1 Kuv hais tseeb tseeb rau nej tias, kuv, tus uas twb hais lus los ntawm kuv tus Ntsuj Plig lub suab, uas twb yog Alafas thiab Aumenkas, nej tus Tswv thiab nej tus Vajtswv—

2 Cia li mloog, auj nej cov uas tau muab nej lub npe kom tawm mus tshaj tawm kuv txoj moo zoo, thiab mus yim kuv lub vaj txiv hmab.

3 Saib seb, kuv hais rau nej hais tias yog kuv lub siab xav kom nej yuav tsum mus thiab tsis txhob nyob, thiab kom tsis txhob tub nkeeg tiam sis khwv ua hauj lwm nrog nej lub zog—

4 Tsa hlo nej lub suab kom zoo li lub suab raj hlau nrov, tshaj tawm txoj kev tseeb raws li tej kev tshwm sim thiab tej lus txib uas kuv tau muab rau nej.

5 Thiab li no, yog nej rau siab ces nej yuav sau ntau tes nplej, thiab tau sam xeeb, thiab yeeb koob, thiab txoj kev tsis txawj tuag, thiab txoj sia nyob mus ib txhis ntoo.

6 Yog li ntawd, kuv hais tseeb rau kuv tus tub qhe William E. McLellin tias, kuv thim txoj kev txib uas kuv tau muab rau nws kom mus lawm tim tej teb chaws sab hnub tuaj;

7 Thiab kuv muab kev txib tshiab thiab ib lo lus txib tshiab rau nws, qhov uas kuv, tus uas yog tus Tswv, qhuab ntuas nws rau txoj kev yws yws ntawm nws lub siab;

8 Thiab nws ua txhaum; txawm li ntawd los, kuv zam txim rau nws thiab hais dua rau nws tias, Koj cia li mus lawm nram tej teb chaws qab teb.

9 Thiab cia kuv tus tub qhe Luke Johnson mus nrog nws, thiab tshaj tawm tej yam uas kuv tau txib nkawd—

10 Thiab thov tus Tswv lub npe kom tau txais tus Nplij Siab, tus uas yuav qhia lawv txhua yam uas tsim nyog rau lawv—

11 Thiab thov Vajtswv tas mus li kom lawv tsis txhob feeb tsis meej; thiab npaum li uas lawv ua li no, kuv twb yuav nrog lawv nyob kom txog thaum kawg.

12 Saib seb, qhov no yog tus Tswv nej tus Vajtswv lub siab nyiam rau nej. Twb yog li ntawd. Amees.

13 Thiab ntxiv, tus Tswv hais tseeb li no tias, cia kuv tus tub qhe Orson Hyde thiab kuv tus tub qhe Samuel H. Smith nkawd mus lawm tim tej teb chaws sab hnub tuaj, thiab tshaj tawm tej yam uas kuv tau txib nkawd; thiab npaum li uas nkawd rau siab, xyuas seb, kuv twb yuav nrog nkawd nyob kom txog thaum kawg.

14 Thiab ntxiv, kuv hais tseeb rau kuv tus tub qhe Lyman Johnson, thiab rau kuv tus tub qhe Orson Pratt tias, kom nkawd mus lawm tim tej teb chaws sab hnub tuaj thiab; thiab saib seb, thiab xyuas seb, kuv twb nrog nkawd nyob thiab, kom txog thaum kawg.

15 Thiab ntxiv, kuv hais rau kuv tus tub qhe Asa Dodds, thiab rau kuv tus tub qhe Calves Wilson tias, kom nkawd mus lawm tim tej teb chaws sab hnub poob thiab, thiab tshaj tawm kuv txoj moo zoo, ib yam li kuv tau txib nkawd.

16 Thiab tus uas rau siab ntseeg yuav kov yeej txhua yam, thiab yuav tsa tus ntawd sawv thaum txog hnub kawg.

17 Thiab ntxiv, kuv hais rau kuv tus tub qhe Major N. Ashley, thiab kuv tus tub qhe Burr Riggs tias, kom nkawd mus lawm nram teb chaws qab teb thiab.

18 Muaj tseeb tiag, kom tag nrho cov ntawd mus, ib yam li kuv tau txib lawv, mus ntawm ib lub tsev rau ib lub tsev, thiab ntawm ib lub zos mus rau ib lub zos, thiab ntawm ib lub nroog mus rau ib lub nroog.

