“Vahe 20: Ko Hono Fakafoki Mai ʻo e Ongoongolelei ʻo Sīsū Kalaisí,” Ngaahi Akonaki ʻa e Kau Palesiteni ʻo e Siasí: Lāsolo M. Nalesoni (2023)

“Vahe 20,” Ngaahi Akonakí: Lāsolo M. Nalesoni

Vahe 20

Ko Hono Fakafoki Mai ʻo e Ongoongolelei ʻo Sīsū Kalaisí

Mei he Moʻui ʻa Lāsolo M. Nalesoní

Naʻe teʻeki ai ke taʻu ʻe taha mei hono fakanofo ʻo Palesiteni Lāsolo M. Nalesoni ko e Palesiteni ʻo e Siasí, naʻá ne lea ʻi ha houalotu sākalamēniti ʻi Sōleki Tokelau, ʻIutā, USA. Naʻá ne pehē, “ʻOku ou fakamoʻoni ʻoku moʻui ʻa e ʻOtuá, ko Sīsū ʻa e Kalaisí, [pea] ko Hono Siasí ʻeni kuo fakafoki mai ʻi he ngaahi ʻaho kimui ní ki hono tānaki ʻo ʻIsilelí pea ke teuteuʻi ʻa e māmaní ki he Hāʻele ʻAnga Ua Mai ʻa e ʻEikí.”

ʻI ha pōpoaki nounou, naʻe nofotaha pē ʻa Palesiteni Nalesoni ʻi he ngaahi tāpuaki te tau lava ʻo maʻu koeʻuhí ko hono fakafoki mai ʻo e lakanga fakataulaʻeikí, ʻa ia naʻá ne ui ko e “taha ʻo e ngaahi fakaʻilonga” ʻo hono Fakafoki Mai ʻo e ongoongolelei ʻo Sīsū Kalaisí. Naʻá ne akonaki ʻo pehē:

“[ʻI he] ʻaho 15 ʻo Mē 1829 naʻe haʻu ai ʻa Sione Papitaiso. Pea ʻoku ou ʻamanaki pē ʻokú ke ʻiloʻi ʻa e hisitōlia hoʻo Tohi Tapú ke ʻiloʻi ʻa e meʻa naʻe hoko kia Sione Papitaisó. ʻI heʻene hoko ko ha tokotaha kuo toetuʻú, naʻá ne haʻu ʻo fakafoki mai ʻa e Lakanga Taulaʻeiki Faka-ʻĒloné. …

“Hili ha taimi nounou mei ai, naʻe haʻu ʻa Pita, Sēmisi, mo Sione—ko e kau ʻAposetolo ʻi he vaeuaʻangamālie ʻo taimí ʻo e ʻEiki ko Sīsū Kalaisí—ʻo fakafoki mai ʻa e Lakanga Taulaʻeiki Faka-Melekisētekí.

“Pea ʻi he ʻaho 3 ʻo ʻEpeleli 1836, naʻe haʻu ʻa Mōsese ke foaki ʻa e ngaahi kī ʻo hono tānaki fakataha ʻo ʻIsilelí. Pea hoko mai leva ʻa ʻIlaiase mo e ongoongolelei ʻo ʻĒpalahamé ke toe fakafoki mai ʻa e fuakava faka-ʻĒpalahame naʻe talaʻofa ʻe he ʻOtuá kia ʻĒpalahamé, pea toe fakahoko kia ʻAisake, [pea] toe fakapapauʻi kia Sēkope, pe ko ʻIsilelí. Pea naʻe haʻu leva ʻa ʻIlaisiā ko e palōfitá ke fakafoki mai ʻa e mafai faisilá, ʻa ia ʻe lava ke silaʻi ai kitautolu ʻi he temipalé pea silaʻi ai ʻetau fānaú kiate kitautolu ki taimi mo hono kotoa ʻo e nofo taʻengatá.

“ʻOkú ne fakahoko nai ha meʻa makehe ʻi he anga hoʻo moʻuí? ʻI heʻeku hoko ko ha tamaí, naʻá ku fakatokoto ha taha ʻo hoku ngaahi ʻofefiné ki he faʻitoká ʻi he uike kuo ʻosí. Ka [ʻoku ou] ʻiloʻi ʻoku kei moʻui hono laumālié pea ʻe ʻi ai e ʻaho hangē pē ko ʻeku tuʻu fakataha mo kimoutolu he ʻaho ní, te ma toe fakataha ʻo taʻengata ʻi he fiefia kakato ʻi he ʻao ʻo e ʻOtuá mo Sīsū Kalaisi mo e kau mēmipa kehe ʻo homau fāmilí, ʻo ʻikai hano ngataʻanga—kotoa ia koeʻuhí pē ko hono fakafoki mai ʻo e mafai ʻo e lakanga fakataulaʻeikí.”

