1 Yexus Khetos ib txoj kev tshwm sim los mus rau nws tus tub qhe Joseph Smith, tus Hluas, thiab rau tus txwj laug, thaum lawv koom siab thiab tsa lawv lub suab mus rau saum ntuj.

2 Muaj tseeb tiag, tus Tswv txoj lus ntsig txog nws lub koom txoos, uas tsa los nyob hauv hnub nyoog kawg rau txoj kev muab nws cov neeg txum tim rov qab los, ib yam li nws tau hais los ntawm nws cov yaj saub lub qhov ncauj, thiab rau txoj kev muab nws haiv neeg ntseeg sau los ua ke nyob hauv Roob Xi-oos, uas yuav ua lub nroog Yeluxalees Tshiab.

3 Lub nroog uas yuav muab txhim tsa, pib ntawm tshav yuav ua lub tuam tsev, uas tus Tswv tus ntiv tes tau qhia, nyob ntawm lub Xeev Missouri ciaj ciam av sab hnub poob, thiab tau muab fij tseg los ntawm Joseph Smith, tus Hluas txhais tes, thiab lwm cov uas tus Tswv tau txaus siab rau.

4 Tseeb tiag qhov no yog tus Tswv txoj lus, hais tias yuav muab lub nroog Yeluxalees Tshiab txhim tsa los ntawm haiv neeg ntseeg txoj kev sib sau, pib ntawm qhov chaw no, uas twb yog qhov chaw ntawm lub tuam tsev, lub tuam tsev uas yuav muab tsa nyob hauv tiam neeg no.

5 Vim tseeb tiag tiam neeg no yuav tsis dhau txhua tus mus kom txog thaum yuav muab ib lub tsev txhim tsa rau tus Tswv tso, thiab ib tauv huab yuav roos lub tsev no, tauv huab uas twb yog tus Tswv lub yeeb koob, uas yuav nyob puv npo hauv lub tsev.

6 Thiab Mauxes cov tub, raws li lub Pov Thawj Hwj Dawb Huv uas nws tau txais los ntawm nws yawm txiv Yethoos txhais tes los;

7 Thiab Yethoos tau txais lub Pov Thawj Hwj Dawb Huv los ntawm Kalej txhais tes los;

8 Thiab Kalej tau txais lub Pov Thawj Hwj Dawb Huv los ntawm Elihus txhais tes los;

9 Thiab Elihus los ntawm Yelemis txhais tes los;

10 Thiab Yelemis los ntawm Khas txhais tes los;

11 Thiab Khas los ntawm Exayas txhais tes los;

12 Thiab Exayas tau txais lub Pov Thawj Hwj Dawb Huv los ntawm Vajtswv txhais tes los.

13 Exayas kuj nyob thaum Anplaham ua neej nyob, thiab Anplaham tau foom koob hmoov rau nws—

14 Tus Anplaham uas txais lub pov thawj hwj los ntawm Mekhixedes los, tus uas txais los ntawm nws txiv caj ceg, uas mus txog ntua Nau-as;

15 Thiab txij Nau-as mus txog Enauj, los ntawm nkawd cov yawg koob caj ceg los;

16 Thiab txij Enauj mus txog Anpees, tus uas raug tua tuag los ntawm nws tus tij laug txoj kev tuav hauv, Anpees tau txais lub pov thawj hwj los ntawm Vajtswv tej lus txib los, los ntawm nws txiv Adas txhais tes los, tus uas yog thawj tus txiv neej—

17 Lub pov thawj hwj uas muaj mus ntxiv nyob hauv Vajtswv lub koom txoos nyob hauv txhua tiam neeg, thiab tsis muaj hnub pib thiab tsis muaj xyoo kawg.

18 Thiab tus Tswv kuj tau tsa ib lub pov thawj hwj rau Aloos thiab nws cov tub ki, thoob plaws lawv txhua tiam neeg, lub pov thawj hwj uas kuj muaj mus ntxiv thiab nyob mus ib txhis li nrog lub pov thawj hwj uas raws li Vajtswv tus txheej txheem uas dawb huv tshaj plaws.

