Tshooj 99
Kev tshwm sim uas tus Yaj Saub Joseph Smith tau txais kom qhia John Murdock, lub Yim Hli Ntuj hnub tim 29, xyoo 1832, nyob hauv Hiram, Ohio. Tau ib xyoos tawm, John Murdock tau qhia txoj moo zoo thaum nws cov me nyuam—uas tsis muaj niam tom qab nws tus poj niam, Julia Clapp, tuag thaum lub Plaub Hlis Ntuj xyoo 1831—nyob nrog lwm tsev neeg nyob hauv Ohio.
1–8, Tus Tswv hu John Murdock mus tshaj tawm txoj moo zoo, thiab cov uas txais yuav nws ces yog txais yuav tus Tswv thiab yuav tau kev hlub tshua.
1 Saib seb, tus Tswv hais li no rau kuv tus tub qhe John Murdock tias—tus Tswv hu koj mus rau tim tej teb chaws sab hnub tuaj mus ntawm ib lub tsev rau ib lub tsev, mus ntawm ib lub zos rau ib lub zos, thiab mus ntawm ib lub nroog rau ib lub nroog, mus tshaj tawm kuv txoj moo zoo uas kav ib txhis rau cov neeg nyob tid, thaum raug tej kev tsim txom thiab kev phem.
2 Thiab cov uas txais yuav koj txais yuav kuv; thiab koj yuav muaj hwj chim tshaj tawm kuv txoj lus nrog kuv tus Ntsuj Plig Dawb Huv txoj kev qhia paub.
3 Thiab cov uas txais yuav koj zoo li ib tug me nyuam yaus, txais kuv lub nceeg vaj; thiab lawv tau koob hmoov, vim lawv yuav tau kev hlub tshua.
4 Thiab yog leej twg xyeej koj ces kuv Txiv thiab nws tsev neeg yuav xyeej nws; thiab koj yuav tsum ntxuav ko taw nyob hauv tej chaw tsis muaj neeg paub tom tej kev los ua pov thawj tawm tsam lawv.
5 Thiab saib seb, thiab xyuas seb, kuv yuav los txiav txim sai sai no, los qhia txhua tus txog lawv tej hauj lwm phem uas lawv tau ua tawm tsam kuv, ib yam li tau sau txog kuv nyob hauv phau ntawv.
6 Thiab nim no, kuv hais tseeb rau koj tias, tsis tsim nyog koj yuav mus kom txog thaum npaj tau rau koj cov me nyuam tso, thiab ua zoo xa lawv mus rau tus npisov ntawm Xi-oos.
7 Thiab tom qab ob peb xyoos, yog koj thov kuv, koj mam mus lawm pem thaj av zoo, mus txais koj qub txeeg qub teg;
8 Tsis li ces koj cia li tshaj tawm kuv txoj moo zoo mus ntxiv kom txog thaum koj raug coj mus. Amees.