Ngaahi Akonaki ʻa Lāsolo M. Nalesoní

ʻOku ʻomi ʻe hono Fakafoki Mai ʻo e Ongoongoleleí ha ʻilo mo ha ngaahi ouau mahuʻinga ki he hakeakiʻí

Hili e Toetuʻu ʻa e Fakamoʻuí pea mo e pekia ʻa e Kau ʻAposetoló, ne tūʻulu ʻa māmani ki ha ngaahi taʻu lahi ʻo e fakapoʻulí. Pea ʻi he taʻu 1820, ne hā ai ʻa e ʻOtua ko e Tamaí mo Hono ʻAlo ko Sīsū Kalaisí ki he Palōfita ko Siosefa Sāmitá ke kamata e Fakafoki mai e Siasi ʻo e ʻEikí.

14:15

Ko e peau ko ʻeni ʻo e moʻoní mo e māʻoniʻoní ʻoku fakaofo! ʻOku ʻikai faʻu ia ʻe he tangatá! ʻOku haʻu ia mei he ʻEikí, ʻa ia ne folofola ʻo pehē, “Te u fakavavevaveʻi ʻa ʻeku ngāué ʻi hono taimí” [Tokāteline mo e Ngaahi Fuakava 88:73]. ʻOku fakaivia ʻa e kaupeau ko ʻení ʻe ha fanongonongo fakalangi [ʻa ia] ʻoku ʻi ai ha foʻi lea pē ʻe [valu]: “Ko Hoku ʻAlo ʻOfaʻangá ʻEni. Fanongo kiate Ia!” [Siosefa Sāmita—Hisitōlia 1:17]. Naʻe folofola ʻaki ia ʻe he ʻOtua Māfimafí, naʻá Ne fakafeʻiloaki ʻa e talavou ko Siosefa Sāmitá ki he ʻEiki ko Sīsū Kalaisí. Naʻe kamata ʻe he ngaahi foʻi lea ko ia ʻe valú ʻa hono Toe Fakafoki Mai ʻo ʻEne ongoongoleleí. Ko e hā hono ʻuhingá? Koeʻuhí he ko hotau ʻOtua moʻuí ko ha ʻOtua ʻofa! ʻOkú Ne finangalo ke ʻilo ʻe Heʻene fānaú Ia mo Sīsū Kalaisi, ʻa ia naʻá Ne fekaú! Pea ʻokú Ne finangalo ke maʻu ʻe Heʻene fānaú ʻa e moʻui taʻe-faʻa-maté mo e moʻui taʻengatá! [vakai Mōsese 1:39].

Koeʻuhí ko e taumuʻa nāunauʻia ko ʻení, ʻoku akoʻi ai ʻe heʻetau kau faifekaú ʻa hono Fakafoki Mai ʻo e Ongoongoleleí. ʻOku nau ʻilo naʻe fokotuʻu ʻe he ʻEikí Hono Siasí he taʻu ʻe 2000 tupu kuo hilí. Hili Hono Tutukí pea pekia mo ʻEne kau ʻAposetoló, ne liliu ʻe he tangatá ʻa e Siasí mo hono tokāteliné. Pea, ʻi ha ʻosi ha ngaahi toʻu tangata ʻo e fakapoʻuli fakalaumālié, pea hangē ko hono kikiteʻi ʻe he kau palōfita kimuʻá, kuo fakafoki mai ʻe he Tamai Hēvaní mo Sīsū Kalaisi ʻa e Siasí, hono tokāteliné, mo hono mafai lakanga fakataulaʻeikí. Tuʻunga ʻi hono Fakafoki Mai ko ia ʻo e Ongoongoleleí, kuo toe ʻatā ai ki he kakai kotoa pē ʻa e ʻilo mo e ngaahi ouau mahuʻinga ki he fakamoʻuí pea mo e hakeakiʻí. Ko hono fakaʻosí, ʻoku fakaʻatā ʻe he hakeakiʻí kitautolu takitaha ke tau nofo mo hotau fāmilí ʻi he ʻao ʻo e ʻOtuá mo Sīsū Kalaisi ʻo lauikuonga!

He ʻikai ke u lava ʻo lea ki hono Toe Fakafoki Mai ʻo e Ongoongoleleí ʻi ha leʻo ongo vaivai. ʻOku fakaofo moʻoni e foʻi moʻoni ko ʻeni ʻo e hisitōliá! ʻOku taʻe-mafakakaukaua! ʻOku fakavaleloto! Hono ʻikai fakaofo ke haʻu ha kau talafekau mei he langí ke foaki ʻa e mafai mo e mālohi ki he ngāue ko ʻení?