19 Thiab lub pov thawj hwj loj zog no tswj hwm txoj moo zoo thiab tuav tus yawm sij ntawm tej txuj ci uas neeg tsis paub txog lub nceeg vaj, uas twb yog tus yawm sij ntawm txoj kev paub txog Vajtswv.

20 Yog li ntawd, los ntawm tej kab ke ntawd, thiaj pom lub hwj chim ua li Vajtswv tshwm sim.

21 Thiab yog hais tias tsis muaj tej kab ke ntawd, thiab txoj cai ntawm lub pov thawj hwj, ces twb tsis pom lub hwj chim ua li Vajtswv tshwm sim los rau neeg uas muaj cev nqaij daim tawv;

22 Vim yog hais tias tsis muaj qhov no ces tsis muaj ib tug neeg twg muaj peev xwm pom tau Vajtswv lub ntsej muag, tus uas twb yog Leej Txiv, es yuav ciaj sia.

23 Nim no Mauxes qhia meej txog qhov no rau cov neeg Ixayees nyob tom roob moj sab qhua, thiab mob siab nrhiav kev ua rau nws cov neeg hloov ua dawb huv kom lawv yuav pom Vajtswv lub ntsej muag;

24 Tiam sis lawv ua lawv lub siab tawv qhawv thiab tiv tsis taus nws lub yeeb haum; yog li ntawd, thaum tus Tswv npau taws, vim nws txoj kev chim siab tau npau tawm tsam lawv, nws cog lus hais tias lawv yuav nkag tsis tau mus rau hauv nws qhov chaw so thaum tseem nyob tom roob moj sab qhua, qhov chaw so uas muaj nws lub yeeb koob tag nrho.

25 Yog li ntawd, nws thiaj tau coj Mauxes tawm hauv lawv mus lawm, thiab lub Pov Thawj Hwj Dawb Huv thiab;

26 Thiab muaj lub pov thawj hwj yau zog mus ntxiv, lub pov thawj hwj uas tuav tus yawm sij ntawm cov tim tswv tej kev los txhawb pab thiab ntawm txoj moo zoo uas npaj kev;

27 Txoj moo zoo uas yog txoj moo qhia kev hloov siab lees txim thiab kev cai raus dej, thiab txoj kev zam txim rau tej kev txhaum, thiab txoj kev cai lus txib ntawm sab nqaij daim tawv, qhov uas thaum tus Tswv txoj kev npau taws nws ua kom muaj mus ntxiv nrog Aloos tsev neeg nyob hauv cov neeg Ixayees mus txog Yauhas, tus uas Vajtswv tsa los, uas muaj tus Vaj Ntsuj Plig Dawb Huv puv npo txij thaum nyob hauv nws niam plab los.

28 Vim nws tau ua kev cai raus dej thaum nws tseem yog me nyuam yaus, thiab Vajtswv tus tim tswv muab nws tsa rau lub hwj chim no nyob rau lub sij hawm nws muaj hnub nyoog yim hnub, los mus ntxeev lub nceeg vaj ntawm cov neeg Yudais, thiab los mus ua tus Tswv txoj kev kom ncaj rau nws cov neeg, los mus npaj lawv tos rau tus Tswv txoj kev los, tus uas muab hwj chim tag nrho rau hauv nws txhais tes.

29 Thiab ntxiv, lub luag hauj lwm ntawm tus txwj laug thiab tus npisov yog qhov uas yuav tsum txuas rau lub pov thawj hwj hlob.

30 Thiab ntxiv, lub luag hauj lwm ntawm tus xib hwb thiab tus diskas yog tej uas yuav tsum txuas rau lub pov thawj hwj yau zog, lub pov thawj hwj uas tau muab tsa rau Aloos thiab nws cov tub.

