1 Tej rooj ntug tau qhib rau peb, thiab kuv tau pom Vajtswv lub nceeg vaj xilethi-aus, thiab lub nceeg vaj ntawd lub yeeb koob, kuv tsis paub tias puas yog nyob hauv lub cev los yog nyob nraum lub cev.

2 Kuv tau pom lub rooj vag zoo nkauj tshaj plaws uas cov neeg uas txais lub nceeg vaj ntawd ua lawv tug yuav nkag mus haud, uas zoo li tej nplaim hluav taws vij vog;

3 Thiab pom Vajtswv lub rooj theej kiab ci ntsa iab, lub rooj uas Leej Txiv thiab Leej Tub zaum.

4 Kuv pom tej kev zoo nkauj ntawm lub nceeg vaj ntawd, uas pom zoo li xuas kub puab.

5 Kuv pom Txiv Adas thiab Anplaham; thiab kuv txiv thiab kuv niam; kuv tus tij laug Alvin, uas tau tuag ntev lawm;

6 Thiab xav tsis thoob txog qhov uas nws tau txais lub nceeg vaj ntawd ua nws qub txeeg qub teg, vim hais tias nws twb tau ncaim lub neej no ua ntej tus Tswv cev nws txhais tes los muab Ixayees sau los ua ke zaum ob, thiab twb tsis tau ua kev cai raus dej rau txoj kev zam txim rau tej kev txhaum.

7 Tus Tswv lub suab los rau kuv li no, hais tias: Tag nrho cov uas tau tuag es tsis tau paub txog txoj moo zoo no, cov uas yeej yuav txais txoj moo zoo yog hais tias tau cia lawv muaj sia nyob, cov ntawd yuav tau Vajtswv lub nceeg vaj xilethi-aus los ua lawv tug;

8 Thiab tag nrho cov uas tuag txij no mus es tsis tau paub txog txoj moo zoo, cov uas yeej yuav xav txais txoj moo zoo nrog tag nrho lawv lub siab, lawv yuav yog cov uas tau lub nceeg vaj ntawd ua lawv tug;

9 Vim kuv, tus uas yog tus Tswv, yuav txiav txim rau neeg sawv daws raws li tej yam lawv ua, raws li tej kev xav tau ntawm lawv lub siab.

10 Thiab kuv kuj tau pom hais tias tus Tswv cawm tag nrho cov me nyuam uas tuag ua ntej lawv muaj hnub nyoog paub tab dim nyob hauv lub nceeg vaj xilethi-aus saum ntuj ceeb tsheej.