Tshooj 96
Kev tshwm sim uas tus Yaj Saub Joseph Smith tau txais, uas qhia txoj kev tsa lub nroog los yog ceg txheem ntseeg ntawm Xi-oos nyob hauv Kirtland, Ohio, lub Rau Hli Ntuj hnub tim 4, xyoo 1833, muab los ua yam ntxwv rau Haiv Neeg Ntseeg nyob hauv Kirtland. Lub caij nyoog yog thaum cov pov thawj hlob muaj ib lub rooj sab laj, thiab yam tseem ceeb tshaj uas muab los sib tham yog txoj kev faib tej thaj av, uas lawv hu ua French thaj teb, uas yog lub Koom Txoos tug nyob ze ntawm Kirtland. Vim tias cov neeg hauv lub rooj sab laj txiav txim siab tsis tau hais tias yuav kom tus twg saib xyuas thaj teb, sawv daws pom zoo cia nug tus Tswv ntsig txog qhov ntawd.
1, Yuav tsum ua kom Kirtland Ceg Txheem Ntseeg ntawm Xi-oos muaj zog; 2–5, Tus npisov yuav tsum faib tej qub txeeg qub teg rau Haiv Neeg Ntseeg; 6–9, John Johnson yuav tsum los ua ib tug mej zeej rau lub koom haum koom siab.
1 Saib seb, kuv hais rau nej tias, qhov no yog laj lim tswv yim, es nej thiaj yuav paub ua li cas ntsig txog qhov no, vim kuv xav tias tsim nyog kom ceg txheem ntseeg no uas kuv tau tsa los ua Xi-oos lub zog los yuav tsum ua rau ceg txheem ntseeg no muaj zog.
2 Yog li ntawd, cia kuv tus tub qhe Newel K. Whitney ua tus thawj saib xyuas qhov chaw uas nej tau hais txog, qhov uas kuv tau npaj los ua kuv lub tsev dawb huv.
3 Thiab ntxiv, muab thaj teb faib ua tej kem av, raws li laj lim tswv yim, kom pab tau cov uas nrhiav qub txeeg qub teg, raws li kev txiav txim siab nyob hauv nej pawg sab laj.
4 Yog li ntawd, xyuas kom nej yuav ua txoj hauj lwm no, thiab feem ntawm qhov uas yuav tsum ua los pab kuv lub koom haum; rau lub hom phiaj coj kuv txoj lus tawm mus rau noob neej.
5 Vim saib seb, kuv hais tseeb rau nej tias, qhov no yog qhov tsim nyog tshaj rau kuv, kom kuv txoj lus yuav mus rau noob neej, rau lub hom phiaj ua rau noob neej lub siab mos muag kom zoo rau nej. Twb yog li ntawd. Amees.
6 Thiab ntxiv, kuv hais tseeb rau nej tias, yog tswv yim thiab tsim nyog rau kuv, kom kuv tus tub qhe John Johnson tus uas kuv tau txais nws txoj kev tiam, thiab kuv tau hnov nws tej lus thov Vajtswv, tus uas kuv tau muab ib txoj kev cog lus uas yuav tau txoj sia nyob mus ib txhis rau npaum li uas nws yuav ua raws li kuv tej lus txib txij no mus—
7 Vim nws yog ib tug xeeb ntxwv ntawm Yauxej thiab yog ib tug tau tej koob hmoov ntawm txoj kev cog lus uas tau cog rau nws cov yawg koob—
8 Kuv hais tseeb rau nej tias, kuv xav tias tsim nyog kom nws yuav los ua ib tug mej zeej rau lub koom haum, kom nws yuav pab coj kuv txoj lus mus rau noob neej.
9 Yog li ntawd nej yuav tsum muab nws tsa rau txoj koob hmoov no, thiab nws yuav tsum mob siab nrhiav kev tshem tej nuj nqis uas muab tsub rau lub tsev nej tau hais txog, kom nws yuav tau nyob haud. Twb yog li ntawd. Amees.