1 Tus Tswv hais tseeb li no rau koj, kuv tus tub qhe Joseph Smith, tus Hluas, thiab kuv tus tub qhe Sidney Rigdon, thiab kuv tus tub qhe Hyrum Smith, thiab ob tug uas yog koj ob tug pab cuam thiab cov uas yuav tsa tom qab no mus;

2 Thiab rau koj, kuv tus tub qhe Edward Partridge, thiab nws ob tug pab cuam;

3 Thiab rau kuv cov tub qhe rau siab ntseeg uas yog pawg sab laj hlob ntawm kuv lub koom txoos nyob hauv Xi-oos, vim yuav hu lawv li no, thiab rau tag nrho cov txwj laug thiab cov neeg hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, uas tawg khiav ri niab nyob thoob plaws lub ntiaj teb;

4 Vim yuav tsum hu kuv lub koom txoos li no nyob hauv hnub nyoog kawg, uas twb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

5 Kuv hais tseeb rau nej sawv daws tias: Cia li sawv thiab ci mus, kom nej lub teeb yuav ua ib tug chij rau tej haiv neeg;

6 Thiab kom txoj kev sib sau los ua ke rau hauv thaj av Xi-oos, thiab rau hauv nws tej ceg txheem ntseeg, yuav tiv thaiv, thiab ua ib qho chaw nkaum ntawm kob cua daj cua dub, thiab ntawm txoj kev npau taws thaum yuav muab nchuav tawm los tsis tseg hlo li rau hauv lub ntiaj teb tag nrho.

7 Cia lub nroog, Far West, ua ib thaj av dawb huv thiab muab fij rau kuv; thiab yuav hu lub nroog no ua qhov chaw dawb huv tshaj plaws, vim nej sawv ntawm thaj av uas dawb huv.

8 Yog li ntawd, kuv txib nej kom txhim tsa ib lub tsev los rau kuv, rau txoj kev muab kuv haiv neeg ntseeg sau los ua ke, kom lawv yuav tau teev tiam kuv.

9 Thiab cia kom muaj qhov chiv keeb ntawm txoj hauj lwm no, thiab ib lub hauv paus, thiab ib txoj hauj lwm npaj tos, rau lub caij ntuj so tom ntej no;

10 Thiab cia qhov chiv keeb pib rau hnub tim plaub ntawm lub Xya Hli Ntuj los no; thiab txij lub sij hawm ntawd mus cia kuv cov neeg rau siab ntso ua hauj lwm txhim tsa ib lub tsev los rau kuv lub npe;

11 Thiab txij hnub no mus ib xyoos ces cia lawv rov qab pib teeb dua lub hauv paus ntawm kuv lub tsev.

12 Txij lub sij hawm ntawd mus cia lawv rau siab ntso ua hauj lwm zoo li no kom txog thaum ua tiav, txij ntawm tus ncej zeb tag mus rau saum lub ruv, kom txog thaum tsis tshuav ib yam dab tsi uas tsis tau tiav.

13 Kuv hais tseeb rau nej tias, txhob cia kuv tus tub qhe Joseph, thiab kuv tus tub qhe Sidney, thiab kuv tus tub qhe Hyrum mus tshuav nuj nqis ntxiv rau txoj kev txhim tsa ib lub tsev los rau kuv lub npe;

14 Tiam sis cia li txhim tsa ib lub tsev los rau kuv lub npe raws li tus qauv uas kuv yuav qhia rau lawv.

15 Thiab yog hais tias kuv cov neeg tsis txhim tsa lub tsev raws li tus qauv uas kuv yuav qhia rau lawv pawg thawj tswj hwm, kuv yuav tsis txais yuav lub tsev no los ntawm lawv txhais tes.

16 Tiam sis yog hais tias kuv cov neeg txhim tsa lub tsev no raws li tus qauv uas kuv yuav qhia rau lawv pawg thawj tswj hwm, uas twb yog kuv tus tub qhe Joseph thiab nws ob tug pab cuam, ces kuv yuav txais yuav lub tsev no los ntawm kuv cov neeg txhais tes.

17 Thiab ntxiv, kuv hais tseeb rau nej tias, yog kuv lub siab nyiam uas yuav tsum txhim tsa lub nroog Far West nrawm nroos los ntawm kuv haiv neeg ntseeg txoj kev sib sau ua ke;

18 Thiab kuj yuav tsum mus tsa lwm qhov chaw los ua tej ceg txheem ntseeg nyob rau hauv tej thaj tsam ib puag ncig, raws li yuav muab tej ntawd qhia los rau kuv tus tub qhe Joseph, tej lub sij hawm.

19 Vim saib seb, kuv yuav nrog nws, thiab kuv yuav muab nws hloov ua neeg dawb huv rau cov neeg; vim kuv tau muab cov yawm sij ntawm lub nceeg vaj no thiab kev ua hauj lwm qhuab qhia rau nws. Twb yog li ntawd. Amees.