Tshooj 52
Kev tshwm sim uas tus Yaj Saub Joseph Smith tau txais kom qhia cov txwj laug ntawm lub Koom Txoos, hauv Kirtland, Ohio, lub Rau Hli Ntuj hnub tim 6, xyoo 1831. Tau muaj ib lub rooj sab laj nyob hauv Kirtland, pib thaum hnub tim 3 thiab xaus rau hnub tim 6 ntawm lub Rau Hli Ntuj. Nyob hauv lub rooj sab laj no yog thawj zaug uas paub tseeb tau muab cov neeg tsa rau lub luag hauj lwm ua pov thawj hlob, thiab cov thawj coj ntawm lub Koom Txoos pom tias muaj cov ntsuj plig cuav thiab ntsuj plig dag tshwm sim thiab hais kom lawv ntiab tawm.
1–2, Muab lub rooj sab laj tom qab lub no teem rau hauv Missouri; 3–8, Tau txib ib co txwj laug kom mus ua ke; 9–11, Cov txwj laug yuav tsum qhia tej uas cov thwj tim thiab cov yaj saub tau muab sau cia; 12–21, Cov uas tau kev kaj los ntawm tus Ntsuj Plig yuav txi txiv uas yog kev qhuas thiab laj lim tswv yim; 22–44, Tus Tswv tsa ib txhia txwj laug mus tshaj tawm txoj moo zoo thaum tab tom taug kev mus rau tom lub rooj sab laj nyob hauv Missouri.
1 Saib seb, tus Tswv hais li no rau cov txwj laug uas nws tau hu thiab tau xaiv nyob hauv hnub nyoog kawg no, los ntawm nws tus Ntsuj Plig lub suab—
2 Hais tias: Kuv, tus uas yog tus Tswv, yuav ua rau nej paub txog qhov kuv xav kom nej yuav tsum ua txij lub sij hawm no mus txog lwm lub rooj sab laj, uas yuav muaj nyob rau hauv Missouri, rau ntawm thaj av uas kuv yuav muab fij tseg rau kuv cov neeg, uas yog cov seem tshuav ntawm Yakhauj, thiab cov uas muaj tug raws li txoj kev khi lus.
3 Yog li ntawd, kuv hais tseeb rau nej tias, cia kuv ob tug tub qhe Joseph Smith, tus Hluas, thiab Sidney Rigdon nkawd cia li mus ntawm nkawd tsev mus sai li sai tau ntawm txoj kev npaj, thiab mus lawm tim thaj av Missouri.
4 Thiab npaum li uas nkawd rau siab ntseeg kuv, yuav ua kom nkawd paub saib nkawd yuav tsum ua dab tsi;
5 Thiab npaum li uas nkawd rau siab ntseeg, yuav ua rau nkawd paub txog thaj av ntawm nej qub txeeg qub teg.
6 Thiab npaum li uas nkawd tsis rau siab ntseeg ces, nkawd yuav raug muab txiav tawm, raws li kuv siab nyiam, ib yam li kuv pom zoo.
7 Thiab ntxiv, kuv hais tseeb rau nej tias, cia kuv tus tub qhe Lyman Wight thiab John Corrill kom nkawd cia li mus nrawm nroos;
8 Thiab kuv tus tub qhe John Murdock, thiab kuv tus tub qhe Hyrum Smith thiab, kom nkawd mus hla Detroit lawm tim tib qho chaw tid.
9 Thiab cia nkawd mus ntawm qhov chaw ntawd mus kom tshaj tawm txoj lus thaum taug kev, txhob hais txog lwm yam dab tsi li tsuas yog tej uas cov yaj saub thiab cov thwj tim tau sau cia xwb, thiab tej uas tus Nplij Siab qhia rau nkawd los ntawm txoj kev thov Vajtswv nrog kev ntseeg.
