1 Rau qhov tus Tswv tau ua tshwm sim rau kuv hais tias kuv cov yeeb ncuab, tag nrho hauv Missouri thiab lub Xeev no, tau rov qab nrhiav kuv; thiab rau qhov lawv nrhiav kuv txawm kuv tsis muaj txim, thiab tsis muaj ib txoj cai me me ntawm kev txim lij thiab kev ncaj ncees nyob rau ntawm lawv sab los mus cuab hais plaub tawm tsam kuv; thiab rau qhov tag nrho lawv tej kev ua txuj yog los ntawm tej kev cuav ntawm tus xim uas dub tshaj plaws, ces kuv tau xav hais tias tsim nyog thiab yog tswv yim zoo uas kuv yuav tsum khiav ntawm qhov chaw no mus ib nyuag ntus, rau kuv txoj kev nyab xeeb thiab txoj kev nyab xeeb ntawm kuv cov neeg no. Kuv xav hais rau tag nrho cov uas nrog kuv ua lag luam, hais tias kuv tau tso kuv tej xwm rau cov sawv cev thiab cov khaws ntaub ntawv los khiav txhua yam lag luam raws sij hawm thiab raws cai, thiab yuav muab kuv tej nuj nqi rho tawm thaum txog lub sij hawm uas pom zoo lawm, los ntawm kev muab tej teej tug pauv, los sis tsis li ces, ua raws li yuav tsum muaj, los yog raws li tej xwm txheej ntawd cia ua. Thaum kuv pom hais tias cua daj cua dub raug muab tshuab ya tag lawm, tom qab ntawd kuv mam rov qab los rau nej dua.

2 Thiab hais txog tej kev plhom sij uas tus Tswv hu kuv los hla kom dhau, tej no yeej zoo li ib yam me me rau kuv xwb, vim tib neeg txoj kev ntshaw thiab kev npau taws tau ib txwm raug kuv tag kuv sim neej; thiab yeej tsis paub qhov uas yog vim li cas, tsuas yog tus Tswv tsa kuv ua ntej ntuj tsim teb raug los rau lub hom phiaj zoo, los sis hom phiaj phem, ib yam li tej zaum nej yuav xav hais. Nej txiav txim rau nej tus kheej. Vajtswv twb paub tag nrho tej yam no lawm, txawm yog tej no zoo los phem. Tiam sis txawm li cas los, kuv yeej swm ua luam dej nyob hauv tej dej tob. Kuv twb swm tag nrho tej yam no lawm; thiab kuv xav, zoo li Povlauj, kom xyiv fab thaum kuv raug txom nyem; vim los txog hnub no tus Vajtswv ntawm kuv cov yawg koob yeej tau cawm kuv dim ntawm tag nrho tej ntawd, thiab tseem yuav cawm kuv dim txij no mus; vim saib seb, thiab xyuas seb, kuv yuav kov yeej tag nrho kuv cov yeeb ncuab, vim tus Tswv uas yog Vajtswv tau hais li.

3 Yog li ntawd txhua tus ntseeg yuav tsum xyiv fab, thiab cia li zoo siab heev; vim Ixayees tus Vajtswv yog lawv tus Vajtswv, thiab nws yuav luj nqi zog ncaj ncees mus rau saum cov neeg uas quab yuam lawv lub taub hau.

4 Thiab ntxiv, tus Tswv hais tseeb li no tias: Cia tej hauj lwm ntawm kuv lub tuam tsev, thiab tag nrho tej hauj lwm uas kuv tau muab rau nej, ua mus ntxiv thiab txhob tsum; thiab cia nej txoj kev rau siab, thiab nej txoj kev nyiaj ntxeem, thiab kev siab ntev, thiab nej tej hauj lwm ua kom ob npaug ntxiv, ces nej yeej yuav tsis poob nej nqi zog li, Ib Tsoom Tub Rog tus Tswv hais li. Thiab yog hais tias lawv tsim txom nej, lawv twb tau tsim txom cov yaj saub thiab tej neeg ncaj ncees uas nyob ua ntej nej. Rau tag nrho tej no twb muaj nqi zog nyob saum ntuj ceeb tsheej.

5 Thiab ntxiv, kuv muab ib lo lus rau nej uas hais txog txoj kev cai raus dej rau nej cov tuag.

6 Muaj tseeb tiag, tus Tswv hais li no rau nej ntsig txog nej cov neeg tuag lawm: Thaum nej leej twg ua kev cai raus dej rau nej cov neeg tuag lawm, yuav tsum muaj ib tug teev ntawv, thiab nws yuav tsum ua tim khawv pom kiag nej tej kev cai raus dej ntawd ntawm qhov muag; nws yuav tsum hnov los ntawm nws ob lub pob ntseg, kom nws yuav ua tim khawv tiag tiag, tus Tswv hais li;

7 Kom tag nrho tej uas nej sau yuav muab sau cia nyob saum ntuj ceeb tsheej; txhua yam uas nej muab khi ua ke nyob hauv ntiaj teb no, yuav muab khi ua ke nyob saum ntuj ceeb tsheej; txhua yam uas nej muab daws nyob hauv ntiaj teb no, yuav muab daws nyob saum ntuj ceeb tsheej;

8 Vim kuv tab tom yuav txum tim ntau yam rov qab los rau hauv lub ntiaj teb, ntsig txog lub pov thawj hwj, Ib Tsoom Tub Rog tus Tswv hais li.

9 Thiab ntxiv, yuav tsum ceev tej ceev xwm txheej kom muaj chaw txawb chaw rau, kom yuav coj tej no mus tso rau qhov chaw cia nyob hauv kuv lub tuam tsev dawb huv, kom muab ceev ua kev nco txog ntawm ib tiam neeg mus rau ib tiam neeg, Ib Tsoom Tub Rog tus Tswv hais li.

10 Kuv yuav hais rau tag nrho haiv neeg ntseeg tias, kuv xav tau, nrog kev xav tau heev, los sawv saum sam thiaj hais lus rau lawv txog lub ntsiab ntawm kev cai raus dej rau cov tuag, rau Hnub Caiv tseem yuav los no. Tiam sis rau qhov kuv tsis muaj hwj chim ua tau li ntawd, tej lub sij hawm kuv yuav sau tus Tswv txoj lus, txog lub ntsiab lus ntawd, thiab muab txoj lus xa tuaj rau nej, thiab lwm yam ntau ntxiv thiab.

11 Nim no kuv xaus kuv tsab ntawv lub sij hawm no, vim xav tau sij hawm ntxiv; vim cov yeeb ncuab twb tos rawv, thiab ib yam li tus Cawm Seej tau hais, tus tub vaj ntxwv ntawm lub ntiaj teb no los lawm, tiam sis tus ntawd tsis muaj hwj chim kav kuv.

12 Saib seb, kuv txoj lus thov Vajtswv yog kom nej sawv daws yuav txais kev cawm dim. Thiab kuv sau npe kuv tus kheej ua nej tus tub qhe rau ntawm tus Tswv, tus yaj saub thiab tus pom tau ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.