31 Yog li ntawd, ib yam li kuv tau hais ntsig txog Mauxes cov tub—vim Mauxes cov tub thiab Aloos cov tub yuav tsum muab ib txoj kev tiam thiab kev txi uas tus Tswv pom zoo nyob hauv tus Tswv lub tsev, lub tsev uas yuav muab txhim tsa rau tus Tswv nyob rau tiam neeg no, rau ntawm qhov chaw uas muab fij tseg raws li kuv tau hais—

32 Thiab Mauxes thiab Aloos cov tub yuav muaj tus Tswv lub yeeb koob puv npo, nyob hauv Roob Xi-oos, hauv tus Tswv lub tsev, cov tub uas twb yog nej; thiab kuj yog ntau tus uas kuv hu thiab xa tawm mus txhim tsa kuv lub koom txoos.

33 Vim cov uas rau siab ua kom tau ob lub pov thawj hwj uas kuv tau hais txog no, thiab rau siab ua tej uas Vajtswv hu lawv ua, ces tus Ntsuj Plig yuav ua rau lawv hloov ua dawb huv kom lawv lub cev hloov dua tshiab.

34 Lawv hloov los ua Mauxes thiab Aloos cov tub thiab ua Anplaham cov tub ki, thiab ua lub koom txoos thiab lub nceeg vaj, thiab ua cov neeg uas Vajtswv tau xaiv tseg lawm.

35 Thiab tag nrho cov uas txais lub pov thawj hwj no txais yuav kuv, tus Tswv hais li;

36 Vim tus uas txais yuav kuv cov tub qhe txais yuav kuv;

37 Thiab tus uas txais yuav kuv txais yuav kuv Txiv;

38 Thiab tus uas txais yuav kuv Txiv txais yuav kuv Txiv lub nceeg vaj; yog li ntawd yuav muab tag nrho tej uas kuv Txiv muaj rau nws.

39 Thiab qhov no yog raws li kev lav lus thiab kev khi lus uas nyob rau ntawm lub pov thawj hwj.

40 Yog li ntawd, txhua tus uas txais lub pov thawj hwj, yog txais kuv Txiv txoj kev lav lus thiab kev khi lus no, qhov uas nws rhuav tsis tau, thiab muab hloov tsis tau.

41 Tiam sis yog leej twg rhuav txoj kev khi lus no tom qab nws tau txais lawm, thiab thim tag nrho ntawm kev khi lus no mus, ces yuav tsis muaj kev zam txim nyob hauv lub neej no los yog nyob hauv lub neej yuav los.

42 Thiab kev txom nyem raug tag nrho cov uas tsis los rau lub pov thawj hwj uas nej tau txais no, uas nim no kuv pom zoo muab rau nej cov uas nyob ntawm no hnub no, los ntawm kuv tus kheej lub suab tawm saum ntuj los; thiab kuv twb tau muab cov neeg qaum ntuj thiab kuv cov tim tswv ris txoj hauj lwm kom saib xyuas nej.

43 Thiab nim no kuv muab ib lo lus txib rau nej kom ceev faj txog nej tus kheej, kom rau siab mloog cov lus ntawm txoj sia nyob mus ib txhis.

44 Vim nej yuav tsum ua neej raws li txhua lo lus uas tawm ntawm Vajtswv lub qhov ncauj los.

45 Vim tus Tswv txoj lus yog qhov tseeb, thiab txhua yam uas yog qhov tseeb yog qhov kaj, thiab txhua yam uas yog qhov kaj yog Ntsuj Plig, uas twb yog Yexus Khetos tus Ntsuj Plig.

46 Thiab tus Ntsuj Plig muab qhov kaj rau txhua tus neeg uas los rau hauv lub ntiaj teb; thiab tus Ntsuj Plig ua rau txhua tus neeg to taub thoob plaws lub ntiaj teb, cov uas mloog tus Ntsuj Plig lub suab.

47 Thiab txhua tus uas mloog tus Ntsuj Plig lub suab yuav los cuag Vajtswv, uas twb yog Leej Txiv.

48 Thiab Leej Txiv qhia nws txog txoj kev khi lus uas Leej Txiv tau khi dua tshiab thiab tau muab tsa rau nej, qhov uas tau muab tsa rau nej kom pab nej, thiab tsis yog kom pab nej nkaus xwb, tiam sis kom pab tag nrho neeg ntiaj teb.

