Lēsoni 8

Ko e Tuʻunga Tangata pe Fefiné mo e ʻIloʻi Ko hai Kita ʻi he Taʻengatá

Talateú

Naʻe fokotuʻu hotau tuʻunga tangata pe fefiné kimuʻa pea fāʻeleʻi mai kitautolu ki he moʻui fakamatelié pea ko ha ʻulungaanga mahuʻinga ia ʻo hono ʻiloʻi ko hai kitautolu ʻi he taʻengatá. ʻOku fakafaikehekeheʻi ʻe he kau taki ʻo e Siasí ʻa e fetokangaʻaki ʻa e tangata mo e tangatá pe fefine mo e fefiné, ʻa ia ʻoku ʻikai ko ha faiangahalá, mo e tōʻonga fakahomosekisualé, ʻa ia ʻoku lau ko e faiangahala koeʻuhí he ʻoku fepaki ia mo e palani ʻa e Tamai Hēvaní ki hotau hakeakiʻí. ʻE tokoniʻi ʻe he lēsoni ko ʻení ʻa e kau akó ke vakai ki he makatuʻunga fakaepalōfita ki he faikehekehe ko ʻení pea mo fakatokangaʻi foki ʻoku ʻofeina tatau pē ʻa e fānau ʻa e ʻOtuá pea ʻoku totonu ke tokangaʻi ʻi he ʻofa mo e fakaʻapaʻapa.

Laukonga Puipuituʻá

• Robert D. Hales, “Ko e Palani ʻo e Fakamoʻuí: Ko Ha Mataʻikoloa Toputapu ʻo e ʻIló ke ne Tataki Kitautolu,” Liahona, ʻOkatopa 2015.

• Jeffrey R. Holland, “Tokoniʻi ʻo Kinautolu ʻOku Fefaʻuhi mo e Femanakoʻaki pē ʻa Tangata mo Tangatá pe Fefine mo Fefiné,” Ensign, ʻOkatopa 2007, 42–45.

• Dallin H. Oaks, “Same-Gender Attraction,” Ensign, Oct. 1995, 7–14.

• Gospel Topics, “Same-Sex Attraction,” lds.org/topics.

• “Love One Another: A Discussion on Same-Sex Attraction,” mormonsandgays.org. Kapau ʻoku ʻoatu ʻe he kau akó ha ngaahi fehuʻi fekauʻaki mo e ngaahi tuʻutuʻuni ʻa e Siasí ki he nonofo fakahomosekisualé, kātaki ʻo tataki kinautolu ki he uepisaiti fakaʻofisiale ʻa e Siasí.

Ngaahi Fokotuʻu ki hono Akoʻí

Tokāteline mo e Ngaahi Fuakava 76:24; Mōsese 2:27; “Ko e Fāmilí: Ko ha Fanongonongo ki Māmani”

Ko ha konga mahuʻinga ʻo hotau tuʻunga taʻengatá ʻa e tuʻunga tangata pe fefiné

Kole ki ha kau ako ʻe toko tolu ke lau leʻolahi ʻa e Tokāteline mo e Ngaahi Fuakava 76:24; Mōsese 2:27; mo e palakalafi hono ua ʻo e “Ko e Fāmilí: Ko ha Fanongonongo ki Māmani” (Ensign pe Liahona, Nōvema 2010, 129). Fakaafeʻi e kalasí ke fakakaukau ki he meʻa ʻoku akoʻi pe fokotuʻu mai ʻe he ngaahi maʻuʻanga tokoni ko ʻení fekauʻaki mo e tuʻunga tangata pe fefiné.

• Te ke fakamatala fakanounouʻi fēfē e meʻa ʻoku akoʻi ʻe he ngaahi maʻuʻanga tokoni ko ʻení fekauʻaki mo hotau tuʻunga taʻengatá? (ʻOku totonu ke ʻilo ʻe he kau akó ʻa e meʻá ni: Ko hotau tuʻunga tangata pe fefiné ko ha ʻulungaanga mahuʻinga ia ʻo hotau tuʻunga mo e taumuʻa taʻengatá.)

