1 Kuv tau hu kuv tus tub qhe, Orson Hyde, los ntawm nws txoj kev tsa mus tshaj tawm txoj moo zoo uas kav ib txhis, los ntawm tus Vajtswv muaj sia zees nyob tus Ntsuj Plig, rau ntawm ib co neeg mus rau ib co, thiab ntawm ib thaj av mus rau ib thaj, nyob hauv tej pawg ntawm cov neeg phem, nyob hauv lawv tej tsev sab laj, sib tham nrog lawv thiab piav tag nrho vaj lug kub rau lawv.

2 Thiab saib seb, thiab xyuas seb, qhov no yog ib tug yam ntxwv rau tag nrho cov uas tus Tswv tau tsa rau lub pov thawj hwj no, cov uas lawv ntiag tug hauj lwm yog txib kom lawv tawm mus tshaj txoj moo zoo—

3 Thiab qhov no yog ib tug yam ntxwv rau lawv, hais tias lawv yuav tsum hais lus thaum tus Vaj Ntsuj Plig Dawb Huv tshoov lawv lub siab.

4 Thiab txhua yam uas lawv yuav hais thaum tus Vaj Ntsuj Plig Dawb Huv tshoov lawv lub siab yeej yog vaj lug kub, yeej yog tus Tswv lub siab nyiam, yeej yog qhov tus Tswv xav, yeej yog tus Tswv txoj lus, yeej yog tus Tswv lub suab, thiab Vajtswv lub hwj chim rau kev cawm seej.

5 Saib seb, qhov no yog tus Tswv txoj kev cog lus rau nej, auj nej cov uas yog kuv cov tub qhe.

6 Yog li ntawd, cia li zoo siab, thiab tsis txhob ntshai, vim kuv uas yog tus Tswv twb nyob nrog nej, thiab yuav sawv ntawm nej ib sab; thiab nej yuav ua pov thawj txog kuv, uas twb yog Yexus Khetos, hais tias kuv yog Vajtswv tus uas muaj txoj sia nyob Leej Tub, hais tias yeej muaj kuv, hais tias tseem muaj kuv, thiab hais tias kuv tseem yuav los.

7 Nov yog tus Tswv txoj lus rau nej, kuv tus tub qhe Orson Hyde, thiab kuj yog rau kuv tus tub qhe Luke Johnson, thiab rau kuv tus tub qhe Lyman Johnson, thiab rau kuv tus tub qhe William E. McLellin, thiab rau tag nrho cov txwj laug uas rau siab ntseeg ntawm kuv lub koom txoos—

8 Nej cia li mus thoob plaws lub ntiaj teb, tshaj tawm txoj moo zoo rau txhua tus neeg, thiab ua los ntawm txoj cai uas kuv tau muab rau nej, muab neeg ua kev cai raus dej los ntawm Leej Txiv, thiab ntawm Leej Tub, thiab ntawm tus Vaj Ntsuj Plig Dawb Huv lub npe.

9 Thiab tus uas ntseeg thiab ua kev cai raus dej yuav txais kev cawm dim, tiam sis tus uas tsis ntseeg yuav raug txim.

10 Thiab yuav muaj tej cim los ua koob hmoov rau tus uas ntseeg, ib yam li tau muab sau cia.

11 Thiab yuav cia kom nej paub tau tej cim ntawm lub caij nyoog, thiab tej cim ntawm Neeg Leej Tub txoj kev los;

12 Thiab rau tag nrho cov uas Leej Txiv yuav ua pov thawj, yuav muab hwj chim rau nej khi lawv cia rau txoj sia nyob mus ib txhis. Amees.

13 Thiab nim no, ntsig txog tej yam uas muaj ntxiv rau tej kev khi lus thiab tej lus txib, tej ntawd yog li no—

14 Tom qab no mus tseem tshuav, thaum txog lub sij hawm tus Tswv pom zoo, yuav tsum muab lwm cov npisov tsa rau lub koom txoos, los mus txhawb pab kom raws li thawj tug;

15 Yog li ntawd lawv yuav tsum yog cov pov thawj hlob uas tsim nyog, thiab Thawj Pawg Thawj Tswj Hwm ntawm lub Pov Thawj Hwj Mekhixedes yuav muab lawv tsa, tsuas yog lawv yog kiag Aloos cov xeeb ntxwv xwb.

16 Thiab yog hais tias lawv yog kiag Aloos cov xeeb ntxwv lawv muaj txoj cai los ua tus npisov, yog hais tias lawv yog tus tub hlob ntawm Aloos cov tub;

17 Vim tus tub hlob muaj txoj cai ntawm pawg thawj tswj hwm los tswj hwm lub pov thawj hwj no, thiab tej yawm sij los yog txoj cai rau qhov ntawd.

18 Tsis muaj ib tug neeg uas muaj txoj cai rau lub luag hauj lwm no, los mus tuav cov yawm sij ntawm lub pov thawj hwj no, tsuas yog nws yog kiag Aloos tus xeeb ntxwv thiab tus tub hlob xwb.

