“Poupouʻi ʻa e kau akó ke nau ʻiloʻi ʻa e Fakamoʻuí ʻaki hono ako fakaʻaho ʻa e ongoongoleleí—taumuʻa ki he akó,” Fakatupulaki ʻa e Ngaahi Taukei ʻa e Faiakó: Fakaafeʻi ʻa e Ako Fakamātoató (2023)
“Poupouʻi ʻa e kau akó ke nau ʻiloʻi ʻa e Fakamoʻuí ʻaki hono ako fakaʻaho ʻa e ongoongoleleí—taumuʻa ki he akó,” Fakatupulaki ʻa e Ngaahi Taukei ʻa e Faiakó: Fakaafeʻi ʻa e Ako Fakamātoató
Ngaahi Tefitoʻi Moʻoni ʻo e Faiako Hangē ko Kalaisí: Fakaafeʻi ʻa e Ako Fakamātoató
Poupouʻi ʻa e kau akó ke nau ʻiloʻi ʻa e Fakamoʻuí ʻaki hono ako fakaʻaho ʻa e ongoongoleleí—taumuʻa ki he akó.
Pōtoʻi Ngāué
Tokoni ki he kau akó ʻi hono fokotuʻu ha taumuʻa ako folofola fakaʻaho.
Fakamatalaʻi
ʻI hono tokoniʻi ʻa e kau akó ke fakatupulaki ha ʻulungaanga ʻo hono ako fakaʻaho ʻo e folofolá, ʻe lava ai ʻe he ʻEikí ʻo akoʻi, fakamālohia, mo fakahinohinoʻi kinautolu ʻi he ngaahi founga ʻoku nau fiemaʻú. Te ke lava ʻo tokoniʻi ʻa e kau akó ʻaki hono tokoniʻi kinautolu ke fokotuʻu ha taumuʻa folofola fakaʻaho. ʻE lava ke fakahoko lelei ʻeni ʻaki hono tokoniʻi ʻa e kau akó ke:
-
Maʻu ha mahino ki he ngaahi tāpuaki kuo talaʻofa fekauʻaki mo e ako folofola fakaʻahó,
-
Faʻa lotu ʻi hono fokotuʻu ha taumuʻa ako folofola fakaʻaho,
-
Fili ʻa e taimi mo e feituʻu ke ako ai ʻa e folofolá ʻi he ʻaho takitaha, pea
-
Fili ha founga ako folofola ke fakaʻaongaʻi.
ʻE lava ke fakahoko ʻeni ʻi he kamataʻanga ʻo ha teemi pea toe vakaiʻi ʻo ka fiemaʻu ke tokoniʻi ʻa e kau akó ke hokohoko atu ʻenau fakalakalaká.
Fakatātaaʻi
Ko ha ngaahi sīpinga ʻeni ʻe niʻihi ʻo e founga te ke ala tokoniʻi ai ʻa e kau akó ke nau fokotuʻu ha ngaahi taumuʻa ako folofola fakaʻaho ʻi heʻenau feinga ke ako ʻa e tohi folofola ʻo e taʻu lolotongá ʻi he ʻaho takitaha:
-
Kole ki he kau akó ke nau fakakaukau ki he ngaahi tāpuaki kuo nau aʻusia ʻi hono ako fakaʻaho ʻo e folofolá.
-
Fakaafeʻi ʻa e kau akó ke nau fekumi ʻi he folofolá pe ngaahi lea ʻo e konifelenisi lahí ki ha ngaahi talaʻofa fekauʻaki mo e ngaahi tāpuaki ʻoku maʻu mei hono ako ʻa e folofola ʻa e ʻOtuá.
-
Fakamanatu ki he kau akó ke nau faʻa lotu ʻi hono fokotuʻu ha taumuʻa ako folofola fakaʻahó. ʻAi ke nau fekumi ki he fakahinohino ʻa e ʻEikí ʻi he meʻa ʻoku nau fiemaʻu lahi tahá mo e founga ʻoku nau ongoʻi te nau lava ʻo fakaleleiʻi ʻi heʻenau ngaahi ngāue kimuʻá ʻi he hokohoko atu ʻenau akó mo e fakalakalaká.
-
Tokoniʻi kinautolu ʻi hono fokotuʻu ha taumuʻa fakaʻaho ʻo e taimi mo e feituʻu ke ako aí ʻaki ʻenau fakakaukau ki heʻenau ngaahi ngāue fakaʻaho lolotongá. Fakaafeʻi kinautolu ke nau fakakaukau ki ha taimi mo ha feituʻu ki he ako fakaʻahó ʻa ia ʻe lava ke nau longomoʻui, ʻāʻā, mo tokanga taha aí.
