Vahe 20
Ko e Kakai Fefine ʻo e Siasí
ʻOku hoko ʻa e kakai fefine anga māʻoniʻoni ʻoku nau fua e ngaahi fatongia kāfakafa kuo tuku kiate kinautolu ʻe he ʻOtuá, ko ha monūʻiaʻanga ki honau ngaahi fāmilí, ki he Siasí, pea ki māmani.
Mei he Moʻui ʻa Sipenisā W. Kimipoló
Naʻe tohi ʻe Palesiteni Sipenisā W. Kimipolo ʻo ne pehē, “ ʻOku ou fakatumutumu ʻi he moʻui faitotonu ʻa ha toko lahi ʻo hotau kakai fefiné pea mo ʻenau mateakiʻi taʻe toe ufi ʻa e ngāue ʻo e māʻoniʻoní.” Hili ko iá naʻá ne fai leva e fakamatala ko ʻení:
“ ʻOku hā ʻi he tohinoa ʻa ʻeku faʻē fakaʻofoʻofá ʻa ʻene fakamālō ʻi he kotoa ʻo ʻene moʻuí ki he faingamālie naʻá ne maʻu ke tokoni aí ka naʻá ne ongoʻi ʻa e ʻikai ke ne lava ʻo fai ha meʻa lahi ange aí. Naʻá ku malimali ʻi heʻeku toki lau ki muí ni mai ha fakamatala naʻá ne hiki ʻi he ʻaho 16 ʻo Sānuali 1900. Naʻe lolotonga hoko ko e tokoni ʻuluaki ʻi heʻemau Fineʻofá ʻi Tetisā ʻi ʻAlesona, pea naʻe ō e kau palesitenisií ki ha ʻapi ʻo ha fefine naʻe puke ʻene kiʻi pēpeé ʻo ʻikai toe lava ai ʻa e faʻeé ʻo fai ʻene tuituí. Naʻe ʻalu ʻeku faʻeé mo ʻene mīsini tuituí, meʻakai hoʻataá, ʻene kiʻi pēpē ʻaʻaná, kiʻi sea māʻolunga maʻá e pēpeé, peá na kamata ngāue leva. Ko e meʻa ʻeni naʻá ne hiki he pō ko iá, ʻnaʻá ma tuitui ha ʻēpani ʻe fā, talausese ʻe ua pea kamata tuitui mo ha sote maʻá e taha ʻo e fānau tangatá.’ Naʻe pau ke tuku ʻena ngāué he taimi 4 efiafí kae ʻalu ki ha meʻafakaʻeiki naʻe fai, ko ia ‘ko e meʻa pē ia naʻe lava ke ma tuituí.’ Ne u fakaʻofoʻofaʻia pē au he ngāue kuo lavá, ka he ʻikai te u pehē, ‘Ko ha fuʻu meʻa lahi naʻe lavá.’
“Hili ha ʻaho ʻe ua mei ai, naʻe fakataha mai e Fineʻofá ʻo fai ʻenau ʻaho ngāué ʻi homau ʻapí. Naʻe tohi ʻe heʻeku faʻeé ʻo pehē, ‘Naʻe toko lahi ʻa e maʻu ʻaho ngāué pea naʻa mau lavaʻi ha meʻa lahi.’ ʻI he hili pē ʻo e ʻaho ngāué, naʻe ʻalu leva ki he fakataha poaté taʻe ʻi ai ha lāunga ʻe taha.
“Ko e faʻahinga ʻapi ia naʻe fāʻeleʻi mai au ki aí, ko ha ʻapi naʻe tataki ʻe ha fefine naʻe tokoni ʻi he ngaahi ngāue kotoa pē naʻá ne fakahokó. Ko e faʻahinga ʻapi pehē naʻe ngaohi ʻe hoku uaifí. Ko e faʻahinga ʻapi ia ʻoku ngaohi ʻe he kakai fefine fakaʻofoʻofa ʻe toko laumano ʻi he feituʻu kotoa pē ʻoku ʻi ai e Siasí.”1
Naʻe akonaki ʻaki ʻe Palesiteni Kimipolo hono mahuʻinga ʻo e kakai fefine anga māʻoniʻoni kotoa pē ʻi he palani ʻa e Tamai Hēvaní maʻa ʻEne fānaú. Naʻá ne pehē: “ ʻE ʻi ai e ʻaho ʻe fakamatalaʻi kakato ai ʻa e talanoa kau ki he toʻu tangatá ni pea mo e ngaahi toʻu tangata ki muʻá, pea ʻe fonu ia ʻi ha ngaahi talanoa ki he lototoʻa ʻa hotau kakai fefiné, ʻa ʻenau anga fakapotopotó mo e moʻui mateakí, ʻenau lototoʻá, he ʻoku lava pē ʻe ha taha ke ne ongoʻi, ʻo hangē ko ia ko e kau fefine ne nau ʻuluaki aʻu ki he telioʻanga ʻo e ʻEiki ko Sīsū Kalaisí he hili ʻEne toetuʻú, ʻoku pehē pē ʻa e faʻa ongoʻingofua ange ʻe hotau kakai fefine anga māʻoniʻoní ʻa e ngaahi meʻa ko ē ʻoku felāveʻi mo e taʻengatá.”2
Ngaahi Akonaki ʻa Sipenisā W. Kimipoló
Kuo ʻoange ha ngaahi fatongia kehekehe ki he kakai fefiné mo e kakai tangatá, ka te nau ngāue fakataha ko ha hoa ngāue tuʻunga tatau mo fefakaʻapaʻapa ʻaki.
