sa bag-ong henerasyon sa talagsaong paagi. Kon magtudlo kita sa kahingpitan sa ebanghelyo ni Jesukristo diha sa Basahon ni Mormon, bation sa atong mga estudyante kana nga gahum. Samtang magtinguha og pagpadayag ang atong mga estudyante pinaagi sa pagbusog sa Basahon ni Mormon, modangat kanila kon unsa ang mga palid nga tumbaga alang sa katawhan ni Nephi—pagsaksi kang Jesukristo ug sa Iyang matubsanong gahum ug tinubdan sa personal nga pagpadayag ug kalipay.

Ang Pagsaksi sa Espiritu Santo nga Naglig-on sa Pagtuo kang Jesukristo ug Nagdugang sa Pagkakabig diha Kaniya

Karon hisgutan nato ang Espiritu Santo. Ang panaw ni Lehi sa gisaad nga yuta usa ka panaw sa espiritwal nga gahum. Panahon kadto nga ang Ginoo mitudlo, migiya, ug mihupay ni Lehi, Sariah, ug tanan nilang anak pinaagi sa gahum sa Espiritu Santo sa inspirasyon, mga damgo, mga panan-awon; Iyang kaugalingong tingog; ug pagpakita sa langitnong mga mensahero. Gipahayag ni Nephi nga kini nga mga panalangin miabut “pinaagi sa gahum sa Espiritu Santo, diin mao ang gasa sa Dios ngadto sa tanan kinsa sa makugihong paagi mangita kaniya.”16

Gitinguha gayud ni Nephi ang Ginoo ug nadawat ang talagsaong pagpadayag pinaagi sa Espiritu Santo. Ang iyang tinguhang mahibalo alang sa iyang kaugalingon usa ka sumbanan nga atong makita sa tibuok Basahon ni Mormon. Si Nephi dunay “dakong tinguha nga mahibalo sa mga misteryo sa Dios.”17 Kadto nga tinguha nakatabang kaniya, ug siya “nangamuyo ngadto sa Ginoo”18 diha sa pag-ampo sa tinuorayng katuyoan. Bahin sa iyang pagsusi, gisultihan si Nephie sa Ginoo: “Bulahan ikaw, Nephi, tungod sa imong pagtuo, kay ikaw kanunay naningkamot sa pag-ila kanako, uban sa tumang pagpaubos.”19

Mao kini ang sundanan: usa ka tinguhang masayud, kinasingkasing nga pag-ampo, makugihong pagsiksik uban sa pagpaubos ug pagtuo kang Jesukristo, ug sa gasa sa Espiritu Santo.20 Nakita nato kini nga sundanan sa kinabuhi ni Enos, Alma, sa mga anak ni Mosiah, Haring Lamoni ug sa iyang amahan, sa katawhan ni Ammon, Helaman ug sa iyang batan-ong manggugubat, ug daghan pa.21 Gani, sa panahon sa katarung tali sa mga Nephite ug mga Lamanite, daghan kaayong personal nga pagpadayag pinaagi sa Espiritu Santo diha kanila.22

Dihang ang matinud-anong mga Nephite ug mga Lamanite milihok—ug misulat—sa gipadayag sa Espiritu Santo kanila, gipanalanginan sila og mas daghan pa sa Ginoo. Kay gibahandi nila23 ang gihatag Niya kanila, mipanalangin kanila ang Ginoo og dugang pagtuo Kaniya, mas lig-ong pagkakabig ug espiritu sa pagpadayag. Milambo ang ilang kapasidad sa pagdawat og pagpadayag pinaagi sa gahum sa Espiritu Santo.

Ang kasinatian ni Alma matahum nga ehemplo niini nga paagi. Kahinumdom mo, nakakita siya’g mga anghel ug nakadawat og talagsaong panan-awon, gani, padayon niyang gitinguha ang pagsaksi sa Espiritu gikan sa Ginoo: “Tan-awa, ako magpamatuod nganha kaninyo nga ako nasayud nga kini nga mga butang diin ako namulong mga tinuod. Giunsa ninyo sa pagdahum nga ako nasayud sa kasiguroan [niini]?

“Tan-awa, ako moingon nganha kaninyo nga [kini] gihimo nga mabutyag ngari kanako pinaagi sa Balaang Espiritu sa Dios. Tan-awa, ako nagpuasa ug nag-ampo sa daghan nga mga adlaw nga ako unta masayud niini nga mga butang sa akong kaugalingon. Ug karon ako nasayud sa akong kaugalingon nga [kini] tinuod; kay ang Ginoong Dios [mipakita niini] kanako pinaagi sa iyang Balaan nga Espiritu; ug kini mao ang espiritu sa pagpadayag diin ania kanako.”24 (tapos sa kutlo.)

