Lēsoni 18 Naunau Teuteu ki he Kalasí: Ko e Hoko ʻo Hangē ko e Tamai Hēvaní mo Sīsū Kalaisí
“Lēsoni 18 Naunau Teuteu ki he Kalasí: Ko e Hoko ʻo Hangē ko e Tamai Hēvaní mo Sīsū Kalaisí,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 18 Naunau Teuteu ki he Kalasí,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 18 Naunau Teuteu ki he Kalasí
Ko e Hoko ʻo Hangē ko e Tamai Hēvaní mo Sīsū Kalaisí
ʻĪmisi
finemui ‘oku sio ki langi
Lolotonga ‘Ene ngāue fakafaifekau ki he kau Nīfaí mo e kau Leimaná, ne ʻeke ʻe Sīsū Kalaisi ki Heʻene kau ākonga ʻe toko hongofulu mā uá, “Ko e hā ʻa e anga ʻoku taau mo kimoutolú?” (3 Nīfai 27:27). Kapau ‘e ʻeke atu ʻe he ʻEikí ʻa e fehuʻi ko ʻení kiate koe, ko e hā hoʻo talí? Te ke lava fēfē ʻo aʻusia hoʻo malava kakató? ʻI hoʻo teuteu ki he kalasí, fakakaukau ki he founga ʻoku lava ai ʻe he ngaahi akonaki ʻa e Fakamoʻuí ʻo tokoniʻi koe ke tali ʻa e ngaahi fehuʻí ni. Fili ha me‘a pau te ke lava ʻo fai ke ke hoko lahi ange ‘o hangē ko Iá.
Konga 1
Te u lava nai ʻo haohaoa ʻo hangē ko e Tamai Hēvaní mo Sīsū Kalaisi?
ʻOku tau lau ʻi he Fuakava Foʻoú ki hono fakahoko ʻe Sīsū e Malanga ʻi he Moʻungá, ʻa ia ne kau ai e ngaahi akonaki naʻe mātuʻaki tokoni ki Heʻene kau ākongá ke nau hoko ʻo haohaoá (vakai, Mātiu 5–7). Hili ʻEne Toetuʻú, naʻe hā ʻa Sīsū ʻi he fonua ko Mahú ʻo fakahoko ai e malanga tatau (vakai, 3 Nīfai 12–14).
ʻI he ofi ke fakahoko ʻEne pōpoaki ki he kakaí, naʻe fakamoʻoni ʻa Sīsū ʻe monūʻia ʻa kinautolu ʻe “tokanga ki he ngaahi lea” ʻa ʻEne kau ākonga ʻe toko hongofulu mā ua ne filí (3 Nīfai 12:1). Naʻá Ne akoʻi ʻa e Ngaahi Monūʻiá, mo fakahā kuó Ne fakakakato e fono ʻa Mōsesé, mo tuku mai ʻa e fono māʻolunga ange ʻo e ongoongoleleí.
Lau ‘a e 3 Nīfai 12:19–20, 46–48, ʻo fekumi ki he meʻa te tau lava ʻo aʻusia ʻi heʻetau haʻu kia Kalaisi mo feinga ke moʻui ʻaki ʻEne fono māʻolunga angé.
Mahalo ʻe ʻi ai ha kakai ʻe niʻihi ʻe ongoʻi puputuʻu pe lomekina ʻi he fekau ʻa e Fakamoʻuí ke hoko ʻo haohaoá. ʻE ala tokoni ke ʻiloʻi mei he folofolá, ko e foʻi lea ko e haohaoá ʻoku lava ke ʻuhinga ia ko e “kakato, kātoa, mo e tupulaki kakato; māʻoniʻoni kakato” pea ko e “kakai muimui moʻoni kia Kalaisí te nau lava ʻo haohaoa ʻi Heʻene ʻaloʻofá mo e Fakaleleí” (Fakahinohino ki he Ngaahi Folofolá,” “Haohaoá,” scriptures.ChurchofJesusChrist.org).
ʻĪmisi
fakaʻilonga, ako
Ako ke Teuteu ki he Kalasí
Lau e Molonai 10:32–33, pea kumi ki he anga hono fie maʻu fakatouʻosi ʻe he haohaoá ʻetau ngāué mo e ʻaloʻofa ʻa e ʻEikí.
Ko e founga ʻe taha ki hono fakamatalaʻi ʻo e ʻaloʻofá: “Ko e tefitoʻi ʻuhinga ʻo e foʻi lea ʻaloʻofá, ʻo hangē ko hono fakaʻaongaʻi ʻi he folofolá, ʻoku fakatautefito ia ki he mālohi ke fakahoko mo e faitoʻo fakalaumālie ʻoku ʻomi ʻi he ʻaloʻofa mo e ʻofa ʻa Sīsū Kalaisí. … Ke maʻu ʻa e mālohi ko ʻení, kuo pau ke tau talangofua ki he ongoongolelei ʻo Sīsū Kalaisí. … Naʻe talaʻofa mai ʻe he ʻEikí kapau te tau fakavaivaiʻi kitautolu ʻi Hono ʻaó pea tui kiate Ia, ʻe tokoni ʻEne ʻaloʻofá ke tau ikunaʻi ʻetau ngaahi vaivai fakafoʻituitui kotoa pē (vakai, ʻEta 12:27)” (“ʻAloʻofá,” Ngaahi Tefito ʻo e Ongoongoleleí, topics.ChurchofJesusChrist.org).
Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
ʻEletā Sefilī R. Hōlani
Ko hotau ʻamanaki leleiʻanga pē ki ha haohaoa moʻoní, ko ʻetau maʻu ia ko ha meʻa-foaki mei he langí—ʻoku ʻikai ke tau lava ʻo “ngāueʻi” ia. Ko ia, ʻoku ʻikai ke ngata pē ʻi hono foaki mai ʻe he ʻaloʻofa ʻa Kalaisí ʻa e fakamoʻui mei he mamahí mo e angahalá pea mo e maté, ka ʻoku fakahaofi ai foki kitautolu mei heʻetau toutou fakaangaʻi pē kitautolú. …
… Kapau te tau vilitaki, ʻe toki fakaʻosi mo kakato hotau fakaleleiʻí, ʻi ha taimi he taʻengatá. …
… Ko ʻeku fakamoʻoní ia ʻi he momeniti ko ʻení, ʻoku mafao mai Hono toʻukupu ne kafo he faʻó, ʻi he ʻaloʻofa tatau pē, ke ʻōʻōfaki mo fakalotolahiʻi kitautolu kae ʻoua ke tau toe aʻu lelei ange ai ki ʻapi kiate Ia ki heʻetau Ongomātuʻa Fakalangí. (“Ko Ia Ke Haohaoa ʻA Kimoutolu,” Liahona, Nōvema 2017, 41, 42)
ʻĪmisi
fakaʻilonga, fakalaulauloto
Fakalaulauloto ke Teuteu ki he Kalasí
Ko e hā ʻene ʻuhinga kiate koe hoʻo ʻiloʻi ʻoku mafao mai ʻe Sīsū Kalaisi ʻEne ʻaloʻofá kiate koe mo teuteuʻi ha founga ke ke hangē ai ko Ia mo ʻEne Tamaí?
Konga 2
Ko e hā te u lava ʻo fai ke u hoko lahi ange ai ʻo hangē ko Sīsū Kalaisí?
ʻI he hokohoko atu hono akoʻi ʻe Sīsū ʻa e kau Nīfaí, naʻá Ne vahevahe ha ngaahi tefitoʻi moʻoni mahuʻinga fekauʻaki mo e anga e moʻui ʻo fakatatau ki he fono māʻolunga ange ʻo ʻEne ongoongoleleí. Naʻe pehē ʻe Palesiteni Hāloti B. Lī:
ʻĪmisi
Palesiteni Hāloti B. Lī
Naʻe ʻikai ke hāʻele mai ʻa Kalaisi ki he māmaní koeʻuhí pē ke fai ha fakalelei maʻá e ngaahi angahala ʻa e faʻahinga ʻo e tangatá ka ke tā ha sīpinga ʻo e tuʻunga haohaoa ʻo e fono ʻa e ʻOtuá pea mo e talangofua ki he Tamaí. ʻI he malanga ʻa e ʻEikí ʻi he Moʻungá, naʻá Ne tala mai ai kia kitautolu ʻi he fakahā ʻa hono ʻulungāngá, pea naʻe haohaoa ia, … pea ʻi Heʻene fai ʻení, naʻá Ne tuku mai ai ha founga ke tau moʻui ai. (Decisions for Successful Living [1973], 55–56).
ʻE tokoniʻi kitautolu takitaha ʻi he feinga ke moʻui ʻaki e ngaahi akonakí ni ke faifai pē pea tau hoko ʻo haohaoa ʻo hangē ko e Fakamoʻuí. Toe vakaiʻi nounou e lisi ko ʻeni ʻo e ngaahi tefito ʻoku fakamatalaʻi ʻi he 3 Nīfai 12–14, pea kumi ha tafaʻaki ʻe taha pe ua te ke loto ke tukutaha ai e tokangá.
Hili hono fili ho‘o tefitó pe ngaahi tefitó, ako fakalelei pea fakalaulauloto ki he ngaahi kupuʻi folofola ʻoku fekau‘aki mo iá. Ke toe lahi ange hoʻo mahino ki he tefitó, fakakaukau ke kumi hake e ngaahi potufolofola fakafekau‘aki ki he ngaahi veesi ʻokú ke akó.
Kumi ha tefitoʻi moʻoni ʻe taha pe lahi ange ʻoku akoʻi ʻi he potufolofolá pe ngaahi potufolofola naʻá ke laú ʻe lava ke ne tokoniʻi koe ke hoko lahi ange ʻo hangē ko e Fakamoʻuí. Lekooti hoʻo ngaahi ongó ʻi hoʻo fakakaukau ki he ngaahi fehuʻi ko ʻení:
ʻE tokoniʻi fēfē au ʻi hono moʻui ʻaki e tefitoʻi moʻoni ko ʻeni ʻi he potufolofolá ke u hoko lahi ange ai ʻo hangē ko Sīsū Kalaisí?
Naʻe fakahaaʻi fēfē ʻe Sīsū Kalaisi ʻa e tefitoʻi moʻoni ko ʻení?
Kuo tāpuekina fēfē ʻe he tefitoʻi moʻoni ko ʻení ʻeku moʻuí pe moʻui ʻa e niʻihi kehé?
Ko e hā te u lava ʻo fai ke fakaʻaongaʻi lelei ange ai e tefitoʻi moʻoni ko ʻení ʻi heʻeku moʻuí?