• Ko e hā ʻe tokoni ai ke tau maʻu ha mahino naʻe fokotuʻu hotau tuʻunga tangata pe fefiné kimuʻa pea tau haʻu ki he māmaní? (ʻI he tali ʻa e kau akó, mahalo te ke fie vahevahe e lea ko ʻeni ʻa Palesiteni Siosefa Filitingi Sāmitá [1876–1972]: “ʻOku tau lau ʻia Sēnesi: … ʻKo ia naʻe ngaohi ʻa e tangatá ʻe he ʻOtuá ʻi Hono tataú, naʻá Ne ngaohi ia ʻi he tatau ʻo e ʻOtuá; naʻá Ne ngaohi ʻa kinaua ko e tangata mo e fefine.’ (Sēnesi 1:27; toki tānaki atu e mataʻitohi fakahihifí.) ʻOku ʻikai lava nai ke nau tui naʻe fakatupu ʻa e ngaahi laumālie ʻo e houʻeiki fafiné ʻi he tatau ʻo ha ‘Faʻē ʻi he Langí’?” [Answers to Gospel Questions, comp. Joseph Fielding Smith Jr., 5 vols. (1957–66), 3:144].)

• ʻE lava fēfē ke tokoni ʻa e mahino ʻo e natula taʻengata ʻo e tuʻunga tangata pe fefiné ke tau moʻui ʻo fakatatau mo e palani ʻa e Tamai Hēvaní ki he fiefiá, naʻa mo e taimi ʻoku faʻa tali ai ʻe he sosaietí ʻa e ngaahi tuʻunga moʻui kehekehe ʻo e ʻulungāngá?

Ke tokoni ki hono aleaʻi ʻo e fehuʻi ʻi ʻolungá, vahevahe ʻa e ngaahi lea fakatokāteline ko ʻeni ne fai ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakakaukau ke lau tahataha ʻa e ngaahi palakalafí pea aleaʻi ʻa e meʻa ʻokú ne akoʻi fekauʻaki mo e founga ʻoku fehangahangai ai ʻa e tōʻonga fakahomosekisualé mo e palani ʻa e Tamai Hēvaní ki hono hakeakiʻi ʻo ʻEne fānaú.

“Ko e taumuʻa ʻo e moʻui fakamatelié pea mo e misiona ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke teuteuʻi ʻa e ngaahi foha mo e ngaahi ʻofefine ʻo e ʻOtuá ki honau ikuʻangá—ke hoko ʻo hangē ko ʻetau mātuʻa fakalangí.

“Ko hotau ikuʻanga taʻengatá—ʻa e hakeakiʻi ʻi he puleʻanga fakasilesitialé—ʻoku toki malava pē ia ʻi he fakalelei ʻa Sīsū Kalaisí (ʻa ia ʻoku tau hoko ai pea lava ke nofo ʻtaʻehalaia ʻi he ʻao ʻo e ʻOtuá’ [T&F 93:38]) pea ʻoku toki lava ke maʻu ia ʻe ha tangata mo ha fefine kuo nau fakahoko mo faivelenga ki he ngaahi fuakava ʻo ha mali taʻengata ʻi he temipale ʻo e ʻOtuá (vakai, T&F 131:1–4; 132). …

“Koeʻuhí ʻoku fie maʻu ʻe Sētane ‘ke mamahi ʻa e tangata kotoa pē ʻo hangē pē ko iá’ (2 Nīfai 2:27), ʻoku fakataumuʻa ʻa ʻene ngahi feinga mālohi tahá ki hono poupouʻi ʻa e ngaahi fili mo e ngaahi ngāue ko ia te ne taʻofi ʻa e palani ʻa e ʻOtuá maʻa ʻEne fānaú. ʻOkú ne feinga ke fakaʻauha ʻa e tefitoʻi moʻoni ʻo e haʻisia fakafoʻituituí, ke fakalotoʻi kitautolu ke ngāue hala ʻaki hotau mālohi toputapu ʻo e fakatupú, ke fakalotosiʻi ki he nofo-malí mo e fanaufanau ʻa e kau tangata mo fafine moʻui tāú, pea ke puputuʻu e ʻuhinga ʻo e hoko ko ha tangata pe fefiné” (“Same-Gender Attraction,” Ensign, Oct. 1995, 7–8).

Tokāteline mo e Ngaahi Fuakava 59:6

ʻOku fakafaikehekeheʻi ʻe he Siasí ʻa e femanakoʻaki ʻa e tangata mo e tangatá pe fefine mo e fefiné pea mo e tōʻonga moʻui fakahomosekisualé

ʻOange ki he tokotaha ako takitaha ha tatau ʻo e lea ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi e kau akó ke ako ʻa e fakamatalá, ʻo kumi e ngaahi tefitoʻi moʻoni ʻoku akoʻi ʻe ʻEletā Hōlani fekauʻaki mo kinautolu ʻoku tokanga ki he kakai ʻo e tuʻunga tangata pe fefine tatau pea mo e founga ke tokoniʻi ai kinautolu ʻi he ʻofa.