Ang saksi sa Espiritu Santo may dakong epekto sa katawhang Nephite ug sa katilingban nga ilang gipuy-an.25 Walay laing mas maayong ehemplo kay sa misyon sa mga anak ni Mosiah ngadto sa mga Lamanite 91 ka tuig sa wala pa matawo ang Manluluwas. Pinaagi sa makugihong pagsiksik sa kasulatan, pagpuasa, ug pag-ampo, kining talagsaong mga misyonaryo “adunay espiritu sa pagpanagna, ug espiritu sa pagpadayag.”26

Ang ilang buhat diha sa mga Lamanite dako og impluwensya sa kasaysayan sa mga Nephite ug Lamanite. Sa unang higayon sa 500 ka tuig, “liboan [sa mga Lamanite] ang nadala ngadto sa kahibalo sa Ginoo, … ug gitudloan sila sa mga rekord ug mga panagna.”27 Ang deskripsyon ni Mormon mahitungod niini nga kasinatian usa ka propetikanhong saad kon unsay posibling mahitabo ni bisan kinsang anak sa Dios kinsa nagsunod sa sundanan sa personal nga pagpadayag pinaagi sa Espiritu Santo: “Kutob sa nadala ngadto sa kahibalo sa kamatuoran, pinaagi sa pagsangyaw ni Ammon ug sa iyang mga kaigsoonan, sumala sa espiritu sa pagpadayag ug sa pagpanagna, ug sa gahum sa Dios nga nagbuhat og mga milagro diha kanila … makabig ngadto sa Ginoo, wala gayud mobiya.”28

Kaigsoonan, mao kini ang saksi ug gahum sa Espiritu Santo nga maglig-on sa pagtuo diha kang Jesukristo ug sa pagkakabig Kaniya.

Mga Propeta kinsa Nagpamatuod kang Jesukristo ug Nakigbatok sa Dautan

Ang ikatulong paagi sa personal nga pagpadayag mao ang mga buhing propeta nga may awtoridad sa pag-ingon, “miingon ang Ginoo,” karon sa tanang tawo. Kini ang talagsaon mapanagnaong paagi nga atong makita sa tibuok Basahon ni Mormon: mga propeta mosaksi kang Jesukristo, motudlo sa Iyang ebanghelyo, manawagan sa katawhan og paghinulsol, ug mopasidaan ug makigbatok sa dautan sa ilang panahon.29 Pinaagi sa pagpadayag, labi na gikan sa mga anghel, ang mga propeta sa Basahon ni Mormon mihatag kanato og talagsaon kaayong pagtulun-an bahin ni Jesukristo, sa Iyang doktrina, ug sa Iyang Pag-ula.30

Way kahadlok ang mga propeta nga nanawag sa katawhan sa paghinulsol. Busa, diha sa Basahon ni Mormon anaa ang talagsaong pagtulun-an sa paghinulsol ni Nephi, Jacob, Haring Benjamin, Alma, Amulek, mga anak ni Mosiah, Kapitan Moroni, Mormon ug Moroni.31 Nanudlo kining mga propeta uban sa kaklaro, kadirekta, gugma ug paglaum. Ang ilang mga gitudlo atong mabatyag pinaagi sa gahum sa Espiritu Santo:

  • “Kamo sa espirituhanon nga paagi natawo ba sa Dios?”32

  • “Kon kamo mibati sa pag-awit sa awit sa matubsanon nga gugma, ako mangutana, kamo mibati ba karon sa mao?”33

  • “Tan-awa, kamo gihuboan ba sa garbo?”34

  • “Paghinulsol, paghinulsol, kay ang Ginoong Dios ang namulong niini! … siya nagpadala og usa ka pagdapit sa tanan nga mga tawo, kay ang mga bukton sa kalooy gitunol kanila, ug siya miingon: Paghinulsol, ug Ako modawat kaninyo.”35

Ang mga propeta nakigbatok sa dautang katawhan kinsa nagtinguhang ipalayo ang katawhan kang Jesukristo ug miguba sa Iyang Simbahan. Ang mga tawo sama ni Sherem, Nehor, Amlici, Korihor, Amalickiah, ug daghan pa gidani sa kaaway aron molibug ug molingla sa dakong kahanas.36 Nahibalo kaayo sila ug migamit sa mga paagi o mga pulong nga maliputon aron ipakita nga ang maayo dautan ug ang dautan maayo.

Hulhugon nila ang katawhan, tandugon ang ilang kaasyoso, garbo, kahangol sa gahum, ug tinguhang pagtagbaw sa ilang mga gana. Nag-ingon ang kasulatan nga sila may “daghan nga gahum sa pinulongan, sumala sa gahum sa yawa”37 ug “pagsulti sa hilabihan ka lanog nga mga pulong.”38 Bisan pa og ang ilang gipangtudlo, mga pulong, ug mga saad tanan bakak, madanihon kaayo kini sa kinaiyanhon nga tawo, ug daghan ang mosupak sa Simbahan ug mahisalaag hangtud ang mga propeta mobadlong ug mobatok sa dautan.39

Karon, dihang dili na igo ang ilang pagpang-agni, nanghulga na ang mga dautan, mipatay, ug nangawat ug mihimo og tinago nga mga kalihukan aron sa pagtago sa dautan nilang mga buhat.40