49 Thiab tag nrho cov neeg ntiaj teb muaj kev txhaum, thiab nyooj nyob hauv txoj kev tsaus ntuj thiab ua qhev rau kev txhaum.

50 Thiab nej thiaj yuav paub hais tias lawv ua qhev rau kev txhaum, vim lawv tsis los cuag kuv.

51 Vim tus uas tsis los cuag kuv yeej ua qhev rau kev txhaum.

52 Thiab tus uas tsis txais yuav kuv lub suab tus ntawd tsis swm kuv lub suab, thiab tsis yog kuv li.

53 Thiab nej thiaj li yuav paub cov ncaj ncees txawv cov phem, thiab paub tias tag nrho cov neeg ntiaj teb nyooj nyob hauv kev txhaum thiab kev tsaus ntuj ziag no.

54 Thiab nyob rau tej lub sij hawm dhau los nej lub siab tau tsaus ntuj vim yog txoj kev tsis ntseeg, thiab vim yog nej saib tsis taus tej uas nej tau txais—

55 Tej kev tsis muaj nuj nqis thiab kev tsis ntseeg no thiaj tau ua rau tag nrho cov ntseeg raug txim.

56 Thiab txoj kev raug txim no poob rau Xi-oos cov me nyuam, twb yog rau txhua tus.

57 Thiab lawv yuav raug lub txim no mus li kom txog thaum lawv hloov siab lees txim thiab nco txog txoj kev khi lus tshiab, uas twb yog Phau Ntawv Maumoos thiab cov lus txib tas los uas kuv tau muab rau lawv, tsis yog hais xwb, tiam sis nco kom ua raws li tej uas kuv tau muab sau cia lawm—

58 Xwv kom lawv yuav txi txiv tsim nyog rau lawv Txiv lub nceeg vaj; yog tsis li ces tseem muaj ib txoj kev nplawm thiab kev txiav txim uas yuav muab nchuav los rau Xi-oos cov me nyuam.

59 Vim cov me nyuam ntawm lub nceeg vaj puas yuav ua kom kuv thaj av dawb huv qias? Kuv hais tseeb rau nej tias, Tsis ua.

60 Kuv hais tseeb tseeb rau nej cov uas nim no hnov kuv tej lus, uas yog kuv lub suab, nej tau koob hmoov npaum li uas nej txais tej yam no;

61 Vim kuv yuav zam txim rau nej tej kev txhaum nrog lo lus txib no—kom nej ua nej lub siab khov kho rau siab tiag tiag thiab nco ntsoov thov Vajtswv, thaum ua tim khawv rau tag nrho neeg ntiaj teb txog tej uas yuav hais rau nej.

62 Yog li ntawd, nej cia li mus kom thoob ntiaj teb; thiab rau txhua qhov chaw uas nej mus tsis tau ces nej yuav tsum muab xa mus, kom zaj lus tim khawv no yuav tawm ntawm nej mus thoob ntiaj teb rau txhua tus neeg.

63 Thiab ib yam li kuv tau hais rau kuv cov thwj tim, ces kuv hais rau nej ib yam li ntawd, vim nej yog kuv cov thwj tim, uas twb yog Vajtswv cov pov thawj hlob; nej yog cov uas kuv Txiv tau muab pub rau kuv; nej yog kuv cov phooj ywg;

64 Yog li ntawd, ib yam li kuv tau hais rau kuv cov thwj tim kuv yuav hais dua rau nej, hais tias txhua tus neeg uas ntseeg nej tej lus, thiab ua kev cai raus dej rau txoj kev zam txim rau tej kev txhaum, yuav txais tus Vaj Ntsuj Plig Dawb Huv.

