1 Cia li mloog, auj nej uas yog cov txwj laug ntawm kuv lub koom txoos, thiab cuab pob ntseg rau tus Vajtswv muaj sia zees nyob lub suab; thiab ua raws li tej lus muaj tswv yim uas yuav muab rau nej, raws li nej tau nug thiab tau pom zoo txog lub koom txoos, thiab tej ntsuj plig uas tau mus thoob plaws lub ntiaj teb.

2 Saib seb, kuv hais tseeb rau nej tias, muaj coob tus ntsuj plig uas yog ntsuj plig cuav, uas tau tawm mus rau hauv lub ntiaj teb, dag ntxias neeg ntiaj teb.

3 Thiab Dab Ntxwg Nyoog kuj tau nrhiav kev dag ntxias nej, kom nws yuav kov yeej nej.

4 Saib seb, kuv, tus uas yog tus Tswv, tau ntsia nej, thiab tau pom tej kev qias hauv lub koom txoos uas ris kuv lub npe.

5 Tiam sis cov uas rau siab ntseeg thiab nyiaj mus yuav tau koob hmoov, txawm yog tseem ciaj los sis tuag lawm, vim lawv yuav tau txoj sia nyob mus ib txhis ua lawv tug.

6 Tiam sis kev txom nyem raug cov uas yog neeg dag ntxias thiab neeg siab dag, vim, tus Tswv tau hais li no, kuv yuav coj lawv los txiav txim.

7 Saib seb, kuv hais tseeb rau nej tias, muaj cov neeg siab dag nyob hauv nej, cov uas tau dag ntxias ib txhia neeg, qhov no twb muab hwj chim rau tus yeeb ncuab, tiam sis saib seb tus Tswv yuav muab cov no coj rov qab los;

8 Tiam sis yeej yuav ntes tau cov neeg siab dag thiab yuav muab lawv txiav tawm, txawm yog thaum lawv tseem ciaj los sis tom qab lawv tuag, twb yuav raws li kuv lub siab nyiam; thiab cov uas muab txiav tawm ntawm kuv lub koom txoos raug txom nyem, vim kev ua li neeg ntiaj teb twb kov yeej lawv.

9 Yog li ntawd, cia txhua tus neeg ceev faj tsam nws ua qhov uas tsis yog raws li qhov tseeb thiab qhov ncaj ncees rau kuv pom.

10 Thiab nim no, tus Tswv hais, los ntawm tus Ntsuj Plig, rau cov txwj laug ntawm nws lub koom txoos hais tias, cia li los, thiab cia peb sib tham ua ke, kom nej yuav to taub;

11 Cia peb sib tham li ib tug neeg sib tham nrog lwm tus tim ntsej tim muag.

12 Nim no, thaum ib tug neeg tham ces neeg yuav to taub nws, vim nws tham li ib tug neeg; twb ib yam li ntawd, kuv, tus uas yog tus Tswv, los yuav sib tham nrog nej kom nej yuav to taub.

13 Yog li ntawd, kuv uas yog tus Tswv nug nej lo lus nug no—cov thawj coj tau tsa nej los ua dab tsi?

14 Mus tshaj tawm kuv txoj moo zoo los ntawm tus Ntsuj Plig, uas yog tus Nplij Siab uas tus Tswv xa los mus qhia qhov tseeb.

15 Thiab tom qab ntawd nej tau txais tej ntsuj plig uas nej tsis muaj peev xwm to taub, thiab nej xav tias nej tau txais tej ntawd los ntawm Vajtswv los; thiab nyob rau qhov no nej tsis muaj txim los?

16 Saib seb nej yuav tsum teb lo lus nug no nej tus kheej; txawm li ntawd los, kuv yuav muaj siab hlub tshua txog nej; tus uas qaug zog nyob hauv nej tom qab no mus yuav ua kom tus ntawd muaj zog.

17 Kuv hais tseeb rau nej tias, tus uas kuv tsa los thiab txib mus tshaj tawm txoj lus tseeb los ntawm tus Nplij Siab, los ntawm tus Ntsuj Plig ntawm kev tseeb, nws puas tshaj tawm txoj lus los ntawm tus Ntsuj Plig ntawm kev tseeb los yog lwm txoj kev?

18 Thiab yog hais tias los ntawm lwm txoj kev los ces txoj kev ntawd tsis yog Vajtswv li.

19 Thiab ntxiv, tus uas txais txoj lus tseeb, nws puas txais los ntawm tus Ntsuj Plig ntawm kev tseeb los yog txais los ntawm lwm txoj kev?

20 Yog hais tias los ntawm lwm txoj kev los ces txoj kev ntawd tsis yog Vajtswv li.

21 Yog li ntawd, vim li cas nej thiaj tsis muaj peev xwm to taub thiab paub, hais tias tus uas txais txoj lus los ntawm tus Ntsuj Plig ntawm kev tseeb ces twb yog nws txais raws li tus Ntsuj Plig ntawm kev tseeb tshaj tawm?

22 Yog li ntawd, tus uas tshaj tawm thiab tus uas txais, ib leeg to taub ib leeg, thiab puav leej txais kev txhawb nqa thiab xyiv fab ua ke.

23 Thiab qhov uas tsis txhawb nqa ces tsis yog Vajtswv li, thiab yog kev tsaus ntuj.

24 Qhov uas yog Vajtswv li yog qhov kaj; thiab tus uas txais qhov kaj, thiab mus ntxiv nrog Vajtswv, yuav txais qhov kaj ntxiv; thiab qhov kaj ntawd yuav ci loj zuj zus mus txog hnub uas zoo tag nrho.