Nakigbatok ang mga propeta niining mga matang sa dautan gamit ang yanong pulong sa Dios, gamit ang ilang mga pagpamatuod pinaagi sa gahum sa Espiritu Santo, ug sa mga milagrong gihimo sa kamot sa Ginoo. Sama sa gisulti ni Jacob sa iyang pakigharong ni Sherem, “Ang Ginoong Dios mibu-bu … sa iyang Espiritu sa akong kalag, hangtud nga ako milibug kaniya sa tanan niyang mga pulong.”41

Ang buhing mga propeta namulong alang sa Ginoo sa atong panahon. Kon madungog nato ang ilang mga pulong pinaagi sa Espiritu, makadawat kita og direktang personal nga pagpadayag, lakip sa pagpadayag nga nagmatuod nga tinuod ang gisulti sa propeta.42 Kon tudloan nato ang atong mga estudyante sa pagtinguha sa pulong sa mga buhing propeta sa pagtubag sa ilang mga pangutana, gigiyahan nato sila sa gamhanan nga tinubdan sa pinadayag nga kamatuoran. Makat-on ang atong mga estudyante nga moabut ang personal nga pagpadayag sa ilang kinabuhi kon sundon nila ang buhing mga propeta nga nagpamatuod kang Jesukristo ug mobatok sa dautan.43

Pagkat-on gayud sa Baruganan sa Pesonal nga Pagpadayag

Gihunahuna namo, mga kaigsoonan, ang personal nga pagpadayag pinaagi sa sagradong mga rekord, ang saksi sa Espiritu Santo, ug ang buhing mga propeta mipresentar sa impluwensyal nga paagi diha sa Basahon ni Mormon.44 Gihunahuna namo kini sa managlahing paagi, apan konektado gayud. Gani, kabahin kini sa “[pag]hiusa diha kang Kristo sa tanang mga butang”45 niini nga dispensasyon.

Kining tanan, mga sundanan sa personal nga pagpadayag nagpamatuod, naglig-on sa pagtuo ug pagkakabig kang Jesukristo. Kinahanglang magkat-on gayud ang atong mga estudyante sa baruganan sa personal nga pagpadayag ug sabton kini diha sa ilang hunahuna ug kasingkasing. Kinahanglang mahibalo sila unsaon sa paghimo og epektibong matarung nga lihok aron maangkon kini, ug kinahanglan kining mahimong usa ka baruganan sa pagpadayag ug mas mahisama sa ilang Manluluwas, si Jesukristo.

Karon, akong isugyot ang pipila ka butang nga unta itudlo ninyo sa inyong mga estudyante, samtang magkat-on sila sa mahangturong baruganan sa personal nga pagpadayag?

Una, ang personal nga pagpadayag personal.

Kon magtutok ang atong mga estudyante kang Jesukristo ug sa Iyang gipahiuling ebanghelyo, bation nila ang Iyang gugma, magmaya diha sa Iyang Ebanghelyo, ug mapaduol Kaniya. Ang tinguhang makadungog sa Iyang tingog ug pagdawat sa Iyang kahayag molambo diha kanila. Ang Personal nga pagpadayag alang sa kaugalingon. Ang Dios sinati kaayo ug personal nga nakaila sa atong mga estudyante. Siya makigsulti kanila sa personal uban sa gugma, empatiya, ug kahibalo nga ilang gikinahanglan. Ang pagpadayag moabut pinaagi sa Balaang Espiritu, apan pulong kini sa Ginoo. Siya nahigugma. Siya makigsulti. Siya moguya. Siya mopanalipod. Personal kini.

Ikaduha, tanan sa atong estudyante may kapasidad sa pagdawat og personal nga pagpadayag.

Ang personal nga pagpadayag moabut pinaagi sa Espiritu ngadto sa espiritu; kini balaaang komunikasyon gikan sa Espiritu Santo ngadto sa mahangturong mga espiritu sa atong mga estudyante.46 Tanan natong estudyante may iyang kapasidad sa pagdawat og personal nga pagpadayag gikan sa Dios. Molihok kini subay sa balaang balaod. Nagkinahanglan kini og buhat—tinguha sa pagpadayag pinaagi sa pag-ampo, puasa, pagtuon, pagpaminaw, pagsulat, ug lihok uban sa pagtuo kang Jesukristo. Mao kini nga buhat—ug personal nga pagkamatarung—ang mag-abli sa personal nga pagpadayag nga anaa nilang tanan.

Ikatulo, ang kapasidad sa atong mga estudyante sa pagdawat og pagpadayag mahimo ug kinahanglang motubo.

Ang kapasidad sa atong mga estudyante sa pagdawat og personal nga pagpadayag pweding motubo. Kinahanglan kining motubo aron makalahutay sa espiritwal nga paagi ug makadawat sa kinabuhing dayon. Tinuod usab kana alang kanato. Maong miawhag si Presidente Nelson kanila ug nangamuyo kanila (ug nato) sa “pagpapalambo sa atong espirituhanong kapasidad sa pagdawat og pagpadayag.”47 Mitudlo si Propeta Joseph, “Pinaagi sa pagkat-on sa Espiritu sa Dios ug sa pagsabut niini, [ang atong mga estudyante] molambo ngadto sa baruganan sa pagpadayag, hangtud nga [sila] mahingpit diha ni Kristo Jesus.”48

Sa katapusan, ayaw, ayaw gayud ipakaubos ang mapanagnaong gahum sa pagsunod sa propeta.