Kuo akonekina mahino kitautolu ʻe he folofolá mo e kau palōfitá ʻoku haohaoa ʻa e ʻOtuá ʻi Heʻene fakamaau totonú, he “ ʻoku ʻikai [te Ne] filifilimānako ki he kakaí” (Ngāue 10:34). … Naʻa tau tuʻunga tatau pē he ko ʻEne fānau fakalaumālie ʻa kitautolu. ʻOku tau maʻu tatau pē ʻa e ʻofa haohaoa ʻa e ʻOtuá maʻatautolu taki taha. Naʻe tohi ʻe ʻEletā Sione A. Uitisou kuo mamaʻó ʻo pehē:
“Ko e tuʻunga ʻo e fefiné ʻi he Siasí ke ne ʻaʻeva ʻi he tafaʻaki ʻo e tangatá, ʻo ʻikai ʻi muʻa ʻiate ia pe ʻi hono tuʻá. ʻI he Siasí, ʻoku tuʻunga tatau kakato pē ʻa e tangatá mo e fefiné. Naʻe faʻu ʻe he ʻEikí ʻa e ongoongoleleí. … maʻá e kakai tangatá mo e kakai fefiné fakatouʻosi” (Improvement Era Māʻasi 1942, p. 161).
Neongo ʻa e ngaahi meʻa pau ko ʻení, ʻoku kehekehe pē hotau ngaahi fatongiá mo e ngaahi ngāue ʻoku tuku mai ke tau fakahokó. Ko ha ngaahi faikehekehe ʻeni ʻoku taʻengata—he ʻoku foaki ki he kakai fefiné ha ngaahi fatongia lahi ʻo e hoko ko e faʻē mo e tuofefiné pea foaki ki he kakai tangatá ʻa e ngaahi fatongia lahi ʻo e hoko ko e tamaí mo e ngaahi fatongia ʻo e lakanga fakataulaʻeikí—ka ʻoku ʻikai ʻi ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí (vakai, 1 Kolinitō 11:11). ʻOku fakatou hoko ʻa e tangata mo e fefine anga māʻoniʻoní ko ha tāpuaki kiate kinautolu kotoa pē ʻoku nau fetuʻutakí.
Manatuʻi, naʻe foaki ki he kakai fefine angatonú ʻi he maama ki muʻa pea tau toki omi ki hení ha ngaahi ngāue pau pea ʻi he taimi tatau naʻe tomuʻa fakanofo ʻa e kakai tangata angatonú ki ha ngaahi ngāue pau ʻi he lakanga fakataulaʻeikí. Neongo ʻoku ʻikai ke tau manatuʻi hono ngaahi fakaikiikí he taimí ni, ka ʻoku ʻikai ke ne fetongi ai e moʻoni nāunauʻia ʻo e meʻa ne tau aleapau te fakahokó.3
ʻOku tau fanongo he taimi ʻe niʻihi ki ha ngaahi fakamatala taʻe fakafiemālie fekauʻaki mo e ngaahi meʻa ʻoku fai ki he kakai fefiné. Ngaahi tokoua, mahalo ʻoku hoko ʻení ko e tupu ia mei he taʻe ongoʻi mo e taʻe fakakaukau, ka ʻoku ʻikai totonu ke hoko. ʻOku ʻi ai e ngāue ʻa e kakai fefine ʻo e Siasí ni ke fakahoko, pea neongo ʻoku faikehekehe ia mei he ngāue ʻoku tau faí, ka ʻoku nau mahuʻinga tatau pē. Ko hono moʻoní, ʻoku tatau pē ʻa ʻenau ngāué mo e ngāue ʻoku kole mai ke tau faí—neongo ʻe kehekehe ʻa hotau ngaahi fatongiá mo e ngaahi ngāue ʻoku vahe mai ke tau fakahokó. …
ʻOku ʻikai fie maʻu ʻe hotau kakai fefiné ke fakaʻaongaʻi halaʻi pe siolalo kiate kinautolu; ʻoku nau fakaʻamu ke fakaʻapaʻapaʻi mo ongoʻi māluʻia kinautolu ko hotau ngaahi tuofāfine mo hotau tatau. ʻE hoku ngaahi tokoua, ʻoku ou lea ʻaki ʻa e ngaahi meʻá ni kātoa ʻo ʻikai ko e pehē ʻoku ʻi ai ha fakaveiveiua kau ki he ngaahi tokāteline pe ngaahi akonaki ʻo e Siasí fekauʻaki mo e kakai fefiné, ka koeʻuhí he ʻoku ʻi ai e taimi ʻoku ʻikai fakapapauʻi ai pe ʻoku taau koā hotau ʻulungaangá pe ʻikai.4