Naʻe hā tuʻo lahi ʻetau Tamai Taʻengatá mo Sīsū Kalaisi ki he Palōfita ko Siosefa Sāmitá. Fakatatau mo ʻEna tuʻutuʻuní, ne omi mo ha kau talafekau fakalangi kehe, mo ha taumuʻa pau. Hangē ko ʻení:

Naʻe fakahaaʻi mai e Tohi ʻa Molomoná ʻe he ʻāngelo ko Molonaí.
Naʻe fakafoki mai ʻe Sione Papitaiso ʻa e Lakanga Taulaʻeiki Faka-ʻĒloné.
Naʻe fakafoki mai ʻe Pita, Sēmisi mo Sione ʻa e Lakanga Taulaʻeiki Faka-Melekisētekí.
Naʻe foaki mai ʻe Mōsese ʻa e ngaahi kī ʻo hono tānaki ʻo ʻIsilelí.
Naʻe foaki mai ʻe ʻĪlaiase ʻa e ngaahi kī ʻo e ʻilo kia ʻĒpalahamé.
Naʻe fakafoki mai ʻe ʻIlaisiā ʻa e ngaahi kī ʻo e mafai faisilá.

ʻIkai ngata aí, naʻe tānaki mai ʻe hono Fakafoki Mai ʻo e Ongoongoleleí ʻa e ʻilo naʻe maʻu ʻe he Kāingalotú he kuonga muʻá. Naʻe ʻomai ʻe he ʻEikí ha tohi folofola foʻou. Naʻá Ne tānaki ki he Tohi Tapú ʻa e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi. Ko ha lekooti ia ʻo e ngaahi kikite mo e ngāue fakalotu ʻa e ʻEiki toetuʻú ki he kakai ʻo ʻAmeliká he kuonga muʻá. ʻOkú ne fakamatalaʻi e palani lahi ʻa e ʻOtuá ki he fiefiá—ʻa e palani ʻo e fakamoʻuí [vakai, ʻAlamā 12:28–30]. ʻOku fenāpasi kakato ʻa e Tohi ʻa Molomoná mo e Tohi Tapú. ʻOku fakapapauʻi mai ʻe he ongo lekooti toputapú fakatouʻosi e moʻoni ʻo e ongoongolelei ʻo Sīsū Kalaisí mo hono mahuʻinga ʻo ʻEne Fakaleleí.

ʻOku fakahoko ʻe hono Fakafoki Mai ʻo e Ongoongoleleí ha ngaahi kikite lahi ʻi he tohi tapú. Hangē ko ʻení, naʻe kikiteʻi ʻe ʻĪsaia ʻe fokotuʻu ʻa e fale ʻo e ʻEikí ʻi he tumutumu ʻo e ngaahi moʻungá [vakai, ʻĪsaia 2:2]. Ko e hiki fononga ko ia ʻa e [Kāingalotu] paioniá ki he ʻotu-moʻunga he fakahihifo ʻo ʻAmeliká ko hano fakahoko kāfakafa ia ʻo e kikité ʻi he feilaulau mo e tui. Naʻe toe kikiteʻi foki ʻe ʻĪsaia ʻe fakahoko ʻe he ʻOtuá “ha ngāue fakaofo mo lahi” [ʻĪsaia 29:14]. ʻOku fakahoko ia he taimí ni ʻe he ngāue toputapu ʻo e fakautuutu e tokolahi ʻo ʻetau kau faifekaú.

Kuo fakafoki mai mo e ngaahi akonaki ʻo e Fuakava Motuʻá fekauʻaki mo e vahehongofulú. Ko hono olá, ʻoku tāpuekina ange ai ha kau totongi vahehongofulu tokolahi ange koeʻuhí ko ʻenau talangofuá. ʻOku fakamahino e fakamatala kau kia Melekisētekí ʻe he ngaahi folofola ʻo hono Fakafoki Mai ʻo e Ongoongoleleí. Ko e ngaahi kikite ko ia ʻe fakatahaʻi ʻa e vaʻakau ʻa Siosefá (ko e Tohi ʻa Molomoná) pea mo e vaʻakau ʻo Siutá (ko e Tohi Tapú) ʻi he toʻukupu ʻo e ʻOtuá kuo fakahoko ia he taimí ni [vakai, ʻIsikeli 37:16, 19; Tokāteline mo e Fuakava 27:5].

ʻOku toe fakamahino foki ʻe hono Fakafoki Mai ʻo e Ongoongoleleí ha ngaahi folofola ʻo e Fuakava Foʻoú. ʻOku mahino lelei ange he taimí ni ʻene fakamatala ki he papitaiso maʻá e pekiá [vakai, 1 Kolinitō 15:29; Tokāteline mo e Ngaahi Fuakava 128]. ʻOku fakahoko he taimí ni ʻa e ngaahi ouau fakafofonga maʻa ʻetau kau pekiá ʻi he … ngaahi temipale he funga ʻo e māmaní! ʻOku ʻikai ha toe founga ia ke foaki ai e fakamoʻuí ki heʻetau ngaahi kui kuo pekia ne teʻeki ha ʻilo ki he ongoongoleleí! Ko e mata-meʻa-hā-mai ko ia ʻa Sione Fakahā ki ha “ʻāngelo kehe ʻe taha ʻoku puna ʻi he loto langí, kuo ʻiate ia ʻa e ongoongolelei taʻengatá ke malanga ʻaki kiate kinautolu ʻoku nofo ʻi he māmaní,” naʻá ne kikiteʻi e misiona ʻo e ʻāngelo ko Molonaí mo e Tohi ʻa Molomoná. [Fakahā 14:6].