Nagpuyo ang atong mga estudyante sa usa ka talagsaon ug mahagitong panahon. Panalipdan ug panalanginan sila ug ang pinadayag moabut sa ilang kinabuhi kon sundon nila ang tambag ug mga pagdapit sa propeta sa Ginoo. Ang mga propeta mamulong alang sa Ginoo. Ania ang kasamtangang ehemplo: mamulong sa atong mga estudyante, misulat si Presidente Russell M. Nelson, “Ang inyong abilidad nga maadunay mas dako og epekto sa kalibutan kay sa nangaging henerasyon nakadepende sa lebel sa inyong debosyon kang Jesukristo. Matag usa ninyo responsable sa pagtabang og tudlo sa ebanghelyo sa inyong panimalay niadtong anaa sa inyong gipuy-an. Ang seminary ug institute makatabang ninyo sa paghimo sa inyong panimalay nga santuwaryo sa pagtuo—usa ka dapit diin ang ebanghelyo ni Jesukristo matudlo, makat-unan, masunod, ug mahigugma.”49

Mga kaigsoonan , palihug tabangi ang atong mga estudyante nga mosunod sa propeta. Tudloi sila pagsuporta sa ilang mga ginikanan sa paghimo sa ilang mga panimalay nga sentro sa pagkat-on sa ebanghelyo. Tudloi silang mopaambit sa ilang gugma sa Ginoo ug sa Iyang ebanghelyo ngadto sa ilang pamilya og mga higala. Kon ilang buhaton, madawat nila ang “pagpadayag ug dugang pagpadayag … kana nga nagdala og kalipay, niana nga nagdala og kinabuhing dayon.”50 Mahisama sila sa sundalo ni Helaman, usa ka inspirasyon sa tanan nga nakaila kanila, labi na sa anaa sa ilang kaugalingong mga panimalay.

Saksi

Minahal kong mga igsoon, mosaksi ko sa atong mahigugmaong Langitnong Amahan. Siya buhi. Si Jesus mao ang Kristo, ang atong Manluluwas ug Manunubos. Ako nasayud nga Siya buhi. Ang Espiritu Santo nagtabang sa atong kinabuhi. Abli ang kalangitan. Adlaw kini sa mga milagro, adlaw sa pagpadayag pinaagi sa gahum “sa Espiritu … gipadala pinaagi sa kabubut-on sa Amahan pinaagi kang Jesukristo, iyang Anak.”51 Nasayud kong tinuod kana. Unta ang matag usa kanato magtinguha og pagpadayag gikan sa Ginoo aron matabangan ang matag estudyante, ang tanan, makat-on gayud niining mahimayaong baruganan ug makadawat og personal nga pagpadayag sa ilang kinabuhi karon ug sa kahangturan.

Sa sagradong pangalan ni Jesukristo, amen.

© 2019 pinaagi sa Intellectual Reserve, Inc. All rights reserved. Bersyon: 5/19. Hubad sa“The Power of Personal Revelation.” Cebuano. PD60009021 853

Mubo nga mga Sulat

  1. Kining tulo ka sundanan giestablisar sa pamilya ni Lehi atol sa ilang panaw ngadto sa gisaad nga yuta. Si Lehi usa ka propeta ug nanagna sa iyang pamilya: nagpamatuod siya bahin ni Jesukristo, nanawagan kanila sa paghinulsol, ug nakigbatok sa dautan tali kanila; tinguha ni Nephi ang personal nga pagpadayag sama sa iyang amahan ug nakadawat niini pinaagi sa mga damgo ug mga panan-awon, sa hagawhaw sa Espiritu, sa tingog sa Ginoo, ug sa pagpangalagad sa mga anghel. Ug anaa kanila ang sagradong mga rekord sa mga palid nga tumbaga nga nagpamatuod kang Jesukristo.

  2. Tan-awa sa Joseph Smith—Kasaysayan 1:19.

  3. Giklaro ni Nephi nga ang iyang amahang si Lehi usa ka tawo nga may kahibalo ug pinulongan. Sa sinugdanan gayud sa iyang rekord miingon si Nephi, “Ako, si Nephi, natawo sa mga matarung nga ginikanan, busa ako gitudloan sa tanan nga nakat-unan sa akong amahan; … naghimo ako og talaan sa pinulongan sa akong amahan, nga naglakip sa kinaadman sa mga Judeo ug sa pinulongan sa mga Ehiptohanon. … Ako, si Nephi, dili mohimo sa hingpit nga asoy sa mga butang nga gisulat sa akong amahan” (1 Nephi 1:1–2, 16).