-
Tokoniʻi ʻa e kau akó ke nau fili ʻa e founga te nau fie ako ai ʻa e tohi folofola ʻo e taʻu lolotongá. ʻAi ke nau fakakaukau ki ha ngaahi founga ako kehekehe. Fakaafeʻi kinautolu ke fokotuʻu ha taumuʻa pau, ʻo fakamanatu ange ʻe lava ke liliu mo fakafenāpasi ʻa e ngaahi taumuʻa ko ʻení ʻi heʻenau hoko atú.
Lomiʻi heni ke vakai ki ha vitiō ʻo e fakatātaaʻi ko ʻení.
Akoako
Fakaʻaongaʻi ha founga ʻe taha pe lahi ange ʻi he ngaahi founga ko ʻení ke fakatupulaki ʻaki hoʻo malava ke tokoniʻi ʻa e kau akó ke fokotuʻu ha ngaahi taumuʻa ako folofola fakaʻaho:
-
Toe vakaiʻi fakataautaha ha niʻihi ʻo e ngaahi tāpuaki kuo talaʻofa fekauʻaki mo hono ako fakaʻaho ʻo e folofolá. ʻE lava ke maʻu ʻeni ʻi he folofolá pe ʻi he ngaahi pōpoaki ʻo e ngaahi lea ʻo e konifelenisi lahí. Fili ha taha ʻo e ngaahi talaʻofa ko ʻení ke vahevahe mo e kau akó ʻi hoʻo palani ke fakaafeʻi kinautolu ke nau ʻiloʻi ʻiate kinautolu pē ʻa e ngaahi talaʻofa ʻi he lēsoni ka hokó.
-
Fakakaukau ki he founga te ke lava ʻo fakaafeʻi ai ʻa e kau akó ke nau faʻa lotu ʻi hono fokotuʻu ha taumuʻa ako folofola fakaʻahó. Hiki ha fehuʻi ʻe taha pe ua te ke ala fakahoko ki he kau akó ʻe tokoni ke nau fakaafeʻi ʻa e ʻEikí ki heʻenau fokotuʻu taumuʻá.
-
Akoako fakaafeʻi ʻa e kau akó ke nau fili ʻa e taimi mo e feituʻu ke ako fakaʻaho ai ʻa e folofolá. Hiki ha fehuʻi ʻe taha te ke lava ʻo fakahoko ki he kau akó ke nau fakakaukau ki ai ʻa ia ʻoku kau ai ʻa e taimi-tēpile fakaʻahó, longomoʻuí, mo hono taʻofi ʻo e ngaahi meʻa ʻokú ne tohoakiʻi ʻa e tokangá.
-
Akoako hono tokoniʻi ʻa e kau akó ke fili ha founga ako folofola ʻaki hono ʻoange ha ngaahi meʻa ke nau fili mei ai pea aleaʻi ʻa e ngaahi lelei ʻo e meʻa takitaha. Akoako fakatātaaʻi ha niʻihi ʻo e ngaahi founga ko ʻení maʻá e kau akó ke nau lava ʻo sio ki he founga te nau lava ʻo liliu ai ʻenau akó ke feau lelei taha ʻenau ngaahi fiemaʻú ʻi heʻenau feinga ke ako ʻi he ʻaho takitaha ʻa e tohi folofola ʻo e taʻu lolotongá.
Aleaʻi pe Fakalaulauloto
Fakalaulauloto ki he meʻa kuó ke ako mei he aʻusia ko ʻení. Mahalo te ke lava ʻo hiki ha niʻihi ʻo e ngaahi fakakaukau ko ʻení ʻi ha tohinoa ako. Fakakaukau ki he ngaahi fehuʻi ko ʻení:
-
Ko e hā kuó u fai kimuʻa ke tokoniʻi ʻa e kau akó ke fokotuʻu ha ngaahi taumuʻa ki he ako folofolá?
-
Ko e hā kuó u ako mei he aʻusia ko ʻení ʻe lava ʻo fakatupulaki ai ʻeku malava ke tokoniʻi kinautolu ke fokotuʻu ha ngaahi taumuʻa ako folofolá?
-
Te u lava fēfē ʻo tokoniʻi ʻeku kau akó ke tauhi pau ki heʻenau taumuʻa ako folofolá?