Ko e Tohi ʻa Molomoná ko e uho ia ʻo e Ongoongolelei kuo fakafoki maí. Naʻe hiki, fakatolonga, mo foaki ia ʻi he fakahinohino ʻa e ʻEikí. Naʻe liliu ia “ʻi he foaki mo e mālohi ʻo e ʻOtuá” [Tokāteline mo e Ngaahi Fuakava 135:3]. ʻOku ʻi he Tokāteline mo e Ngaahi Fuakavá ha ngaahi fakahā kehe naʻe fai ki he Palōfita ko Siosefa Sāmitá. Kuo tau maʻu ʻiate ia ha ngaahi peesi lahi ange ʻo e folofolá ʻo laka ange ʻi ha toe palōfita kehe. Kuo pau pē ko ha momeniti ʻo e fakaʻānaua lahi, heʻene tala ki he Kāingalotu ʻi Nāvū, ʻIlinoisí, “Kuo teʻeki te u fakahā atu kiate kimoutolu ʻoku ou haohaoa; ka ʻoku ʻikai ha hala ʻi he ngaahi fakahā kuó u akoʻí” [Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 603].

ʻOku ou fakafetaʻi ki he ʻOtuá mo Hono ʻAlo ko Sīsū Kalaisí, ʻi hono Fakafoki Mai ʻo e ongoongoleleí mo hono mālohí ke tekeʻi atu ʻaki ha peau kāfakafa ʻo e moʻoní mo e māʻoniʻoní ʻi he funga ʻo e māmaní.

Fehuʻi ke Akó

Ko e hā ha niʻihi ʻo e ngaahi moʻoni mo e ngaahi ouau kuo fakafoki mai kuo nau tokoniʻi lahi hoʻo moʻuí?

ʻOku teʻeki ai ke kakato ʻa hono Fakafoki Mai ʻo e Ongoongoleleí

ʻOku teʻeki ai ke kakato ʻa hono Fakafoki Mai ʻo e Ongoongoleleí. ʻOku kei toe lahi e meʻa ke faí. ʻE malanga ʻaki ʻa e ongoongoleleí ki he faʻahinga, puleʻanga, lea, mo e kakai kotoa pē. He ʻikai tokanga ki ai ha kakai tokolahi, ka ko kinautolu te nau tali iá te nau ʻiloʻi ʻoku moʻoni ia pea te nau fiefia ke muimui ki he ʻEikí.

Ko ia ai hokohoko atu hoʻo tui ki he ʻOtuá, mo fakatupulaki ha ʻilo ko Sīsū Kalaisi hotau Fakamoʻuí, [kuo] fakafoki mai Hono Siasí ʻi he ngaahi ʻaho kimui ní, [pea] ʻe hoko mai ha ngaahi meʻa maʻongoʻonga mo fakaofo lahi … ʻi he ngaahi puleʻanga kotoa pē ʻo e māmaní.

ʻOku tau fakamoʻoni ki he founga hono fakafoki mai ʻo e ongoongoleleí. … Kapau ʻokú ke pehē kuo kakato hono fakafoki mai ʻo e Siasí, ʻokú ke vakai pē ko e ki he kamataʻangá. ʻOku kei lahi fau ha ngaahi meʻa ke hoko mai. … Tatali ki he taʻu foʻoú. Pea mo e taʻu ka hoko maí. Folo hoʻomou foʻi ʻakau vaitaminí. Maʻu ha mohe feʻunga. He kuo pau ke fakafiefia ia.

Ko Hono Fakafoki Mai ʻo e ongoongoleleí ko ha ngāue ia ʻoku lolotonga fai. ʻI heʻetau hoko ko e kaungā-ngāue kotoa ʻi he ngāue ko iá, ʻoku fakatahaʻi ai hotau fatongiá ke tokoni ki hono tānaki ʻo ʻIsilelí mo teuteuʻi e kakai ʻo e māmaní ki he Hāʻele ʻAnga Ua Mai ʻa e ʻEikí. Ko e ngāue mahuʻinga taha pē ʻeni ʻi he māmaní.

Fehuʻi ke Akó

Kuó ke fakatokangaʻi fēfē ʻa e ʻaonga ki hoʻo moʻuí ʻa hono Fakafoki Mai ʻo e Ongoongoleleí?

Ko e tefitoʻi taumuʻa ʻo hono fakafoki mai ʻo e Siasí ke tokoniʻi kitautolu ke tau muimui ʻia Sīsū Kalaisi pea taau mo e moʻui taʻengatá

2:3

Siʻoku kāinga ʻofeina, kuo tau ongona ha meʻa lahi he ʻahó ni fekauʻaki mo e Fakafoki mai ʻo e Siasí—ʻa e Siasi naʻe fokotuʻu ʻe hotau Fakamoʻui ko Sīsū Kalaisí, lolotonga ʻEne ngāue ʻi māmaní. Naʻe kamata hono Fakafoki Mai ʻo e Ongoongoleleí [ʻi he 1820] ʻi he hā ʻa e ʻOtua ko e Tamaí mo Hono ʻAlo ko Sīsū Kalaisí ki he talavou ko Siosefa Sāmitá.