Ko e Fineʻofá ko e houalotu ia ʻa e ʻEikí maʻá e kakai fefiné. ʻOkú ne fakakakato ʻe ia ʻa e ako ʻoku fai ʻe he lakanga fakataulaʻeikí ki he houʻeiki tangatá. ʻOku ʻi ai ha mālohi ʻi he houalotu ko ʻení kuo teʻeki ai fakaʻaongaʻi kakato ke fakamālohia e ngaahi ʻapi ʻo Saioné mo langa hake ʻa e Puleʻanga ʻo e ʻOtuá. …
… Kuo hanga ʻe heʻetau Tamaí ʻi Heʻene fakapotopotó mo ʻEne ʻaloʻofá ʻo ngaohi ʻa e tangatá mo e fefiné ke na fefakafalalaʻaki ʻo fakatupulaki kakato ai ʻa e ngaahi meʻa te na lava ke fakahokó. Koeʻuhí ko e kehekehe hona natulá, te na lava ʻo fefakakakato ʻaki ʻena ngaahi fiemaʻú; pea koʻeuhí ʻoku lahi e ngaahi founga ʻokú na faitatau aí, ʻe lava ke na femahinoʻaki. ʻOua naʻa tuku ke na felotokoviʻaki koeʻuhí ko hona ngaahi faikehekehé; tuku ke na fakatou sio ʻo ʻilo ʻa e meʻa laulaunoá mo e meʻa ʻoku fakaʻofoʻofa mo mahuʻingá peá na ngāue ʻo fakatatau ki ai. Pea ʻofa ke hoko ʻa e anga fakatokoua ʻo e lakanga fakataulaʻeikí mo e anga fakatokoua ʻo e Fineʻofá ko ha monūʻiaʻanga ʻi he moʻui ʻa e kāingalotu kātoa ʻo e Siasi maʻongoʻongá ni, he lolotonga ʻa ʻetau fetokoniʻaki ʻi he hala ko ia ki he haohaoá.5
Kuo uiuiʻi ʻe he ʻOtuá ʻa e kakai fefiné ke nau tokoni ki hono fakatupulaki, maluʻi, mo leʻohi ʻo e ʻapí mo e fāmilí.
Ko ha meʻa nāunauʻia ia ʻi ha faʻahinga kuonga pē ke hoko ha taha ko ha fefine anga māʻoniʻoni. Ko ha uiuiʻi fakaʻeiʻeiki makehe foki ʻa e hoko ko ha fefine anga māʻoniʻoni he lolotonga ʻo e ngaahi ʻaho fakaʻosi ʻi he māmaní, ki muʻa pea hāʻele ʻangaua mai ʻa hotau Fakamoʻuí. ʻE lava ke liunga hongofulu ʻa e mālohi pea mo e ivi takiekina ʻo e fefine anga māʻoniʻoní ʻi he ʻahó ni ʻi ha toe taimi melino ange. Kuo tuku ia heni ke ne fakatupulaki, maluʻi, mo leʻohi ʻa e ʻapí—ʻa e tefitoʻi faʻunga mahuʻinga mo fakaʻeiʻeiki taha ʻo e sosaietí. ʻE faʻa lava pē ke kiʻi tuʻu taʻe pau pea aʻu ʻo taʻe lavameʻa ʻa e ngaahi kautaha kehé, ka ʻe lava ke tokoni ʻa e fefine anga māʻoniʻoní ke fakahaofi ʻa e ʻapí, he mahalo ko e hūfangaʻanga fakaʻosi pē ia ʻe taha ʻe ʻilo ʻe ha kakai ʻe niʻihi ʻi he lotolotonga ʻo e faingataʻá mo e vātau ʻo e moʻuí.6
ʻOku mou lau he ngaahi nusipepá, ʻoku mou sio he televīsone, ʻoku mou fanongo he letioó, ʻoku mou lau e ʻū tohi mo e ʻū makasiní, pea ʻoku fakataumuʻa e ngaahi meʻa lahi ʻoku haʻu ki hoʻo-mou fakakaukaú ke fakaheeʻi kimoutolu. … Ko e niʻihi ʻeni ʻo e ngaahi meʻa ʻoku nau talaatu kiate kimoutolu he ngaahi ʻaho ní: ʻoku ʻikai fie maʻu ia ke ke mali; ʻoku ʻikai fie maʻu ke ke mali kae toki ʻi ai ha fānau; ʻoku ʻikai fie maʻu ia ke ʻi ai ha fānau; te ke lava ke maʻu kātoa e ngaahi meʻa fakafiefia ʻo e māmaní taʻe te ke fakahoko e ngaahi ngafa mo e ngaahi fatongia ko ʻení. … ʻOku [lahi] e ngaahi founga te ke maʻu ai ʻa e tauʻatāina molengofua ko ʻení. ʻOku nau talaatu ʻoku fakapōpulaʻi [seiniʻi] kimoutolu ki homou ngaahi ʻapí, ki homou ngaahi husepānití, ki hoʻomou fānaú, ki hoʻomou ngaahi ngāue fakaʻapí. ʻOku nau talanoa mo tohi atu kiate kimoutolu ʻo kau ki ha tauʻatāina ʻoku halaʻatā ke nau ʻilo ha meʻa ʻe taha ʻo kau ki ai. …