10 Cia kom nkawd mus ob leeg ua ib khub, thiab li ntawd cia kom nkawd tshaj tawm txoj moo zoo rau hauv txhua pawg ntseeg tuaj ua ke thaum taug kev mus, muab neeg ua kev cai raus dej, thiab tso tes rau saum taub hau nyob tim ntug dej.
11 Vim tus Tswv hais li no, kuv yuav ua kuv txoj hauj lwm sai sai kom thiaj ncaj ncees, vim lub sij hawm tab tom los uas kuv yuav xa txoj kev txiav txim los kom muaj yeej.
12 Thiab cia kom kuv tus tub qhe Lyman Wight ceev faj, vim Dab Ntxwg Nyoog xav muab nws tshau kom poob li tej npluag nplej.
13 Thiab saib seb, yuav muab tus uas rau siab ntseeg tsa ua tus kav ntau yam.
14 Thiab ntxiv, kuv yuav muab ib tug txheej txheem ntawm txhua yam rau nej, kom nej yuav tsis raug ntxias; vim Dab Ntxwg Nyoog twb mus rau qhov txhia chaw hauv thaj av, thiab nws yuav mus ntxias tej haiv neeg—
15 Yog li ntawd tus uas thov Vajtswv, tus uas muaj siab xav ua zoo, kuv yuav txais tus ntawd yog hais tias nws ua raws li kuv tej kab ke.
16 Tus uas hais lus, tus uas muaj siab xav ua zoo, tus uas hais tej lus mos lus muag thiab txhawb zog, tus ntawd yog Vajtswv li yog hais tias nws ua raws li kuv tej kab ke.
17 Thiab ntxiv, tus uas tshee hnyo rau kuv lub hwj chim ces yuav ua kom tus ntawd muaj zog, thiab nws yuav txi txiv uas yog kev qhuas thiab laj lim tswv yim, raws li tej kev tshwm sim thiab kev tseeb uas kuv tau muab rau nej.
18 Thiab ntxiv, tus uas kov tsis yeej thiab tsis txi txiv, kom raws li tus txheej txheem no, tsis yog kuv li.
19 Yog li ntawd, los ntawm tus txheej txheem no txhua zaus nej yuav paub cov ntsuj plig zoo li cas nyob tag nrho hauv qab ntuj.
20 Thiab lub caij nyoog tau los txog lawm; yuav muaj taus rau neeg raws li neeg txoj kev ntseeg.
21 Saib seb, lo lus txib no yog muab rau tag nrho txhua tus txwj laug uas kuv tau xaiv.
22 Thiab ntxiv, kuv hais tseeb rau nej tias, cia kuv tus tub qhe Thomas B. Marsh thiab kuv tus tub qhe Ezra Thayre kom nkawd cia li mus thiab, tshaj tawm txoj lus thaum taug kev mus rau tib thaj av no.
23 Thiab ntxiv, cia kuv tus tub qhe Isaac Morley thiab kuv tus tub qhe Ezra Booth kom nkawd cia li mus, thiab tshaj tawm txoj lus thaum taug kev mus rau tib thaj av no.
24 Thiab ntxiv, cia kuv ob tug tub qhe Edward Partridge thiab Martin Harris kom nkawd mus nrog kuv ob tug tub qhe Sidney Rigdon thiab Joseph Smith, tus Hluas.
25 Cia kuv ob tug tub qhe David Whitmer thiab Harvey Whitlock kom nkawd cia li mus thiab, thiab tshaj tawm txoj moo zoo thaum taug kev mus rau tib thaj av no.
26 Thiab cia kuv ob tug tub qhe Parley P. Pratt thiab Orson Pratt kom nkawd cia li mus, thiab tshaj tawm txoj moo zoo thaum taug kev mus, uas mus rau tib thaj av no.
27 Thiab cia kuv ob tug tub qhe Solomon Hancock thiab Simeon Carter kom nkawd cia li mus lawm tim tib thaj av no, thiab tshaj tawm txoj moo zoo thaum taug kev mus.