Hili e taʻu ʻe hongofulu mei he mata meʻa-hā-mai fakalangi ko ʻení, ne ui e Palōfita ko Siosefa Sāmitá mo ha toko nima kehe ko e fuofua kau mēmipa kinautolu ʻo e Siasi ʻo e ʻEikí kuo fakafoki maí.

Kuo tupu mei he kiʻi kulupu tokosiʻi ko ia naʻe fakatahataha mai ʻi he ʻaho 6 ʻo ʻEpeleli 1830, ha kautaha fakamāmani lahi kuo laka hake hono kāingalotú ʻi he toko 16 milioná. ʻOku ʻiloa e lelei kuo fakahoko ʻe he Siasí ni ʻi he funga ʻo e māmaní ke faitokonia siʻi faingataʻaʻia ʻo e tangatá mo hiki hake e faʻahinga ʻo e tangatá. Ka ko hono tefitoʻi taumuʻá ke tokoniʻi ʻa e houʻeiki tangatá, fafiné, mo e fānaú ke nau muimui ʻi he ʻEiki ko Sīsū Kalaisí, tauhi ʻEne ngaahi fekaú, pea taau mo e ngaahi tāpuaki maʻongoʻonga tahá—ʻa ia ko e moʻui taʻengata mo e ʻOtuá mo honau ngaahi ʻofaʻangá [vakai, Tokāteline mo e Ngaahi Fuakava 14:7].

ʻI heʻetau fakamanatua ko ia e meʻa naʻe kamata ʻi he 1820, ʻoku mahuʻinga ke manatuʻi neongo ʻoku tau fakaʻapaʻapaʻi ʻa Siosefa Sāmita ko ha palōfita ʻa e ʻOtuá, ka ʻoku ʻikai ko ha Siasi ʻeni ʻo Siosefa Sāmita, pe ko ha siasi ʻo Molomona. Ko e Siasi ʻeni ʻo Sīsū Kalaisí. Naʻá Ne fakamahinoʻi pau ʻa e hingoa ʻoku totonu ke ui ʻaki Hono Siasí: “He ʻe ui peheʻi ʻa hoku siasí ʻi he ngaahi ʻaho fakaʻosí, ʻio, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní” [Tokāteline mo e Ngaahi Fuakava 115:4].

2:3

Ko e hā ʻene ʻuhinga kiate koe ʻa e pehē kuo ʻosi fakafoki mai e ongoongolelei ʻo Sīsū Kalaisí ki māmaní?

ʻOku ʻuhinga ia ʻe lava ke silaʻi koe mo ho fāmilí ke taʻengata! ʻOku ʻuhinga ia, kuo ʻosi papitaiso koe ʻe ha taha kuó ne maʻu e mafai meia Sīsū Kalaisi mo ʻosi hilifakinima ko ha mēmipa ʻo Hono Siasí, pea te ke lava leva ʻo maʻu e takaua maʻu pē ʻo e Laumālie Māʻoniʻoní. Te Ne tataki mo maluʻi koe. ‘Oku ʻuhinga ia he ‘ikai teitei tuku ke ke tuenoa, pe ‘ikai maʻu e mālohi ‘o e ʻOtuá ke tokoni atu. ʻOku ʻuhinga ia ‘e lava ke tāpuekina koe ʻe he mālohi ‘o e lakanga fakataulaʻeikí ‘i haʻo ma‘u e ngaahi ouau mahu‘ingá mo fai e ngaahi fuakava mo e ʻOtuá mo tauhi kinautolú. ʻOku hoko e ngaahi moʻoni ko ʻení ko ha fakamaʻunga ki hotau laumālié, tautautefito ki he taimi ko ʻeni ʻoku taulōfuʻu ai e faingataʻá.

Ngaahi Fehuʻi ke Akó

ʻOkú ke pehē ko e hā ʻoku mahuʻinga ai ke ʻi ai ha Siasi kuo fokotuʻutuʻu lelei ʻi he māmaní he ʻahó ni? Naʻe mei kehe fēfē nai hoʻo moʻuí, kapau naʻe ʻikai ke ʻi ai ʻa e Siasi ʻo Sīsū Kalaisi kuo fakafoki maí?

Ko ha fanongonongo: “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí”

2:3

ʻI heʻetau nofo ʻamanaki ki he taʻu 200 ko ʻeni ʻo e ʻUluaki Mata-meʻa-hā-mai ʻa Siosefa Sāmitá, ne fifili e Kau Palesitenisī ʻUluakí mo e Fakataha Alēlea ʻo e Kau ʻAposetolo ʻe Toko Hongofulu Mā Uá ki ha meʻa ke tau fai ke fakamanatua lelei ʻaki e meʻá ni.