Ne toki ʻalu hifo pē ʻa ʻIvi mei he nofoʻa fakatuʻi taʻengatá, kae hangē naʻe mahino kiate ia ʻa e founga ʻo e moʻuí, he naʻá ne fiefia—fiefia!—ʻi heʻena kai ʻa e ʻakau naʻe tapui ke ʻoua naʻá na kaí. … Naʻe kamata ʻe heʻetau faʻē ʻofeina ko ʻIví ʻa e faʻahinga ʻo e tangatá ʻi he loto nēkeneka, ʻi heʻene fie maʻu ha fānaú, nēkeneka ʻi he fiefia te nau ʻomi kiate iá, loto fiemālie ke tali ʻa e ngaahi palopalema ʻe hoko fekauʻaki mo ha fāmilí, kae tali foki mo e ngaahi meʻa fakafiefiá. …
ʻOku ʻi ai e ngafa toputapu ʻo e ngaahi faʻeé. Ko e ngaahi hoa ngāue kinautolu mo e ʻOtuá, pea mo honau ngaahi husepāniti totonú foki, ʻuluakí ʻi hono fāʻeleʻi mai ʻo e fānau fakalaumālie ʻa e ʻEikí, hili iá pea ʻohake ʻa e fānau ko iá ke nau tauhi ki he ʻEikí mo tauhi ʻEne ngaahi fekaú. … Ko e tuʻunga fakafaʻeé ko ha fakatongia toputapu ia, ko ha fakatapui mo e līʻoa e moʻuí ki hono lehilehiʻi hake, tauhi mo tanumaki ʻo e sinó, ʻatamaí mo e laumālie ʻo kinautolu naʻa nau tauhi honau ʻuluaki tuʻungá, pea kuo nau omi ki he māmaní ki honau tuʻunga hono uá ke ako mo siviʻi pea ngāue ke aʻusia e tuʻunga faka-ʻOtuá.7
ʻOku fuʻu toko lahi ha kakai fefine ʻoku fakamoleki honau taimí ʻi he ngaahi meʻa fakasōsialé, ʻi he ngaahi meʻa fakapolitikalé, ʻi he ngaahi ngāue maʻá e kakaí, kae lolotonga iá naʻe totonu ke nau ʻi ʻapi ʻo akonekina mo akoʻi mo talitali pea mo ʻofaʻi ʻenau fānaú koeʻuhí ke nau malu ai.8
ʻOku ʻikai mo ha lāngilangi lahi ange ʻe lava ʻo foaki ki ha fefine ka ko haʻane tokoni ʻi he palani fakalangi [ʻa e ʻOtuá]. ʻOku ou fie talaatu ʻi he ʻiloʻilopau he ʻikai ha fiemālie mo ha fiefia mo ha melino lahi ange ʻe maʻu ʻe ha fefine pea he ʻikai haʻane tokoni lahi ange ki he faʻahinga ʻo e tangatá ka ko ʻene hoko ko ha fefine anga fakapotopoto mo moʻui taau peá ne ohi hake ha fānau lelei.9
Kuo talaʻofa ʻaki ʻe he ʻEikí ʻa e ngaahi tāpuaki ʻo e moʻui fakafāmili taʻengatá ki he kakai fefine faitotonu kotoa pē.
ʻOku ʻi ai hamou niʻihi kuo mole meiate kimoutolu homou ngaahi husepānití ʻi haʻanau pekia, pea niʻihi ʻi he mali vete. ʻOku ʻi ai hamou niʻihi kuo teʻeki ai ke mou maʻu ʻa e faingamālie maʻongoʻonga ko ia ke malí. Ka ʻi hono fakahoa atu ki he taʻengatá, “ ʻe kiʻi fuofuoloa siʻi pē” (vakai, T&F 121:7.) ʻene mole meiate kimoutolu ʻa e ngaahi tāpuakí ni. …
ʻI heʻetau hanga taha ki he ngaahi nāunau pea mo hono mahuʻinga ʻo e moʻui fakafāmili ʻi hení, manatu ʻoku tau kau kātoa ki he fāmili taʻengata ʻo ʻetau Tamai ʻi Hēvaní.