65 Thiab yuav muaj tej cim no nrog lawv cov uas ntseeg—

66 Los ntawm kuv lub npe lawv yuav ua ntau yam zoo kawg nkaus;

67 Los ntawm kuv lub npe lawv yuav ntiab tej dab phem tawm;

68 Los ntawm kuv lub npe lawv yuav kho cov neeg muaj mob zoo;

69 Los ntawm kuv lub npe lawv yuav ua rau cov neeg dig muag pom kev, thiab ua rau cov neeg lag ntseg hnov lus tuaj;

70 Thiab tus nplaig ntawm tus ruam yuav hais lus;

71 Thiab yog hais tias muaj ib tug neeg twg ho muab tshuaj lom lawv ces yuav tsis ua rau lawv mob;

72 Thiab tej taug nab yuav tsis muaj hwj chim ua rau lawv mob.

73 Tiam sis kuv muab ib lo lus txib rau lawv, hais tias lawv yuav tsum tsis txhob khav txog lawv tus kheej ntsig txog tej yam no, los yog hais txog tej no rau neeg ntiaj teb; vim tej yam no yog muab rau nej kom pab nej thiab rau kev cawm seej xwb.

74 Kuv hais tseeb tseeb rau nej tias, cov uas tsis ntseeg nej tej lus, thiab tsis ua kev cai raus dej los ntawm kuv lub npe, rau txoj kev zam txim rau lawv tej kev txhaum, kom lawv yuav txais tus Vaj Ntsuj Plig Dawb Huv, yuav raug txim, thiab yuav tsis los mus rau hauv kuv Txiv lub nceeg vaj uas kuv Txiv thiab kuv nyob.

75 Thiab txoj kev tshwm sim no rau nej, thiab lo lus txib, yeej qhib txij teev no mus rau tag nrho neeg ntiaj teb, thiab txoj moo zoo yog mus rau tag nrho cov uas tsis tau txais yuav tej no.

76 Tiam sis, kuv hais tseeb rau tag nrho cov uas tus Tswv tau muab lub nceeg vaj lawm—yog nej uas yuav tsum tshaj tawm txoj moo zoo mus rau lawv, hais tias lawv yuav tsum hloov siab lees txim rau lawv tej kev ua phem yav tas los; vim lawv yuav tsum raug cem rau lawv lub siab phem uas tsis ntseeg, thiab nej cov kwv tij nyob hauv Xi-oos rau lawv txoj kev ntxeev siab rau nej lub sij hawm kuv tau xa nej mus.

77 Thiab kuv hais ntxiv rau nej, kuv cov phooj ywg, vim txij no mus kuv yuav hu nej ua phooj ywg, tsim nyog uas kuv muab lo lus txib no rau nej, hais tias nej yuav tsum los ua zoo ib yam li kuv cov phooj ywg nyob rau lub sij hawm uas kuv tau nrog lawv ua ke, taug kev mus tshaj tawm txoj moo zoo nrog kuv lub hwj chim;

78 Vim kuv tsis cia lawv nqa hnab nyiaj los yog hnab thoob puab, thiab tsis cia lawv nqa ob lub tsho tiv no.

79 Saib seb, kuv xa nej mus sim neeg ntiaj teb lub siab, thiab tus uas khwv yeej tsim nyog tau nws nqi zog.

80 Thiab tus neeg twg uas mus thiab tshaj tawm txoj moo zoo ntawm lub nceeg vaj no, thiab tsis poob ntawm txoj kev rau siab ua txhua yam mus ntxiv, yuav tsis nkees hauv lub siab, thiab tsis tsaus ntuj, tsis nkees lub cev, txhais npab txhais ceg, los yog pob qij txha; thiab txawm nws ib txoj plaub hau xwb yuav poob rau hauv av los tus Tswv yeej yuav pom. Thiab lawv yuav tsis tshaib plab, thiab tsis nqhis dej.

81 Yog li ntawd, nej tsis txhob txhawj txog tag kis, hais tias nej yuav noj dab tsi, los yog nej yuav haus dab tsi, los sis hais tias nej yuav hnav dab tsi.

