Thawj Pawg Thawj Tswj Hwm Lus Cev
Peb lub hli tom qab uas tau txhim tsa lub Koom Txoos, tus Tswv, dhau ntawm tus Yaj Saub Yauxej Xamiv los, tau qhia Yauxej tus poj niam, Emma, kom nws xaiv tseg ib co nkauj qhuas Vajtswv dawb ceev rau lub Koom Txoos. Tus Tswv hais tias nws zoo siab rau zaj nkauj uas tawm hauv nruab siab los, muaj tseeb tiag, zaj nkauj ntawm cov ncaj ncees yog ib zaj lus thov rau nws, thiab nws yuav teb nrog ib qho koob hmoov los rau saum lawv taub hau (saib Q&K 25:12).
Nim no, 150 xyoo tom qab uas lub Koom Txoos muab thawj phau nkauj qhuas Vajtswv luam tawm, peb zoo siab muab phau ntawv uas peb kho no rau nej. Ntau zaj uas muaj hauv thawj phau nkauj qhuas Vajtswv los muaj, thiab ntau zaj nkauj qhuas Vajtswv tshiab los muaj thiab. Tau xaiv tseg tag nrho tej zaj no kom pab tau tej yam uas cov mej zeej hauv lub Koom Txoos nyob thoob plaws lub ntiaj teb xav tau.
Cov Nkauj hauv Peb lub Koom Txoos tej Kev Sib Ntsib
Cov nkauj uas tshoov peb lub siab yog tej yam tseem ceeb nyob hauv peb lub koom txoos tej kev sib ntsib. Cov nkauj qhuas Vajtswv caw tus Tswv tus Ntsuj Plig los, ua rau peb muaj kev tswm seeb, ua rau peb cov mej zeej koom siab, thiab qhib ib txoj kev rau peb qhuas tus Tswv.
Thaum peb hu tej zaj nkauj qhuas Vajtswv ces peb tshaj tawm tej lus cob qhia zoo tshaj plaws. Cov nkauj qhuas Vajtswv ua rau peb xav hloov siab lees txim thiab ua tej yam zoo, txhawb peb zaj lus tim khawv thiab kev ntseeg, pab cov uas raug txom nyem, nplij cov uas nyuaj siab, thiab tshoov peb lub siab kom peb nyiaj kom mus txog thaum kawg.
Peb cia siab tias peb yuav hu nkauj qhuas Vajtswv ntau dua ntxiv hauv peb tej pawg ntseeg. Peb yaum kom tag nrho cov mej zeej, tsis hais cov uas txawj hu nkauj los yog, nrog peb koom hu nkauj cov nkauj qhuas Vajtswv. Peb cia siab tias cov thawj coj, cov kws qhia, thiab cov mej zeej uas hais lus hauv lub koom txoos yuav siv phau nkauj qhuas Vajtswv thiaj yuav nrhiav tau cov lus cob qhia uas muaj hwj chim thiab zoo nkauj heev.
Haiv Neeg Ntseeg hauv Hnub Nyoog Kawg yeej koom ua tej pawg hu nkauj tau ntev heev. Tsim nyog uas txhua pawg ntseeg thiab ceg ntseeg hauv lub Koom Txoos muaj ib pawg hu nkauj uas hu nkauj ntau zaus.
Cov Nkauj hauv Peb Tsev
Cov nkauj muaj hwj chim loj kawg nkaus rau kev pab tsev neeg sab ntsuj plig loj hlob tuaj thiab pab lawv rau siab ntseeg txoj moo zoo. Haiv Neeg Ntseeg yuav tau ua rau lawv lub tsev muaj lub suab nkauj uas tsim nyog puv nkaus.
Peb phau nkauj qhuas Vajtswv zoo siv hauv tsev thiab zoo siv hauv lub tsev sib ntsib. Peb cia siab hais tias peb yuav saib phau nkauj qhuas Vajtswv no rau nqi koom nrog cov vaj lug kub thiab lwm yam phau ntawv uas qhia txog kev teev ntuj hauv peb tsev. Tej zaj nkauj qhuas Vajtswv yuav ua rau tsev neeg muaj kev zoo nkauj thiab kev nyob kaj siab lug hauv lawv lub siab thiab ua rau tsev neeg ib leeg hlub thiab koom siab nrog ib leeg.
Cia li qhia nej cov me nyuam kom lawv nyiam tej zaj nkauj qhuas Vajtswv. Hu nkauj thaum Hnub Caiv, hauv tsev neeg hmo ua ke, thaum kawm vaj lug kub thiab thaum yuav thov Vajtswv. Hu nkauj thaum nej ua hauj lwm, thaum nej ua si, thiab thaum nej mus ub mus no ua ke. Hu tej zaj nkauj qhuas Vajtswv thaum xwv nej cov me nyuam kom tsaug zog kom thiaj ua rau lawv txoj kev ntseeg thiab zaj lus tim khawv loj hlob tuaj.
Coj Nkauj hauv Peb lub Neej
Ntxiv rau qhov uas tej zaj nkauj qhuas Vajtswv foom koob hmoov rau peb cov uas yog lub Koom Txoos cov mej zeej thiab tsev neeg, cov nkauj qhuas Vajtswv yuav pab peb txhua tus ib yam. Cov nkauj qhuas Vajtswv txhawb peb lub siab, ua rau peb ua siab loj thiab tshoov peb lub siab kom peb ua ncaj ua ncees. Cov nkauj no ua rau peb muaj tej kev xav uas los saum ntuj los hauv peb lub siab ntsws thiab coj ib txoj kev thaj yeeb los rau peb.
Tej zaj nkauj qhuas Vajtswv kuj pab peb tiv tau tus yeeb ncuab tej kev ntxias. Peb yaum kom nej cim ntsoov cov nkauj qhuas Vajtswv uas nej nyiam zoo tshaj plaws thiab kawm tej nqe vaj lug kub uas piv txog tej zaj ntawd. Ces, yog tias muaj tej kev xav tsis tsim nyog nkag hauv nej lub siab, cia li hu ib zaj nkauj qhuas Vajtswv rau nej tus kheej, tej kev xav zoo thiaj yuav ua rau tej kev phem tawm mus.
Cov kwv tij thiab cov muam, cia peb siv cov nkauj qhuas Vajtswv coj tus Tswv tus Ntsuj Plig los rau hauv peb pawg ntseeg, hauv peb tsev neeg, thiab peb lub neej. Cia peb cim ntsoov thiab xav txog tej zaj no, hu nkauj thiab hais lus los ntawm tej no, thiab txais yuav tej no kom txhawb nqa peb sab ntsuj plig. Cia li paub hais tias ib zaj nkauj ntawm cov neeg ncaj ncees yog ib zaj lus thov rau peb Leej Txiv Saum Ntuj Ceeb Tsheej , thiab Nws yuav teb nrog ib qho koob hmoov los rau saum nej taub hau.
Thawj Pawg Thawj Tswj Hwm