28 Cia kuv ob tug tub qhe Edson Fuller thiab Jacob Scott kom nkawd cia li mus thiab.
29 Cia kuv ob tug tub qhe Levi W. Hancock thiab Zebedee Coltrin kom nkawd cia li mus thiab.
30 Cia kuv ob tug tub qhe Reynolds Cahoon thiab Samuel H. Smith kom nkawd cia li mus thiab.
31 Cia kuv ob tug tub qhe Wheeler Baldwin thiab William Carter kom nkawd cia li mus thiab.
32 Thiab cia kuv ob tug tub qhe Newel Knight thiab Selah J. Griffin kom muab nkawd ob leeg tsa, thiab kom nkawd cia li mus thiab.
33 Muaj tseeb tiag, kuv hais tseeb tias, cia tag nrho cov no kom lawv cia li mus rau ib qho chaw, txawm yog lawv nyias mus nyias txoj kev mus, thiab ib tug yuav tsum tsis txhob txhim tsa rau saum lwm tus lub hauv paus, thiab txhob mus txoj kev lwm tus mus.
34 Tus uas rau siab ntseeg, tus Tswv yuav muab tus ntawd ceev cia thiab txi tau txiv ntau.
35 Thiab ntxiv, kuv hais rau nej tias, cia kuv ob tug tub qhe Joseph Wakefield thiab Solomon Humphrey kom nkawd cia li mus lawm tim tej av sab hnub tuaj;
36 Cia nkawd kom ua hauj lwm rau nkawd tsev neeg, txhob qhia lwm yam dab tsi li tsuas yog cov yaj saub thiab cov thwj tim tej kev qhia xwb, tej uas lawv tau pom thiab tau hnov thiab tau ntseeg tiag tiag, xwv kom muaj raws li tej yuav muaj los yav tom ntej.
37 Yeeb vim yog los ntawm kev ua txhaum, cia li muab qhov uas tau foom rau Heman Basset tshem tawm ntawm nws mus, thiab muab tso rau saum Simonds Ryder taub hau.
38 Thiab ntxiv, kuv hais tseeb rau nej tias, cia li muab Jared Carter tsa ua ib tug pov thawj, thiab kuj tsa George James ua ib tug pov thawj thiab.
39 Cia cov seem tshuav ntawm cov txwj laug kom saib xyuas tej pawg ntseeg, thiab tshaj tawm txoj lus hauv tej thaj tsam ib puag ncig lawv; thiab cia lawv siv lawv txhais tes khwv kom thiaj yuav tsis muaj kev pe mlom los yog coj phem.
40 Thiab txhua lub sij hawm cia li nco ntsoov cov neeg pluag thiab cov neeg xav tau kev pab, cov neeg mob thiab cov neeg raug txom nyem, vim tus uas tsis ua tej yam no, nws tsis yog kuv tus thwj tim.
41 Thiab ntxiv, cia kuv cov tub qhe Joseph Smith, tus Hluas, thiab Sidney Rigdon thiab Edward Partridge kom lawv nqa ib daim ntawv tso cai los ntawm lub koom txoos nrog lawv mus. Thiab cia li muab ib daim rau kuv tus tub qhe Oliver Cowdery thiab.
42 Thiab li no, ib yam li kuv tau hais lawm, yog nej rau siab ntseeg ces nej yuav sib txoos nej tus kheej ua ke mus xyiv fab nyob hauv thaj av Missouri, uas yog thaj av ntawm nej qub txeeg qub teg, uas nim no yog thaj av rau ntawm nej cov yeeb ncuab.
43 Tiam sis, saib seb, kuv, tus uas yog tus Tswv, yuav rhawv lub nroog nrawm nroos thaum txog lub sij hawm tsim nyog, thiab yuav muab meej mom kev xyiv fab thiab kev zoo siab rau cov uas rau siab ntseeg ntoo.
44 Saib seb, kuv yog Yexus Khetos, Vajtswv Leej Tub, thiab kuv yuav tsa lawv sawv thaum txog hnub kawg. Twb yog li ntawd. Amees.