“Ne u tangutu fehāngaaki mo ha talavou angalelei ʻoku taʻu uofulu tupu siʻi. Ko ha taha malimali lelei neongo naʻe ʻikai ke faʻa malimali lolotonga ʻema pōtalanoá. Ko e meʻa naʻá ku fakatokangaʻí ko ʻene fofonga mamahí.

Naʻá ne pehē, “ʻOku ʻikai ke u ʻilo pe ʻoku totonu ke u kei hoko ko ha mēmipa ʻo e Siasí.’ ‘ʻOku ʻikai ke u tui ʻoku ou taau.’

Naʻá ku ʻeke ange leva, ‘Ko e hā ʻoku ʻikai ke ke taau aí?’

“ʻOku ou manako pē au he kakai tangatá.

“ʻOku ou tui naʻá ne fakakaukau ia te u ʻohovale. Ka naʻe ʻikai. Peau ʻeke ange, ‘Pea …?’

“Ne hangē ʻoku kiʻi fiemālie hono fofongá ʻi heʻene ongoʻi ʻoku ou kei tokanga ange peé. ‘ʻOku ʻikai ke u manako au ʻi he kakai fefiné. ʻOku ou manako au ʻi he kakai tangatá. Kuó u faʻa feinga ke tekeʻi ʻa e ngaahi ongo ko ʻení pe liliu, ka … ’

“Naʻe māpuhoi ai. ‘Ko e hā e ʻuhinga ʻoku ou pehē aí? ʻOku hoko moʻoni ʻa e ngaahi ongo ko ʻení ia.’

“Naʻá ku kiʻi longo, peá u toki pehē ange, ‘ʻOku ou fie maʻu ha toe fakamatala lahi ange kimuʻa peá u toki faleʻi koé. ʻOkú ke fakatokangaʻi, ko e femanakoʻaki ʻa e tangata mo e tangatá pe fefine mo e fefiné, ʻoku ʻikai ko ha angahala ia, ka ko e angahalá ʻete fakahoko ʻa e ongo ko iá—ʻo tatau pē mo e ngaahi ongo ʻi he vā ʻo e tangatá mo e fefiné. ʻOkú ke maumauʻi e fono ʻo e angamaʻá?

“Naʻe kalokalo pē hono ʻulú. ‘ʻIkai, ʻoku ʻikai.’

[“Ne u ongoʻi fiemālie he taimi ko ʻení.] ‘Mālō hoʻo fie fakaleleiʻi e meʻá ni. ‘ʻOku fie maʻu ha loto lahi ke [talanoa ki ai] pea ʻoku ou fakaʻapaʻapaʻi koe ʻi hoʻo tauhi koe ke ke maʻá.

“‘He ʻikai ke u lava ʻo tali atu ʻa e fehuʻi fekauʻaki mo e ʻuhinga ʻokú ke ongoʻi pehē aí. ʻE lava ke tupu ia mei ha ngaahi ʻuhinga kehekehe, pea ʻe lava pē ke nau kehekehe ʻo hangē ko e kehekehe ʻa e kakaí. Mahalo he ʻikai ke tau teitei lava ʻe kitautolu ʻo ʻilo ʻi he moʻuí ni ha ngaahi meʻa ʻe niʻihi, kau ai e tupuʻanga hoʻo ongoʻi peheé. Ka ʻoku ʻikai mahuʻinga tatau hoʻo ʻiloʻi ʻa e ʻuhinga ʻokú ke ongoʻi pehē aí mo hoʻo ʻiloʻi kuo teʻeki ai ke ke maumau fonó. Kapau ʻoku fenāpasi pē hoʻo moʻuí mo e ngaahi fekaú pea ta ʻokú ke taau pē koe ke ke ngāue ʻi he Siasí, ʻo feohi kakato mo e kāingalotú, ʻalu ki he temipalé mo maʻu ʻa e ngaahi tāpuaki kotoa ʻo e Fakalelei ʻa e Fakamoʻuí.’