19 Thiab nyob hauv txhua lub tsev uas nej nkag mus hauv, thiab lawv txais yuav nej, cia li foom nej txoj koob hmoov rau tsev neeg ntawd.

20 Thiab nyob hauv txhua lub tsev uas nej nkag mus, thiab lawv tsis txais yuav nej, nej cia li tawm ceev ceev ntawm lub tsev ntawd mus, thiab nchos tej hmoov av ntawm nej ko taw kom ua tim khawv nkaug lawv.

21 Thiab nej yuav tau txoj kev xyiv fab thiab kev zoo siab puv npo; thiab paub li no tias, nyob rau hnub txiav txim nej yuav ua cov neeg txiav txim rau tsev neeg ntawd, thiab rau txim rau lawv;

22 Thiab cov neeg tsis hwm Vajtswv tseem yuav nyiaj taus dua tsev neeg ntawd nyob rau hauv hnub txiav txim; yog li ntawd, muab nej tej siv sia thiab rau siab ntseeg, ces nej yuav kov yeej txhua yam, thiab yuav tsa nej sawv thaum txog hnub kawg. Twb yog li ntawd. Amees.

23 Thiab ntxiv, tus Tswv hais li no rau nej tias, auj nej cov txwj laug ntawm kuv lub koom txoos, cov uas tau muab nej lub npe xwv kom nej yuav paub nws lub siab nyiam ntsig txog nej—

24 Saib seb, kuv hais rau nej tias, cov ntseeg dej num yog mus pab txhawb nqa tej tsev neeg ntawm cov ntawd, thiab kuj txhawb nqa tej tsev neeg ntawm cov uas tus Tswv hu thiab yeej yuav tsum xa mus rau hauv ntiaj teb mus tshaj tawm txoj moo zoo rau neeg ntiaj teb.

25 Yog li ntawd, kuv, tus uas yog tus Tswv, muab lo lus txib no rau nej, kom nej mus nrhiav chaw rau nej tsev neeg, npaum li uas nej cov kwv tij yuav txaus siab qhib lawv lub siab.

26 Thiab cia tag nrho cov uas muaj peev xwm nrhiav tau chaw rau lawv tsev neeg, thiab tau kev txhawb nqa los ntawm cov ntseeg rau lawv, kom lawv txhob tso tseg txoj kev mus rau hauv ntiaj teb, txawm yog mus rau sab hnub tuaj los yog sab hnub poob, los sis mus rau sab qaum teb, los yog sab qab teb.

27 Cia lawv thov ces lawv yuav tau txais, khob ces yuav qhib rau lawv, thiab yuav qhia los saum ntuj los kom lawv paub, twb yog los ntawm tus Nplij Siab, saib lawv yuav mus qhov twg.

28 Thiab ntxiv, kuv hais tseeb rau nej tias, txhua tus neeg uas yuav tsum nrhiav noj nrhiav haus rau nws tsev neeg, cia nws nrhiav noj nrhiav haus, ces nws yeej yuav tsis poob nws lub meej mom li; thiab cia nws khwv ua hauj lwm nyob hauv lub koom txoos.

29 Cia txhua tus neeg rau siab ntso rau txhua yam. Thiab tus neeg tub nkeeg yuav tsis muaj chaw nyob hauv lub koom txoos, tsuas yog nws hloov siab lees txim thiab kho nws tej kev xwb.

30 Yog li ntawd, cia kuv tus tub qhe Simeon Carter thiab kuv tus tub qhe Emer Harris nkawd koom siab ua hauj lwm qhuab qhia;

31 Thiab kuv tus tub qhe Ezra Thayre thiab kuv tus tub qhe Thomas B. Marsh thiab;

32 Kuv tus tub qhe Hyrum Smith thiab kuv tus tub qhe Reynolds Cahoon thiab;

33 Thiab kuv tus tub qhe Daniel Stanton thiab kuv tus tub qhe Seymour Brunson thiab;

34 Thiab kuv tus tub qhe Sylvester Smith thiab kuv tus tub qhe Gideon Carter thiab;

35 Thiab kuv tus tub qhe Ruggles Eames thiab kuv tus tub qhe Stephen Burnett thiab;

36 Thiab kuv tus tub qhe Micah B. Welton thiab kuv tus tub qhe Eden Smith thiab. Twb yog li ntawd. Amees.