Tshooj 55
Kev tshwm sim uas tus Yaj Saub Joseph Smith tau txais kom qhia William W. Phelps, hauv Kirtland, Ohio, lub Rau Hli Ntuj hnub tim 14, xyoo 1831. William W. Phelps, ib tug luam ntawv, thiab nws tsev neeg nyuam qhuav los txog hauv Kirtland, thiab tus Yaj Saub tau nug tus Tswv ntsig txog nws.
1–3, Tus Tswv hu thiab xaiv William W. Phelps ua kev cai raus dej, tsa nws ua ib tug txwj laug, thiab mus tshaj tawm txoj moo zoo; 4, Nws kuj yuav tsum sau tej phau ntawv rau cov me nyuam nyob hauv lub Koom Txoos tej tsev kawm ntawv; 5–6, Nws yuav tsum mus lawm tim Missouri, uas yuav yog qhov cheeb tsam ntawm nws tej hauj lwm.
1 Saib seb, tus Tswv hais li no rau koj, kuv tus tub qhe William, muaj tseeb tiag, twb yog tus Tswv ntawm tag nrho lub ntiaj teb, hais tias, tus Tswv twb hu thiab xaiv koj; thiab tom qab koj tau ua kev cai raus dej lawm, uas yog koj ua nrog lub qhov muag ntsia ntsoov rau kuv lub yeeb koob, koj yuav tau txoj kev zam txim rau koj tej kev txhaum thiab yuav tau txais tus Ntsuj Plig Dawb Huv los ntawm kev tso tes rau saum taub hau;
2 Thiab tom qab ntawd kuv tus tub qhe Joseph Smith, tus Hluas, txhais tes yuav tsa koj, los ua ib tug txwj laug rau lub koom txoos no, kom tshaj tawm txoj kev hloov siab lees txim thiab kev zam txim rau tej kev txhaum los ntawm txoj kev ua kev cai raus dej los ntawm Yexus Khetos, uas yog Vajtswv tus uas muaj txoj sia nyob Leej Tub lub npe.
3 Thiab koj yuav tso koj tes rau tus twg, yog hais tias lawv muaj siab xav ua zoo rau ntawm kuv qhov muag, koj yuav muaj hwj chim muab tus Ntsuj Plig Dawb Huv rau tus ntawd.
4 Thiab ntxiv, yuav tsa koj mus pab kuv tus tub qhe Oliver Cowdery ua txoj hauj lwm luam ntawv, thiab mus xaiv thiab sau tej phau ntawv rau tej tsev kawm ntawv nyob hauv lub koom txoos no, xwv kom kuv pom tias cov me nyuam yaus thiaj txais tej kev qhia raws li kuv pom zoo.
5 Thiab ntxiv, kuv hais tseeb rau koj tias, vim rau qhov no koj yuav tsum mus nrog kuv ob tug tub qhe Joseph Smith, tus Hluas, thiab Sidney Rigdon, kom yuav muab koj cog rau hauv thaj av ntawm nej qub txeeg qub teg los ua txoj hauj lwm no.
6 Thiab ntxiv, cia kuv tus tub qhe Joseph Coe nrog lawv mus thiab. Cov seem tshuav mam qhia kom paub tom qab no mus, raws li kuv pom zoo. Amees.