“Naʻá ne kiʻi tangutu hangatonu hake heni. Ne u hoko atu, ‘ʻOku ʻikai tonu hoʻo meʻa ʻoku faí ʻi hoʻo fakaʻilongaʻi koe ʻo fakatatau mo e anga hoʻo manakó. ʻOku ʻikai ko ho ʻulungāngá pē ia, ko ia, ʻoua ʻe fuʻu tō ki ai hoʻo tokangá. Ko e ʻuluaki mo e mahuʻinga tahá, ko e foha koe ʻo e ʻOtuá, pea ʻokú Ne ʻofa ʻiate koe’” (“Tokoniʻi Kinautolu ʻoku Fefaʻuhi mo e Femanakoʻaki pē ʻa e Tangata mo e Tangatá pe Fefine mo e Fefiné,” Liahona, ʻOkatopa 2007, 40).

• Ko e hā e ngaahi tefitoʻi moʻoni naʻá ke ʻilo ʻi he faleʻi ʻa ʻEletā Hōlaní?

Hiki e ngaahi tefitoʻi moʻoni mataʻāʻā ko ʻení ʻi he palakipoé ʻi hono vahevahe kinautolu ʻe he kau akó, pea aleaʻi kinautolu ʻi he ongoʻingofua:

• ʻE lava ke tau ongoʻi e ʻofa ʻa e ʻOtuá ʻi he taimi ʻoku tau tokanga taha ai ki hotau tuʻunga ko Hono ngaahi foha mo e ngaahi ʻofefiné.

• ʻOku ʻikai ko hano maumauʻi ʻo e fono ʻo e angamaʻá ʻa e femanakoʻaki ʻa e tangata mo e tangatá pe fefine mo e fefiné, ka ko hono fakahoko e ongo ko iá. Fakakaukau ke vahevahe ʻa e Tokāteline mo e Ngaahi Fuakava 59:6: “ʻOua naʻá ke … tono … pe fai ha faʻahinga meʻa pehē,” ʻo fakamahinoʻi ange ʻoku ʻuhinga e “faʻahinga meʻa pehē” ki ha faʻahinga feohi fakasekisuale ʻi tuʻa he haʻi ʻo e nofomalí. Ko e tōʻonga fakahomosekisualé ko ha angahala ia, ʻo hangē pē ko ha angahala e ngaahi fetuʻutaki ʻi tuʻa he nofomalí ʻa e tangata mo fefiné. ʻE lava ke fakamolemoleʻi ha taha ʻoku kau ʻi ha faʻahinga founga pē ʻo e angahala fakasekisualé ʻo fou ʻi he fakatomalá.

• Tatau ai pē pe ko e hā e ngaahi ʻuhinga ʻoku femanakoʻaki ai pē ha tangata mo e tangata pe fefine mo e fefiné, ʻe lava ke fili ʻa e kakai kotoa pē ke moʻui ʻo fakatatau mo e ngaahi fekau ʻa e ʻOtuá. Fakamamafaʻi ʻa e fakamatala ko ʻeni ʻa ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku lahi e ngaahi meʻa ʻoku ʻikai ke mahino kiate kitautolu fekauʻaki mo e kaveingá ni, ʻe lelei ke tau tauhi ki he meʻa ʻoku tau ʻilo mei he folofola ʻa e ʻOtuá kuo fakahā maí. Ko e meʻa ʻoku tau ʻiló ko e tokāteline ʻa e Siasí, ʻoku totonu ke hoko pē ʻa e feohi fafalé ʻi he vahaʻa ʻo ha tangata mo ha fefine ʻokú na mali, kuo ʻikai liliu ia pea he ʻikai liliu” (“What Needs to Change,” mormonsandgays.org).

• ʻI he taimi ʻoku tau moʻui ai ʻo fakatatau mo e ngaahi fekau ʻa e ʻOtuá, ʻe lava ke tau maʻu ʻa e kotoa ʻo e ngaahi faingamālie ʻo e memipasipi ʻi he Siasí mo e ngaahi tāpuaki ʻo e Fakalelei ʻa e Fakamoʻuí. Neongo he ʻikai fili ʻa e niʻihi fakafoʻituituí ke tokanga ki he kakai ʻo e tuʻunga tangata pe fefine tatau, ka te nau lava ʻo fili e founga ke tali ʻaki e faʻahinga ongo ko iá.

Hili hono hiki e ngaahi tefitoʻi moʻoni ko ʻení ʻi he palakipoé, fehuʻi ange:

• Ko e hā ha ngaahi founga ʻe lava ke ʻoatu ai ʻe he ngaahi tefitoʻi moʻoni ko ʻení e ʻamanaki leleí kiate kinautolu ʻoku nau aʻusia ʻa e femanakoʻaki ʻi he tuʻunga tangata pe fefine tataú?

