Tshooj 87
Kev tshwm sim thiab kev qhia tej yuav muaj los yav tom ntej txog kev ua rog, uas tau muab los ntawm tus Yaj Saub Joseph Smith, nyob ntawm los sis nyob ze Kirtland, Ohio, lub Kaum Ob Hlis Ntuj hnub tim 25, xyoo 1832. Thaum lub sij hawm no muaj tej kev sib cav sib ceg ntau txog kev ua cev qhev thiab qhov uas South Carolina tsis them se rau lub teb chaws ntxiv. Joseph Smith zaj keeb kwm hais tias “tej kev kub ntxhov nyob hauv cov teb chaws” ua rau tus Yaj Saub “haj yam pom tseeb tshaj dua li thaum lub Koom Txoos tau pib tawm ntawm hav zoov los.”
1–4, Twb qhia ua ntej txog kev ua rog ntawm cov Xeev Qaum Teb thiab cov Xeev Qab Teb; 5–8, Kev puas tsuaj loj yuav raug tag nrho cov neeg nyob hauv lub ntiaj teb.
1 Tus Tswv hais tseeb li no ntsig txog tej kev ua rog uas tsis ntev no yuav muaj los, pib ntawm txoj kev ntxeev siab hauv South Carolina, qhov uas thaum kawg yuav muaj kev tuag thiab kev nyuaj siab ntawm ntau tus tib neeg;
2 Thiab lub sij hawm yuav los thaum kev ua rog yuav muaj nplua mias rau txhua haiv neeg, pib hauv qhov chaw no.
3 Vim saib seb, cov Xeev Qab Teb yuav cais mus tawm tsam cov Xeev Qaum Teb, thiab cov Xeev Qab Teb yuav hu lwm haiv neeg, uas twb yog haiv neeg ntawm Akiv Teb, li uas lawv hu, thiab lawv kuj yuav hu lwm haiv neeg thiab, kom thiaj thaiv tau lawv tus kheej tawm tsam lwm haiv neeg; thiab tom qab ntawd yuav muaj kev ua rog yuav muaj nplua mias mus rau txhua haiv neeg.
4 Thiab yuav muaj tias, tom qab ntau hnub, cov neeg ua qhev yuav sawv tawm tsam lawv cov tswv, cov uas yuav raug coj los thiab muab cob ua rog.
5 Thiab kuj yuav muaj tias cov seem tshuav uas seem nyob hauv thaj av yuav coj lawv tus kheej los, thiab yuav chim siab heev, thiab yuav tsim txom Lwm Haiv Neeg nrog ib txoj kev tsim txom loj heev.
6 Thiab li no, nrog rab ntaj thiab los ntawm nqaij ntuag ntshav nrog cov tib neeg hauv lub ntiaj teb no yuav quaj ntsuag; thiab nrog rau kev tshaib kev nqhis, thiab kev mob nkeeg, thiab av qeeg, thiab xob quaj saum ntuj, thiab xob laim uas tsiv thiab ci heev, cov tib neeg hauv ntiaj teb no yuav paub txoj kev npau taws, thiab kev chim siab, thiab txhais tes qhuab ntuas ntawm tus Vajtswv uas Muaj Hwj Chim Tag Nrho, kom txog thaum txoj kev puas tsuaj uas Vajtswv tau tshaj tawm ua rau txhua haiv neeg ploj mus huv tib si tso;
7 Kom lub suab quaj ntawm haiv neeg ntseeg, thiab ntawm haiv neeg ntseeg cov ntshav, yuav tseg tsis quaj ntawm lub ntiaj teb mus rau tus Tswv ntawm Xanpa-aus lub pob ntseg ntxiv lawm, kom ua pauj lawv cov yeeb ncuab.
8 Yog li ntawd, nej cia li sawv hauv tej chaw dawb huv, thiab tsis txhob txav mus, kom txog hnub tus Tswv los; vim saib seb, hnub ntawd los sai sai, tus Tswv hais li. Amees.