82 Vim, xav txog tej paj deg tom tej liaj, saib tej paj no tuaj li cas, tsis khwv, thiab twb tsis ntos ntaub ntos xov; thiab tej nceeg vaj hauv lub ntiaj teb, thaum pom tag nrho tej nceeg vaj no lub yeeb koob los, twb tsis tau hnav zoo nkauj li tej paj no.

83 Vim nej Txiv, tus uas nyob saum ntuj ceeb tsheej, yeej paub tias nej yuav tsum muaj tag nrho tej yam no.

84 Yog li ntawd, cia tag kis mam txhawj txog tej yam uas yuav muaj tag kis.

85 Thiab tsis txhob txhawj ua ntej hais tias nej yuav hais dab tsi; tiam sis khaws tej lus uas cawm neeg txoj sia cia rau hauv nej lub cim xeeb tsis tu ncua, thiab yuav muab qhov uas nej yuav tsum hais rau txhua tus neeg los rau nej nyob rau lub sij hawm ntawd kiag.

86 Yog li ntawd, vim lo lus txib no yog muab rau tag nrho txhua tus uas rau siab ntseeg uas Vajtswv hu nyob hauv lub koom txoos kom mus ua txoj hauj lwm qhuab qhia, txij lub sij hawm no mus tsis txhob cia ib tug neeg twg hauv nej nqa hnab nyiaj los yog hnab thoob puab, cov uas tawm mus tshaj tawm txoj moo zoo no ntawm lub nceeg vaj.

87 Saib seb, kuv xa nej tawm mus qhuab ntuas cov neeg ntiaj teb txog tag nrho tej uas lawv ua tsis ncaj ncees, thiab mus qhia lawv txog ib txoj kev txiav txim uas yuav los.

88 Thiab yog leej twg txais yuav nej, kuv kuj yuav nyob ntawd thiab, vim kuv yuav ua nej ntej mus. Kuv yuav nyob ntawm nej sab xis thiab nyob ntawm nej sab laug, thiab kuv tus Ntsuj Plig yuav nyob hauv nej lub siab, thiab kuv cov tim tswv nyob ib puag ncig nej, los txhawb nqa nej.

89 Tus uas txais yuav nej txais yuav kuv; thiab cov no yuav pub nej noj, thiab muab khaub ncaws rau nej hnav, thiab muab nyiaj txiag rau nej.

90 Thiab tus uas pub nej noj, los yog muab khaub ncaws rau nej hnav, los yog muab nyiaj txiag rau nej, tus ntawd yeej yuav tsis poob nws nqi zog.

91 Thiab tus uas tsis ua tej yam no ces tsis yog kuv tus thwj tim; los ntawm tej no nej yuav paub kuv cov thwj tim.

92 Tus uas tsis txais yuav nej, cia li ncaim nws mus nyob nej tus kheej, thiab ntxuav nej txhais ko taw nrog dej, tej dej ntshiab, txawm yog kub kub los yog no no, thiab ua tim khawv txog qhov no rau nej Txiv tus uas nyob saum ntuj ceeb tsheej, thiab tsis txhob rov qab mus xyuas tus neeg ntawd dua.

93 Thiab nyob txhua lub zos los yog lub nroog uas nej nkag mus, ua tib yam nkaus.

94 Txawm li ntawd los, rau siab nrhiav thiab txhob tseg; thiab kev txom nyem raug tsev neeg ntawd, los yog lub zos los sis lub nroog ntawd uas xyeej nej, los yog nej tej lus, los sis nej zaj lus lus tim khawv txog kuv.

95 Kuv hais dua, kev txom nyem los raug tsev neeg ntawd, los yog lub zos los sis lub nroog ntawd uas xyeej nej, los yog nej tej lus, los sis nej zaj lus lus tim khawv txog kuv.