• Ko e hā ha ngaahi tefitoʻi moʻoni kehe ʻoku tau ako mei he lea ʻa ʻEletā Hōlaní?

Mātiu 7:12; Sione 8:1–11; 15:12

ʻOku totonu ke tau ʻofa mo fakaʻapaʻapaʻi e niʻihi kehé

(Fakatokangaʻi ange: ʻI hoʻo akoʻi ʻa e konga ko ʻeni ʻo e lēsoní, fakapapauʻi ke fakamamafaʻi ange ʻoku ʻikai faiangahala ʻa kinautolu ʻoku manako ʻi he kakai ʻo e tuʻunga tangata pe fefine tataú kae ʻikai fakahoko ha meʻa ki he femanakoʻaki ko iá ʻo hangē ko e fefine ne moʻua ʻi he feʻauakí/tonó. Neongo ia, ko e ngaahi ngāue ʻa Kalaisi ki he fefiné ko ha sīpinga ia ʻo e founga ʻoku totonu ke tau fai ki he kakai kotoa pē—ʻo tatau ai pē pe ʻoku nau kau pe ʻikai ʻi ha tōʻonga angaʻuli.)

Talaange ki he kau akó naʻe tohi ʻa e ʻAposetolo ko Sioné ki ha taimi naʻe fehangahangai ai ʻa e Fakamoʻuí mo ha tuʻunga pelepelengesi ʻaupito. ʻOange ki he kau akó ha ngaahi miniti siʻi ke ako e Sione 8:1–11, ʻo kumi ki he founga naʻe fai ʻe he Fakamoʻuí ki he fefine feʻauakí. Tokoni ki he kau akó ke fakatatau ʻa e fakamatala ko ʻení ki heʻenau ngaahi tōʻonga fakakaukaú mo e tōʻonga kiate kinautolu ʻoku nau kau atu ki he tōʻonga fakahomosekisualé mo e ngaahi tōʻonga angaʻulí ʻaki hano fai e fehuʻi ko ʻení:

• Ko e hā ʻoku akoʻi mai ʻe he ngaahi ngāue ʻa e Fakamoʻuí fekauʻaki mo e founga ke tau fai ki he niʻihi kehé? (Neongo naʻe ʻikai ke ne fakatonuhiaʻi e angahala ʻa e fefiné, ka naʻá Ne angaʻofa mo fakaʻapaʻapa, ʻo ʻikai ʻi he taʻeʻofa.)

• Ko e hā e founga te tau lava ʻo fakaʻaongaʻi ai e sīpinga ʻa e Fakamoʻuí ki heʻetau ngaahi tōʻonga fakakaukaú mo e ngaahi tōʻonga ki hotau ngaahi tokouá mo e tuofāfine ʻoku manako ʻi he tangata mo e tangatá pe fefine mo e fefiné, ʻo tatau ai pē pe kuo nau kau ʻi ha tōʻonga angaʻuli? ʻI he tali ʻa e kau akó, hiki e tefitoʻi moʻoni ko ʻení he palakipoé: ʻOku tau muimui ki he sīpinga ʻa e Fakamoʻuí ʻi heʻetau ongoʻi ʻofa ki he fānau kotoa pē ʻa e ʻOtuá pea angaʻofa mo angalelei kiate kinautolú. (Vakai foki,Mātiu 7:12; Sione 15:12.)

Fakakaukau ke fakaʻaliʻali ʻa e lea ko ʻeni naʻe fai ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá, pea kole ki ha tokotaha ako ke lau leʻolahi ia:

“ʻOku mahino naʻe ʻikai fakatonuhiaʻi ʻe he ʻEikí ʻa e ngaahi angahala ʻa e fefiné. Naʻá ne fakahā ange pē naʻe ʻikai ke Ne fakahalaiaʻi ia—ʻa ia, he ʻikai ke Ne fai hano fakamaau aofangatuku he taimi ko iá. ʻOku fakamoʻoniʻi ʻe he fakaʻuhinga ko ʻení ʻi he meʻa naʻá Ne folofola ʻaki ki he kau Fālesí: ‘ʻOku mou fakamaau fakakano pē; ʻoku ʻikai te u fakamaau ha tokotaha’ (Sione 8:15). Naʻe foaki ki he fefine naʻe moʻua he tono tangatá ha taimi ke fakatomala ai, ko ha taimi naʻe ʻikai ke mei ʻoange ʻe kinautolu naʻa nau fie tolomakaʻi iá” (“‘Judge Not’ and Judging,” Ensign, Aug. 1999, 8).