ʻIloʻi foki ko e kakai fefine angatonu kotoa pē ʻoku ʻikai te nau maʻu ʻa e faingamālie ke fakamaʻu ki ha tangata moʻui taau he lolotonga ʻenau ʻi honau tuʻunga hono uá pea ʻikai ko hanau loto ʻeni, te nau maʻu ʻa e tāpuaki ko iá ʻi he nofo taʻengatá. ʻI he taimi ʻoku holi ai ho lotó ke tali koe mo ke maʻu ʻa e ongoʻi ʻofa ʻoku maʻu ʻi he moʻui fakafāmili ʻi māmaní, kātaki ka ke ʻiloʻi ʻoku ʻafioʻi ʻe heʻetau Tamai ʻi Hēvaní ho lotomamahí, pea ʻe ʻi ai ʻa e ʻaho te Ne tāpuakiʻi ai koe ʻo lahi ange ʻi he meʻa te ke faʻa lava ke fakamatalaʻí.
ʻOku ʻi ai e taimi ʻe niʻihi ʻe fie maʻu ai ke toʻo fakataimi meiate kitautolu ha ngaahi meʻa koeʻuhí ke siviʻi ai pe ʻoku tau taau—ka ʻe ʻi ai ʻa e ʻaho ʻe maʻu ai ʻe he kakai fefine anga māʻoniʻoní ʻa e meʻa kotoa pē—fakakaukau angé ki ai ʻe hoku ngaahi tuofāfine—ʻa e meʻa kotoa pē ʻoku maʻu ʻe heʻetau Tamaí! ʻOku ʻikai ngata pē heʻene mahuʻinga ke tau faʻa tatalí; ʻoku toe mahuʻinga foki ke tau moʻui taau ke maʻu ia!
Lolotonga iá, ʻoku ʻikai fie maʻu ia ke mali ha taha pe ke ne hoko ko ha faʻē kae toki lava ke ne tauhi ʻa e ʻuluaki fekau lahí mo hono uá—ʻa e ʻofa ki he ʻOtuá mo hotau kāingá—ʻa ē naʻe folofola ʻa Sīsū ʻoku tautau ai ʻa e fonó kotoa mo e kau palōfitá.10
ʻE kei lava pē ʻe kimoutolu ʻoku ʻikai ke mou aʻusia ʻa e fatongia tukufakaholo ʻo e fefiné he taimí ni, ʻo ʻikai koeʻuhí ko hamou loto ka ʻi ha ngaahi ʻuhinga ʻoku ʻikai te mou pule ki ai, ke fai ha ngaahi meʻa lahi ke tokoni ki he kakai kehé.11
ʻOku totonu ke feinga ʻa e fefine taki taha ke ne fakakakato ʻa hono tuʻunga fakalangí.
ʻOku mau fiefia mo fakatumutumu ʻi hono fakatupulaki pea mo hono fakaʻaliʻali ʻo e ngaahi talēniti lahi ʻoku maʻu ʻe hotau kakai fefiné ʻi he founga totonú.12
ʻOku mau fakalotolahiʻi kotoa ai hotau kakai fefiné ke nau fakaʻaongaʻi honau ngaahi faingamālié ke maʻu ʻa e māmá mo e ʻiló ʻi ʻapiako, ʻi he ako fakatāutahá, pea ʻi he Fineʻofá. 13
Kau finemui, te mou lava ʻo fokotuʻu hoʻomou ngaahi taumuʻá pea mou kakapa mo feinga ke aʻusia kinautolu. Toutou feinga ke aʻusia kinautolu. Mou faʻa lotu mo loto māʻulalo ʻi hoʻomou fekumi ko ia ki he potó mo e ʻiló. ʻOku mou ʻi he vahaʻa taimi ʻo hoʻomou moʻuí ke mou ako ai mo teuteu. Ako ʻa e meʻa kotoa pē te mou ala akó. ʻOku hoko ʻa e tupulakí ʻi hoʻomou fokotuʻu ke māʻolunga hoʻomou ngaahi taumuʻá pea kakapa ke aʻusia kinautolú. 14
ʻOku totonu ke teuteuʻi ʻe he taʻahine kotoa pē ia, pea ʻoku ou pehē atu, ʻe he taʻahine kotoa pē ia, ki he nofo malí mo e ngaahi fatongia fakaʻapí mo fakafāmilí. ʻOku moʻoni ʻeni neongo ʻoku ʻikai ke mou lau ia ʻi he ngaahi makasini ʻo e ʻaho ní. ʻOku totonu ke fakalotolahiʻi ia ke ne laukau ʻaki ʻeni mo ne teuteu ki he ngaahi ngāue moʻoni ʻa e houʻeiki fafiné. ʻOku totonu ke ne poto ʻi he ngaahi meʻa ko ē ʻoku ʻaonga mo fakatupulekina ki heʻene moʻui fakafāmilí. ʻOku totonu ke ne fakatupulaki hono ngaahi talēnití, fakamālohia ʻene ʻilo mo ʻene fakamoʻoni ki he ongoongoleleí, peá ne vēkeveke ke tokoniʻi ʻa e niʻihi kehé. ʻE ui ha fānau fefine ʻe niʻihi ke nau ō ʻo ngāue fakafaifekau, pea ʻe maʻu ʻe he tamaiki fefine kotoa pē ha faingamālie ke ʻaonga lahi ai ʻi he puleʻanga ʻo e ʻOtuá ʻo kapau te nau teuteuʻi kinautolu. … ʻOku mau fie maʻu hotau kakai fefiné ke nau ako lelei koeʻuhí he ʻikai ke toe maʻu ʻe he fānaú ha meʻa kuo mole tupu mei he taʻe ʻilo ʻa ʻenau ngaahi faʻeé.15
ʻOku mau fakaʻamuange te mou hokohoko atu hoʻomou akó pea lavaʻi ʻa e ako ko iá… te ne fakafeʻungaʻi kimoutolu ki he nofo taʻengatá pea pehē foki ki hoʻomou fakahoko kakato ʻo e ngāue tokoni ʻi he māmaní. ʻOku ʻi ai foki mo ha ngaahi poto fakangāue kehe ʻo mavahe mei he ngaahi poto fakatauhiʻapi mahuʻingá ʻe lava ke fakatupulaki totonu pea te nau ʻai ke toe ʻaonga ange hoʻo ngāue ʻi ʻapí, ʻi he Siasí, pea ʻi he koló.