    Edukado nga tawo si Lehi kinsa misulat sa kaugalingon niyang mga sugilanon bahin sa iyang mga damgo ug mga panan-awon ug sa iyang mga panagna. Apan, ang Ginoo misugo kaniya sa pagpabalik sa iyang mga anak ngadto sa Jerusalem aron sa pagkuha sa mga rekord sa mga Judeo nga gitipigan ni Laban.

  4. 1 Nephi 3:19–20.

  5. Tan-awa sa 1 Nephi 19:10 alang sa ehemplo sa mga sinulat sa mga propeta nga anaa sa mga palid nga tumbaga nga dili nato mabasa diha sa Biblia.

  6. Tan-awa sa 1 Nephi 6:4; 19:1, 21. Ang mga palid nga tumbaga padayon nga usa ka tinubdan sa pagtulun-an ug pagpadayag sa tibuok kasaysayan sa mga Nephite. Sa pagsulat 1,000 ka tuig human ni Lehi, gikutlo ni Moroni si Isaias gikan sa mga palid nga tumbaga ang mahitungod sa mga pakigsaad sa Amahan ug nanawagan sa matubsanong gahum ni Jesukristo: “Pagmata, ug bangon gikan sa abug, O Jerusalem; oo, ug isul-ob ang imong matahum nga mga saput, O anak nga babaye sa Zion; … nga ang mga pakigsaad sa Amahan sa Kahangturan diin siya mihimo nganha kaninyo, O balay ni Israel, mahimo nga matuman.

    “Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon” (Moroni 10:31–32).

  7. Tan-awa sa 1 Nephi 6:4; 19:21.

  8. Ang kaimportante sa pinulongan ug pagkat-on—ang abilidad sa pagbasa ug pagsulat ug pagtipig sa mga rekord—natisok gayud sa Nephite nga katilingban nga gani ang mga dili tumutuo mipalambo niana nga kapasidad. Sama pananglit, si Amulon, usa sa dautang mga pari ni Haring Noah, nahimong magtutudlo sa mga Lamanite ug mitudlo kanila sa pagbasa ug pagsulat ug pagtipig og mga rekord. Bisan ang mga tulisan ni Gadianton mobasa ug mosulat. Dugang pa, ang pagmugna og usa ka katilingban sa mga tawong tigtipig og mga rekord, mga tigbasa, ug mga magtutudlo importante kaayo sa kalambuan sa patakaran sa balaod tali sa mga katawhang Nephite atol sa pagdumala sa mga maghuhukom. Ang mga rekord ug pagtipig og rekord ingon man ang pagbasa ug pagsulat mga importanting paagi diin ang Ginoo mipanalangin sa mga Nephite sa temporal ug sa espiritwal nga paagi. Aduna diha niana nga kasinatian ang usa ka sundanan para kanato sa atong panahon.

  9. Makita nato kana nga mga rekord nga nahitabo sa pakigpulong ni Haring Benjamin dihang gipasulat niya ang iyang mga pulong ug giapud-apod ngadto sa iyang katawhan kinsa dili makadungog kaniya. Makita nato kana dihang si Abinadi mibasa gikan sa mga panid nga tumbaga sa mga sugo sa Ginoo ngadto sa dautang mga pari ni Haring Noah. Makita nato kini tali niadtong anaa sa Ammonihah kinsa mituo kang Alma ug ni Amulek ug kinsa “misugod sa paghinulsol, ug sa pagsiksik sa mga kasulatan” (Alma 14:1). Ang kababayen-an ug mga anak sa mga tumutuo, kauban sa “ilang mga talaan nga naglangkob sa balaan nga mga kasulatan” (Alma 14:8) gitambog sa kalayo ug nangasunog.

  10. Tan-awa sa Mosiah 1:2–5.

  11. Tan-awa sa Alma 18:36 diin si Ammon “mipahiluna sa atubangan [ni Haring Lamoni] sa mga talaan ug sa balaan nga mga kasulatan.”

  12. Tan-awa sa Alma 37:8–9.

  13. Tan-awa sa 3 Nephi 11:8–17. Ang mga tawo hilabihan ang kalipay ug misaksi kang Jesukristo niana gayung gabhiona ug sa henerasyong miabut. Si Nephi, ang apo sa kiting ni Alma nga Batan-on, mirekord niadtong sagradong mga hitabo, ug naglangkob kini sa talagsaong saksi sa pagkabanhaw ug makatubos nga sakripisyo sa Anak sa Dios.

  14. Gisultihan sa Ginoo si Joseph nga gihatagan siya og gahum sa paghubad sa Basahon ni Mormon pinaagi “sa kalooy sa Dios” (Doktrina ug mga Pakigsaad 1:29). Sa katapusan sa iyang kinabuhi, gihatag ni Nephi ang mahagiton nga tawag sa pagbahandi sa pulong ni Kristo ngadto sa tanang mosulod sa dalan sa pakigsaad. Kana nga tawag milanog hangtud sa mga siglo sa Nephite nga kasaysayan diha sa mga panimalay, sa mga santuwaryo, ug sa mga pagtulun-an sa mga propeta. Mituhop kini karon sa atong kasingkasing uban sa makadasig nga saad: “Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, miingon ang Amahan: Kamo makabaton og kinabuhi nga dayon” (2 Nephi 31:20).

