Tshooj 69
Kev tshwm sim uas tus Yaj Saub Joseph Smith tau txais, nyob hauv Hiram, Ohio, lub Kaum Ib Hlis Ntuj hnub tim 11, xyoo 1831. Cov neeg uas nyob hauv lub rooj sab laj tshwj xeeb ntawm lub Kaum Ib Hlis Ntuj hnub tim 1–2 tau pom zoo muab tej kev tshwm sim uas tau sau los ua ke npaj coj mus luam tawm. Nyob rau lub Kaum Ib Hlis Ntuj hnub tim 3, tau muab txoj kev tshwm sim hauv no, uas yog tshooj 133, sau ntxiv rau, thiab tom qab ntawd muab hu ua tej Cov Ntawv Ntxiv Tom Kawg. Ua ntej no, tau muab Oliver Cowdery tsa kom nqa cov ntawv uas sau tej kev tshwm sim thiab tej lus txib nyob rau hauv mus lawm tim Independence, Missouri, coj mus luam. Kuj tau hais kom nws nqa cov nyiaj uas cov mej zeej tau muab tuaj mus txhim tsa lub Koom Txoos nyob rau hauv Missouri nrog nws mus thiab. Txoj kev tshwm sim no kuj qhia John Whitmer kom nrog Oliver Cowdery mus thiab qhia Whitmer mus khaws cov ntaub ntawv txog zaj keeb kwm kom ua raws li nws txoj kev hu ua lub Koom Txoos tus kws sau keeb kwm thiab tus teev ntawv.
1–2, John Whitmer yuav tsum ua Oliver Cowdery tus khub mus rau Missouri; 3–8, Nws kuj yuav tsum tshaj tawm txoj moo zoo thiab khaws, sau cia, thiab sau ntawv txog keeb kwm.
1 Cia li mloog kuv, tus Tswv nej tus Vajtswv hais li, kom pab kuv tus tub qhe Oliver Cowdery. Tsis yog kuv lub tswv yim uas yuav tso siab muab cov lus txib thiab cov nyiaj uas nws yuav nqa mus tim thaj av Xi-oos rau nws, tsuas yog cia ib tug nrog nws mus uas yuav ncaj thiab rau siab ntseeg xwb.
2 Yog li ntawd, kuv, tus uas yog tus Tswv, xav kom kuv tus tub qhe, John Whitmer, yuav mus nrog kuv tus tub qhe Oliver Cowdery;
3 Thiab kuj xav kom nws sau ntawv mus ntxiv thiab ua ib phau keeb kwm txog txhua yam tseem ceeb uas nws yuav pom thiab paub ntsig txog kuv lub koom txoos;
4 Thiab kuj xav kom nws txais tej lus ntuas thiab kev pab los ntawm kuv tus tub qhe Oliver Cowdery thiab lwm tus.
5 Thiab, kuv cov tub qhe uas nyob hauv lub ntiaj teb yuav xa lawv tej ceev xwm txheej ntawm lawv tej hauj lwm saib xyuas mus rau hauv thaj av Xi-oos thiab;
6 Vim thaj av Xi-oos yuav ua ib lub hauv paus thiab ib qho chaw txais thiab ua tag nrho tej yam no.
7 Txawm li ntawd los, cia kuv tus tub qhe John Whitmer mus ntawm ib qho chaw mus rau ib qho, thiab ntawm ib pawg ntseeg mus rau ib pawg, ntau ntau zaus, kom nws yuav txais tau kev txawj ntse yooj yim zog—
8 Tshaj tawm thiab piav txoj moo zoo, sau ntawv, theej ntawv, xaiv, thiab txais tag nrho txhua yam uas yog muab los pab rau lub koom txoos, thiab pab rau tej tiam neeg uas tab tom loj hlob nyob hauv thaj av Xi-oos, los muab ua lawv tug los ntawm ib tiam neeg mus rau ib tiam, mus ib txhiab thiab ib txhis li. Amees.