Tshooj 62
Kev tshwm sim uas tus Yaj Saub Joseph Smith tau txais, nyob ntawm ntug Dej Missouri hauv Chariton, Missouri, lub Yim Hli Ntuj hnub tim 13, xyoo 1831. Nyob rau hnub no tus Yaj Saub thiab nws pab neeg, cov uas tab tom mus ntawm Independence lawm tim Kirtland, tau ntsib ob peb tug txwj laug uas tab tom mus lawm tim thaj av Xi-oos, thiab, tom qab tau sib hu xyiv fab hlo, nws tau txais txoj kev tshwm sim no.
1–3, Tus Tswv sau tej lus tim khawv ceev cia saum ntuj ceeb tsheej; 4–9, Cov txwj laug yuav tsum mus thiab tshaj tawm txoj moo raws li pom tias zoo thiab raws li tus Ntsuj Plig coj kev.
1 Saib seb, thiab mloog, auj nej cov uas yog txwj laug ntawm kuv lub koom txoos, tus Tswv nej tus Vajtswv hais li, tus uas twb yog Yexus Khetos, tus sawv cev uas daws nej zaj, tus uas paub neeg txoj kev qaug zog thiab paub pab lawv cov uas raug ntxias.
2 Thiab kuv qhov muag yeej ntsia ntsoov cov uas tseem tsis tau mus rau pem thaj av Xi-oos; yog li ntawd nej ntiag tug hauj lwm tseem tsis tau tiav.
3 Txawm li ntawd los, nej tau koob hmoov, vim zaj lus tim khawv uas nej tau hais twb muab ceev cia saum ntuj ceeb tsheej rau cov tim tswv nyeem; thiab lawv xyiv fab rau nej, thiab tus Tswv zam txim rau nej tej kev txhaum lawm.
4 Thiab nim no nej cia li mus ntxiv. Txoos nej tus kheej rau hauv thaj av Xi-oos; thiab tsa ib txoj kev sib ntsib thiab xyiv fab ua ke, thiab ua lub cim nco txog rau tus Siab Tshaj Plaws.
5 Ces tom qab ntawd nej mam rov qab mus ua pov thawj txog, muaj tseeb tiag, ua ua ke, los sis ob leeg ua ib khub, raws li nej pom zoo, nws tsis ua li cas rau kuv; tsuas yog rau siab ntseeg, thiab tshaj tawm tej moo zoo siab rau cov neeg hauv ntiaj teb no, los sis rau tej pawg neeg phem.
6 Saib seb, kuv, tus uas yog tus Tswv, tau coj nej los ua ke xwv kom yuav muaj raws li txoj kev cog lus no, kom yuav muab cov uas rau siab ntseeg nyob hauv nej tshwj tseg thiab xyiv fab ua ke nyob hauv thaj av Missouri. Kuv, tus uas yog tus Tswv, cog lus rau cov rau siab ntseeg thiab kuv dag tsis tau.
7 Kuv, tus uas yog tus Tswv, yeej txaus siab, yog muaj leej twg hauv nej xav caij nees, los yog caij zag, los sis caij tsheb nees luag, nws yuav txais txoj koob hmoov no, yog hais tias nws txais los ntawm tus Tswv txhais tes, nrog lub siab ua tsaug rau txhua yam.
8 Tej yam no nyob ntawm nej saib yuav xav ua zoo li cas thiab ntawm tus Ntsuj Plig tej lus coj kev.
9 Saib seb, lub nceeg vaj yog nej li. Thiab saib seb, thiab xyuas seb, kuv yeej nrog nraim cov uas rau siab ntseeg. Twb yog li ntawd. Amees.