1 Auj Vajtswv, koj nyob qhov twg? Thiab lub tsev ntaub uas npog koj qhov chaw nkaum nyob qhov twg?

2 Koj txhais tes yuav nkaum ntev npaum li cas, thiab koj lub qhov muag, muaj tseeb tiag koj lub qhov muag dawb huv, ntsia puag saum ntuj ceeb tsheej uas nyob mus ib txhis tuaj pom tej uas luag ua tsis zoo rau koj cov neeg thiab koj cov tub qhe, thiab lawv lub suab quaj tshoov koj lub pob ntseg?

3 Muaj tseeb tiag, auj tus Tswv, koj cov neeg yuav raug tej kev ua tsis yog thiab tej kev quab yuam tsis raug cai no ntev npaum li cas, ua ntej koj lub siab yuav mos muag rau lawv, thiab koj lub siab yuav kub lug nrog kev khuv leej rau lawv?

4 Auj tus Tswv Vajtswv uas Muaj Hwj Chim Tag Nrho, tus tsim lub ntuj, ntiaj teb, thiab tej dej hiav txwv, thiab txhua yam uas muaj nyob rau haud, thiab tus uas tswj thiab kav tus dab phem, thiab lub ntuj txiag thiab teb tsaus Si-aus—cia li xyab koj txhais tes; kom koj lub qhov muag pom tshab; cia li muab koj lub tsev ntaub tshem; cia li muab koj qhov chaw nkaum qhib kom txhob npog lawm; cia li qaij koj lub pob ntseg los hnov; cia li ua rau koj lub siab mos muag, thiab cia li ua rau koj lub siab kub lug nrog kev khuv leej rau peb.

5 Cia koj txoj kev chim siab npau tawm tsam peb cov yeeb ncuab; thiab, los ntawm koj txoj kev tshawj chim hauv koj lub siab, cia li muab koj rab ntaj ua pauj tej uas luag ua tsis yog rau peb lawm.

6 Nco ntsoov koj haiv neeg ntseeg uas raug txom nyem, auj peb tus Vajtswv; thiab koj cov tub qhe yuav xyiv fab rau koj lub npe mus ib txhis li.

7 Kuv tus tub, koj cia li nyob kaj siab lug; koj tej kev nyuaj siab thiab koj tej kev txom nyem yuav muaj nyob ib nyuag ntus xwb;

8 Thiab tom qab ntawd, yog koj ua tib zoo nyiaj mus, Vajtswv yuav tsa koj mus nto ntuj; koj yuav yeej tag nrho koj cov yeeb ncuab.

9 Koj cov phooj ywg twb sawv ntawm koj ib sab, thiab lawv yuav rov qab txais tos koj nrog kev sov siab thiab kev phooj ywg.

10 Koj twb tsis tau zoo li Yauj; koj cov phooj ywg tsis cem koj, thiab tsis liam tias koj ua txhaum, ib yam li lawv ua rau Yauj.

11 Thiab lawv cov uas liam tias koj ua txhaum, lawv txoj kev cia siab yuav qhuav mus, thiab tej lawv xav tau yuav yaj zoo li tej hws dej khov yaj thaum lub hnub sawv ci tuaj kub;

12 Thiab Vajtswv tau muab nws txhais tes thiab lub cim los hloov tej sij hawm thiab tej caij nyoog, thiab los ua kom lawv tsis thoob tsib to nrog, xwv kom lawv yuav tsis to taub nws tej kev ua hauj lwm zoo kawg nkaus; kom nws yuav sim lawv lub siab thiab thiab txhom lawv thaum nyob hauv lawv tus kheej txoj kev txawj ntxias.

13 Thiab vim lawv lub siab tau liam lawm, thiab vim tej yam uas lawv txaus siab ua kom raug lwm tus, thiab nyiam kom lwm tus raug txom nyem, tej ntawd yuav los raug lawv tus kheej kom txaus nkaus;

14 Kom lawv yuav poob siab thiab, thiab kom lawv tej kev cia siab raug muab txiav tawm;

15 Tsis tshuav ntau xyoo txij hnub no mus, es lawv thiab lawv cov xeeb leej xeeb ntxwv yuav raug ua kom puas tsuaj nyob hauv qab ntuj, Vajtswv hais li, kom tsis tshuav lawv ib tug sawv ntawm phab ntsa li.

16 Tag nrho cov uas tsa luj taws tuam cov uas kuv pleev roj rau yuav raug foom tsis zoo, tus Tswv hais li, thiab liam hais tias lawv tau ua txhaum thaum lawv twb tsis tau ua txhaum rau ntawm kuv, tus Tswv hais li, tiam sis tau ua yam uas kuv pom zoo, thiab yam uas kuv tau txib lawv.