Fakakau
-
Vakaiʻi ʻi he faʻa lotu ho ngaahi fatongia fakakalasí lolotonga hoʻo fakakaukau ki he ngaahi sīpinga ʻi he konga fakatātaaʻi mo e akoako ʻi he ako ko ʻení. Fakakaukau pe ko e fē ngaahi sīpinga ʻe tokoni lelei taha ki hoʻo kau akó ke faʻu ha taumuʻa ako folofolá. Fakaʻaongaʻi ha taha ʻo e ngaahi sīpingá pe ko ha sīpinga pē ʻaʻau, kamata ʻaki ha kiʻi liliu siʻisiʻi ʻoku tokoni ke fakatupulaki ʻe hoʻo kau akó ha ʻulungaanga lelei ʻo e ako folofola fakaʻahó. Fokotuʻu ha taimi te ke lava ai ʻo toutou vakaiʻi pe ʻoku fēfē pea tokoni ke nau toe fakaleleiʻi ʻenau taumuʻá ʻo ka fiemaʻu.
Fie Ako Lahi Ange?
-
Richard G. Scott, “Ko e Mālohi ʻo e Folofolá,” Liahona, Nōvema 2011
-
David A. Bednar, “A Reservoir of Living Water” (Brigham Young University devotional, Feb. 4, 2007), speeches.byu.edu
-
“Daily Scripture Study and Goals,” Inservice Leaders’ Resources
Pōtoʻi Ngāué
Fakatupulaki pea ʻeke ha ngaahi fehuʻi ʻe tokoni ke fakafehokotaki ʻe he kau akó ʻa e meʻa kuo nau ako ʻi heʻenau ako folofola fakataautaha mo fakafāmilí ki he aʻusia ʻi loki akó.
Fakamatalaʻi
Ko e fakafehokotakí ko hono ʻomi pe fakatahaʻi ha meʻa ʻe ua. ʻI hono tokoniʻi ʻe he kau faiakó ʻa e kau akó ke fakafehokotaki ʻenau ako folofola ʻi ʻapí ki he loki akó, ʻoku nau ʻomi pe fakatahaʻi ai ʻa e ongo aʻusia ko ʻení. ʻOku lahi ha ngaahi founga ki hono fakahoko ʻení. Ko e founga ʻe taha ko hono fai ʻa e ngaahi fehuʻi ʻoku tali tauʻatāiná ʻa ia ʻoku (1) kau ai ʻa e ngaahi aʻusia fakataautaha pe fakafāmili ʻa e kau akó ʻi heʻenau ako folofola ʻi ʻapí, (2) vakaiʻi ʻa e founga ʻoku fakafehokotaki ai ʻa e ngaahi aʻusia ko iá ki he meʻa ʻoku nau ako ʻi he kalasí, pea (3) ʻoange ha taimi ke nau fakakaukauloto mo manatuʻi ai ʻa e meʻa ne nau ako ʻi ʻapí.
Te ke lava foki ʻo teuteu ha ngaahi fehuʻi fealēleaʻaki maʻá e kalasí ʻe tokoni ki he kau akó ke nau ʻave ʻa e meʻa ʻoku nau ako ʻi loki akó pea fakaʻaongaʻi ia ʻi ʻapi. ʻOku faitatau ʻa e ngaahi fehuʻi ko ʻení. ʻOkú ke fakaafeʻi ʻa e kau akó ke nau fakakaukau ki he ngaahi aʻusia fakaako ne nau maʻu ʻi he kalasí ʻi he ʻaho ko iá pea mo e founga ʻe lava ke nau ʻaonga ai ʻi ʻapí. ʻE lava ke tokoniʻi kitautolu ʻe he ngaahi fehuʻi ko ʻení ke tau fakatefito ange ʻi ʻapi pea poupouʻi ʻe he Siasí ʻi he loki akó pea teuteuʻi ʻa e kau akó ke nau maʻu ha ngaahi aʻusia fakaako lahi ange mavahe mei he loki akó.
Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.
Fakatātaaʻi
Ngaahi fehuʻi ʻoku fakafehokotaki ai ʻa e ako ʻi ʻapí ki he ngaahi aʻusia ʻi he loki akó:
-
Ko e hā kuó ke ako ʻi he kalasí ʻi he ʻahó ni ʻoku fakafehokotaki mo e meʻa ʻokú ke ako ʻi ʻapí?
-
Ko e hā naʻá ke ako mo ho fāmilí fekauʻaki mo Sīsū Kalaisi ʻi he uike ní?