Kuo pau foki ke mou toe fakapotopoto ʻi he ngaahi fili ʻoku mou faí, ka ʻoku ʻikai ke mau loto ke taʻe tala ʻa e ngaahi meʻá ni ki he kakai fefine ʻo e Siasí pe ʻikai ola lelei ʻenau ngaahi ngāué. Kapau te mou fakatupulaki ʻa e ngaahi pōtoʻi ngāue kuo foaki kiate kimoutolú mo fakaʻaongaʻi ʻa e ngaahi talēniti kuo tāpuakiʻi ʻaki kimoutolu ʻe he ʻOtuá, te mou hoko ko ha ngaahi faʻē mo ha ngaahi uaifi lelei ange.16
ʻOku mau tokanga ke maʻu ʻe hotau kakai fefiné ʻa e ngaahi meʻa lelei kotoa pē. ʻOku mau tui ʻoku totonu ke nau maʻu kātoa ʻa e ngaahi tāpuaki ko ʻení—ʻa e ʻulungāanga fakafonuá, anga fakaʻeiʻeikí, akó, ʻiló, anga haohaoákoeʻuhí kae lava ʻe he ngaahi faʻē ʻa ʻetau fānaú ʻo ohi hake mo akoʻi kinautolu ʻi he anga māʻoniʻoni.17
ʻOku ou toe fakamamafaʻi atu ʻa e fiemaʻu ko ia ke ako ʻe he fefine taki taha ʻa e folofolá. ʻOku tau fie maʻu ke tāpuekina hotau ngaahi ʻapí ʻaki ha kau fafine kuo nau ʻilo lelei ʻa e folofoláʻo tatau ai pē pe ʻoku teʻeki ke mali pe ʻosi mali, kei talavou pe motuʻa, uitou pe nofo ʻi ha fāmili.
ʻI he fakaʻau ko ia ke toe lahi ange hoʻomou ʻilo ki he ngaahi moʻoni ʻo e folofolá, ʻe toe lelei ange ai hoʻomou tauhi ʻa e fekau lahi hono uá, ke ʻofa ki ho kaungāʻapí ʻo hangē pē ko koé, ʻo tatau ai pē pe ko e hā e ngaahi tuʻunga ʻo e moʻuí ʻoku mou ʻi aí. ʻAi ke mou hoko ko ha kau taukei ʻi he folofolá—ʻo ʻikai ke mou tuku hifo ai ha niʻihi ki lalo ka ke mou hiki hake kinautolu! He ko hai ʻe fie maʻu ke toe lahi ange ʻenau “tauhi” e ngaahi moʻoni ʻo e ongoongoleleí (ke nau lava ʻo kumi tokoni ki ai ʻi he taimi ʻo ʻenau fiemaʻú) ka ko e kau fefiné mo e ngaahi faʻeé ʻoku lahi taha ʻenau fakahoko ʻo e lehilehiʻí mo e akonakí?
Mou feinga ke aʻusia ʻa e lelei tahá ʻi he ngaahi ngāue kotoa pē ʻo e māʻoniʻoní ʻoku mou fakahokó, pea ʻi he tapa kotoa pē ʻo hoʻomou moʻuí.