Naʻe kamata ʻe he meʻa kilukilua ko iá hono Fakafoki Mai e kakato ʻo e ongoongolelei ʻo Sīsū Kalaisí mo kamataʻi e kuonga fakakosipeli ʻo e kakato ʻo e ngaahi kuongá.

Ne mau fifili pe ʻoku totonu ke toe fokotuʻu ha maka fakamanatu. Ka ʻi heʻemau fakakaukau ki he meʻa fakahisitōlia makehé ni mo hono [mahuʻinga] fakavahaʻa-puleʻanga ʻo e ʻUluaki Mata-Meʻa-Hā-Maí, naʻa mau ongoʻi ke fokotuʻu ha maka fakamanatu [ʻo ʻikai] kalānite pe maka [ka ko] ha fakalea—fakalea molumalu mo toputapu—ʻe hiki, kae ʻikai tongitongi ʻi ha “maka lafalafa” ka ʻi he “kakano” ʻo e lotó [2 Kolinitō 3:3].

Talu hono fokotuʻu ʻo e Siasí, ko e fanongonongo pē ʻe nima kuo tuku atú, pea ko e fakamuimuitahá “Ko e Fāmilí: Ko ha Fanongonongo ki Māmani,” ne fai ʻe Palesiteni Kōtoni B. Hingikelī ʻi he 1995.

ʻI heʻetau fakakaukauʻi e kuonga mahuʻinga ko ʻeni ʻi he hisitōlia ʻo māmaní mo e tukupā ʻa e ʻEikí ke tau tānaki ʻa ʻIsileli kuo fakamoveteveté ko e teuteu ki he Hāʻele ʻAnga Ua Mai ʻa Sīsū Kalaisí, ʻoku mau tuku atu ai ʻe kimautolu ko e Kau Palesitenisī ʻUluakí mo e Fakataha Alēlea ʻo e Kau ʻAposetolo ʻe Toko Hongofulu Mā Uá, ʻa e fanongongó ni. ʻOku ui ia “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ki Māmani ʻo e Taʻu Uangeaú.” Naʻe fatu ia ʻe he Kau Palesitenisī ʻUluakí pea mo e Fakataha Alēlea ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e ʻahó ko ‘Epeleli 2020. Naʻá ku tomuʻa lekooti e fanongonongó ni, ʻi he Vaoʻakau Tapú, ʻi heʻeku teuteu ki he ʻaho ní, ʻa ia naʻe ʻuluaki mamata ai ʻa Siosefa ki he Tamaí mo e ʻAló.

2:3

“ʻOku mau fakahā ʻi he loto māluʻia ʻoku ʻofa ʻa e ʻOtuá ʻi Heʻene fānaú ʻi he puleʻanga kotoa pē ʻi he māmaní. Kuo foaki mai ʻe he ʻOtua ko e Tamaí ʻa e fanauʻi fakalangí, ʻa e moʻui taʻe-mafakatatauá, mo e feilaulau fakaleleítaʻefakangatangata ʻa Hono ʻAlo ʻOfaʻanga ko Sīsū Kalaisí. Naʻe toe tuʻu ʻa Sīsū mo ikunaʻi ʻa e maté ʻaki e mālohi ʻo e Tamaí. Ko Ia hotau Fakamoʻuí, hotau Faʻifaʻitakiʻangá, pea mo hotau Huhuʻí.

“ʻI ha pongipongi fakaʻofoʻofa ʻi he taʻu ʻe uangeau kuo hilí, ʻi he faʻahitaʻu failau ʻo e 1820, naʻe fononga ai ʻa e talavou ko Siosefa Sāmitá ʻi heʻene fekumi ke ʻilo pe ko e fē e siasi ke kau ki aí, ʻo lotu ʻi he vaoʻakau ofi mai ki hono ʻapí ʻi he fakatokelau ʻo Niu ʻIoke, USA. Naʻe ʻi ai haʻane ngaahi fehuʻi fekauʻaki mo e fakamoʻui ʻo hono laumālié pea naʻá ne falala ʻe fakahinohinoʻi ia ʻe he ʻOtuá.

“ʻOku mau fakahā ʻi he loto-fakatōkilalo, ko e tali ki he lotu ʻa Siosefá, naʻe hā mai ai kiate ia ʻa e ʻOtua ko e Tamaí mo Hono ʻAlo ko Sīsū Kalaisí, pea naʻe kamata ai e ʻ[fakafoki] ʻo e meʻa kotoa pē’ (Ngāue 3:21) ʻo hangē ko ia ne tomuʻa kikiteʻi ʻi he Tohi Tapú. ʻI he mata meʻa-hā-mai ko ʻení, naʻá ne ako ai ne hili e pekia ʻa e fuofua kau ʻAposetoló, naʻe mole mei he māmaní ʻa e Siasi ʻo Kalaisi ʻi he Fuakava Foʻoú. ʻE hoko ʻa Siosefa ko ha konga mahuʻinga ʻo hono fakafoki maí.

