Tshooj 25
Kev tshwm sim uas tus Yaj Saub Joseph Smith tau txais, nyob hauv Harmony, Pennsylvania, lub Xya Hli Ntuj xyoo 1830 (saib cov lus piav lub ntsiab ntawm tshooj 24). Txoj kev tshwm sim no qhia txog tus Tswv lub siab nyiam rau Emma Smith, tus Yaj Saub tus poj niam.
1–6, Tus Tswv hu Emma Smith, ib tug poj niam uas tau xaiv tseg lawm, los pab thiab nplij nws tus txiv lub siab; 7–11, Tus Tswv kuj hu kom nws sau ntawv, piav cov vaj lug kub, thiab xaiv tej nkauj qhuas Vajtswv; 12–14, Zaj nkauj ntawm cov ncaj ncees yog kev thov rau tus Tswv; 15–16, Tej ntsiab cai ntawm kev mloog lus nyob hauv txoj kev tshwm sim no yog hais rau tag nrho txhua tus.
1 Mloog tus Tswv koj tus Vajtswv lub suab, thaum kuv hais lus rau koj, Emma Smith, kuv tus ntxhais, vim kuv hais tseeb rau koj tias, tag nrho cov uas txais kuv txoj moo zoo ces yog cov tub thiab cov ntxhais nyob hauv kuv lub nceeg vaj.
2 Kuv muab kev tshwm sim rau koj ntsig txog kuv lub siab nyiam; thiab yog hais tias koj rau siab ntseeg thiab taug tej kev tsim txiaj rau ntawm kuv qhov muag, kuv yuav tsom kwm koj txoj sia, thiab koj yuav tau txais qub txeeg qub teg nyob hauv Xi-oos.
3 Saib seb, tus Tswv twb zam txim rau koj tej kev txhaum, thiab koj yog ib tug poj niam tau xaiv tseg, tus uas kuv tau hu.
4 Tsis txhob yws vim rau qhov tej yam uas koj tsis tau pom, vim tsis pub tej ntawd rau koj thiab rau tej neeg ntiaj teb pom, uas yog raws li kuv lub tswv yim rau ib lub sij hawm uas yuav los.
5 Thiab lub luag hauj lwm uas kuv hu koj ua yog los ua kev nplij siab rau kuv tus tub qhe, Joseph Smith, tus Hluas, koj tus txiv, thaum nws muaj kev txom nyem, siv tej lus nplij, nrog tus cwj pwm ua siab mos siab muag.
6 Thiab koj yuav nrog nws mus thaum lub sij hawm nws yuav mus, thiab ua ib tug teev ntawv rau nws, thaum uas tsis muaj neeg ua tus teev ntawv rau nws, xwv kom kuv thiaj tau xa kuv tus tub qhe, Oliver Cowdery, mus rau qhov twg los xij kuv.
7 Thiab nws txhais tes yuav tsa koj los piav tej vaj lug kub, thiab ntuas cov ntseeg, raws li qhov uas kuv tus Ntsuj Plig yuav qhia rau koj.
8 Vim nws yuav tsa nws ob txhais tes rau saum koj taub hau, thiab koj yuav tau txais tus Vaj Ntsuj Plig Dawb Huv, thiab koj yuav siv koj lub sij hawm sau ntawv, thiab kawm ntau yam.
9 Thiab koj tsis tas ntshai, vim koj tus txiv yuav txhawb koj nyob hauv lub koom txoos; vim Vajtswv hu nws los mus rau cov ntseeg, xwv kom yuav muab txhua yam uas kuv pom zoo ua tshwm sim los rau lawv, raws li lawv txoj kev ntseeg.
10 Thiab kuv hais tseeb rau koj tias koj yuav tsum muab tej yam ntawm lub ntiaj teb no tso tseg, thiab nrhiav tej yam ntawm ib qhov chaw uas zoo dua.
11 Thiab kuj yuav cia koj los xaiv ib co nkauj qhuas Vajtswv uas dawb ceev, raws li yuav cia rau koj, qhov uas yuav txaus kuv siab, kom muaj nyob hauv kuv lub koom txoos.
12 Vim kuv tus ntsuj plig zoo siab rau zaj nkauj uas tawm hauv nruab siab los; muaj tseeb tiag, zaj nkauj ntawm cov ncaj ncees yog ib zaj lus thov rau kuv, thiab tus Tswv yuav teb nrog ib txoj koob hmoov los rau saum lawv taub hau.
13 Yog li ntawd, koj cia li zoo siab thiab xyiv fab, thiab cia li muab siab npuab tej kev khi lus uas koj tau khi lawm.
14 Coj tus cwj pwm ua siab mos siab muag mus ntxiv, thiab ceev faj rau txoj kev muab hlob. Cia koj lub siab lub ntsws zoo siab rau koj tus txiv, thiab lub yeeb koob uas yuav los rau nws.
15 Ua raws li kuv tej lus txib kom tsis tu ncua, ces koj yuav tau txais ib lub meej mom ntawm kev ncaj ncees. Thiab yog koj tsis ua li no, ces koj yuav los tsis tau ntawm qhov chaw uas kuv nyob.
16 Thiab kuv hais tseeb tseeb rau koj tias, ntawm no yog kuv lub suab los mus rau sawv daws. Amees.