17 Tiam sis cov uas liam kev ua txhaum lawv ua li vim lawv yog cov tub qhe ntawm kev txhaum, thiab lawv tus kheej yog cov me nyuam tsis mloog lus.

18 Thiab cov uas hais lus tsis tseeb twv tawm tsam kuv cov tub qhe, kom yuav coj tau lawv mus rau kev ua qhev thiab kev tuag—

19 Kev txom nyem raug lawv; vim lawv tau ua txhaum rau kuv cov me nyuam lawv yuav raug txwv tawm ntawm cov kab ke hauv kuv lub tsev.

20 Lawv lub tawb yuav tsis puv, lawv tej vaj tsev thiab tej tsev rau tsiaj txhu yuav piam sij, thiab cov uas tau qhuas ntxias lawv yuav ntxub lawv.

21 Lawv yuav tsis muaj cai txais lub pov thawj hwj, thiab lawv cov xeeb leej xeeb ntxwv tom qab lawv ntawm ib tiam neeg mus rau ib tiam neeg.

22 Ntshai yuav zoo dua rau lawv yog muab ib txhib zeb dai rau ntawm lawv caj dab, thiab muab lawv pov kom poob deg hauv hiav txwv tob tob.

23 Kev txom nyem raug tag nrho cov uas ua rau kuv cov neeg tsis tau zoo, thiab muab ntiab mus, thiab muab tua, thiab ua tim khawv nkaug lawv, Ib Tsoom Tub Rog tus Tswv hais li; ib tiam nab muaj taug yuav tsis dim txoj kev raug txim ntuj txiag teb tsaus.

24 Saib seb, kuv lub qhov muag twb pom thiab paub tag nrho tej yam lawv ua, thiab kuv tau tshwj ib txoj kev txiav txim sai sai hauv lub caij nyoog txiav txim, rau lawv sawv daws;

25 Vim muaj ib lub sij hawm teem tseg rau txhua tus neeg, nyias raws li tej yam nyias ua.

26 Vajtswv yuav pub kev txawj ntse rau nej los ntawm nws tus Ntsuj Plig Dawb Huv, muaj tseeb tiag, los ntawm lub txiaj ntsim Vaj Ntsuj Plig Dawb Huv uas tsis paub piav, uas yeej tsis tau muab ua tshwm sim txij thaum ntuj tsim teb raug los txog nim no;

27 Kev txawj ntse uas peb cov yawg koob tau kub siab lug tos ntsoov kom tshwm sim los rau hauv lub caij nyoog kawg, kev txawj ntse uas cov tim tswv tau hais kom peb cov yawg koob xav txog, ib yam li tau muab tshwj tseg tos qhov txhij txhua ntawm lawv lub yeeb koob;

28 Ib lub sij hawm yuav los thaum uas yuav tsis cheem dab tsi, txawm yog muaj ib tug Vajtswv los sis ntau tus vaj tswv, lawv yuav tshwm los.

29 Txhua txoj kev tswj thiab kev kav, tej nom tswv thiab tej lub hwj chim, yuav tshwm sim los thiab yuav muab cob rau tag nrho cov uas rau siab nyiaj rau Yexus Khetos txoj moo zoo.

30 Thiab, saib puas muaj tej ciaj ciam teem rau tej ntuj los yog rau tej dej hiav txwv, los sis rau tej teb qhuav, los sis rau lub hnub, lub hli, los yog cov hnub qub—

31 Tag nrho tej sij hawm ntawm lub hnub, lub hli, thiab cov hnub qub txoj kev tig mus tig los, tag nrho kev teem muaj hnub, muaj hli, thiab muaj xyoo, thiab tag nrho tej sij hawm ntawm txhua hnub, txhua hli, thiab txhua xyoo, thiab tag nrho lub yeeb koob, tej kev cai, thiab tej sij hawm teem tseg, tus Tswv yuav muab ua tshwm sim los nyob hauv lub caij nyoog tso txoj cai uas muaj txhij txhua—

32 Raws li qhov uas tau muab tsa nyob hauv Pawg Sab Laj ntawm tus Vajtswv uas Nyob Mus Ib Txhis ntawm tag nrho lwm cov vaj tswv ua ntej muaj lub ntiaj teb no, qhov uas yuav tsum tshwj tseg rau thaum tag thiab thaum kawg, thaum txhua tus neeg yuav nkag mus rau ntawm Vajtswv xub ntiag mus ib txhis thiab rau ntawm nws qhov chaw so uas tsis txawj tuag.