96 Vim kuv, tus Muaj Hwj Chim Tag Nrho, tau tso kuv txhais tes rau tej haiv neeg, los nplawm lawv rau lawv tej kev phem.

97 Thiab tej kev mob nkeeg yuav muaj tuaj, thiab yuav tsis muab tej ntawd tshem tawm hauv ntiaj teb no mus kom txog thaum kuv ua kuv txoj hauj lwm tiav tso, qhov uas yuav ua sai sai kom thiaj ncaj ncees—

98 Kom txog thaum tag nrho txhua tus paub kuv, cov uas tseem nyob, txij ntawm cov yau dua ntais mus txog cov hlob tshaj plaws, thiab yuav muaj puv npo txoj kev paub txog tus Tswv, thiab yuav pom tim ntsej tim muag, thiab yuav tsa lawv lub suab, thiab nrog lub suab ua ke lawv yuav hu zaj nkauj tshiab no, hais tias:

99 Tus Tswv tau rov qab coj Xi-oos los;Tus Tswv tau txhiv nws haiv neeg, Ixayees,Raws li txoj kev xaiv kev tshav ntuj,Uas tau muaj vim los ntawm txoj kev ntseegThiab kev khi lus ntawm lawv cov yawg koob.

100 Tus Tswv tau txhiv nws haiv neeg dim;Thiab Dab Ntxwg Nyoog raug khi thiab tsis muaj sij hawm ntxiv lawm.Tus Tswv tau sau txhua yam los ua ke.Tus Tswv tau coj Xi-oos los puag sab ntuj los.Tus Tswv tau coj Xi-oos tawm hauv av los.

101 Lub ntiaj teb tau mob ntsaj thiab tau muaj zog tuaj;Thiab kev tseeb tau muaj nyob hauv nws lub siab;Thiab lub ntuj tau luag nyav rau nws;Thiab nws hnav nws tus Vajtswv lub yeeb koob;Vim Vajtswv sawv nrog Vajtswv cov neeg.

102 Yeeb koob, thiab sam xeeb, thiab hwj chim, thiab dag zog,Yog los ntawm peb tus Vajtswv; vim nws muaj kev hlub tshua puv npo,Kev txim lij, kev tshav ntuj thiab kev tseeb, thiab kev kaj siab lug,Mus ib txhiab thiab ib txhis li, Amees.

103 Thiab ntxiv, kuv hais tseeb tseeb rau nej tias, tsim nyog kom txhua tus neeg uas tawm mus tshaj tawm kuv txoj moo zoo uas kav ib txhis, hais tias npaum li uas lawv muaj tsev neeg, thiab tau nyiaj txiag los ntawm txiaj ntsim, kom lawv yuav tsum xa cov nyiaj txiag ntawd mus rau lawv tsev neeg los sis muab siv los pab rau lawv, raws li tus Tswv yuav qhia lawv, vim kuv pom zoo li ntawd.

104 Thiab cia tag nrho cov tsis muaj tsev neeg, cov uas txais tau nyiaj txiag, kom xa mus rau tus npisov nyob hauv Xi-oos, los sis mus rau tus npisov nyob hauv Ohio, kom yuav muab cov nyiaj txiag ntawd fij tseg cia rau txoj kev coj tej kev tshwm sim tawm los thiab txoj kev muab tej ntawd luam tawm, thiab cia txhim tsa Xi-oos.

105 Thiab yog muaj ib tug neeg muab ib lub tsho tiv no los yog ib ce khaub ncaws xuv rau nej ib tug twg, cia li nqa lub qub mus thiab muab rau cov neeg pluag, thiab taug nej txoj kev xyiv fab hlo mus.

106 Thiab yog muaj ib tug neeg ntawm nej muaj zog los ntawm tus Ntsuj Plig, cia nws coj ib tug qaug zog nrog nws, kom yuav txhawb nqa tus qaug zog raws li kev siab mos siab muag huv si, kom nws yuav hloov los muaj zog thiab.

107 Yog li ntawd, nej cia li coj cov tau muab tsa rau lub pov thawj hwj yau zog lawm nrog nej mus, thiab xa lawv ua ntej mus teem caij sib ntsib, thiab mus npaj txoj kev, thiab mus koom tej kev sib ntsib uas nej tus kheej mus tsis tau.