Siʻi ngaahi tuofāfine, manatuʻi ko e ngaahi tāpuaki taʻengata ko ia ʻoku ʻamoutolu ʻi hoʻomou kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku nau maʻongoʻonga ange kinautolu ʻi ha toe tāpuaki kehe ʻe lava ke mou maʻu. ʻOku ʻikai mo ha toe fakalāngilangi māʻolunga ange ʻe lava ke ke maʻu ʻi māmani ka ko hono ʻiloa koe ko ha fefine ʻo e ʻOtuá. He ʻikai mo ha tuʻunga māʻolunga ange ʻe lava ke foaki kiate koe ka ko hoʻo hoko ko ha ʻofefine ʻo e ʻOtuá kuó Ne aʻusia ʻa e laumālie ʻo e feohi fakatokouá, ʻo e hoko ko ha uaifí, mo e tuʻunga fakafaʻē moʻoní, mo ha toe ngaahi ngāue kehe ʻoku nau takiekina e moʻuí ki he leleí. …
… ʻOku fie maʻu ke mou ako lahi ʻa e ngaahi moʻoni ʻo e ongoongoleleí ʻoku kau ki he natula taʻengata ʻo homou tuʻunga fakafoʻituituí pea mo e mahuʻinga taʻe hano tatau ʻo homou angá. ʻOku fie maʻu ke toe lahi ange hoʻomou ongoʻi ʻa e ʻofa haohaoa ko ia ʻa ʻetau Tamai ʻi Hēvaní kiate kimoutolú pea mou ongoʻi ʻa e mahuʻinga kuó Ne tuku kiate kimoutolu fakafoʻituituí. Mou fakalaulauloto ki he ngaahi moʻoni maʻongoʻongá ni, kae tautautefito ki he ngaahi momeniti (ʻokú ke ongoʻi fakafoʻituitui ai hoʻo loto-moʻuá) te ke fifili ai pe puputuʻu ʻi ha faʻahinga meʻá. …
ʻOku ʻikai mo ha toe talaʻofa nāunauʻia ange kuo foaki ki he houʻeiki fafiné ka ko e ngaahi tāpuaki ʻoku fakafou mai ʻi he ongo-ongoleleí mo e Siasi ʻo Sīsū Kalaisí. He ko e fē ha toe feituʻu te ke ako ʻo ʻilo ai pe ko hai moʻoni koe? Ko e fē mo ha toe feituʻu ʻe foaki atu ai e ngaahi fakamatala ʻaonga mo e ngaahi tala fakapapau fekauʻaki mo e anga ʻo e moʻuí? Ko e fē ha toe maʻuʻanga tokoni kehe te ke lava ʻo ako ai ʻo ʻilo ho mahuʻinga taʻe hano tataú mo ʻiloʻi pe ko hai koe? Ko hai te ke toe ʻilo mei ai ʻa e palani nāunauʻia ʻo e fiefia ʻa ʻetau Tamai ʻi Hēvaní?18
ʻE lava ke tokoni lahi ʻa e kakai fefine anga māʻoniʻoní ki māmani pea ki he puleʻanga ʻo e ʻOtuá.
Kuo teʻeki ai ha taimi ʻi māmani ʻe puputuʻu pehē fau ai ʻa e fatongia ʻo fafiné. Kuo teʻeki ai ha taimi ʻi he Siasí kuo malava ai ʻe he houʻeiki fafiné ʻo fakahaaʻi ki māmani ʻa honau fatongiá pea mo ia ʻoku totonu ke nau fakahokó. ʻOku mātuʻaki mahuʻinga ʻi hotau māmani ko ʻení ʻa e ʻaonga pea mo e ivi takiekina ʻo e houʻeiki fafiné mo e ngaahi faʻeé. ʻOku toe moʻoni ange he ʻahó ni ʻi ha toe taimi ʻi he kuo hilí ʻa e fakakaukau ko ia ʻoku pehē, “ ʻoku puleʻi ʻa māmani ʻe he nima ʻokú ne luelue e mohenga pēpeé”.19
ʻOku makehe ʻa e kakai fefine ʻo e Siasí ʻi hono foaki kiate kinau-tolu ʻa e ngaahi ngāue mahuʻinga ko ia kuo tuku kiate kinautolu ʻe heʻetau Tamai ʻi Hēvaní, kae tautefito kiate kimoutolu kuo mou monūʻia ke fanauʻi mai ʻi he konga ko ʻeni ʻo e kuonga fakakosipeli fakaʻosí. Tukuange pē ʻa e kakai fefine kehé ia ke nau fekumi ʻi heʻenau hamumú. … ki he ngaahi meʻa ʻoku nau tokanga siokita ki aí. ʻE lava ke mou hoko kimoutolu ko ha mālohi lahi he ʻoku fie maʻu ke ʻi ai ʻa e ʻofá mo e moʻoní mo e anga māʻoniʻoní ʻi māmani. …