-
Ko e hā ha ngaahi fehuʻi kuó ke maʻu ʻi hoʻomou aleaʻi ʻa e ngaahi potufolofola ko ʻení?
-
Ko e hā ʻa e meʻa ʻokú ke saiʻia taha ke ako ʻi hoʻo ako pe ako mo hoʻo fāmilí ʻi he ngaahi potufolofola ko ʻení?
Ngaahi fehuʻi ʻoku fakafehokotaki ai ʻa e ako ʻi he loki akó ki he ngaahi aʻusia ʻi ʻapí:
-
Ko e hā naʻá ke ako ʻi he ʻahó ni ʻe hoko ko ha tāpuaki kiate koe mo hoʻo fāmilí?
-
Kapau naʻá ke teuteu ha lēsoni miniti ʻe nima ʻi he ngaahi moʻoni ko ʻení, ko e hā te ke tokanga taha ki aí, pea ko e hā hono ʻuhingá?
-
Ko e hā ha ngaahi aʻusia naʻá ke maʻu ʻi he ʻahó ni ʻe ʻaonga ki hoʻo fāmilí? Ko e hā te ke liliu pe kehe hoʻo fakahokó ke feʻunga mo e ngaahi fiemaʻu hoʻo fāmilí?
Lomiʻi heni ke vakai ki ha vitiō ʻo e fakatātaaʻi ko ʻení.
Akoako
Akoako #1: Fakaʻaongaʻi ʻa e ngaahi sīpinga ʻi he fakatātaá (pe ko ha sīpinga pē ʻaʻau), fakapapauʻi ʻa e founga te ke fakafehokotaki ai ʻa e meʻa ʻoku aʻusia ʻe he kau akó ʻi heʻenau ako ʻi ʻapí ki he meʻa ʻoku nau aʻusia ʻi he kalasí ʻo makatuʻunga ʻi he ngaahi lēsoni fakatātā ko ʻení.
-
Ko e ngaahi lēsoni ʻo e uike ní ʻoku ʻi he Tokāteline mo e Ngaahi Fuakava 94–97.
-
Ko e ngaahi lēsoni ʻo e uike ní ʻoku ʻi he Tokāteline mo e Ngaahi Fuakava 121–23.
Akoako #2: Faʻu ha fehuʻi ke fakafehokotaki ʻa e meʻa ʻoku fai ʻe he kau akó ʻi loki akó ki heʻenau ngaahi aʻusia ʻi ʻapí, ʻo makatuʻunga ʻi he ngaahi lēsoni fakatātā ko ʻení.
-
Ko e ngaahi lēsoni ʻo e uike ní ʻoku ʻi he Tokāteline mo e Ngaahi Fuakava 129–32.
-
Ko e ngaahi lēsoni ʻo e uike ní ʻoku ʻi he Tokāteline mo e Ngaahi Fuakava 135–36.
Aleaʻi pe Fakalaulauloto
-
Ko e hā kuó ke ako fekauʻaki mo hono fakaafeʻi ʻo e ako fakamātoató ʻi he aʻusia ko ʻení?
-
Ko e hā ha ngaahi founga kehe kuó ke lava ai ʻo fakafehokotaki ʻa e meʻa ʻoku aʻusia ʻe he kau akó ʻi heʻenau ako ʻi ʻapí ki he meʻa ʻoku nau aʻusia ʻi he kalasí?
Fakakau
Tuku ha miniti ʻe tolu kimuʻa ʻi he kalasí ʻi he ʻaho takitaha ʻi he uike ʻe ua ka hokó ke ke sio ki he hingoa ʻo ha tokotaha ako ʻi hoʻo taliuí. ʻI hoʻo vakai ki hono hingoá, fakalaulauloto ki he meʻa te ne ala ako ʻi he ako fakataautaha mo fakafāmili ʻi ʻapí. Lolotonga ʻa e kalasí, ʻeke ki he kalasí pe ko e tokotaha ako ko iá ha taha ʻo e ngaahi fehuʻi kuó ke akoako fakahokó. Te ke lava foki ʻo hiki ʻa e meʻa ʻokú ke akó ʻi hoʻo fehuʻi mo fakafanongó.
Fie ako lahi ange?
-
Russell M. Nelson, “Lea Fakafeʻiloaki,” Liahona, Nōvema 2018, 6–8
-
Haʻu, ʻo Muimui ʻIate Au, ChurchofJesusChrist.org
-
Ngaahi Vitiō Akoʻí, ChurchofJesusChrist.org