  15. Alma 37:18; tan-awa usab sa Alma 37:14–19. Ang mga palid nga tumbaga gipreserba ug anaa sa pag-atiman ug pagtipig ni Moroni. Si David Whitmer sa usa ka interbyu niadtong 1878 uban ni Joseph F. Smith ug Orson Pratt sa Richmond Missouri mipamatuod nga tinuod kadto: “Si Joseph, Oliver ug ako, wala lamang makakita sa mga palid sa B[asahon] ni M[ormon] apan sa mga palid nga Tumbaga usab, sa mga Palid sa Basahon ni Ether, … ug daghan pa sa ubang mga palid. Ang tinuod mao nga sama ra nga si Joseph, Oliver ug ako naglingkod dinhi sa troso dihang gipaibabwan kami sa kahayag, dili kadto sama sa kahayag sa adlaw … apan mas mahimayaon ug matahum. … Mitungha ang sama og usa ka lamesa nga dunay daghang Rekord o mga palid diha niini gawas sa mga palid sa Basahon ni Mormon, sa espada ni Laban usab, sa mga Tigpunting, nga mao ang Bola nga nahuptan ni Lehi, ug ang mga Ighuhubad. Nakita nako kini sama kaklaro sa akong pagkakita niini nga higdaan … ug akong nadungog ang tingog sa Ginoo nga klaro sukad nga akong nadungog sa akong kinabuhi namahayag nga ang mga rekord diha sa mga Palid sa Basahon ni Mormon gihubad pinaagi sa gasa ug gahum sa Dios” (David Whitmer, sa sulat ni Joseph F. Smith nadto kang John Taylor, Sept. 17, 1878, Joseph F. Smith papers, 1854–1918, Church History Library, Salt Lake City, 8–9).

  16. 1 Nephi 10:17. Sa 2 Nephi, gihulagway ni Nephi sa unsang paagi ang usa ka tawo kwalipikado sa gasa sa Espiritu Santo ug unsay gihimo sa Espiritu Santo: “Kay ang ganghaan diin kamo kinahanglan nga mosulod mao ang paghinulsol ug bunyag pinaagi sa tubig; ug unya mosunod ang kapasayloan sa inyong mga sala pinaagi sa kalayo ug sa Espiritu Santo. … Unya kamo maanaa sa higpit ug pig-ot nga dalan nga mopadulong sa kinabuhi nga dayon; … kamo nakadawat sa Espiritu Santo, diin mosaksi sa Amahan ug sa Anak, ngadto sa katumanan sa saad diin siya mihimo nga kon kamo mosulod pinaagi sa agianan kamo kinahanglan makadawat” (2 Nephi 17–18).

    “Kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5).

  17. 1 Nephi 2:16.

  18. 1 Nephi 2:16.

  19. 1 Nephi 2:19.

  20. Kini nga sundanan makita diha sa daghang kasinatian sa personal nga pagpadayag diha sa Basahon ni Mormon. Ikonsiderar ang mosunod:

    Tinguha nga Masayud alang sa Atong Kaugalingon

    Ang usa ka tinguha nga masayud sa kamatuoran, sa pagdawat sa mga tubag, aron makadawat og giya o kahupayan o kapasayloan, sa kasagaran magsugod sa pulong sa Dios, modasig sa pagsiksik og personal nga pagpadayag. Si Nephi adunay “dako nga tinguha nga mahibalo sa mga misteryo sa Dios” (1 Nephi 2:16). Ang “kalag ni Enos gigutom” alang sa kapasayloan (Enos 1:4). Si Alma nangamuyo sulod sa iyang kasingkasing “O Jesus, ikaw nga Anak sa Dios, malooy ka kanako” (Alma 36:18). Tinuod kini nga tinguha aron makadawat og pagpadayag gikan sa Dios.

    Mag-ampo uban sa Tinuod nga Katuyoan

    Ang tinuod nga tinguha mosangko sa pag-ampo, sa kasagaran sa hilom nga dapit. Magtinguha kita og pagpadayag gikan sa atong Langitnong Amahan, ug mahimo nato kana sa kinasingkasing nga pag-ampo, gikan sa tinguha nga masayud. Pag-ampo kini sa tinuod nga katuyoan sa paglihok unsay atong nadawat. Mao kana ang mga pag-ampo nga gihalad ni Nephi, Enos, Alma, sa mga anak ni Mosiah, ug Helaman ug sa iyang batan-ong mga manggugubat (tan-awa sa 1 Nephi 2:16; Enos 1:4; Alma 17:3; Alma 58:10–12).

    Kakugi sa Pagsiksik

    Ang pagtinguha og pagpadayag nagkinahanglan og kakugi sa pagsiksik. Hunahunaa si Alma kinsa “nagpuasa ug nag-ampo sa daghan nga mga adlaw nga [siya] unta masayud niini nga mga butang sa [iyang] kaugalingon” (Alma 5:46). Ang kakugi sa pagpangita og pagpadayag nagpasabut sa pagsiksik sa mga kasulatan, pagpamalandong, pag-ampo, ug pagpuasa mahitungod sa unsay atong nabasa ug nakat-unan. Nagpasabut kini sa kanunay nga pag-adto sa Langitnong Amahan ug pagsalig sa Iyang panahon.