“ʻOku mau fakamoʻoniʻi naʻe omi ha kau talafekau fakalangi ‘o fakatatau ki he fakahinohino ʻa e Tamaí mo e ʻAló, ʻo fakahinohinoʻi ʻa Siosefa mo toe fokotuʻu e Siasi ʻo Sīsū Kalaisí. Naʻe fakafoki mai ʻe Sione Papitaiso kuo toetuʻú ʻa e mafai ke papitaiso ʻi he fakauku ke fakamolemoleʻi ‘a e ngaahi angahalá. Naʻe hanga ʻe ha toko tolu ʻi he fuofua kau ʻAposetolo ʻe toko hongofulu mā uá—Pita, Sēmisi, mo Sione—ʻo fakafoki mai e tuʻunga fakaeʻaposetolo mo e ngaahi kī ʻo e mafai lakanga fakataulaʻeikí. Naʻe ō mai foki mo ha niʻihi kehe, ʻo kau ai ʻa ʻIlaisiā, ʻa ia naʻá ne fakafoki mai e mafai ke fakatahaʻi e ngaahi fāmilí ke taʻengata ʻi ha ngaahi vā fetuʻutaki taʻengata ʻoku ope atu ʻi he maté.

“ʻOku mau fakamoʻoni foki naʻe foaki kia Siosefa Sāmita ʻa e meʻafoaki mo e mālohi ʻo e ʻOtuá ke liliu ha lekooti fakakuongamuʻa: ko e Tohi ʻa Molomoná—Ko ha Fakamoʻoni ʻe Taha ʻo Sīsū Kalaisi. ʻOku fakakau ʻi he ngaahi peesi ʻo e fakamatala toputapú ni ha fakamatala ki he ngāue fakafaifekau fakataautaha ʻa Sīsū Kalaisí ʻi he lotolotonga ‘o e kakai ʻi he Hemisifia Hihifó, hili pē ʻEne Toetuʻú. ʻOku akoʻi ai e taumuʻa ʻo e moʻuí mo fakamatalaʻi e tokāteline ʻo Kalaisí, ʻa ia ʻoku fakatefito ai e taumuʻa ko iá. ʻI heʻene hoko ko ha folofola tokoni ki he Tohi Tapú, ʻoku fakamoʻoni ʻa e Tohi ʻa Molomoná ko e faʻahinga kotoa pē ʻo e tangatá ko ha ngaahi foha mo e ngaahi ʻofefine kinautolu ʻo ha Tamai ʻi Hēvani ʻofa, ʻoku ʻi ai Haʻane palani fakalangi ki heʻetau moʻuí, pea ʻoku folofola mai foki Hono ʻAlo ko Sīsū Kalaisí ʻi he kuongá ni ʻo hangē ko ia ʻi he kuongamuʻá.

“ʻOku mau fakahā ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia naʻe fokotuʻu ʻi he ʻaho 6 ʻo ʻEpeleli 1830, ko hono fakafoki mai ia ʻo e Siasi ʻo Kalaisi ʻi he Fuakava Foʻoú. ʻOku fakavaʻe ʻa e Siasí ni ʻi he moʻui haohaoa ʻo hono fungani makatulikí, ʻa Sīsū Kalaisi mo ʻEne Fakalelei taʻefakangatangatá mo e Toetuʻu moʻoní. Kuo toe ui ‘e Sīsū Kalaisi ha kau ‘Aposetolo mo foaki kiate kinautolu e mafai ʻo e lakanga fakataulaʻeikí. ʻOkú Ne fakaafeʻi kitautolu kotoa ke haʻu kiate Ia mo Hono Siasí, ke maʻu e Laumālie Māʻoniʻoní, ngaahi ouau ʻo e fakamoʻuí, mo maʻu e fiefia ʻoku tuʻuloá.

“Kuo ʻosi ʻeni ha taʻu ʻe uangeau talu mei hono kamataʻi ʻe he ʻOtua ko e Tamaí mo Hono ʻAlo ʻOfaʻanga ko Sīsū Kalaisí ʻa e Fakafoki Mai ko ʻeni ʻo e ongoongoleleí. Kuo tali ʻe he lauimiliona ʻi he funga ʻo e māmaní ʻa e ʻilo ki he ngaahi meʻa ko ʻeni ne kikiteʻi ʻe hokó.

“ʻOku mau fakahā loto-fiefia ʻoku laka ki muʻa hono Fakafoki Mai ʻo e Ongoongolelei ne talaʻofa maí, ʻi he hokohoko atu hono maʻu ʻo e fakahaá. He ʻikai ke toe tatau ʻa e māmaní, he ʻe hanga ʻe he ʻOtuá ʻo ‘[tānaki] fakataha ʻa e meʻa kotoa pē ʻia Kalaisi’ (ʻEfesō 1:10).

