Tshooj 44
Kev tshwm sim muab rau tus Yaj Saub Joseph Smith thiab Sidney Rigdon, hauv Kirtland, Ohio, thaum lub Ob Hlis Ntuj yuav luag tas ntawm xyoo 1831. Xwv kom ua raws li qhov uas hais nyob hauv kev tshwm sim no, lub Koom Txoos tau tsa ib lub rooj sab laj kom muaj rau thaum ntxov ntawm lub Rau Hli Ntuj uas yuav los.
1–3, Cov txwj laug yuav tsum mus txoos rau lub rooj sab laj; 4–6, Lawv yuav tsum sib sau raws li tej kev cai ntawm thaj av thiab mus pab cov pluag.
1 Saib seb, tus Tswv hais li no rau nej uas yog kuv cov tub qhe, kuv xav tias tsim nyog kom hu kuv cov txwj laug ntawm kuv lub koom txoos tuaj ua ke, tuaj sab hnub tuaj thiab sab hnub poob tuaj, thiab tuaj sab qaum teb thiab sab qab teb tuaj, hu lawv los ntawm tsab ntawv los sis lwm txoj kev.
2 Thiab yuav muaj tias, npaum li uas lawv rau siab ntseeg, thiab muab siab rau ntseeg kuv, kuv yuav pub kuv tus Ntsuj Plig los rau lawv nyob rau hnub lawv tuaj txoos lawv tus kheej ua ke.
3 Thiab yuav muaj tias lawv yuav tawm mus rau tej thaj tsam ib puag ncig, thiab tshaj tawm txoj kev hloov siab lees txim rau cov neeg.
4 Thiab coob leej yuav hloov siab los ntseeg, ua rau nej yuav tau hwj chim nej tus kheej raws li tej kev cai ntawm tib neeg;
5 Kom nej cov yeeb ncuab tsis txhob muaj hwj chim kov yeej nej; kom tus Tswv yuav muab nej tshwj cia ntawm txhua yam; kom nej yuav muaj peev xwm ua raws li kuv tej kev cai; kom txhua txoj kev khi lus uas cov yeeb ncuab siv los nrhiav kev ua rau kuv cov neeg puas tsuaj raug muab rhuav.
6 Saib seb, kuv hais rau nej tias, nej yuav tsum mus xyuas cov txom nyem thiab cov pluag thiab pab kom lawv dim pa, kom tus Tswv hwj xwm lawv txog thaum tau ua txhua yam tiav raws li kuv txoj kev cai uas nej tau txais lawm. Amees.