25 Thiab ntxiv, kuv hais tseeb rau nej, thiab kuv hais kom nej yuav paub qhov tseeb, kom nej yuav ntiab kev tsaus ntuj tawm hauv nej mus;

26 Tus uas Vajtswv tsa thiab txib mus, Vajtswv twb tsa tus ntawd ua tus loj kawg nkaus, txawm hais tias nws yog tus me tshaj plaws thiab yog tus tub qhe rau sawv daws.

27 Yog li ntawd, nws yog tus muaj txhua yam; vim nws tswj txhua yam, tag nrho saum ntuj thiab hauv ntiaj teb, txoj sia thiab txoj kev kaj, tus Ntsuj Plig thiab lub hwj chim, uas tau xa mus raws li Leej Txiv lub siab nyiam los ntawm Yexus Khetos, uas yog nws Leej Tub.

28 Tiam sis tsis muaj leej twg yuav muaj txhua yam tsuas yog nws hloov ua neeg huv huv thiab ntxuav tag nrho nws tej kev txhaum mus.

29 Thiab yog hais tias nej hloov ua neeg huv huv thiab ntxuav tag nrho nej tej kev txhaum mus, yog nej thov yam uas nej xav tau los ntawm Yexus lub npe ces yuav muaj li ntawd.

30 Tiam sis cia li paub tias, nej thov dab tsi los yuav muab qhov ntawd rau nej; thiab ib yam li tus Tswv tsa nej los ua cov thawj, cov ntsuj plig yuav ywj rau nej.

31 Yog li ntawd, yuav muaj tias, yog nej pom ib tug ntsuj plig tshwm los uas nej tsis muaj peev xwm to taub, thiab nej tsis txais tus ntsuj plig ntawd, nej yuav tsum nug Leej Txiv los ntawm Yexus lub npe; thiab yog nws tsis tau xa tus ntsuj plig ntawd los rau nej, ces nej yuav paub hais tias nws tsis yog Vajtswv li.

32 Thiab yuav pub hwj chim rau nej kov yeej tus ntsuj plig ntawd; thiab nej yuav tshaj tawm kom tawm tsam tus ntsuj plig ntawd nrog ib lub suab nrov hais tias nws tsis yog Vajtswv li—

33 Txhob siv lus phem mus liam, kom tus ntsuj plig ntawd yuav kov tsis yeej nej, thiab txhob khav txiv los yog xyiv fab, tsam nej mag nws txhom.

34 Tus uas txais los ntawm Vajtswv los, cia nws suav hais tias yog Vajtswv li; thiab cia nws xyiv fab hais tias Vajtswv suav nws tsim nyog los txais.

35 Thiab los ntawm kev mloog lus thiab kev ua tej yam no uas nej tau txais, thiab tej uas nej yuav tau txais tom qab no mus—thiab Leej Txiv twb muab lub nceeg vaj rau nej, thiab lub hwj chim kom kov yeej txhua yam uas tsis yog nws tsa—

36 Thiab saib seb, kuv hais tseeb rau nej tias, nej cov uas ziag no mloog kuv cov lus no uas los ntawm kuv tus tub qhe lub qhov ncauj tau koob hmoov, vim tus Tswv zam txim rau nej tej kev txhaum lawm.

37 Cia kuv tus tub qhe Joseph Wakefield, tus uas ua rau kuv txaus siab, thiab kuv tus tub qhe Parley P. Pratt tawm mus rau tej pawg ntseeg thiab txhawb lawv zog los ntawm txoj lus ntuas;

38 Thiab kuv tus tub qhe John Corrill thiab, los yog npaum li kuv cov tub qhe cov uas tau tsa rau lub luag hauj lwm no, thiab cia lawv ua hauj lwm nyob hauv lub vaj txiv hmab; thiab txhob cia ib tug neeg twg tab kaum lawv thaum lawv ua qhov uas kuv tau txib lawv—

39 Yog li ntawd, nyob ntawm qhov no kuv tus tub qhe Edward Partridge muaj txim; txawm li ntawd los cia nws hloov siab lees txim ces tus Tswv yuav zam txim rau nws.

40 Saib seb, nej yog me nyuam yaus thiab nej ris tsis taus txhua yam lub sij hawm no; nej lub dag zog ntawm sab ntsuj plig thiab txoj kev paub qhov tseeb yuav tsum loj tuaj.

41 Tsis txhob ntshai, cov me nyuam yaus, vim nej yog kuv cov, thiab kuv twb kov yeej lub ntiaj teb lawm, thiab nej twb yog cov uas kuv Txiv tau muab pub kuv lawm;

42 Thiab tsis muaj ib tug ntawm cov uas kuv Txiv tau muab pub kuv lawm yuav poob.

43 Thiab Leej Txiv thiab kuv wb yog ib tug. Kuv nrog Leej Txiv thiab Leej Txiv nrog kuv; thiab rau qhov nej tau txais yuav kuv, nej twb nrog kuv thiab kuv twb nrog nej.

44 Yog li ntawd, kuv nyob nrog nraim nej, thiab kuv yog tus tswv yug yaj zoo, thiab yog lub pob zeb ntawm Ixayees. Tus uas cog rau saum lub pob zeb no yuav tsis vau ib zaug li.

45 Thiab hnub ntawd yuav los kom nej yuav hnov kuv lub suab thiab pom kuv, thiab paub hais tias kuv yog lawm.

46 Yog li ntawd, saib xyuas, kom nej yuav npaj txhij. Twb yog li ntawd. Amees.