… Siʻoku ngaahi tuofāfine, tuku muʻa ke u fokotuʻu atu ha meʻa ne teʻeki lea ʻaki ki muʻa, pe naʻe teʻeki lea ʻaki ʻi he founga ko ʻení. Ko e konga lahi ʻo e tupu toko lahi ʻa e Siasí ʻi he ngaahi ʻaho fakaʻosí, e hoko ia tupu mei he kakai fefine toko lahi ʻo e māmaní (ʻa ia ʻoku nau maʻu ʻa e anga fakalaumālié) te nau kau mai ki he Siasí. ʻE hoko ʻeni ʻo aʻu ki ha tuʻunga ʻe hā mei he kakai fefine ʻo e Siasí ʻa e anga māʻoniʻoní pea nau lava ke fakahā ʻeni ʻi honau ʻulungāanga leleí pea ʻe fakatokangaʻi ʻa e kehe atu pē ʻa e kakai fefine ia ʻo e Siasí mei he kakai fefine ʻo e māmaní—ʻi ha ngaahi founga ʻoku fakafiefia. … Ko ia ʻe hoko ai ʻa e faʻifaʻitakiʻanga ʻa e kakai fefine ʻo e Siasí ko ha mālohinga mahuʻinga ʻo tatau pē ki he tupu ʻo e toko lahí mo e tupu fakalaumālie ʻa e Siasí ʻi he ngaahi ʻaho fakaʻosí…
ʻOku mau ʻofa ʻiate kimoutolu siʻi ngaahi tuofāfine. ʻOku mau falala kiate kimoutolu. ʻOku mau fiefia ʻi hoʻomou moʻui mateakí. ʻOku hoko ko e fakalotolahi kiate kimautolu ʻa hoʻomou. … ʻi he konga ko ʻeni ʻo e kuonga fakakosipelí ni ʻa ia ʻoku fuʻu fie maʻu ʻaupito ai homou ngaahi talēnití mo homou mālohi fakalaumālié.20
Ngaahi Fokotuʻu ki he Akó mo hono Akoʻí
Fakakaukauʻi e ngaahi fakakaukau ko ʻení ʻi hoʻo ako pe teuteu ke akoʻi e vahé. Vakai ki he peesi v–x ki ha tokoni makehe ʻe fiemaʻu.
-
Toe vakai ki he talanoa ʻi he peesi 264–265 mo e palakalafi ʻuluaki ʻi he peesi 265. Ko e hā ha ngaahi talanoa fakalotolahi ʻokú ke manatu ki ai fekauʻaki mo e kakai fefine ʻi homou fāmilí pea ʻi he Siasí?
-
Ako kakato e palakalafi fakaʻosi ʻi he peesi 267. ʻE lava fēfē ke fetokoniʻaki ʻa e kakai tangatá mo e kakai fefiné neongo ʻa e faikehekehe ʻo honau natulá pea mo honau ngaahi ʻulungāangá? Ko e hā e founga ʻoku totonu ke nau ngāue ai ko ha hoa ngāue ʻi he fāmilí? ʻi he Siasí?
-
Ko e hā ʻoku hoko ai ko ha “uiuiʻi [mahuʻinga] makehe” ʻa e hoko ʻa ha fefine he ʻahó ni ko ha fefine anga māʻoniʻoní? (peesi 268). Ko e hā e ngaahi founga ʻoku feinga ai ʻa māmani ke afeʻi ʻa e kakai fefiné mei he uiuiʻí ni? Te tau lava fēfē ʻo tokoniʻi ʻa e kau talavoú mo e kau finemuí ke nau houngaʻia ʻi he uiuiʻi fakaʻeiʻeikí ni?
-
ʻI hoʻo lau ʻa e peesi 270 mo e ʻuluaki palakalafi e tolu ʻi he peesi 271, fakalaulauloto angé ki he meʻa ʻoku talamai ʻe he ngaahi akonakí ni ʻo kau ki he ʻofa ʻa e Tamai Hēvaní ki he kotoa ʻo ʻEne fānaú.
-
Ko e hā ha ngaahi founga ʻe lava ke fakahoko ai ʻe he kakai fefine ʻo e Siasí honau ngaahi fatongia fakalangí? (Vakai, peesi 271–274.) Ko e hā nai e founga ʻe lava ke poupouʻi ai ʻe he kakai tangata ʻo e Siasí ʻa e ngaahi ngāue ʻa e kakai fefine ʻo e Siasí? (Vakai, peesi 267.)
-
Fakalaulauloto angé ki he palakalafi hono ua ʻi he 257. Ko e hā e meʻa ʻoku ongo kiate koe kau ki he fakamatala ko ʻení? ʻOku anga fēfē hono fakahoko he ʻahó ni ʻo e kikite ko ʻeni fekauʻaki mo e tupu ʻa e Siasí?
Ngaahi Potufolofola ʻOku Nau Fekauʻakí: Lea Fakatātā 31:10–31; ʻEfesō 5:22–29; ʻAlamā 56:41–48; T&F 25:1, 5–10; Mōsese 3:18, 21–25
Ko Palesiteni Kimipolo mo hono uaifi ko Kamilá.
“Ko e tuʻunga fakafaʻeé ko ha uiuiʻi māʻoniʻoni ia, ko ha līʻoa toputapu ke fakahoko e ngāue ʻa e ʻEikí.”
“ ʻOku ʻikai mo ha toe ngaahi tāpuaki maʻongoʻonga mo nāunauʻia ange kuo foaki ki he houʻeiki fafiné ka ko e ngaahi tāpuaki ko ia ʻoku fakafou mai ʻi he ongoongoleleí mo e Siasi ʻo Sīsū Kalaisí.”