  21. Sama sa gitudlo ni Jacob, ang gasa sa personal nga pagpadayag pinaagi sa Espiritu Santo nagdala usab og espirituhanong mga gasa, nagkadakong pagtuo kang Jesukristo, ug lig-ong pagkakabig ngadto sa Ginoo: “Busa, kami nangita sa mga propeta, ug kami adunay daghan nga mga pagpadayag ug sa espiritu sa pagpanagna; ug ingon nga aduna sa tanan niini nga mga saksi kami nakaangkon og usa ka paglaum, ug ang among hugot nga pagtuo nahimo nga dili matarug, hangtud nga kami sa pagkatinuod makasugo diha pinaagi sa ngalan ni Jesus ug ang mao nga mga kahoy motuman kanamo, o ang mga bukid, o ang mga balud sa dagat.

    “Bisan pa niana, ang Ginoong Dios mipakita kanamo sa among kahuyang aron kami masayud nga pinaagi sa iyang grasya, ug sa iyang walay katapusan nga pagpakig-angay ngadto sa mga katawhan, nga kami adunay gahum sa pagbuhat niini nga mga butang” (Jacob 4:6–7).

  22. Tinuod kana alang sa tanang paagi sa pagpakigsulti sa Dios sa Iyang katawhan. Sama pananglit, ang pagpangalagad sa mga anghel komon ra tali sa mga matarung. Miingon si Alma, “Tan-awa, ang mga anghel mipahayag [og paghinulsol] niini ngadto sa daghan niini nga panahon dinhi sa atong yuta” (Alma 13:24). Sa hapit na matawo ang Manluluwas, “Ang mga anghel nagpakita ngadto sa mga tawo, makinaadmanon nga mga tawo, ug nagpadayag ngadto kanila sa malipayon nga mga balita sa dako nga hingpit nga kalipay” (Helaman 16:14).

  23. Tan-awa sa Doktrina ug mga Pakigsaad 84:85.

  24. Alma 5:45–46.

  25. Dihang nanudlo siya sa katawhan sa Ammonihah, gi-summarize ni Alma ang talagsaong mga panalangin nga natagamtam sa mga Nephite ug ang matang sa komunidad sa pakigsaad nga gihimo sa Ginoo diha kanila. Ang Alma 9:20–22 nag-ingon nga sila “pinalabi kaayo nga mga katawhan sa Ginoo”; “makaangkon sa tanan nga mga butang nga gipahibalo ngadto kanila, sumala sa ilang mga tinguha, ug sa ilang hugot nga pagtuo, ug mga pag-ampo, niana nga diha na, ug nga anaa, ug nga moabut”; “naduaw sa Espiritu sa Dios; … nakigsulti uban sa mga anghel, ug ingon nga nakapamulong ngadto pinaagi sa tingog sa Ginoo”; ug “nakaangkon sa espiritu sa pagpanagna, ug sa espiritu sa pagpadayag, ug usab sa daghan nga mga gasa.”

  26. Alma 17:3; tan-awa usab sa Alma 17:1–3.

  27. Alma 23:5; tan-awa usab sa Alma 23:5–7.

  28. Alma 23:6.

  29. Nag-focus kita dinhi sa tahas sa mga propeta apan moila nga ang mga propeta mga manalagna ug mga tigpadayag usab. Sama sa gitudlo ni Ammon: “Ang usa ka manalagna mao ang usa ka tigpadayag ug usa ka propeta usab; … ang usa ka manalagna masayud sa mga butang diin nangagi na, ug usab sa mga butang diin umaabut, ug pinaagi kanila ang tanan nga mga butang ipadayag, o, kaha, ang tinago nga mga butang mahimo nga makita, ug ang gitagoan nga mga butang mahimo nga magpakita, ug ang mga butang diin wala mahibaloi ipahibalo pinaagi kanila, ug usab ang mga butang mahimo nga ipadayag pinaagi kanila nga sa lain nga bahin dili gayud mahibaloan” (Mosiah 8:16–17).

  30. Mihimo sila niini pinaagi niana nga espiritwal nga gahum nga ang mensahe mituhop sa kasingkasing sa katawhan kinsa andam nga maminaw. Kapin sa 1,000-ka tuig nga kasaysayan, mabasa nato ang mahitungod sa katawhan kinsa “napuno sa kalipay” (1 Nephi 5:1; Mosiah 4:3), “ang ilang mga kalag … nalamdagan pinaagi sa kahayag sa walay katapusan nga pulong” (Alma 5:7), ug “natubos na sa Ginoo; … natawo sa Espiritu” (Mosiah 27:24). Sa daghang okasyon “liboan … mipasakop sa ilang mga kaugalingon ngadto sa simbahan ug nabunyagan ngadto sa paghinulsol” (Helaman 3:24). Alang sa usa ka ehemplo sa tahas sa mga anghel diha sa pagpadayag ngadto sa mga propeta nga nagpadako sa atong kahibalo sa doktrina ni Kristo, tan-awa sa Mosiah 3.