Mahalo ʻe lelei ke ako ʻe he kau akó, fakatatau ki he Liliu ʻa Siosefa Sāmita ʻo e Sione 8:11, hili ʻene fengāueʻaki mo e Fakamoʻuí “naʻe fakalāngilangiʻi ʻe he fefiné ʻa e ʻOtuá mei he houa ko iá, pea tui ki hono huafá” (ʻi he Sione 8:11, futinouti f).

Fakaʻaliʻali ʻa e lea ko ʻeni naʻe fai ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá, pea kole ki ha tokotaha ako ke lau leʻolahi ia:

“ʻI heʻetau hoko ko ha siasí, ʻoku ʻikai totonu ke ʻi ai ha taha ʻe toe ʻofa mo manavaʻofa lahi ange. Tuku muʻa ke tau takimuʻa ʻi he anga hono fakahaaʻi ʻetau ʻofá, manavaʻofá mo e tokoní. ʻOua naʻa tau ʻai ke ʻikai fakakau pe taʻe fakaʻapaʻapaʻi ʻe he fāmilí ʻa kinautolu ʻoku fili ha tōʻonga moʻui kehe ko e ola ʻo ʻenau ngaahi ongo fekauʻaki mo honau tuʻunga tangata pe fefiné” (“Love One Another: A Discussion on Same-Sex Attraction,” mormonsandgays.org).

Fakaafeʻi e kau akó ke nau fakafuofuaʻi ʻenau ngaahi tōʻonga fakakaukaú mo e ngaahi tōʻonga ki he kakai ʻoku femanakoʻaki pē e tangata mo e tangatá pe fefine mo e fefiné. ʻOku fenāpasi nai ʻa e ngaahi tōʻonga fakakaukaú mo e tōʻonga ko iá pea mo e ngaahi akonaki mo e sīpinga ʻa e ʻEikí?

• Ko e hā te ke fai ʻo kapau te ke ʻi ha kulupu ʻoku fai ai ha ngaahi lea kovi ʻo kau ki he kakai ʻoku nau aʻusia ʻa e femanakoʻaki pē e tangata mo e tangatá pe fefine mo e fefiné?

Fakamoʻoni ange kapau te tau fakahaaʻi ha ʻofa mo e angaʻofa lahi ange ki hotau ngaahi tokoua mo e tuofāfine ʻoku femanakoʻaki pe tangata mo e tangatá pe fefine mo e fefiné, ʻe lava ke liliu e moʻuí, ʻe lava ke fakamoʻui ʻa e ngaahi fāmilí, pea ʻe lava ke ongoʻi ʻe he kāingalotu ʻo e Siasí ʻoku ongoʻi liʻekiná ʻoku talitali lelei ange kinautolu ʻe he kāingalotu ʻo e Siasí. Fakamanatu ki he kau akó ʻoku lava ke maʻu ha taha pē ʻokú ne feinga ke tauhi e ngaahi fekaú, pea mo ia ʻoku tuʻu maʻu ʻi he ngaahi fuakava ʻo e ongoongoleleí ʻa e ngaahi tāpuaki ʻo e Fakalelei ʻa Sīsū Kalaisí.

Fakaafeʻi e kau akó ke nau fakakaukau ki ha niʻihi fakafoʻituitui ʻoku nau ʻilo ʻoku femanakoʻaki pe tangata mo e tangata pe fefine mo e fefine pea fakalaulauloto ki he meʻa te nau fai ke angaʻofa lahi ange ai kiate kinautolu lolotonga ʻenau tui moʻoni ki he fono ʻa e ʻEikí ki he angamaʻá.

Laukonga ʻa e Tokotaha Akó

• Mātiu 7:12; Sione 8:1–11; 15:12; Tokāteline mo e Ngaahi Fuakava 76:24; Mōsese 2:27; mo e palakalafi ua ʻo e “Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129.

• Jeffrey R. Holland, “Tokoniʻi ʻo Kinautolu ʻoku Fefaʻuhi mo e Femanakoʻaki pē ʻa Tangata mo e Tangatá pe Fefine mo e Fefiné,”Ensign, ʻOkatopa 2007, 42–45.