“ʻI he loto-ʻapasia mo e loto-houngaʻia, pea ʻi heʻemau hoko ko ʻEne kau ʻAposetoló, ʻoku mau fakaafeʻi ʻa e kakai kotoa pē ke nau ʻilo—ʻo hangē ko ia ʻoku mau ʻiló—ʻoku fakaava mai ʻa e ngaahi langí. ʻOku mau fakamoʻoniʻi ʻoku fakahā mai ʻe he ʻOtuá Hono finangaló ki Hono ngaahi foha mo e ngaahi ʻofefine ʻofeiná. ʻOku mau fakamoʻoni ko kinautolu ʻoku nau ako ʻi he faʻa lotu ʻa e pōpoaki ʻo hono Fakafoki Mai ʻo e ongoongoleleí pea ngāue ʻi he tuí, ʻe tāpuekina kinautolu ke nau maʻu haʻanau fakamoʻoni ki hono fakalangí pea ki hono taumuʻá ke teuteuʻi ʻa e māmaní ki he talaʻofa ʻo e Hāʻele ʻAnga Ua Mai ʻa hotau ʻEiki mo e Fakamoʻui ko Sīsū Kalaisí.”

Siʻoku kāinga ʻofeina, ko ʻetau fanongonongo ʻeni ʻo e taʻu uangeaú ki māmani fekauʻaki mo hono Fakafoki Mai ʻo e ongoongolelei ʻo Sīsū Kalaisí ʻi hono tuʻunga kakató. … Ako fakafoʻituitui ia pea mo e kau mēmipa ho fāmilí mo e ngaahi kaungāmeʻá. Fakalaulauloto ki he ngaahi moʻoní pea fakakaukau ki he ʻaonga ʻo e ngaahi moʻoni ko iá ki hoʻomou moʻuí kapau te mou fanongo ki ai, tokanga ki ai, mo talangofua ki he ngaahi fekau mo e ngaahi fuakava ʻoku haʻu fakataha mo iá.

ʻOku tau moʻui ʻi he taimi makehe mo fakafiefia ko ʻeni ʻoku kei hokohoko atu ai hono Fakafoki Mai ʻo e Ongoongolelei ʻo Sīsū Kalaisí. ʻOku ou poupouʻi kimoutolu takitaha ke mou ako, fakalaulauloto, mo faiako mei he fanongonongo ʻo e taʻu uangeau hono Fakafoki Mai ʻo e Ongoongoleleí, ʻa ia naʻe fakafeʻiloaki mai ʻi he konifelenisi lahi ʻo ʻEpeleli 2020. … ʻOku maʻu ha mālohi ʻi hono ngaahi leá. ʻOkú ne fakahā ʻa e ngaahi moʻoni fekauʻaki mo e Toluʻi ʻOtuá, Fakalelei ʻa Sīsū Kalaisí, ʻUluaki Mata Meʻa-Hā-Maí, ko hono fokotuʻu ʻo e Siasi ʻo e ʻEikí, ko hono fakafoki mai ʻo e mafai ʻo e lakanga fakataulaʻeikí, ko hono ʻomi ʻo e Tohi ʻa Molomoná, mo e kau palōfita ʻo onopōní.

Ngaahi Fehuʻi ke Akó

Ko e fē ʻa e ngaahi moʻoni ʻi he fanongonongo ki hono Fakafoki Mai ʻo e Ongoongoleleí ʻoku mahuʻingamālie taha kiate koé? Ko e hā hono ʻuhingá?

Ngaahi Fakaafé mo e Ngaahi Talaʻofá

Fakatupulaki ha ʻilo ki hono Fakafoki Mai ʻo e Ongoongoleleí

Hokohoko atu hoʻo tui ki he ʻOtuá, mo fakatupulaki ha ʻilo ko Sīsū Kalaisi hotau Fakamoʻuí, [kuo] fakafoki mai Hono Siasí ʻi he ngaahi ʻaho kimui ní, [pea] ʻe hoko mai ha ngaahi meʻa maʻongoʻonga mo fakaofo lahi … ʻi he ngaahi puleʻanga kotoa pē ʻo e māmaní.

Ako, fakalaulauloto, mo faiako mei he fanongonongo ʻo e taʻu uangeau hono Fakafoki Mai ʻo e Ongoongoleleí

ʻOku ou poupouʻi kimoutolu takitaha ke mou ako, fakalaulauloto, mo faiako mei he fanongonongo ʻo e taʻu uangeau hono Fakafoki Mai ʻo e Ongoongoleleí, ʻa ia naʻe fakafeʻiloaki mai ʻi he konifelenisi lahi ʻo ʻEpeleli 2020. … ʻOku maʻu ha mālohi ʻi hono ngaahi leá. ʻOkú ne fakahā ʻa e ngaahi moʻoni fekauʻaki mo e Toluʻi ʻOtuá, Fakalelei ʻa Sīsū Kalaisí, ʻUluaki Mata Meʻa-Hā-Maí, ko hono fokotuʻu ʻo e Siasi ʻo e ʻEikí, ko hono fakafoki mai ʻo e mafai ʻo e lakanga fakataulaʻeikí, ko hono ʻomi ʻo e Tohi ʻa Molomoná, mo e kau palōfita ʻo onopōní.