  31. Tan-awa sa 2 Nephi 31; Jacob 2; Mosiah 3; Alma 5; Alma 18, Alma 34; Alma 46; Moroni 7; Moroni 8; Moroni 10.

  32. Alma 5:14.

  33. Alma 5:26.

  34. Alma 5:28.

  35. Alma 5:32–33.

  36. Tan-awa sa Jacob 7:1–20 (Sherem); Alma 1:3–15 (Nehor); Alma 2:1–31 (Amlici); Alma 30:3–59 (Korihor); Alma 46:3–11 (Amalickiah).

  37. Tan-awa sa Jacob 7:4.

  38. Tan-awa sa Alma 30:31.

  39. Sa panahon nga nagkaduol ang pagkatawo sa Manluluwas, ang dautang mga tawo padayon gani mas dautan pa—mihimo sila og tinagong mga kalihokan (tan-awa sa Helaman 1:9–12; Helaman 2:4–5). Sa karaang proseso balik sa panahon ni Adan ug Eva, kining mga tawong dautan mihimo og usa ka pundok nga nagtinguha sa pag-angkon og gahum, makaangkon og katigayunan, ug pagguba sa Simbahan ug sa gobyerno pinaagi sa pagpamatay ug tinagong pagpangawat. Ang ilang mga hinagiban dili mga pulong, apan mga bunal, mga espada, ug mga kutsilyo. Gipanalipdan sila pinaagi sa mga panumpa ug mga pakigsaad nga ilang gihimo sa usag usag aron pagtago sa ilang dautang mga buhat sa silot nga kamatayon kon mahibaloan man (tan-awa sa Helaman 6:20–33; 3 Nephi 1:27–30).

  40. Tan-awa sa Helaman 1:9–12; Helaman 2:4–5; Helaman 6:20–33; 3 Nephi 1:27–30.

  41. Tan-awa sa Jacob 7:8.

  42. Alang sa usa ka panaghisgot mahitungod niini nga baruganan, tan-awa sa Henry B. Eyring, “Padayon nga PagpadayagLiahona, Nob. 2014, 70–73.

  43. Mao kini ang kahulugan sa mensahe sa Ginoo ngadto ni Propeta Joseph: “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (Doktrina ug mga Pakigsaad 50:24). Bisan dili kanunay nga matarung ang mga Nephite, ug bisan aduna man kanunay mga supakan, ang mga propeta padayong mipadilaab sa kalayo sa pagtuo. Uban sa kaisug ug gahum sa pagpadayag, gihiusa nila ang katawhan sa pagtuo kinsa nawad-an sa kadasig ug gipanglutos. Gitabangan nila ang daghan nga maestablisar ang ilang kinabuhi diha sa Manluluwas ug makadawat og personal nga pagpadayag nga midala kanila o mipahiuli kanila kang Jesukristo ug sa Iyang ebanghelyo.

  44. Ang atong mga estudyante makabasa ug makakita kon sa unsang paagi ang mga Nephite ug mga Lamanite napanalanginan pinaagi sa sagradong mga rekord, personal nga pagpadayag, ug sa buhing mga propeta. Sa higayon gayud nga mabasa sa atong mga estudyante ang mahitungod niining talagsaong mga panalangin, masinati nila kini sa ilang kaugalingon kon ila kining sagupon. Pinaagi sa pagtuon ug pagsiksik sa Basahon ni Mormon ug sa pag-ampo alang sa espirituhanong giya, ang atong mga estudyante makadawat og kahibalo ug panabut mahitungod sa ebanghelyo ni Jesukristo ug sa plano sa Amahan, makat-unan nila unsaon sa pagkapabuhi sa ebanghelyo, ug makadawat sila og saksi nga ang ilang gibasa tinuod—tanan pinaagi sa gahum sa Espiritu Santo.

  45. Tan-awa sa Mga Taga-Efeso 1:10.

  46. Si Joseph Smith mitudlo nga samtang ania sa pagka-mortal, ang personal nga pagpadayag moabut “sa atong mga espiritu sa tukma ingon og kita walay mga lawas gayud” (Mga Pagtulun-an sa mga Presidente sa Simbahan: Joseph Smith [2007], 575).

  47. Russell M. Nelson, “Pagpadayag alang sa Simbahan, Pagpadayag alang sa Atong mga KinabuhiLiahona,Mayo 2018, 96.

  48. Mga Pagtulun-an sa mga Presidente sa Simbahan: Joseph Smith (2007), 154–155.

  49. Presidente Russell M. Nelson nga page sa Instagram, post gikan sa Mar. 22, 2019. Kini nga post nagpahibalo sa mga kausaban sa calendar sa seminary ug kurikulum sugod sa Enero 2020.

  50. Doktrina ug mga Pakigsaad 42:61.

  51. Doktrina ug mga Pakigsaad 50:27.