33 Ntev li cas es tej dej uas ntws yuav tsis huv? Lub hwj chim twg thiaj yuav cheem tau ceeb tsheej? Tib yam nkaus li tib neeg twb tsis muaj peev xwm muab nws txhais npab uas qaug zog los thaiv tus dej Missouri kom txhob ntws raws li tau tsim kom ntws, los yog ua kom tus dej ntws nce toj, ces tib neeg twb cuam tshuam tsis tau qhov uas tus Muaj Hwj Chim Tag Nrho yuav muab tej kev txawj ntse nchuav saum ntuj ceeb tsheej los rau Tsoom Haiv Neeg Ntseeg hauv Hnub Nyoog Kawg.

34 Saib seb, cov uas tus Tswv hu los muaj coob, tiam sis cov uas nws xaiv los muaj tsawg. Thiab vim li cas nws thiaj tsis xaiv lawv?

35 Vim lawv tso siab plhuav rau tej yam ntawm lub ntiaj teb no, thiab xav muaj koob nto npe es lawv thiaj tsis kawm zaj lus qhia no—

36 Hais tias tej kev muaj cai ntawm lub pov thawj hwj sib txuas nrog tej lub hwj chim saum ntuj ceeb tsheej uas yeej tsis sib cais, thiab hais tias tsis muaj peev xwm tswj thiab tuav tau tej lub hwj chim saum ntuj ceeb tsheej tsuas yog los ntawm tej ntsiab cai ncaj ncees xwb.

37 Qhov uas hais tias muab tau tej ntawd rau peb, los muaj tseeb; tiam sis thaum peb nrhiav kev los npog peb tej kev txhaum, los yog ua kom muaj raws li peb txoj kev muab hlob, tej yam peb ntshaw uas tsis muaj nuj nqis, los yog tswj los yog kav los yog yuam noob neej cov ntsuj plig, los ntawm kev ua tsis ncaj ncees npaum li cas los, saib seb, ntuj ceeb tsheej txawm thim mus; tus Tswv tus Ntsuj Plig tu siab; thiab thaum nws thim tas lawm, ces Amees rau lub pov thawj hwj los yog txoj cai ntawm tus neeg ntawd.

38 Saib seb, ua ntej nws paub, ces nws twb raug muab tso tseg nws nyob nws, tuam tej ntsis hmuv, tsim txom haiv neeg ntseeg, thiab tawm tsam Vajtswv.

39 Peb tau kawm los ntawm tej uas muaj dhau los uas txaus tu siab hais tias yeej yog yuav luag txhua tus neeg tus xeeb ceem thiab tus cwj pwm, uas thaum lawv tau txoj cai me ntsis, raws li lawv xav, thaum ntawd lawv yuav siv txoj cai los kav yam tsis ncaj ncees.

40 Yog li ntawd cov uas tus Tswv hu los muaj coob, tiam sis cov uas nws xaiv los muaj tsawg.

41 Tsis muaj leej twg uas muaj peev xwm los yog tsim nyog siv ib lub hwj chim los yog hwj huam los ntawm lub pov thawj hwj, tsuas yog los ntawm kev yaum, los ntawm kev ua siab ntev, los ntawm kev siab mos thiab siab muag, thiab los ntawm kev hlub tiag tiag xwb;

42 Los ntawm kev siab zoo, thiab kev txawj ntse uas dawb huv, uas yuav txhawb tus ntsuj plig yam tsis muaj kev siab dag, thiab tsis muaj kev ntxias—

43 Cia li ua nruj ntuas thaum txog lub sij hawm yog, thaum tus Vaj Ntsuj Plig Dawb Huv tshoov siab; thiab tom qab ntawd muab kev hlub ntxiv rau tus uas koj tau ntuas, tsam nws xav hais tias koj yog nws tus yeeb ncuab;

44 Kom nws yuav paub hais tias koj txoj kev cia siab ntseeg muaj zog tshaj tej hlua khi ntawm txoj kev tuag.

45 Cia koj lub siab muaj txoj kev siab hlub puv nkaus rau txhua tus neeg, thiab rau tsev neeg uas muaj kev ntseeg, thiab cia kev tsim txiaj txhawb koj tej kev xav kom tsis tu ncua; thaum ntawd koj txoj kev tso siab yuav muaj zog tuaj nyob ntawm Vajtswv xub ntiag; thiab lub pov thawj hwj tej lus qhuab qhia yuav teev los rau koj tus ntsuj plig ib yam li tej lwg los saum ntuj los.

46 Tus Vaj Ntsuj Plig Dawb Huv yuav ua koj tus khub tsis tu tsis tseg, thiab koj tus cwj vaj yog tus cwj vaj ntawm kev ncaj ncees thiab kev tseeb uas tsis hloov li; thiab koj txoj kev kav yuav yog txoj kev kav uas kav ib txhis, thiab koj txoj kev kav yuav ntws los rau koj mus ib txhiab thiab ib txhis tsis muaj kev quab yuam.