108 Saib seb, nov yog txoj kev uas kuv cov thwj tim, nyob txheej thaum ub, tau txhim tsa kuv lub koom txoos rau kuv.

109 Yog li ntawd, cia txhua tus neeg nyias ua nyias lub luag hauj lwm thiab nyias khwv raws li nyias txoj kev hu; thiab txhob cia lub taub hau hais rau ob txhais ko taw hais tias tsis tas muaj ob txhais ko taw; vim yog hais tias tsis muaj ob txhais ko taw ces lub cev yuav sawv ntsug taus li cas?

110 Thiab lub cev yuav tsum muaj txhua tus, kom txhua tus ib tug txhawb nqa ib tug ua ke, kom thiaj ceev tau lub cev zoo tag nrho.

111 Thiab saib seb, cov pov thawj hlob yuav tsum mus, thiab cov txwj laug thiab, thiab cov pov thawj yau thiab; tiam sis yuav tsum txib cov diskas thiab cov xib hwb los saib xyuas cov ntseeg, los ua cov muab kev pab rau lub koom txoos.

112 Thiab tus npisov, Newel K. Whitney, kuj yuav tsum mus rau ib puag ncig thiab mus rau hauv tag nrho tej pawg ntseeg, mus nrhiav cov pluag es pab lawv rau tej yam uas lawv tsis muaj los ntawm kev ua kom cov nplua nuj thiab muab hlob txo hwj chim.

113 Nws kuj yuav tsum ntiav ib tug sawv cev mus coj thiab mus ua nws tej hauj lwm ntawm sab cev nqaij daim tawv raws li nws qhia.

114 Txawm li ntawd los, cia tus npisov mus lawm tim lub nroog New York, thiab mus rau lub nroog Albany, thiab mus rau lub nroog Boston, thiab ceeb toom cov neeg nyob tej nroog ntawd nrog lub suab ntawm txoj moo zoo, nrog ib lub suab nrov, txog txoj kev puas tsuaj thiab txoj kev puas ntsoog uas tos lawv yog lawv xyeej tej yam no.

115 Vim yog hais tias lawv xyeej tej yam no ces lub sij hawm ntawm lawv txoj kev txiav txim twb yuav txog lawm, thiab lawv tej tsev yuav raug muab tso nyob quav poj tseg mus.

116 Cia kom nws tso siab rau kuv thiab nws yuav tsis raug puas tsuaj tas; thiab txawm nws ib txoj plaub hau xwb yuav poob rau hauv av los tus Tswv yeej yuav pom.

117 Thiab kuv hais tseeb rau nej, tag nrho kuv lwm cov tub qhe, cia li mus raws li nej tej xwm txheej yuav cia nej mus, ua tej uas Vajtswv hu nej ua, mus rau hauv tej nroog thiab tej zos loj thiab nto npe, cia li cem cov neeg ntiaj teb raws li kev ncaj ncees txog tag nrho lawv tej hauj lwm tsis ncaj ncees thiab phem, piav txog txoj kev puas ntsoog uas phem qias nyob hauv hnub nyoog kawg rau lawv kom meej thiab nkag siab hlo.

118 Vim, los ntawm nej, tus Tswv Muaj Hwj Chim Tag Nrho hais tias, kuv yuav muab lawv tej nceeg vaj ua kom puas tsuaj; kuv yuav tsis yog muab lub ntiaj teb co xwb, tiam sis lub ntuj muaj hnub qub yuav tshee hnyo thiab.

119 Vim kuv, tus uas yog tus Tswv, tau muab kuv txhais tes sib zog tso lub hwj chim saum ntuj; ziag no nej tsis pom, tiam sis ib nyuag pliag ces nej yuav pom, thiab paub hais tias muaj kuv, thiab hais tias kuv yuav los thiab kav nrog kuv haiv neeg.

120 Kuv yog Alafas thiab Aumenkas, qhov chiv keeb thiab qhov kawg. Amees.