19 Tiam sis, vim tus pov thawj hlob ntawm lub Pov Thawj Hwj Mekhixedes muaj txoj cai coj ua tag nrho tej luag hauj lwm qis zog nws muaj cai coj ua txoj hauj lwm npisov thaum tsis muaj kiag Aloos ib tug xeeb ntxwv, yog hu thiab tshwj cia thiab tsa nws rau lub hwj chim no lawm, los ntawm Thawj Pawg Thawj Tswj Hwm ntawm lub Pov Thawj Hwj Mekhixedes txhais tes.

20 Thiab Pawg Thawj Tswj Hwm no kuj yuav tsum xaiv Aloos ib tug xeeb ntxwv kiag los, thiab Pawg Thawj Tswj Hwm yuav tsum pom hais tias nws yog neeg tsim nyog, thiab pleev roj rau nws, thiab muab nws tsa, tsis li ces twb tsis tau txoj cai tiag rau nws siv nws lub pov thawj hwj los coj.

21 Tiam sis, los ntawm txoj kev tshaj tawm ntsig txog lawv txoj cai rau lub pov thawj hwj los ntawm leej txiv mus rau leej tub, lawv aws tau lawv txoj kev pleev roj lub sij hawm twg los tau yog lawv ua tau pov thawj txog lawv caj ceg, los yog nrhiav tau lawv caj ceg los ntawm txoj kev tshwm sim los ntawm tus Tswv uas yog muab ntawm Pawg Thawj Tswj Hwm uas tau hais npe saud txhais tes.

22 Thiab ntxiv, tsis muaj ib tug npisov los yog pov thawj hlob uas tus Tswv muab tsa los ua txoj hauj lwm qhuab qhia no yuav raug txiav txim los yog raug txim rau kev txhaum dab tsi, tsuas yog los ntawm Thawj Pawg Thawj Tswj Hwm ntawm lub koom txoos xwb;

23 Thiab yog Pawg Thawj Tswj Hwm no txiav txim hais tias nws muaj txim, los ntawm zaj lus tim khawv uas hais rhuav tsis tau, ces nws yuav raug txim;

24 Thiab yog hais tias nws hloov siab lees txim ces yuav zam txim rau nws, raws li tej kev khi lus thiab tej lus txib ntawm lub koom txoos.

25 Thiab ntxiv, npaum li uas cov niam thiab txiv muaj me nyuam nyob hauv Xi-oos, los yog nyob ntawm Xi-oos ib ceg txheem ntseeg uas tau tsim muaj, es tsis qhia kom lawv to taub tej lus qhuab qhia ntawm kev hloov siab lees txim, kev ntseeg Khetos uas yog Vajtswv tus uas muaj txoj sia nyob Leej Tub, thiab kev cai raus dej thiab lub txiaj ntsim Vaj Ntsuj Plig Dawb Huv los ntawm txoj kev tso tes rau saum taub hau, thaum muaj yim xyoo, ces txoj kev txhaum yuav nyob saum lawv niam lawv txiv lub taub hau.

26 Vim qhov no yog ib txoj kev cai rau cov neeg nyob hauv Xi-oos, los yog nyob ntawm Xi-oos ib ceg txheem ntseeg uas tau tsim muaj.

27 Thiab lawv cov me nyuam yuav tsum ua kev cai raus dej rau txoj kev zam txim rau lawv tej kev txhaum thaum muaj yim xyoo, thiab txais txoj kev tso tes rau saum taub hau.

28 Thiab lawv kuj yuav tsum qhia lawv cov me nyuam kom thov Vajtswv, thiab kom taug kev ncaj rau tus Tswv.

29 Thiab tej neeg nyob hauv Xi-oos kuj yuav tsum hwm Hnub Caiv kom dawb huv.

30 Thiab tej neeg nyob hauv Xi-oos kuj yuav tsum nco ntsoov lawv tej kev khwv, npaum li uas yuav tsa lawv los khwv, los ntawm kev rau siab ntseeg tag nrho; vim tus Tswv yuav nco ntsoov txog tus neeg tub nkeeg.

31 Nim no, kuv, tus uas yog tus Tswv, twb tsis txaus siab rau cov neeg nyob hauv Xi-oos, vim muaj neeg tub nkeeg nyob nrog lawv; thiab lawv cov me nyuam los kuj hlob tuaj thaum ua kev phem; lawv kuj tsis mob siab nrhiav tej kev nplua nuj uas nyob mus ib txhis, tiam sis lawv qhov muag ntshaw luag tug puv npo.

32 Tej yam no yuav tsum tsis txhob muaj, thiab yuav tsum tseg txhob ua ntxiv nyob hauv lawv; yog li ntawd, cia kuv tus tub qhe Oliver Cowdery coj tej lus hais no mus rau thaj av Xi-oos.

33 Thiab kuv muab ib lo lus txib rau lawv—hais tias tus uas tsis thov Vajtswv rau ntawm tus Tswv nyob rau thaum lub caij ntawd, ces cia tus txiav txim ntawm kuv haiv neeg nco ntsoov txog nws.

34 Tej lus hais no yeej muaj tseeb thiab ncaj; yog li ntawd, tsis txhob ua txhaum tej no, thiab tsis txhob rho dab tsi tawm hauv cov lus no mus.

35 Saib seb, kuv yog Alafas thiab Aumenkas, thiab kuv los sai sai no. Amees.